ئەڤرۆ نیوز:
راھێنەرێ ھەلبژارتیێ عیراقێ یێ بەری نوکە حەکیم شاکر د بەرنامەیێ نیڤا سێ ل سەر کەنالێ شەرقیە یێ عیراقی دیارکر ئەو دێ سکالایەکێ ل سەر ئێکەتیا تەپا پێ یا عیراقی تومارکەت ژبەرکو ھەتانوکە مافێ وی ب دروستی نەدایێ یێ ھەڤبەستا وی ل گەل ھەلبژارتیێ عیراقێ .
ناڤبری زێدەتر دیارکر ئەوی ھەڤبەست ل گەل ئێکەتیا تەپا پێ یا عیراقی  ل سەر کوژمێ ٤٥٠ ملیون دیناران ئیمزاکر بوو، وەکو راھێنەرێ ئێکێ ھەلبژارتیێ عیراقێ و پشتی قارەمانیا کەنداڤی ل سالا بوری ب دووماھی ھاتی ئەو ژ پوستێ وی ھاتیە دورخستن بتنێ کوژمێ ٢٣٠ ملیون دیناران ژ ھەڤبەستا خوە وەگرت بوو، ئێکەتیا تەپا پێ بۆ دیارکر بوو ئەو دێ پاش کوژمێ دی ل ماوەکێ دی دەنێ لێ ھەتانوکە چو دیار نینە .
ھەردیسان ناڤبری دیارکر ماڤێ وی یە دیڤچوونا مافێ خوە بکەت و ھەکە ل ماوێ بھێت ئەو کوژمێ ٢٢٠ ملیون دیناران نەدەنێ ئەو دێ سکالایەکێ ل سەر ئێکەتیا تەپا پێ یا عیراقی تومارکەت .

ئەڤرۆ نیوز، ھەژار :
یانا بایرن میونیخ ھەلگرا ناسناڤێ خۆلا بوندس لیگ یا ئەلمانی سوپرایزەک بۆ جەماوەر و حەژێکەرێن تیما خوە دروستکر ئەوژی ب نووکرنا ھەڤبەستا چار ستێرێن تیمێ کو ژ ئەوانا مولەر کو ئارمانجا مانچستەر یوناید بوو .
یانا بافاری ھەڤبەستا ھەر ئێک ژ توماس مولەر یێ ئەلمانی ھەتا سالا ٢٠٢١ نووکر کو وەسا ھاتە چاڤەرێکرن ئەڤ یاریکەرە دێ ل سالا بھێت ھەڤبەستا یانا مان یوناید ئیمزاکەت و ھەردو یاریکەران خافی مارتینێز یێ ئیسپانی ل گەل بواتینگ ھەتا سالا ٢٠٢١ ھەڤبەستێن خوە نووکرن و چاڤی ئەلونسۆ وی ژی ھەڤبەستا خوە ھەتا سالا ٢٠١٧ ل گەل یانا بایرن میونیخ نووکر.

ئەڤرۆ نیوز،ھەژار مەعروف:
رێڤەبەرێ یاریکەرێ لیبی محەمەد عەبدولسلام قەباسی دیارکر یاریکەر ل سەر ھەمی خالێن ھەڤبەستێ رێککەفت بوون بۆ ئیمزاکرنا ھەڤبەستا یانا سیناعە دخۆلا عیراقێ دا لێ ژبەر نە گەھشتا پلێتا وی یا نیڤدەولی یاریکەر نەشیا پەیوەندی ب یانا عیراقێ بکەت .
زێدەتر عەبدولحەفیز عەقوری رێڤەبەرێ یاریکەران ل لیبیا دیارکر ئەو گەھشتی یە رێکەفتنێ ل گەل رێڤەبەرێ تیما زاخۆ یا خۆلا عیراقی تەھا زاخۆی یاریکەر قەباسی پەیوەندی ب یانا زاخۆ یا پشکدار دخولا کوردستانێ دا بکەت ژبەرکو خۆلا کوردستانێ پێدڤی پلێتا نیڤدەولی نینە .

ھەژی گوتنێ یە یاریکەری محەمەد عەبدولسلام یاری ل یانێن ئەھلی بنغازی و ھیلال یێن لیبی کری یە و ل وەرزێ بوری یاری ل یانا سور یا عومانی کر ل سەر ئاستێ نیڤدەولی یاری ل گەل ھەلبژارتیێن پێگەھشتیان و لاوان و ئولومپی و ھەلبژارتیێ ئێکێ لیبیا یاری کری یە ل گەل ھەلبژارتیێ لیبیا یێ نافخوی شیابوو ناسناڤێ قارەمانیا ئەفریقیا ب دەستخوڤە بینت ل سالا بوری .

ئەڤرۆ نیوز:
ھەردو یانێن جەویە و شورتە د یاریێن خوە یێن ئەڤرۆ ژ گەرا دوێ ژ قوناغا دوێ یا خۆلا عیراقێ شیان سەرکەفتنێ توماربکەن کو تیما جەویە ب سەرکەفت ل سەر یانا ئەمانە بەغداد ب سێ گولان بەرامبەر گولەکێ ب ڤی ئەنجامێ یانا جەویە خالێن خوە گەھاندنە ١٩ خالان ژ رێزا پێنجێ پێشڤە ھاتە رێزا دوێ ب ١٩ خالان و کێمتر یاریەکێ.
ژلایەکێ دووڤە تیما شورتە بەردەوامی دا ئەنجامێن خوە یێن باش ب سەرپەرشتیا راھێنەرێ خوە یێ نووی ئەڤ جارە ژی شیا سەرکەفتنێ ل سەر یانا سیناعە توماربکەت ب ب دو گولان بەرامبەر بێ بەرامبەر و یانا شورتە خالێن خوە گەھاندنە ١٤ خالان پێشڤە ھاتە رێزا شەشێ .
پشتی گەرا دوێ ب دووماھی ھاتین ھەلویستێ کوما دوێ ب ڤی رەنگی یە
مینا ٢٠ خال
جەویە ١٩ خال
نەجەف ١٩ خال
ھەولێر ١٧ خال
زاخۆ ١٧ خال
شورتە ١٤ خال
بەغداد ١٤ خال
کەربەلا ١١ خال
حدود ١٠ خال
سیناعە ٤ خال

ئەڤرۆ نیوز:

پشتی یانا چێلسی بریارا دورخستنا راھێنەرێ خوە مورینھوی دای، چەندین پوست ل سەر مالپەرێن کومەلایەتی ھاتنە بەلاڤەکرن کو چەندین راھێنەر و وەرزشڤان ل ئورۆپا کەیفخوش بوون ب دورخستنا مورینھوی و شکەستنا وی ل گەل یانا لەندەنی.
ئەو پوست رامانا وێ چەندێ د گەھینن کو راھێنەرێ پرتوگالی مورینھوی کەس بخوە نەکر بوو مال ھەردەم  ل یاریگەھێ و پشتی یاریان ب داخویانیێن دژوار بەرسڤا ھژمارەکا راھێنەر و یاریکەران دا.