ئەڤرۆ نیوز:
شارەزایەکێ لەشکەری دیارکر دکەت کەسێ دبیت پۆلیس یان ل جھێن لەشەری دھێتە دامەزراندن دڤێت ل دووڤ چەندین پرەنسیپێن جیھانی دبیت و ل کوردستانێ 80% ناھێتە بجھئینان و گۆت: وەک پولیسێن کوردستانێ ھەتا نوکە ئەڤ رێنمایێن جیھانی جێبەجێ نەکرینە، لێ 60% روویێ لەشکەری دھێتە جێبەجێکرن و ب تایبەت وەرگرتنا قوتابیان ل ئەکادیمیا سەربازی، دیسان کۆلیژا پولیسان 60% دھێتە بجھئینان، لێ بۆ وەرگرتنا پۆلیسێن ئاسایی 20% دھێتە بجھئینان.
عەقید روکن مەسعود سالح، شارەزا د بیاڤێ سەربازی مامۆستایێ کولیژا لەشکەری ل زاخۆ بۆ رۆژناما ئەڤرۆ دیار کر، لەشکەر و پۆلیس ل سەر چەند رێنمایێن جیھانی دھێتە دروستکرن، خالا سەرەکی دڤێت ژیێ وی دناڤبەرا 18 سالیێ و د سەردا ھەتا 24 سالیێ بیت، چونکو د ڤی ژی دا دێ پتر شیانێن وەرگرتنا لەشی ھەبن و دێ ژیانا وی ژ مەدەنی بۆ سەربازی ھێتە گوھۆرین، دیسا دڤێت یێ ساخلەم بیت ژ ھەموو نەخۆشیان و دڤێت پشکنینێن ساخلەمێی بۆ بھێنەکرن.
ناڤبری زێدەتر گۆت: ئەڤە ژ دەست و پێَن وی راست بن و پێشتر ژ نشتەگەری نەکربن و دیسان نەیێ پەککەفتی بیت وەک یێ ب چاڤەکی بیت یان تبلەکا وی یا ژێڤەکر بیت، گوە نەیێ گران بیت، خالا ل دووڤ دا دڤێت بلنداھی و بەژنا وی ژ 170 سم کێمتر نەبیت، چونکو بەژنا بلند د پێگەھێ سەربازی دا ھەیبەتا خوە ھەیە و دھێت پێش، دڤێت سنگێ وی یێ پان بیت و نابیت زراڤ بیت، سەنگا وی ل دووڤ بلنداھی وی یە و نابیت ژ 75 کیلۆیان زێدەتر بیت، خالا ل دووڤ دڤێت باوەرناما وی ژ شەشێ ئامادەیی کێمتر نەبیت، چونکو ئاستێ وی یێ خواندنێ یێ بلند بیت و یا باشتر ئەوە کولیژەک خواندبیت دا بشێت پتر بیت و ئەو ئەزموون و زانستێ سەربازی چو پۆلیسی دا بیتە زێدەکرن ل سەر وی و دا ھەموو کاران بگەھیت و بشێت زانستێ سەربازی ل سەر زانستێ مەدەنی زێدەبکەت و بێخیتە د خزمەتا وەلاتیان دا.
عەقید مەسعود سالح ئەو ژی گۆت: سەرەرایی ڤان مەرجێن جیھانی کو بۆ ھەر کەسەکێ دھێنە دان بۆ پولیس و سەربازی دڤێت پشکداری ئەزموونەکێ بیت و دڤێت تێدا ب سەر کەڤیت و شیانێن وی تێدا بھێنە دیارکرن ژ ھەموو ئالیان ڤە، کا ئەڤ کەسە دێ یێ بەرھەڤ بیت بۆ سەربازی و لەشکەری یان نە، دیسان دڤێت رابوردویێ وی کەسی بۆ سەربازی خوە بەرھەڤ دکەت یێ باش بیت و چو تاوان نەکربن، یان دژی قانوونێ راوەستیا بیت، خالا ژ ھەموویا گرنگتر دڤێت نشتیمان پەروەر بیت و ب خاکا خوە ڤەگرێدایی بیت و ب ئالا خوە ڤە گرێدایی بیت و پێزانینێن نشتیمانی ل سەر گەل و وەلاتێ خوە و سەرکردە و قارەمانێن وەلاتێ خوە ھەبن.
ئاماژە دا وێ چەندێ ژی، ئەڤە ئەرکەکێ نشتیمانی یە کو پێشکێشی وەلاتێ خوە دکەت و ئەڤ خالە بۆ وێ مەرەمێ نە دا ئارمانجا وی نەبیتە مۆچە و پارە، بەلکو دا ئارمانجا وی بیتە خزمەت و ئەڤە خالێن سەرەکی نە و ل دووڤ ستاندارێن جیھانی بۆ ھەر کەسەکێ دبیتە سەرباز یان پۆلیس، ئەڤە ھەموو ژ لایێ لیژنەکێ پێک دھێت وەک پێکھاتینە ژ نوشدارەکێ بسپۆر، دیسان شارەزایەکێ لەشکەری، شارەزایەکێ دەروونی کو چو نەخۆشیێن دەروونی نەبن و دیسان ئەو کەس نەیێ تۆرەبیت، چونکو ل پاشەرۆژێ دێ پەیوەندی ل گەل خەلکی ھەبن، چونکە دەمێ سەنگاندنا وان کەسان بھێتەکرن دا ب دورستی بھێنە ھەلسەنگاندن.
ھەمان شارەزایێ لەشکەری گۆت: ئەڤە بۆ سەربازی و پۆلیسی دھێتە بکارئینان و پشتی مەشقکرنێ ل دووڤ دا دھێتە ڤاڤارتن کا بۆ چو بیاڤە.
عەقید مەسعود سالح گۆت: وەک پولیسێن کوردستانێ ھەتا نوکە ئەڤ رێنمایێن جیھانی جێ بەجێنەکرینە، لێ 60% روویێ لەشکەری دھێتە جێبەجێکرن و ب تایبەت وەرگرتنا قوتابیان ل ئەکادیمیا سەربازی، دیسان کۆلیژا پولیسان 60% دھێتە بجھئینان، لێ بۆ وەرگرتنا پۆلیسێن ئاسایی 20% دھێتە بجھئینان.
عەقید مەسعود سالح گۆت ژی: ل دووڤ ستاندارێن جیھانی دەمێ کەسەک بۆ سەربازی یان لەشکەری دھێتە وەرگرتن و دچیتە سەر کارێ خوە، ھندەک خۆل ھەنە و دێ پشکداربیت و ئەڤە دا پاراستنێ ل سەر زانیاری شیانێن خوە بکەت، پێدڤی یە پۆلیس دەمژمێر حەفت بھێتە دەوامێ دەمژمێرەکێ مەشقێ بکەت و ل دووڤ دا دەواما خوە بکەت و ئەو دەمژمێر دێ پاراستنێ ل سەر سەنگا وی کەت و دیسا دێ بۆ بیتە پالدەرەک یێ رژد بیت دکارێ خوە دا و ئەڤە ھەموو جیھانێ یە، کوردستانێ ئەڤە نینە و پۆلیس گەلەک قەلەو دبیت و ئەڤە د قانوونا سەربازی دا ھەر کەسەک ژ سەنگا خوە یا دیارکری کو ل گەل بلنداھی یا وی دھێتە دیارکرن دەرکەفت، دڤێت ب زووترین دەم ببۆ خانەنشینیێ بھێتە رەوانەکرن، چونکو مفا ژێ ناھێتە وەرگرتن.
مەسعود سالح ل دووماھیێ گۆت ژی: پێدڤیە ئەڤ پۆلیسێن قەلەو نوکە ھەموو پشکداری خۆلان بن دا زەعیف بن.

ئەڤرۆ نیوز:
پارێزەرەکێ دادگەھا زاخۆ راگەھاند، کو ژنەک یا نەرازی بوو ب رزقێ خوە بوو ئەگەر زەلامێ وێ ژنەکا دی ل سەر وێ بینیت، چونکی وی دو زارۆ ھەبوون ژ ھەڤژینا خوە یا ئێکێ ئەوا مری و وێ دو زارۆ ھەبوون، یا بەرھەڤ نەبوو نەڤسیێن خوە خودان بکەت، زەلامی ژی بەردا و ژنا سیێ ئینا، ژ نوو یا دویێ خواست زەلامێ وێ بزڤرینیت وی ژی زڤراندەڤە.
پارێزەر ھەژار محەمەد یوسف ل دادگەھا زاخۆ بۆ ئەڤرۆ دیار کر کو زەلامەکی ھەڤژینا وی یا ئێکێ چوو بەر رەحما خودێ و دو زارۆ ھەبوون و گۆت “بابێ وان چوو بۆ خوە ژنەکا دی ئینا و خودێ دو زارۆ وێ ژی دانێ، لێ ئەڤ ژنە رازی نەبوو ھەردو زارۆیێن دی خودان بکەت و چوو دادگەھێ، د قانوونا بارێ کەسایەتی دا د مادێ (26) دا ھاتیە ھەکە زارۆیێن زەلامی ژیێ وان ببیتە حەفت سال و دەیکا وان نەمابیت نەمەرجە ل سەر ژنکا دویێ وان زارۆیان خودان بکەت و ژنکێ مفا ژ ڤی مادەی کر”.
پارێزەرێ ناڤبری گۆت “ب بوچوونا من ئەڤ مادە گەلەک یێ شاشە و دبیتە ئاریشە بۆ زەلامی و ژنکێ، چونکو بەری زەلام ژنێ ل دادگەھێ مارە بکەت دڤێت دادوەر بێژیتێ ئەڤی کەسی دو زارۆ ھەنە دێ خودان کەی یان نە؟ و دەمێ گۆتبا بەلێ دێ خودان کەم نەدشیا پشتی چەند سالا بێژیتە زەلامی خودان ناکەم، ھەکە گۆتبا نەخێر ژی ھینگێ دبیت زەلامی مار نەکربا و نەڤیابا، ئەڤجا ئەڤی مادەی ماف دا ژنێ بچیتە دادگەھێ، لەورا دادوەری گۆتێ دڤێت تو مالەکا دی بۆ ڤێ ژنێ ب دانی”.
پارێزەر ھەژار محەمەد گۆت “ئەڤ مادێ قانوونی بۆ ئەگەر ئەڤ زەلامە ژنا خوە بەردەت، زارۆیێن وێ ژی ل گەل بن ل مالا بابێ وێ و زەلام مەزاختنا زارۆیێن خوە بکەت. لەورا زەلامی ژنەکا دی ئینا، ماوەک پێڤە چوو ژنا دویێ ئەڤا بەردایی داخوازیەک ل دادگەھێ تۆمار کر کو زەلام بھێت ھەردو زارۆیێن خوە بەت و ئەو ب خودان کەت، زەلام ژی رابوو زارۆیێن خوە زڤراندنەڤە، ماوەکێ گەلەک درێژ پێڤە چوو ژنکا دویێ گۆتە زەلامی من دڤێت تو من بزڤرینیەڤە زەلامی ژی زڤراندەڤە، نوکە زەلام یێ بوویە خودانێ دو ژنا و ھەر چار زارۆیێن وێ ژی ل نک وانن، خانیەکێ دو قات ھەیە ژنەک ل سەری دانایە یا دی ل خوارێ”.
ل دووماھیێ پارێزەری دیار کر کو ژنا دویێ بۆ ئەگەر ژنەکا دی ل سەر وێ بھێت، چونکی ب رزقێ خوە رازی نەبوو، ل ڤێرە ھەلویستێ زەلامی یێ دروست بوو و غەدرە ژی ل ھەردو ھەڤژینێن خوە نەکر”.