كارتێكرنا قه‌له‌ويێ ل سه‌ر دوگيانى و عاده‌يا هه‌يڤانه‌ يا ژنان

14/12/2015 13:01

750

ئه‌ڤرۆ نيوز:

قەلەویا زێدە دبیتە ئەگەرێ نەرێکخستنا ھورمونێن ژنان و تەنگەزاریێن عادەیا ھەیڤانە ل دەڤ پەیدادبن و و دبیتە ئەگەرێ کێمکرنا شیانێن دوگیانیێ و زێدەکرنا مەترسیێن ژبەرچوونێ ژبەر ژنێ.
ژیێ ژنێ ژی ئەگەرەکێ دیترێ ژبەرچوونێ یە و ھەکە ھێکێن ژنێ ژی ھاتنە گوھۆرین و ژیێ وێ مەزن بوو دێ مەترسی ل سەر کروموسومان زێدە بن و ئەڤە دێ بیتە ئەگەر کو کو رێژەیا ژبەرچوونێ ژی زێدەببیت و دپتریا دەمان دا پشتی ژیێ 35 سالیێ ژبەرچوونا زارۆیان پەیدادبیت و ھندی ژن مەزنتر لێ بھێت، ھەلبەت رێژا ژبەرچوونێ ژی دێ پتر لێ دھێت و دژیێ 45 سالیێ دا گەلەک مشە دبیت، ژبەرکو ھەکە ھێلدانکێن ژنێ مەزن بوون شیانێن دابەشبوونێ ھەنە و ھەکە کروموسوم دابەش بوون ب شێوەیەکێ دروست ب کارێ خوە رانابن. لەورا بۆ پێدانا چارەسەریەکا گونجای پێدڤیە پشکنینێن تایبەت بۆ ژنێ بھێنە کرن و ل دووڤ ئەنجامێن وان چارەسەری بۆ بھێتە کرن.

ھەرێم دشێت ھەتا 100 سالێن بھێت غازێ بو تورکیا دابین بکەت

14/12/2015 12:45

139

ئەڤرۆ نيوز:
بسپورەکێ غازا سروشتی راگەھاند: ھەرێما کوردستانێ دشێت تا 100 سالێن بھێت غازا سروشتی بۆ تورکیا دابین بکەت و زێدەباری ھەبوونا یەدەکێ زورا غازا ھەرێمێ و جورێ وێ ژی باشە.
د.محەمەد حەسیب بسپور دبیاڤێ غازا سروشتی ل زانکۆیا کۆیە راگەھاندیە عیراق خودانا یەدەکەکێ مەزنێ غازا سروشی یە کو ب وەلاتێ یازدێ ل جیھانێ دھێتەدانان و پشکەکا زورا ئەوی یەدەکی ل ھەرێما کوردستانێ یە .
محەمەد حەسیب ئەو چەندە ژی دیارکر لگۆری ئامارێن وەزارەتا سامانێن سروشتی ھەرێم رێژا 200 ترلیۆن پێ سێجا غازا سروشتی ھەیە و تورکیا ژی بازارەکێ باش دبیت بۆ غازا سروشتی یا ھەرێما کوردستانێ تا سالا 2020 داخازی ل سەر غازا سروشتی ژلایێ تورکیا بۆ ترلیۆنەک و 900 ملیار پێ سێجا بلند بیت، ئەگەر ھەرێم ژی خودانا 200 ترلیۆن پێ سێجا یەدەکێ غازا سروشتی بیت، ئەڤە دشێت بۆ 100 سال غازا سروشتی بو تورکیا دابین بکەت.
ناڤبری ئەو چەندە ژی دیارکر ھندەک ژێدەرێن دی ھەنە ھەرێم دشێت تا 300 سالان دابینکەرێ غازا سروشتی بیت بو تورکیا.
بسپورێ ناڤبری ئەو چەندە ژی دیارکر نھا ناڤبەرا تورکیا و روسیا ئالوزی درۆست بوویە و تورکیا نھا ھزر ل جھگرێ غازا روسی دگەریت و ھەرێم ژی ئەو یەدەکێ زورێ ھەی و ژ روویێ پێگەھێ جوگرافیی ڤە نێزیکە ژ تورکیا، دشێن پشت گرێدای بیت بۆ دابینکرنا غازا تورکیا .

بزانە چەند ژی ١٠٠% ژ جەماوەرێ بەرشەلۆنا رۆنالدوی دخوازن

14/12/2015 12:34

573

ئەڤرۆ نیوز:
رۆژناما سپورت یا ئیسپانی ئامارەیەک دروستکر بوو چەند ژی جەماوەرێن یانا بەرشەلۆنا حەزا ئینانا ستێرا یانا ریال مەدرید و ھەلبژارتیێ پرتوگال ھەیە ھەر چەندە بەری وێ دەنگ دانێ یاریکەرێ یانا ریال مەدرید کریستیانو رۆنالدو دیارکر بوو ئەو نە یێ بەرھەڤە رۆژەکێ یاریێ ل ڤێ یانێ بکەت .
ل دەنگدانا وێ رۆژنامێ دا ئەوا ٧٦٦٢ کەسان ب رێیا ئەنترنێتی پشکداری تێدا کری کو ب رێژەیا ٨٨% ژ حەشێکەرێن یانا بەرشەلۆنا ناخوازن ئەڤ یاریکەرە ل یانا بەرشا یاریێ بکەت بەرامبەر ١٢% دخوازن رونالدو یاریێ ل یانا ئەوان بکەت.
بەری ڤێ ئامارێ رونالدوی د دیدارەکا خوە دا ل سەر کەنالێ “إی إس بی إن” ئەی ئەس بی ئێن یێ ئەمریکی دیارکر بوو ھەر چەندە ل ژیانێ دا ١٠٠% نینە لێ ئەو ب رێژەیا ١٠٠% دانیت ئەو ناخوازیت رۆژەکێ ژی یاریێ ل یانا بەرشەلۆنا بکەت و ھەردیسان دیارکر بوو ژبلی یانا مانچستەر یوناید ئەو یاریێ ل چو یانێن دی یێن ئینگلیزی ناکەت.

پێشمەرگەنا نووکرەڤە

14/12/2015 12:11

125

ئەڤرۆ نیوز:
ھونەرمەندێ ناڤدارێ کورد( جوان حاجۆ) د نووترین کارێ خوەیێ ھونەری دا دێ سروودا خوە یا بەرنیاس ب پێشمەرگەی(پێشمەرگەنا) کلیپ کەت.
عیسا مێرگەسۆری رێڤەبەرێ بەرھەمێ ھونەرێ ھونەرمەندێ ناڤبری بۆ بەرپەرێ ھونەری یێ ئەڤرۆ گۆت: ھونەرمەند (جوان حاجۆ) سروودا خوە پێشمەرگەنە دێ کلیپ کەت و تێدا دێ وێنێن پێشمەرگێ کوردستانێ د سەنگەرێن شەرەفێ دا نیشادەت.
مێرگەسۆری ھێشتا ژی گۆت: ھونەرمەندی ئەف سترانە پێشتر ھونەرمەندی گۆتیە و سترانبێژێ ناڤبری جارەکا دی ب دەنگێ خوە یێ چیایی دێ سەرکەفتێن پێشمەرگەی ڤەگەرینتە ڤە، دبینم ئەڤ کلیپە دێ خزمەتەکا بچووک بەرامبەر ئەو سەرکەفتن و داستانێن پێشمەرگێ کوردستانێ کەت تۆمار کرین کەت، جھێ ئاماژەکرنێ یە سروودا (پێشمەرگەنە) ل سالا 1981 ێ ھونەرمەند (جوان حاجۆ)ی تۆمارکریە و ھەتا نوکە ل سەر زارێ ھەر کوردەکی مایە.

بزاڤ دھێتە کرن وەلاتی ژ نیڤا پارێ کارەبێ و باجان بھێنە عەفوکرن

14/12/2015 12:00

414

ئەڤرۆ نیوز:
ئەندامەکێ پەرلەمانێ کوردستانێ دیار کر کو بزاڤێ دکەن پارێ حوکمەتێ یێ کەفتیە سەر وەلاتیان دگەل باجان نیڤی بکەن، وەکو بارسڤیەک بۆ وەلاتیان و گۆت “ئەزی گەشبینم کو پەرلەمان دێ پەسەند کەت”.
د. ئیبراھیم سمۆ ئەندامێ پەرلەمانێ کوردستانێ بۆ رۆژناما ئەڤرۆ خویا کر کو پشتی قەیرانا دارایی ب سەر ھەرێما کوردستانێ دا ھاتی و ژبەر گیروبوونا مووچەیان، پڕانیا وەلاتیان نەشیاینە پارێ کارەبێ و ئاڤێ سولفێن دی بدەنە حوکمەتێ وان بزاڤ کریە کو ھاریکاریا وەلاتیان بھێتە کرن و گۆت “ئەم یێ بزاڤان دکەین کو حوکمەت نیڤا پارەی ژ وەلاتیان وەربگریت و نیڤا دی بھێنە عەفوکرن”.
د. ئیبراھیم سمۆ ئەندامێ پەرلەمانێ کوردستانێ گۆت ژی “ئەزێ گەشبینم کو ئەڤ بزاڤە دێ بنە بریار و پەرلەمان دێ پەسەند کەت و دێ کەڤیتە د وارێ بجھئینانێ دا”.

کی بەرپرسە ژ جودابوونا ھەڤژینان؟

14/12/2015 11:22

257

ئەڤرۆ نیوز:
ل دەمەکی ھەکە ئەم تەکنەلۆژیا و پێشکەفتنا سەردەم ب شێوەیەکێ ئەرێنی ب کار بینین دێ مە نێزیکی ھەڤ کەت، لێ د ھەمان دا ھەکە ب شێوەیەکێ نەرێنی ب کار بینین ئامرازەکێ باشە بۆ ژێک جودابوونێ ژی، کو تشتەکێ وسا ب راستەقینە ل ئیتالیا روو دایە، پارێزەرێن تایبەت د وارێ ھەڤژینی و جودابوونێ دیار کریە کو 40% ئەگەرێن ژێکڤەبوونا ھەڤژینان بۆ خراب بکارئینانا تۆرێن جڤاکی دزڤڕیت.
د ڕاستی دا whats up رۆلەکێ باش د ئاشکراکرنا خیانەتێ دا ھەیە، چونکی پرانیا زەلامان پیاوان ل ولاتێ ئیتالیا چەندین ھەڤالێن کچ ھەنە و بەرنامێ whats up بۆ پەیوەندیکرنێ ب کار دئینن.
ب شێوەیەکێ گشتی تەکنەلۆجیا ل گەلەک ولاتان ب ئەگەرەکێ سەرەکیێ ژێکڤەبوونا ھەڤژینان دھێتە دانان، ھەروەکو د راپرسیەکێ دا ھاتی کو ل سالا 2011 ژ لایێ پارێزەرەکی وارێ ھەڤژینی و جودابوونێ ل ولاتێ بەریتانیا بۆ دەستنیشانکرنا ئەگەرێن ژێکڤەبوونا ھەڤژینان ھاتیە ئەنجامدان، ئەنجامێن راپرسیێ دیار بوویە کو ئێک ل سەر سێ حالەتێن ژێکڤەبوونێ ژ بەر خراب بکارئینانا تۆرێن جڤاکی و فێسبوکە، چونکی بکارئینانا فێسبوکێ یا ب سەناھی یە کو مرۆڤ دشێت د دەمەکی دا دگەل چەند ھەڤالان باخڤیت و پەیوەندیان گرێدەت و بەرنامێ whats up ژی ب سەناھی یە و د ھەمان دەمی دا کەسێ بکارئینەر دشێت وێنەیان ژی بھنێریت.
پشتی گھۆرینێن د بەرنامێ whats up دا ھاتین کو دەمێ مرۆڤ نامەیەکێ دنڤیسیت نیشانەکا کەسک دیار دبیت کو یێ بەرامبەر دزانیت نامە ھاتیە خواندن، کو ھیچ کەس نەشێت حاشاتیێ ل نەخواندنا نامێ بکەت.
ھەژی گۆتنێ یە د ھەیڤا بۆری دا ل وەلاتێ سعوودیێ حالەتەکێ ژ ڤی جۆری روودایە، کو ل دەمەکی زەلامەکی ب رێیا بەرنامێ whats up چەند جاران ل نامە بۆ ھەڤژینا خوە فرێکرین و ئەو نیشانا کەسک دیاربووی کو نامە خواندینە، لێ بەرسڤ نەدان و ھەر ب وی ئەگەری ژنا خوە بەردا.

نابیت پارە ژ قوتابیان بھێنە وەرگرتن

14/12/2015 10:15

507

ئەڤرۆ نیوز:
دچارچوڤێ کۆمبوونا جڤاتا پەروەردێ دا، رێڤەبەرێ گشتی یێ پەروەردێ ل پارێزگەھا دھۆکێ دیار کر کو بڕیار ھاتیە دان کو ب چو رەنگەکی نابیت پارە ژ قوتابیان بھێنە وەرگرتن و بەرۆڤاژی ڤێ چەندێ رێڤەبەرێ قوتابخانێ دێ یێ بەرپرسیار بیت.
ئەحمەد عەبدۆللا زوبێر، رێڤەبەرێ پەیوەندی و ڕاگەھاندنێ ل رێڤەبەریا گشتی یا پەروەردا دھۆکێ بۆ رۆژناما ئەڤرۆ ئاشکرا کر کو دوھی 13/12/2015 جڤاتا رێڤەبەریا گشتی یا پەروەردێ کۆمبوونا خوە یا ئاسایی ئەنجام دا و تێدا بەحسێ رەوشا پرۆسا پەروەردە و فێرکرنێ و ئەو ئاریشە و ئاستەنگێن د کەرتێ پەروەردێ دا ھەین و کێمیا ئاڤاھیێن قوتابخانان و رەوشا میلاکی و زێدەبوونا رێژا قوتابیان د ناڤ قوتابخانێن پارێزگەھا دھوکێ دا کر و گۆت: “پلانا وەزارەتا پەروەردێ بۆ ڤەکرنا خولێن ب ھێزکرنا شیانێن ماموستایان نەخاسمە بۆ پروسا ئینگلیزیکرنا بابەتێن زانستی ل قووناغێن بنەرەت و باخچێن زارۆیان ھاتە کرن و بڕیار ھاتەدان لژنەک ل سەر ئاستێ رێڤەبەریێن قەزایان و قوتابخانان بھێتە پێکئینان بۆ ھەلسەنگاندنا ڤێ پرۆسێ دا کو ھەیڤانە کۆمبوون بھێنە ئەنجامدان و ڕاپورت بۆ رێڤەبەریا گشتی یا پەروەردێ ل پارێزگەھا دھۆکێ بھێنە بلندکرن”.
خویا ژی کر، د کۆمبوونێ دا بڕیار ھاتەدان، ئامارەک بۆ پشکداریا مامۆستایان د خۆلێن ئینگلیزیکرنا بابەتێن زانستی دا ل قووناغا بنەرەت و باغچێن زارۆیان بھێتە ئامادەکرن و پێدڤیە ھەموو مامۆستا پشکداریێ د ڤان جۆرە خۆلان دا بکەن، چونکو رەنگە ل سالا خواندنێ 2016 – 2017 ھەموو قوتابخانێن ھەرێما کوردستانێ ببنە ئینگلیزی.

ھەرێما کوردستانێ دێ باجێ زێدەکەت

14/12/2015 10:10

351

ئەڤرۆ نیوز:
حوکمەتا عیراقێ ل بەرە باج ل سەر کەل و پەلان بھێتە زێدەکرن و بۆ ڤێ مەرەمێ ژی دڤێت ھەرێما کوردستانێ ل خالێن سنوری باجێ زێدە بکەت، چونکو ھەکە ھەرێم جێ بەجێ نەکەت بازرگانێن عیراقێ دێ ب رێیا ھەرێمێ کەل و پەلا ئینن و ناچنە خالێن دی.
ژێدەرەکێ ئاگەھدار ل بەغدا بۆ رۆژناما ئەڤرۆ گۆت:(ئەڤ سالە حوکمەتا عیراقێ دخواست ب رێیا زێدەکرنا باجێ داھاتێ خوە زێدەبکەت و ئەو کورت ئینانا ھەی بھێتە کێمکرن، لێ ژ بەر کو ھەرێما کوردستانێ یا پێگیر نەبوو ب وێ بڕیارێ و باج ل خالێن سنوریێن ھەرێمێ نەھاتە زێدەکرن، لەورا بەغدا ژی نەشیا بڕیارێ بجە بینیت).
ئەڤی ژێدەری نەڤیا ناڤێ خوە ئاشکرا بکەت و دیار کر، بۆ سالا بھێت بەغدا یا رژدە ل سەر زێدەکرنا باجێ و بڕیارە ھەرێما کوردستانێ ژی نەچار بکەت، باج ل سەر کەل و پەلان بھێتە زێدەکرن، چونکو ھەتا ھەرێما کوردستانێ بڕیارێ بجە نەئینیت بەغدا نەشێت، چونکو دێ بازرگانێن عیراقێ بۆ خوە ڤەدزین ژ باجێ، ب رێیا سنورێن ھەرێما گوردستانێ کەل و پەلا ئیننە عیراقێ.

خواندنا بلند: ھەتا نوکە چو سکالا ب فەرمی دەربارەی رێزبەندیا زانکۆیان نە گەھشتینە مە

14/12/2015 09:45

219

ئەڤرۆ نيوز:
وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ د ڕاگەھاندنەکێ دا دیار دکەت، ھەتا نوکە چ سکالا و تێبینی و پێشنیارێن فەرمی نەگەھشتینە وان، لێ وەزارەت یا بەرھەڤە ل رێیا رێڤەبەریا دلنیا جۆری و باوەری بەخشینێ ھەموو سکالا و تێبینی و پێشنیاران وەربگریت و ھووربینیێ بۆ بکەت.
د ڕاگەھاندنا وەزارەتێ دا ھاتیە: ” ھندەک کەس و رێکخراوان دەربارەی ئەنجام و شێوازێ ئەنجامدانا پرۆسا رێزبەندیا نشتیمانی یا زانکۆیێن ھەرێما کوردستانێ داخویانی داینە، لەو مە ب فەر زانی ڤێ رۆنکرنێ بۆ رایا گشتی دیار بکەین”.
ئاشکرا ژی کر، سیستەمێ رێزبەندیا نشتیمانی یا زانکۆیێن ھەرێما کوردستانێ ب رەنگەکێ زانستی و ئەکادمی و پرۆفیشنال ب ھەڤکاری و شیرەت د گەل رێکخراوێن (چێنیکا، داد یا ئەلمانی، رێزبەندیا نشتیمانی یا ئیتالیا و ئەلمانیا) ھاتیە ئەنجام دان، سیستەمێ رێزبەندیا نشتیمانی یا زانکۆیێن ھەرێمێ ل سەر بنەمایێ پێزانینێن زانکۆیان و رێژە و ھاوکێشێن بیرکاری ب مفا وەرگرتن ژ سیستەمێن رێزبەندیا نێڤدەولەتی یا نشتیمانی یا وەلاتێن جیھانێ ھاتیە دارێژتن، ھەموو پێزانینێن زانکۆیان ب شێوازەکێ ئەلکترۆنی سەرەدەری د گەل دا ھاتیە کرن و وی سیستەمی ژی ب رەنگەکێ کارا رێزبەندی ئەنجام دایە.
وەزارەتێ خویا کریە، گەلەک شێوازێن رێزبەندیکرنێ د وەلاتێن جیھانێ دا کار پێ دھێتە کرن، ب تایبەت پۆلینکرن ل رێیا ستێران یان دانا رەنگەکێ دیارکری بۆ وان زانکۆ پشکێن د چنە وی ئاستێ رێزبەندیێ، نموونە ژی رێزبەندیا نشتیمانی یا وەلاتێ ئەلمانیایە.

بەرپرسەکێ ئەمریکی: شەرێ دژی داعشێ دێ ب رێیا ھەڤالێن کاریگەر وەکی کوردان کەین

14/12/2015 09:30

ئەڤرۆ نیوز:
بەرپرسەکێ وەزارەتا دەرڤەیا ئەمریکی دوپاتکر، وەلاتێ وی یێ بەردەوامە ل سەر دژاتیا شەرێ داعشێ و ئازادکرنا دەڤەرێن ل ژێر کونتۆلا وان، ب ھەڤکاری و ھاریکاریا ھەڤپشکێن وێ ل دەڤەرێ، ھەروەسا ئاماژەدا ھندێ، وەزیرێ دەرڤەیێ ئەمریکی جۆن کێری ژی بەری حەفتیەکێ دوپاتکریە کو پارچەکا سەرەکیا ستراتیجیا ئەمریکی دژی داعشێ پشتبەستنا وان لسەر ھەڤالەکێ کاریگەر ل دەڤەرێ یە.
بەرپرسێ وەزارەتا دەرڤەیا ئەمریکی بۆ رۆژناما (شەرق ئەلئەوسەت) خوەیاکر، ھەبوونەک د پێشڤەچوونا ھێزێن پەیادە دا ھەیە کو دبیت ئەرکێ بەرھەنگاریا داعشێ پێ بھێتە راسپاردن و گۆت: پشڤەچوونا باش ھەیە، ل ھەیڤا بۆری ھێزێن کوردان شیان باژێرێ شنگالێ ژ داعشێ رزگار بکەن، پاشی ل ھێزێن کوردان باژێرکێ ھولێ رزگارکر ل رۆژھەلاتا سووریا، شنگال و ھۆل دو بنگەھێن گرنگ بوون بۆ بزاڤ و پەیوەندیێن داعشێ. سەبارەت پێکئینانا ھێزێن پەیادە و بەرھەڤیێن وەلاتێن دەڤەرێ بۆ پشکداریا لەشکری و ھێزا پەیادە، بەرپرسێ ئەمریکی گۆت: خوەشحالین بۆ ھەر بزاڤەکا راستەقینە بۆ پشکداریا د بەرھنگاریا داعشێ ل سووریایێ و عیراقێ دا بکەن، شەرەکێ درێژە و چو گۆمان تێدا نینە، دێ د بەردەوام بین ل گەل ھەڤپشک و ھەڤالێن خوە ل دەڤەرێ.
ژ ئالیەکێ دی ڤە ئەنجامێن پرۆسا ھەڤپەیمانا نێڤدەولی د شەرێ ژدی داعشێ دا ب ھژمار خوەیاکر، کو ھەتا نھا نێزیکی 23 ھەزار چەکدارێن تیرۆرستی یێن داعشێ ھاتینە کوشتن.
بەرپرسێ ئەمریکی ھەروەسا ئاشکراکر، 8700 ھێرشێن ئەسمانی ژ ئالیێ ھێزێن ھەڤپەیمانیا نێڤدەولی ڤە دژی رێکخستنا تیرۆرستی ھاتینە ئەنجامدان، 6700 ژوان ھێرشان ژ ئالیێ ویلایەتێن ئێکگرتیا ئەمریکی ڤە ھاتینە کرن.
ھەڤدەم ئەو دەنگۆباس دھێنە بەلاڤکرن، پشتی ستراتیجیا سەرۆکێ ئەمریکی باراک ئۆبامای کەفتیە بەر ھێرشەکا رەخنەگرتنێ د شەرێ دژی داعشێ دا، بلند بوونا داخوازیان سەبارەت گێرانا رۆلەکێ باشتر و مەزنتر ژ ھەڤپشکێن ئەمریکیان ڤە ل دەڤەرێ، ھەروەسا داخوازکرنا ھنارتنا ھێزێن لەشکری یێن پەیادە یێن وەلاتێن رۆژئاڤا دا کو پشکداریا شەرێ داعشێ ل دەڤەرێ بکەن.

نيشاندان 1...1,410 2,410 3,410 3,4143,4153,416 4,410...4,558 زێده‌تر

لاپه‌ر 3,415 ژ 4,558