ئه‌ڤرۆ، ئه‌یاد به‌رواری
نڤیسه‌ركا كوێتی، ره‌خنه‌ ل سیسته‌م و پرۆگرامێن خواندنێ و فێركرنێ ل وه‌لاتێن عه‌ره‌بی گرت و دیاركر كو ئه‌و سیسته‌مه‌ یێ بوویه‌ ئه‌گه‌رێ هه‌ڤسۆزیا هنده‌كان ل گه‌ل داعشێ و داخواز دكه‌ت بابه‌تێ ئاینێ ل قوتابخانان بهێته‌ گوهۆرین و ل شوینا وی بابه‌تێ دیرۆكا ئاینان بهێته‌ خواندن.
د. ئیبتیهال ئه‌لخه‌تیب نڤیسه‌ر و مامۆستایا زانكۆیا كوێت د گۆتاره‌كێ دا ل رۆژناما (الجریده‌) یا كوێتی یا هژمار (2879) ل 30/11/20015 ێ،  داخواز ژ دارێژه‌رێن پرۆكرامێن فێركرنێ دكه‌ت كو ئاینێن جورا و جور یێن جیهانێ بۆ قوتابیان پێناسه‌ بكه‌ت، یان ژی راسپاردێن مافێن مرۆڤی و ره‌وشتی، ده‌وله‌ت ژی ڕێ ب دابینكرنا قوتابخانێن ئاینی ل ده‌مێ نیڤرۆ، یان ژی ل ده‌مێ بێهنڤه‌دانێن هه‌فتیێ، وه‌كو قوتابخانێن ئێكشه‌مبی یێن دێران، بۆ وان كه‌سێن دخوازن زانستێن ئاینی یێن ل گه‌ل تایفا وی دگونجیت نیشا زارۆیێن خوه‌ بده‌ت.
نڤیسه‌را كوێتی به‌حسێ وێ ره‌خنا دژوار یا ئه‌و تووشیبوویێ پشتی ده‌ركه‌فتنا وێ د خه‌له‌كه‌كا به‌رنامێ (ئاخڤتنا عه‌ره‌بان) ل كه‌نالێ (سكای نیۆز عه‌ره‌بیه‌) كو وێ د به‌رنامه‌ی دا ره‌خنه‌ ل پرۆگرامێن فێركرنێ گرت و ئه‌و پرۆگرامه‌ ب تایبه‌تی ببابه‌تێ ئاینێ تۆمه‌تباركر ب په‌یداكرنا هه‌ڤسۆزیێ ل گه‌ل داعشێ و دگۆتارا خوه‌دا خویا ژی دكه‌ت “ئه‌و هێرش و ره‌خنێن ل من دهێته‌ كرن ژ عه‌قلیه‌تا قوربانی ئه‌وا موسلمان كار پێ دكه‌ن ل گه‌ل هه‌ر كه‌سه‌كێ ره‌خنێ ل وان بگریت، یان ژی یێ جودا بیت ل گه‌ل وان”.
د. ئیبتیهالێ د دووماهیا گۆتارا خوه‌دا گوت” نزانم بۆچی ئه‌ڤ پێشنیازا من وه‌كو خه‌فكه‌كا دژی ئاینێ دهێته‌ هژمارتن؟، به‌لێ هه‌كه‌ ئه‌م عه‌قلیه‌تا عه‌ره‌بی ئیسلامی تێبگه‌هین، دێ زانین بۆچی ل ده‌ڤ هنده‌كان گوتنا (سپێده‌ باش) ل شوینا (السلام علیكم) كاره‌كێ پیلانگیری و دژی ئاینی یه‌”.

ئه‌ڤرۆنیۆز، ئه‌یاد به‌رواری

بۆ جارا ئێكێ د دیرۆكا سعودیێ دا، ئه‌ڤرۆ ئێكشه‌مبی 29 چریا دویێ، به‌ربژارێن ژن یێن سعودی ده‌ست ب هه‌وێن خوه‌ یێن هه‌لبژارتنێن باژێرڤانیان ل سعودیێ كرن، كو دێ بیته‌ جارا ئێكێ ژنێن سعودی پشكداریێ د هه‌لبژارتنان دا بكه‌ن وه‌كو به‌ربژار و ده‌نگده‌ر.
ل دووڤ سایتێ (هاڤینگتۆن پۆست)، 900 ژنان ژ سه‌رجه‌مێ 7 هزار كه‌سان خوه‌ به‌ربژاركریه‌ بۆ هه‌لبژارتنێن باژێرڤانیان كو ل به‌ره‌ ل 12 مه‌ها مانوونا ئێكێ بهێنه‌ ئه‌نجامدان، دیسا 130 هزار و 600 ژنان وه‌كو ده‌نگده‌ر خوه‌ ناڤێن خوه‌ وه‌كو ده‌نگده‌ر یێن توماركرین.
هه‌لبژارتنێن ئێكێ یێن باژێرڤانیان ل سعودیێ ل سالا 2005 ێ هاتبوونه‌ ئه‌نجامدان ل سه‌رده‌مێ شاهێ كوچكری (عه‌بدوللا بن عه‌بدولعه‌زیز ئال سعود) كو وی شاهی به‌ری هه‌لبژارتنێن 2011 ێ سۆز دابوو كو د هه‌لبژارتنێن 2015 ێ دا ژن پشكداریێ تێدا بكه‌ن و شاهێ نوكه‌ یێ سعودیێ (سه‌لمان بن عه‌بدولعه‌زیز ئال سعود) پێگیری ب وێ سۆزێ كر، به‌لێ ل دووڤ سیسته‌مێ سعودی، د هه‌وێن هه‌لبژارتنان دا ژنێن به‌ربژار تنێ دێ ژنان بینن و دشێن هندك زه‌لامان بكه‌نه‌ وه‌كیلێن خوه‌ كو هه‌وا وان یا هه‌لبژارتنان دناڤ زه‌لامان دا ب رێڤه‌ ببه‌ن.
وه‌لاتێ سعودیێ كو شه‌ریعه‌تا ئیسلامی په‌یره‌و دكه‌ت، پێرابوونێن گران ل سه‌ر ژنان سه‌پاندینه‌ وه‌كو قه‌ده‌غه‌كرنا لێخورینا ترومبێلان و سه‌پاندنا له‌چكێ ل سه‌ر وان ل جهێن گشتی و وه‌رگرتنا رازیبوونێ زه‌لامی ل ده‌مێ گه‌شتان و كاری و پێكئینان ژیانا هه‌ڤژینیێ.