ئه‌ڤرۆنیۆز، ئه‌یاد به‌رواری

سه‌رۆك وه‌زیرێن ئیسرائیلێ پشته‌ڤانیا وه‌لاتێ خوه‌ بۆ سه‌ربخوه‌یا كوردستانێ دیاركر و دوپاتی ل سه‌ر وێ چه‌ندێ ژی كر كو پێدڤیه‌ هه‌ڤپه‌یمانیه‌ك د ناڤبه‌را هێزێن میانڕه‌و ل ده‌ڤه‌رێ دروست ببیت.
بنیامین ناتانیاهۆ سه‌رۆك وه‌زیرێن ئیسرائیلێ د گۆتاره‌كێ دا ل ناڤه‌ندا ڤه‌كۆلینێن (ته‌ل ئه‌بیب) گوت” د چارچۆڤێ هه‌ڤپه‌یمانیه‌كا به‌رفره‌ه دا د ناڤبه‌را هێزێن میانڕه‌وێن ده‌ڤه‌رێ، پێدڤیه‌ ده‌وله‌تا كوردی یا سه‌ربخوه‌ دروست ببیت”.
ناتانیاهۆی گوت ژی” زێده‌بوون و به‌رفره‌هبوونا توندڕه‌وێن سونی ب هاریكاریا قاعیده‌، ل گه‌ل زێده‌بوون و به‌رفره‌هبوونا شیعان ب هاریكاریا ئیرانێ، ره‌وشه‌كا وه‌سا یا دروستكری كو پێدڤیه‌ هاریكاریا كوردستانێ بكه‌ین كو ئۆتۆنومی یا هه‌ی ل باكوورێ عیراقێ و ده‌ڤه‌ره‌كا زه‌نگێن ب ڕێڤه‌دبه‌ن” دیاركر ژی” كورد نه‌ته‌وه‌كێ شه‌ڕكه‌رن و یا سه‌لماندی ژی كو دشێن پێگیریا سیاسی بپارێزن و هه‌ژی سه‌ربخوه‌یێ نه‌ و پێدڤیه‌ پشته‌ڤانیا خه‌ونا كوردان بۆ سه‌ربخوه‌یێ بكه‌ین”.

ئه‌ڤرۆنیۆز، ئه‌یاد به‌رواری
پرۆفیسۆره‌كێ سویدی یێ تایبه‌تمه‌ند دبیاڤێ شرۆڤه‌كرنا پێزانینێن هه‌والگیری ل زانكۆیا لوند یا سویدی دیاركر كو كریارێن تیرۆرستی ئه‌وێن پاریس رووداین و به‌رسڤا فره‌نسا ل سه‌ر وان دوپاتیه‌ ل سه‌ر هه‌لبوونا شه‌ڕێ جیهانیێ سیێ.
ویلهلم ئه‌گریل د دیداره‌كێ دا ل گه‌ل رۆژناما ( سیدسفینسكا) یا سویدی گوت” شه‌ڕێ جیهانیێ سیێ دێ گه‌له‌ك یێ جودا بیت ژ هه‌ردو شه‌ڕێن جیهانی یێن ئێكێ و دویێ و راده‌یا وی دێ به‌ده‌وام زێده‌تر لێهێت”.
گوت ژی” شه‌ڕێ د ناڤبه‌را رێكخستیێن تیرۆرستی یێن ئیسلامی ژلایه‌كی ڤه‌ و وه‌لاتێن ئورۆپی ژلایه‌كێ دی ڤه‌، ب ره‌نگه‌كێ باش دیاردكه‌ن كو شه‌ڕێ جیهانیێ سیێ یێ هه‌لبووی”.
ب دیتنا وی شاره‌زایێ پێزانینێن هه‌والگیری” ژ كارڤه‌دانا فره‌نسا، رێكخستیا ده‌وله‌تا ئیسلامی (داعش) یا تیرۆرستی دێ چه‌كێ شه‌ڕه‌كێ به‌رفره‌هتر كه‌ت، داخویانیا فره‌نسا ژی كو ئه‌و یا د شه‌ڕی دا ل گه‌ل تیررۆێ، ئارمانجا داعشێ بوو و تێدا سه‌ركه‌فت”.
خویاكر ژی” پشكداریا چار وه‌لاتان د ڤی شه‌ڕی دا، ژ سه‌رجه‌مێ پێنج وه‌لاتێن ئه‌ندامێن به‌رده‌وام د جڤاتا ئاسایشا نێڤده‌وله‌تی دا، وی شه‌ڕی دكه‌ته‌ شه‌ڕه‌كێ جیهانی” گوت ژی” شاشی یه‌ كه‌ هه‌كه‌ هزر بهێته‌ كرن كو شه‌ڕێ جیهانیێ سیێ دێ وه‌كو هه‌ردو شه‌ڕێن جیهانی یێن ئێكێ و دویێ بیت، به‌لكو ئه‌م نوكه‌ یێن د شه‌ڕێ جیهانیێ سیێ دا، به‌لێ ئه‌م وێ چه‌ندێ نزانین”.
گوت ژی” شه‌ڕێ نوكه‌ و ئه‌نجامێن وی، كارتێكرنێ ل سه‌ر رۆژهه‌لاتا ناڤین و ئه‌فریقیا ب تنێ ناكه‌ت، به‌لكو دێ ل سه‌ر ئورۆپا ژی كه‌ت و ئه‌م نوكه‌ یێ زنجیره‌كا روودانێن مه‌زن ل وه‌لاتێن ئێكه‌تیا ئورۆپی دبینین، بێ كو ئه‌م بشێن كونترۆلێ ل سه‌ر بكه‌ین”.
ل دۆر پێشبینیێن ڤی شه‌ڕی، پرۆفیسۆرێ سویدی دبێژیت” ئه‌م نزانین دێ چاوا ئه‌ڤ شه‌ڕه‌ب دووماهی هێت، ب زه‌حمه‌ته‌ ژی د چه‌ند هه‌فتیه‌كان دا پێشبینیێ بكه‌ین و بێژین كا دێ ره‌وش ل رۆژهه‌لاتا ناڤین و ئێكه‌تیا ئورۆپی پشتی چه‌ند سالان یا چاوان بیت، به‌لێ پێشبینیه‌كا مه‌زن یا هه‌ی ئه‌وژی به‌رفره‌هبوونا بیاڤێ ڤی شه‌ڕی كو دێ بیته‌ شه‌ڕه‌كێ مال وێرانكه‌ر د پاشه‌رۆژێ دا”.

ئه‌ڤرۆنیۆز، ئه‌یاد به‌رواری

ئاژانسا وزا نێڤده‌وله‌تی پێشبینیا بلندبوونا بهایێن په‌ترۆلێ دكه‌ت و دبێژیت دێ به‌رده‌وام بهایێن په‌ترۆلێ بلندبوونێ ب خوه‌ڤه‌ بینیت و ل سالا 2020 دێ گه‌هیته‌ 80 دۆلاران بۆ هه‌ر به‌رمیله‌كێ.
ل دووڤ راپۆرته‌كا ئاژانسا ناڤبری كو ل رۆژا ئه‌ینیێ 27/11/2015 ێ ده‌ركری” پشتبه‌ستنا هندستانێ ل سه‌ر كڕینا په‌ترۆلی دێ 90% زێده‌تر لێهێت ل سالا 2040 ێ و هندستان پێدڤی ب وه‌به‌رهێنانێ یه‌ د وزێ دا ب گۆژمێ دترلیۆن و 800 ملیۆن دۆلاران”.
د راپۆرتا ناڤبری دا هاتیه‌” وه‌به‌رهێنانێن په‌ترۆلی ل جیهانێ 20% یێن كێمبووین دسالا 2015 ێ دا و ل سالا 2016 ێ دێ كێمتربن، به‌لێ هندستان دێ بیته‌ ئه‌گه‌رێ زێده‌بوونا داخوازیێ ل سه‌ر وزێ ل جیهانێ د سالێن داهاتی دا پتر ژ چینێ”.

ئه‌ڤرۆ نیۆز، قائید میرۆ
هێزێن پێشمه‌رگه‌ی ل میحوه‌رێ مه‌خموور پیلانه‌كا تیرۆرستێن داعش ژناڤبر و هژماره‌ك موشه‌كێن تیرۆرستان هاتنه‌ ژناڤبرن.
ئه‌حمه‌د جاف، په‌یڤدارێ میحوه‌رێ مه‌خموور ب ئه‌ڤرۆ نیۆز راگه‌هاند”چه‌كدارێن داعش هژماره‌ك موشه‌ك ل گوندێ لاكه‌چه‌ یێ نێزیك قه‌زا مه‌خموور ڤه‌شارتینه‌ ژبۆی كو هه‌مبه‌ر سه‌نگه‌رێن پێشمه‌رگه‌ی بهێنه‌ بكارئینان، به‌لێ پیلانا داعش ژئالیێ هێزێن پێشمه‌رگه‌ی هاته‌ ئاشكراكرن و ئه‌ موشه‌ك هاتنه‌ ژناڤبرن.
جاف دیاركر”به‌ری نوكه‌ژی تیرۆرستێن داعش موشه‌كێن دۆر هاڤێژ ئاراسته‌ی سه‌نته‌رێ هه‌ردوو قه‌زایێن مه‌خموور و خه‌بات و سه‌نگه‌رێن پێشمه‌رگه‌ی كرینه‌ و زیانێن گیانێ ل په‌یدابوونه‌.

ئه‌ڤرو نیوز،بارزان مزوورى

راید فیراس یاسین، به‌رپرسێ به‌شێ راگه‌هاندنا رێڤه‌به‌ریا به‌ره‌ڤانیا باژێرێ ئاكرێ بو مالپه‌رێ ئه‌ڤرو نیوز ئاشكرا كر كو ئه‌ڤرو ده‌مژمێر 11:45 خوله‌ك 28/11 تیمێن بنگه‌هێ بجیل هاتنه‌ ئاگه‌هداركرن كو دوو زاروك كه‌فتینه‌ لبن خانیه‌كێ ل ناحیا بجیل و تیمێن وان بله‌ز گه‌هشتنه‌ جهێ روودانێ كو دوو زاروك ل بن خانى ڤه‌ ماینه‌ ئاسێ و بله‌ز كاریته‌ و ئه‌و ئاخا كه‌فتیه‌ سه‌ر وان راكرن و قورتال كرن و هه‌ردوو زاروك به‌رى گیانێ خو ژ ده‌ست ده‌ن بو نه‌خوشخانا ته‌نگاڤیا ئاكرێ ڤه‌گوهاستن و چه‌ند ده‌مژمێره‌كا لبن چاڤدێریا نوژداران بوون و نها ره‌وشا وان باشه‌ و بو مال هاتن ڤه‌گوهاستن.
ناڤبرى لدور ئه‌گه‌رێن رویدانێ دیار كر كو بابێ وان بناڤێ “كه‌ریم مسته‌فا” دیاركریه‌ كو ژبه‌ر هاتنا وه‌رزێ زڤستانێ خانیێ وى گاریته‌ بوویه‌، رابویه‌ هنده‌ك ئاخ كریه‌ سه‌ر بانى و بارى وان گاریتا گران كریه‌ وبویه‌ ئه‌گه‌ر كو گاریته‌ بشكێن.