ئه‌ڤرۆ نيوز:

ئەحمەد داوود ئوگلۆ راسپاردیێ ئاڤاکرنا حوکمەتا نوو یا تورکیا و سەرۆکێ پارتا داد و گەشەپێدانێ د داخۆیانیەکی دا پشتی کۆمبوونا ل گەل پارتا کۆماریا گەل راگەھاند کو وان ب فەرمی دەست ب گەرا ل گەل پارتێن ل پەرلەمانێ کرینە بۆ ئاڤاکرنا حوکمەتێ و گۆت: (ئەز ھیڤیدارم ئەم دێ د دەمەکی نێزیکی دا حوکمەتا ھەڤپەیمانیێ ئاڤا بکەین و کۆمبوونا مە ل گەل CHP ئەرێنی بوو و ئەم دێ ئەڤرۆ ل گەل پارتا بزاڤا نەتەوەپەرست MHP و سبێدی ژی ل گەل پارتا دیمۆکراسیا گەلان HDP کۆم ببین و پاشی د گەرا دویێ دا ھەڤپەیمانیێ ل گل پارتەکی دروست بکەین).
داوود ئوگلۆ ل سەر داخۆیانیا کۆما جڤاکێن کوردستانێ KCK ژی راگەھاند کو ئەو چو بریارا وەردگرن بلا وەرگرن لێ نەشێن وان ژ بزاڤا دروستکرنا ئاشتیا گشتی دوور بکەن و ھەتا قۆناغ سەرکەڤتنا قۆناغێ دێ کارێ خوە بکەن و گۆت: (ئاشکرایە ھەتا نھا قەندیلێ و ھەڤالێن وان سۆزێن کو دابوون بجیە نەکرینە و چەکدارێن خوە ژ ئاخا تورکیا دەرنەخستینە و ب جدی نێزیکی چارەکرنا پرسگرێکان نەبووینە بۆ ڤێ چەندێ ژی ب جھێ کو بەحسێ دەسپێکرنا شەری دکەن بلا دەستپێکێ سۆزێن خوە بجە بینن و دەست ژ سیاسەتا ئاژاوەگەریێ بەردەن).
داوود ئوگلۆ د پشکەکا دی یێ ئاخڤتنا خوە دا ژی راگەھاند کو ئەو دێ د ھەڤدیتنا ل گەل HDP بەحسێ قۆناغا ئاشتیێ بکەن و گۆت: (دڤێت ئێدی HDP و قەندیل دەست ژ خاپاندنا خەلکێ بەردەن و بریارا خوە بدەن دێ دەست ژ چەکدان بەردەن و سیاسەتێ بکەن یان دێ شەری بکەن، ژ بەر کو سیاسەت و چەکداری پێکڤە ناھێتە مەشاندن و ھەکە ب راستی ئاشتیخوازن بلا بێی مەرج ژ ئاخا تورکیا دەربکەڤن).
ل ھەمبەر ئاخڤتنێن داوود ئوگلۆ ھەڤسەرۆکێ HDP سەلاحەدین دەمیرتاش بۆ رۆژنامەڤانان راگەھاند کو KCK نە گۆتیە ئەو دێ دەست ب شەری بکەن و تشتێ د داخۆیانیا وان دا دەردکەڤیت ئەو داخوازا بجە ئینانا بنگەھێن قۆناغا ئاشتیێ دکەن.
دەمیرتاش ھەروەسا دیار ژی کر داوود ئوگلۆ کەسەکی بێ ئیرادە و بێ شیانە و ل دەڤێ سەرۆک کۆمار دنێریت و بۆ ڤێ چەندێ ژی دەمێ ئەردۆگان پرۆسا دانوستاندنێ ژ ھۆلێ راکر بێی ھەلویست ما و گۆت: (ل ئالیەکی ڤە بزاڤا دیمۆکراتیک و نەتەوەی یا کوردی چەکێن خوە بێدەنگ کریە و راگەھاندیە کو ئەو ئێدی ناخوازیت شەری بکەت و رژدیا خوە بۆ چارەکرنا ئاشتیانە دیار کریە، لێ ژ ئالیێ حوکمەتێ ڤە چو پێنگاڤەک بۆ سەرخستنا قۆناغێ نەھاتیە ئاڤێتن و ھەردەم ل رێیێن تێکدانێ دگەرن و ل ئالیەکی بۆ ڤالاکرنا کوردستانێ بەردەوامیێ ددەنە دروستکرنا بەنداڤان و ل ئالیەکی ڤە ژی ئەو جھێن ستراتیژی یێن کو پەکەکێ ڤالا کرینە ب دروستکرنا بنگەھێن سەربازی دخوازن وەربگرن و ھەرکەس دزانیت ئارمانجا ڤان بەنداڤان و بنگەھێن سەربازی ڤالاکرنا کوردستانێ یە و ئەم ئێدی ڤێ سیاسەتا شاش یا حوکمەتێ قەبوول ناکەین و ئاشتیی وەسا بجە ناھێت و حوکمەت نەشێت وەسا پرسا کوردی چارە بکەت).

ئەڤرۆ:

کونگریس و وەزارەتا بەرگریا ئەمریکی، د روونشتنەکێ دا بەحسێ مفایێن مانا عیراقێ وەکو وەلاتەکێ ئێکگرتی کر و دوپاتی ل سەر ھاریکاریا عیراقێ کر، بەلێ بنتاگۆنێ دان ب وێ چەندێ کر کو رۆژ بۆ رۆژێ ئومێدا مانا عیراقەکا ئێکگرتی یا کێمتر دبیت، بەلکو پارچەبوونا عیراقێ بۆ سێ دەولەتان یا نێزیکترە ژ دۆرھێلی.
ئادەم سمیس کو ئەندامێ لیژنا چەکدارکرنێ یە ل کونگرسێ ئەمریکی گوت” عیراق یا ژێکڤەبووی و یا راست ئەوە ژ ئەڤرۆ و پێڤە تشتەک نەمایە ب ناڤێ عیراق”.
گوت ژی” د دەمەکی دا حەیدەر عەبادی بزاڤا دروستکرنا عیراقەکا ئێکگرتی دکەت، سەرکردێن دی یێن شیعی پێگیریێ ب ڤێ بزاڤا عەبادی ناکەن، ئەڤ چەندە ژی وەدکەت کو ھەر بزاڤەکا ئەمریکی بۆ ھنارتنا ھێزان بۆ مەشقێ و چەکدارکرنا سونان چو مفایەک بۆ نەبیت”.
ل دۆر شیانێن عەبادی بۆ ب رێڤەبرنا عیراقێ، ئاشتون کارتەر وەزیرێ بەرگریا ئەمریکی د وێ روونشتنێ دا گوت” ھەتا نوکە ئەم چاڤەرێَی نە وان شیانان ببینین”.
ئادەم سمیس ژی د وێ روونشتنێ دا دبێژیت” چ مفا د ھەبوونا عیراقەکا ئێکگرتی دا ھەیە کو تێدا سونان نوونەراتیا راستەقینە نەبیت و نەھێنە پشتەڤانیکرن و چاوا دێ شێین پێگەھەکێ ھەژی دەینە سونان، د دەمەکی دا حوکمەتا بەغدا پشتەڤانیا وان ناکەت”.
د وێ روونشتنا ھەڤپشکدا یا کونگرسی و پنتاگۆنێ، وەزیرێ بەرگریا ئەمریکی دبێژیت” پنتاگۆنێ ھەموو ئەگەرێن ڤەکری ل دۆر پاشەرۆژا عیراقێ ل بەرچاڤ وەردگریت، ژوان ژی پارچەبوونا عیراقێ بۆ سێ عیراقان، نەکو ئێک عیراق، دبیت عیراق بھێتە پارچەکرن ل سەر ئەردی بۆ سێ پارچان، پارچا کوردی، پارچا سونی و پارچا شیعی، ئەڤە ژی ھەکە حوکمەتا ناڤەندی یا بەغدا شکەستن ئینا د قانعکرنا سونان و کوردان دا کو وان رۆلەکێ راستەقینە یێ ھەی د دروستکرنا بریارێ دا”.
تولسی گابارد ئەندامێ کونگرسێ ئەمریکی د وێ روونشتنێ دا گوت” سونە ل عیراقێ ھەست ب پشت گوە ھاڤێتنێ دکەن ژلایێ حوکمەتا بەغدا ڤە کو زورینەیا شیعە ل سەر وێ حوکمەتێ یا زالە، ھەتاکو سونە د شەڕێن چارەنڤیسازدا دژی داعشێ د پشت گوە ھاڤێتینە، ژ بەر ڤێ چەندێ ژی سونان چو ھاندەر نیننکو ھەست ب وێ چەندێ بکەن حوکمەتا ناڤەندی دێ وان پارێزیت و وان پشکدار بکەت دحوکمرانیێ دا”.
گوت ژی”سەرەاری پرۆپاکندێن عەبادی ل دۆر عیراقەکا ئێکگرتی، لێ بسپۆرێن لەشکری و شارەزایێن دی پشتی دەمەکێ درێژ ژ ڤەکۆلینا بارێ رۆژھەلاتا ناڤەراست، یێن گەھشتینە وێ باوەریێ کو عیراق یا بوویە سێ پارچە”.