ئەڤرۆ نیوز:
گەلەک وەلاتی پسیار دکەن کا فشارا خۆینی چ کارتێکرن ل سەر ساخلەمیا وان ھەیە د ھەیڤا رەمەزانێ دا و نڤستنا ب رۆژ ژی گەلەک مەترسیە ل سەر ساخلەمیا وەلاتیان ونابیت مروڤی خۆارنی بخوت ل سەر بنڤیت، نەخۆشێن دلی و رەبوویێ ژی پتریا جارا پێدڤی ب چارەسەریا دەملدەست دبن و رۆژانە چەندین جارا دەرمانا ب کاردئینن، ل رەمەزانێ داکو ساخلەمیا مرۆڤی یا باش بیت پێدڤیە کێم خوارنێ بخووت و زێدە لڤینێ بکەت.
د. مەردان خەلیل ھدایەت، تایبەتمەندێ نەخۆشیێن دل و ھناڤا دیارکر کو ھەر وەلاتیەکێ نەخۆشیا دلی ھەی رۆژی گرتن دبیتە بارگرانی ل سەر لەشێ وی مروڤی ب تایبەتی ژی ھەکە گەلەک تێھنی و برسی ببیت و فشارەک ل سەر ئەندامێن لەشێ وی دروست ببیت و گۆت: پێدڤیە وەلاتیێ نەساخ قەستا نوشدارێن خوە بکەن بۆ ھندێ ھەکە نوشدار ببینیت ساخلەمیا وی یا باشە و گەلەک پێدڤی ب خۆارنا دەرمانان نننە نوشدار دشێت بڕیارێ بدەت کا نەساخ چ بکەت بۆ ھندی ساخلەمیا نەساخی باشتر ببیت، کو شەریعەتی رێک یا دایێ و پێدڤیە مروڤ مفایی ژ وێ رێکێ ببیینت.
د. مەردان خەلیل ھدایەت گۆتژی: گەلەک جاران نەساخێن فشارا خۆینێ پسیارا دکەن کا فشارا خۆینی چ کارتێکرن ھەیە کو ھەکە فشارا خۆینێ یا نۆرمال بیت، چو کارتێکرن نینە لێ فشارا خۆینێ یا مەترسیدار ئەوە کو ببیتە ٢٠ و٢٢ ل سەر ١٢ و١٣ و١١.٥ ئەڤ فشارا خۆینی یا ب مەترسیە دەمێ بلند دبیت، ئەڤە ژی پێدڤیە نەساخ بۆ ماوەیێ چەند رۆژان رۆژیا خوە بخوت ھەتا جارەکا دی فشارا وی یا خۆینی نورمال دبیت و پاشی دەست بگرتنا رۆژیێن خوە بکەتەڤە کو ئەو کەسێ فشارا خۆینێ ھەی ب تایبەتی ژی ئەوێن فشارا وان دبیتە ٢٢ ل سەر ١٢ یان ل سەر ١٣ ئەڤ وەلاتینە پێدڤی ب خۆارنا دەرمانان ھەنە و پێدڤیە رۆژێ زێدەتر ژ سێ جاران و چار جاران حەبکێن خوە بخوت و پێدڤی ب چاڤدێریا نوشداری دبن.
تایبەتمەندێ نەخۆشیێن دل و ھناڤا زێدەتر گۆت: نەخۆشیێن رەبویێ کو بێھنا وان تەنگ دبیت، ئەوژی بەخاخێ ب کاردئینن و گۆت: ھەکە شیان ھەبن دەرمانێن خوە بخوت و بەخاخێ بکاربینت، دەمێ پاشیڤێ، دشێت رۆژیێن خوە بگرت، لێ ھەکە ھات و نەخۆشیا بێھن تەنگیێ ھەبیت و بێھنا وی تەنگ ببیت و پێدڤی ب نەخۆشخانێ و ئوکسجینی ببیت ئەم دبینین ھەکە رۆژیا خوە بخوت باشترە، چونکو بێھن تەنگی یا باش نینە.
د. مەردان خولیل، ئاشکرا کر کو نڤستنا ب رۆژێ ژی گەلەک یا شاشە و پێدڤیە مروڤ لڤینێ بکەت نە خۆارنێ بخوت و ل سەر بنڤیت، و گۆت: ئەڤە گەلەک نەیا دروستە بەری ھزارەھا سالان خەلک نە روونیشتە خارێ و بەردەوام کاردکرن و ھینگی نەخۆشی دکێم بوون، لێ نوکە چونکو لڤینا مروڤان یا کێمە و خۆارنی دخوون و ل سەر دنڤن کو دکەڤیتە سەر میلاکێ یان رووڤیکێن وی ل سەر دلێ ئەو خارنا دمینت دئەنجامدا سەنگا وی زێدەبیت، ئەو مروڤ دێ تووشی نەساخیان بیت، باشترە مروڤ گەلەک خوارنی نەخووت و زێدە لڤینێ بکەت دھەیڤا رەمەزانێ دا داکو ساخلەمیا وی باش بیت.

ئەڤرۆ نیوز:
رۆژیگرتنێ مفایێن ساخلەمیێ بۆ ھندەک ژ نەخۆشان ھەنە و مفایێن وێ ژ ئالیێن زانستێ پزیشکی ھاتینە تەکەز کرن، ئەو نەخوشیێن رۆژیگرتنێ مفا بۆ ھەی پتریا وان د دومدرێژن و گرێدای ژیانا رۆژانە نە و ئەو سیستەمێ خەلەتێ خوارنێ یێ مرۆڤ پەیرەو دکەت، رۆژیگرتن ئانکو خۆ دوورکرن ژ خوارنێ و ڤەخوارنێ و ئەنجام ژی دبیتە ئەگەرێ کێمبوونا ھندەک ژڤان کەرستێن زیان بەخش و قورتالبوون ژ ژەھرێن ب رێکا وان دچنە دناڤا لەشێ مرۆڤی دا.
د. محەمەد تاھر رەسول شیرەتکارێ نەخۆشیێن گەھان و دل و ھناڤان بۆ رۆژنامەیا ئەڤرۆ دیارکر کو رۆژی شانەیێن پووچ و بێھێز ژناڤ دبەت و ئەو برسیبوونا رۆژیگر ل سەر خۆ د سەپینیت دبیتە ئەگەر ئەندامێن ناڤیا لەشێ وی ب کاربکەڤن داکو شانەیێن بێھێز ژناڤ ببەن بۆ بەرھنگاریا برسیاتیێ و لەشێ مرۆڤی دێ بزاڤ و چەلەنگیا خۆ ڤەگەرەنیتەڤە و شانەیێن نەساخ دێ پووچ بن و ل جھێ وان شانەیێن نوو دێ ئاڤابن، دیسان رۆژیگرتن مرۆڤی ژ بەرک و گیرھەیێن کلسی و زێدەگوشتی و کیسکێن روینی و پەنجەشێرێ د پارێزیت.
سەبارەت مفایێ رۆژیگرتنێ بۆ نەخۆشیێن شەکرێ ب تایبەت، د. محەمەد تاھر گوت: رۆژیگرتن باشترین ئالاڤە بۆ کێمکرنا رێژا شەکرێ و گوت: ل رەمەزانێ رۆژیگر دەلیڤەیەکا باش ددەتە بنکریاسی کو ئارامیا خۆ وەربگریت و بنکریاس شەکرێ ڤەدگوھێزیتە کەرستێن نشایێ و روینی و دھێتە ئومبارکرن دناڤ شانەیێن لەشیدا، دەمێ رێژەیا خوارنێ پتری وی ئەنسولینێ دھێتە ھاڤێتن لێھات، ل وی دەمی بنکریاس دێ تووشی وەستیانێ بیت و شیان نامینن ب کارێ خۆ راببیت و شەکر دێ دناڤ خوینێ دا کومڤەبیت و بەرە بەرە زێدەدبیت ھەتا مرۆڤ تووشی نەخوشیا شەکرێ دبیت، ھەردیسان گوتژی کو نوکە ل جیھانێ ھەمیێ نەخوشێ شەکرێ بۆ دەمەکێ درێژ رۆژانە ١٠-١٢ دەمژمێران خوارنێ ناخوت و پاشی دەست ب خوارنەکا سڤک دخوت و ئەڤ چارەسەریە نوکە ل ھەموو جیھانێ بۆ دەمێ سێ حەفتیان کار پێ دھێتە کرن و ئەنجامێن وێ گەلەک باشن بۆ چارەسەریا نەخوشیا شەکرێ.
دکتوری دیارکر ژی کو رۆژی یا باشە بۆ چارەسەرکرنا ھندەک نەخۆشیێن پیستی ژبەرکو رێژا ئاڤێ ئەوا دگەھیتە خوینێ کێم دبیت و ل وی دەمی دێ رێژا ئاڤێ ل پیستی ژی کێم بیت و ئەو چەند دێ کارکەت ژبۆ کو بەرگریا پیستی زێدەببیت و بەرگریا نەخوشیێن میکروبی و نەخوشیێن ڤەگر بکەت و دیسان دژواریا ھندەک نەخوشیێن کو جھەکێ مەزن ل پیستی دگرن کێم دکەت وەکو نەخوشیا (ێەدەفیێ) و ھەروەھان رۆژی نەخوشیێن ھەستداریا پیستی کێم دکەت و ئاریشەیێن پیستێ دوھنی ژی کێم دبن.
تایبەتمەندێ نەخوشیێن گەھان دیسان گوت: رۆژیگرتن مرۆڤی ژ نەخوشیا شاھان دپارێزیت، ئانکو ئەوا دبێژنێ (نقرس) کو ژ ئەنجامێ زێدە خوارنێ و ب تایبەت گوشتێ سۆر پەیدادبیت، دگەل ڤێ چەندێ دێ نەباشیەک کەڤیتە د نوونەراتیا پروتینێن دناڤ گوشتی دا ھەین، ژ ئەنجامێ ڤێ چەندێ دێ ترشیێ بولیک دگەھان دا و ب تایبەت د تلێن پێیان دا کومڤەبیت و دەمێ گەە تووشی نەخوشیا ( نقرس) دبن دێ وەرمن و سۆر بن و دگەلدا دێ ئێشانەکا دژوار پەیدابیت و کێمکرنا رێژا خوارنێ چارەسەریا سەرەکی یە بۆ ڤێ نەخوشیێ.
ل دووماھیێ و دوارێ نەخۆشیێن گەھان دا، دکتوری دیارکر کو ئێشانا گەھان دگەل کەڤبوون و دومدرێژبوونا وێ زێدەدبیت و دبیتە ئەگەرێ وەرمینا وان پشکان، دگەل ڤێ چەندێ دەست و پێ تووشی کرێتیان دبن و ئەڤ نەخوشیە رەنگە د ھەر ژیەکی دا پەیداببیت و ب تایبەت ل ژیێ ٣٠-٥٠سالیێدا و ئاریشا سەرەکی ژی ئەوە کو نوشداریا نوو چ چارەسەریێن ڤەبر بۆ ڤێ نەخوشیێ نەدیتینە و ل وەلاتێ رۆسیا دبێژن رۆژیگرتن باشترین چارەسەری یە و ژبەرکو رۆژی مرۆڤی ژ بەرمایکێن خوارنێ و کەرستەیێن ژەھراوی دپارێزیت، بەلێ ب مەرجەکی کو ژ ٣ ھەفتیان کێمتر نەبیت و ئەنجامێن گەلەک باش ژێ دەردکەڤن.