ئه‌ڤرۆ نيوز:

كۆمبوونا شاندێ پارتى ديموكراتى كوردستان ل گه‌ل ئێكه‌تى نشتيمانى كوردستان ل سلێمانيێ ب دووماهى هات و  د. به‌رهه‌م ئه‌حمه‌د سالح جێگرێ دويێ يێ سكرتێرێ گشتى و نێچيرڤان بارزانى جێگرێ سه‌رۆكێ پارتى ديموكراتى كوردستان كۆنگره‌كێ هه‌ڤپسك ئه‌نجامدا.

به‌رهه‌م سالح راگه‌هاند كو ئه‌وان بۆ شاندێ پارتى دايه‌ زانين كو ئه‌و ب روونى ل گه‌ل سيسته‌مێ په‌رله‌مانى نه‌ ل هه‌رێما كوردستانێ.

جێگرێ دويێ يێ سكرتێرێ گشتيێ ئێكه‌تيێ دا زانين ژى كو ب ئاشكرايى ژى ل گه‌ل وێ چه‌ندێ نه‌ كو ده‌سپێكێ ئه‌ڤ پرسه‌ ل گه‌ل به‌رپرسان بهێته‌ گه‌نگه‌شه‌كرن.

نێچيرڤان بارزانى ته‌كست ل سه‌ر وێ چه‌ندێ كر كو دانوستاندن ل سه‌ر سه‌رۆكاتيا هه‌رێمێ و دستوورى كر و ئێكه‌تى ب هه‌ڤپشكا خوه‌ يا رێكه‌فتناما ستراتيژى وه‌سفكر.

جێگرێ سه‌رۆكێ پارتى دا زانين ژى كو هه‌بوونا هه‌ڤبووچوونان ل گه‌ل ئێك تشته‌كێ ئاسايى و د كاودانێن ژ ڤى ره‌نگى دا و بزاڤا وێ چه‌ندێ دكه‌ن كو بگه‌هنه‌ ئێك بۆچوون.

نێچيرڤان بارزانى دا زانين ژى كو ئه‌و وه‌كو پارتى ل گه‌ل سيسته‌مێ په‌رله‌مانى نه‌ و چو بووچوونێن جودا ل گه‌ل ئێك نينن و هه‌ڤبۆچوونين و دێ گه‌هينه‌ رێكه‌فتنێ.

بارزانى نه‌ڤه‌شارت ژى كو ئه‌وان چو پرۆژه‌ به‌رچاڤ نه‌كرينه‌ چونكو ب ديتنا پارتى لژنا دستوورى دێ ب كارێ خوه‌ رابيت و هه‌موو به‌رهه‌ڤيان ئاماده‌ كه‌ت و گۆت: “ئه‌و لژنا 21 كه‌سى دێ پرۆژێ دستوورێ هه‌رێما كوردستانێ و هه‌موو ئه‌و پێدڤيێن هه‌ين دابين كه‌ن ژ پرسيا سه‌رۆكاتيا هه‌رێمێ و چاوانيا هه‌لبژارتنێ و هه‌موو ئه‌و تشتێن د ناڤ دستوورى دا هه‌ين ئاماده‌ بكه‌ن”.

ل دۆر سيسته‌مێ حوكمرانيێ ژى ل هه‌رێما كوردستانێ نێچيرڤان بارزانى گۆتژى: “سيسته‌مىێ هه‌رێما كوردستانێ نوكه‌ ژى په‌رله‌مانى و ئه‌و د خه‌له‌تن يێن دبێژن سيسته‌مێ سه‌رۆكاتى يه‌، ل كوردستانێ سيسته‌مه‌كێ تێكه‌له‌ و جوداهيا مه‌ ل سه‌ر وێ چه‌ندێ يه‌”. ئاماژه‌ ب وێ چه‌ندێ ژى كر كو كار ژ بوو وێ چه‌ندێ دكه‌ين هه‌ڤسه‌نگيه‌ك هه‌بيت، نه‌ ده‌سته‌لات هه‌موو ل لايێ سه‌رۆكێ هه‌رێمێ و نه‌ ژى چو جهێن دى كۆم ببيت ئه‌ڤجا ئه‌ڤه‌ يێ پارتى بيت يان هه‌ر لايه‌نه‌كێ دى.

به‌رهه‌م سالح ل دۆر رێكه‌فتنا ستراتيژى يا پارتى و ئێكه‌تيێ ژى دا زانين كو ئه‌و رێكه‌فتن بۆ قووناغا پشتى شه‌رێ براكوژيێ ده‌ستكه‌فته‌كێ مه‌زن بوو، به‌لێ نوكه‌ نه‌خشه‌يێ سياسى ل هه‌رێما كوردستانێ هاتيه‌ گوهۆڕين و وه‌كو جاران نه‌مايه‌ و گۆت: “نوكه‌ پێدڤيه‌ هه‌موو لايه‌نێن سياسى يێن كوردستانى دوور ژ جوداهيێن هه‌ين، نوكه‌ دڤێت هه‌موو لايه‌ن خوه‌ نێزيكى ئێك بكه‌ن و د به‌رژه‌وه‌ندا گشتى دا بڕيارێ بده‌ن”.

ده‌رباره‌يى ئه‌و كارێ په‌رله‌مانێ كوردستانێ ل 23ى خزيرانێ ب ئاماده‌بوونا قونسلێ ئيرانێ كرى، نێچيرڤان بارزانى دا زانين كو ب تنێ نه‌ خواندنا ئێكێ بوو پرۆژه‌كێ به‌لكو شكاندنا وێ رێكه‌فتنا ناڤبه‌را هێز و لايه‌نێن سياسى بوو ئه‌وا حوكمه‌ت پێك ئينايى و پێدڤى نه‌بوو هاتيه‌ كرن.

ئه‌ڤرۆ رۆژا ئێكشه‌مبى رێكه‌فتى 5ى تيرمه‌ها 2015ێ شاندێ پارتى ب سه‌رۆكاتيا نێچيرڤان بارزانى جێگرێ سه‌رۆكێ پارتى ديموكراتى كوردستان ل گه‌ل شانده‌كێ بلندێ ئێكه‌تى نشتيمانى كوردستان كو پێكهاتى بوو ژ هه‌ر ئێك ژ كوسره‌ت ره‌سۆل، به‌رهه‌م سالح، مه‌لا به‌ختيار، هێرۆ ئيبراهيم ئه‌حمه‌د، عيماد ئه‌حمه‌د، حاكم قادر حه‌مه‌جان و چه‌ند ئه‌ندامه‌كێن دى كۆمبوو.

مه‌ره‌م ژ سه‌ره‌دانا پارتى بۆ لايێ ئێكه‌تيێ دانوستاندن بوو ل سه‌ر قانوونا سه‌رۆكاتيا هه‌رێما كوردستانێ كو ب گۆره‌يى ئه‌و پێزانينێن ل به‌ر ده‌ست پارتى داخوازا سيسته‌مێ نيڤ سه‌رۆكاتى و نيڤ په‌رله‌مانى كريه‌.

بڕياره‌ ئه‌ڤرۆ شاندێ پارتى ديموكراتى كوردستان سه‌ره‌دانا بزاڤا گۆڕان ژى بكه‌ت بۆ هه‌مان مه‌به‌ست ژى ل گه‌ل كۆم ببيت.