ئه‌ڤرۆ نیوز، ئه‌كره‌م ئیبراهیم
ئه‌ڤرو سپێدێ به‌هزاد عه‌لى ئاده‌م پارێزگه‌رێ دهوكێ ب وه‌كاله‌ت پێشوازیا سه‌لاحه‌دین بابه‌كر وه‌زیرێ كاره‌با هه‌رێما كوردستانێ و شاندێ دگه‌لدا كر , دهه‌ڤدیتنه‌كێ دا ب ئاماده‌بونا رێڤه‌به‌رێ گشتى یێ كاره‌با پارێزگه‌ها دهوكێ به‌حسێ ره‌وشا كاره‌بێ و به‌رنامێن وه‌زاره‌تا كاره‌با هه‌رێما كوردستانێ بو باشتر كرنا كه‌رتێ كاره‌بێ و نه‌هێلانا كێما سیان دڤى كه‌رتێ گرنگدا هاته‌ كرن.
پارێزگه‌رێ دهوكێ ب وه‌كاله‌ت دیار كر كو ره‌وشا پارێزگه‌ها دهوكێ پێدڤى ب پێتر پشته‌ڤانى و هاریكاریێ یه‌ دبیاڤێ كاره‌بێ ژلایێ حكومه‌تا هه‌رێما كوردستانێ ڤه‌ ژبه‌ر كو نوكه‌ 23 كه‌مپێن ئاوارا و په‌نابه‌ران ل دهوكێ زێده‌بوینه‌ و روژانه‌ كاره‌به‌كا مه‌زن لێ دهێته‌ مه‌زاختن و گه‌له‌ك خێزانێن ئاوارا نوكه‌ ژبلى ئه‌وێن ل كه‌مپا ل ناف باژێرى ژى ئاكنجینه‌ و دهوك دوو به‌رامبه‌ر به‌رى نوكه‌ لیهاتیه‌.
هه‌روه‌سا رێڤه‌به‌رێ گشتى یێ كاره‌با پارێزگه‌ها دهوكێ ئامار و داتا یێن مه‌زاختنا كاره‌بێ ل كه‌مپێن سنورێ پارێزگه‌هێ و به‌روكێن شه‌رى دژى داعش دیار كرن و دیار كر كو ل زفستانێ بو كه‌مپێن ئاوارا و په‌نابه‌را 113 میگاوات پێدڤى نه‌ هه‌كه‌ هه‌ر خێزانه‌ك 6 ئه‌مپیرا بكار بینیت و ل هاڤینێ 60 میگاوات پێدڤى نه‌ و زێده‌بارى روژانه‌ 60 میگاوات بو به‌روكێن شه‌رى دهێنه‌ دابین كرن و به‌حسى وان كارا كر یێن بو كه‌مپا هاتینه‌ كرن كو 422 گهوركێن كاره‌بێ هاتینه‌ دانان دگه‌ل تێله‌ و ستینكێن كاره‌بێ یێن پێدڤى .
ژلایێ خوڤه‌ وه‌زیرێ كاره‌با هه‌رێمى سوز دا ئه‌وا دشیان دا بیت بو پارێزگه‌ها دهوكێ ژبه‌ر هاتنا ڤێ رێژا ئاوارا بهێته‌ كرن .
دیڤدا دپرێس كونفرانسه‌كى دا سه‌لاحه‌دین بابه‌كر وه‌زیرێ كاره‌با هه‌رێما كوردسنتانێ دیار كر كو ئارمانجا سه‌ره‌كى ژ سه‌ره‌دانا شاندێ وه‌زره‌تا كاره‌بێ بو دهوكێ داكو ژ نێزیك ئاگه‌ه ژى پێدڤى و كێم و كاسیێن كه‌رتێ كاره‌بێ ل سنورێ پارێزگه‌هێ هه‌بیت هه‌روه‌سا دانانا به‌رێ بنیاتى بو پروژه‌كێ ستراتیژى و گرنگ ئه‌وژى پروژێ هایدروپاوه‌رێ دیره‌لوكێ ل گه‌لیێ ره‌شاڤا یه‌ كو جارا ئێكێ یه‌ پشتى پروژێ دوكان و ده‌ربه‌ندیخان پروژه‌كى بڤى ره‌نگى ل هه‌رێما كوردستانێ دهێته‌ دانان و دێ ب قه‌رێ ژاپونى ب رێكا ئاژانسا جایكا هێته‌ بجهئینان و بریاره‌ 37 مێگاواتێن كاره‌بێ به‌رهه‌م بینیت و برێكا ئاڤێ دێ كار كه‌ت و ژلایێ ئابورى ڤه‌ گه‌له‌ك یێ گرنگه‌ , و ئه‌ف پروژه‌ ژ وان پروژا یه‌ یێن دپلان و ستراتیژیه‌تا حكومه‌تا هه‌رێما كوردستانێ هه‌ى كومه‌ دڤیت مه‌زاختیێن كاره‌بێ كێم بكه‌ین و ڤى پروژه‌ى پێدڤى ب سوته‌مه‌نیێ نینه‌ ,
بو شنگارێ وه‌زیرێ كاره‌بێ گوت : حكومه‌تا هه‌رێما كوردستانێ پلانا ئاڤه‌دانكرنا شنگارێ هه‌یه‌ و سه‌روكێ حكومه‌تا هه‌رێمێ یا راگه‌هاندى كو كاره‌كێ سه‌ره‌كیێ حكومه‌تێ دێ ئاڤه‌دانكرنا شنگارێ بیت و ئه‌م وه‌كو وه‌زاره‌تا كاره‌بێ دێ مه‌ژى پلان هه‌بیت و ستافێ پارێزگه‌ه دهوكێ دێ سه‌ره‌دانا ده‌ڤه‌رێ ده‌ن دا بزانن چ پێدڤیه‌ بو شنگارێ و ده‌وروبه‌ران بهێته‌ كرن.