ئەڤرۆ نيوز:
بەرپرسێ پشکا ڕاگەھاندنێ ل رێڤەبەریا گشتی یا رێک و پران ل دھۆکێ بۆ ئەڤرۆ دیار کر، تیمێن رێڤەبەریا گشتی یا رێک و پران دەست ب ڤەکرن رێیێن سەرەکی و چێکرنا سەنگەران کریە بۆ ھێزێن پێشمەرگەی.
نەوزاد محەمەد سالح، بەرپرسێ پشکا ڕاگەھاندنێ ل رێڤەبەریا گشتی یا رێک و پران ل دھۆکێ ئاشکرا کر، تیمێن وان ل گەل ئۆپراسیونا رزگارکرنا شنگالێ پشکداربوون و ھاریکاریا ھێزێن پێشمەرگەی دکرن بۆ ڤەکرن و دروستکرنا رێیێن سەرەکی و گۆت: “تیرۆرستێن داعش ژ ترسێن پێشمەرگەی دا گەلەک رێیێن سەرەکی گرتبوون و گەلەک قەسیسە پەقاندبوون”.
نەوزاد خویا ژی کر، تیمێن رێڤەبەریا گشتی یا رێک و پران ب شەفەر و ئامیرێن دی ڤە ل گەل ھێزێن پێشمەرگەی ل شنگالێ د بەرھەڤن و ل بەرۆکێن شەری سەنگەر و رەبیان بۆ ھێزێن پێشمەرگەی دروست دکەن و گۆت: “نوکە ئەم یێ خەندەکەکا پاراستنێ ل دۆر شنگالێ دکۆلین”.

ئەڤرۆ نیوز:

سەرۆکێ دەستەیا دەڤەرێن کوردستانێ یێن دەرڤەی ھەرێما کوردستانێ راگەھاند، ژبلی پێشمەرگەی، ھەبوونا ھەر ھێزەکا دی ل شنگالێ جھێ مەترسیێ یە، دبێژیت ژی پێدڤیە حوکمەتا ھەرێمێ و بەغدا و نەتەوێن ئێکگرتی بزاڤێن رژد بکەن بۆ ئاڤەدانکرنا شنگالێ.

نەسرەدین سەعید سەرۆکێ دەستەیا دەڤەرێن کوردستانێ یێن دەرڤەی ھەرێما کوردستانێ بۆ باس گوت، ھەبوونا ھێزێن پەکەکێ و حەشد شەعبی و چەند ھێزێن دی ل شنگالێ پشتی ئازادکرنا وێ، جھێ مەترسیێ یە و پێدڤیە تنێ پێشمەرگە و ھێزێن حوکمەتا ھەرێمێ ل وێرێ بمینن، نەکو ھێزێن دی.

نەسرەدینی دیارکر ژی، ددەمێ سالەکێ و سێ مەھان دا، داعشێ وێرانکاریەکا مەزن ب سەر شنگالێ و دەوروبەرێن وێ ئەنجامدایە و ژ ئەگەرێ وێ وێرانکاریا مەزن، پێدڤیە حوکمەتا ھەرێما کوردستانێ و حوکمەتا بەغدا و نەتەوێن ئێکگرتی و ھەڤپەیمان بھێنە سەر خەت ھەتاکو تشتەکێ باش بۆ شنگالێ بھێتە کرن و بھێتە ئاڤەدانکرن.
سەرۆکێ دەستەیا دەڤەرێن کوردستانێ یێن دەرڤەی ھەرێما کوردستانێ رۆھن کر ژی، ئاڤەدانکرنا شنگالێ دێ پێدڤی ب ملیۆنان دۆلاران بیت و بەری دەمەکی مە پرۆژەک پێشکەشی جڤاتا وەزیران کربوو کو سەرژمێریێ بکەین بۆ زیانێن ب وان دەڤەرێن کوردستانی کەفتین ئەوێن داعشێ ھێرش کرینە سەر، چونکی ئەو دەڤەرانە یێن کاڤل بووین، لەوما ئەم د چاڤەڕێی نە ل ڤان نێزیکان جڤاتا وەزیران رازیبوونێ بکەت بۆ ئەنجامدانا سەرژمێریێ بۆ تومارکرنا زیانان.
نەسرەدین سەعیدی ئاماژە دا وێ چەندێ کو پتر ژ نیڤەکا شنگالێ یا تووشی وێرانکاریێ بووی و بەری ھاتنێ داعشێ ژی، ئەو دەڤەرێن کورستانی یێن دەرڤەی ھەرێما کوردستانێ و ب تایبەتی شنگال، ژلایێ حوکمەتا ناڤەندی ل بەغدا چو گرنگیەک پێ نەھاتیە دان و خزمەتگوزاریێ باش بۆ نەھاتینە کرن.
ل دۆر زڤرینا خەلکێ شنگالێ، گوت ، ھەکە بارێ ئەمنی باش بیت، خەلکێ شنگالێ دێ بۆ جھێن خوە زڤرن، بەلێ دەم بۆ ڤێ چەندێ دڤێت، چونکی داعش ھەر جھەکێ بھێلیت، تژی دکەت ژ مین و تی ئێن تی، لەوما دڤێت بھێتە پاقژکرن ژ وان مین و تێ ئێن تی یان و پاشی خەلک بزڤریتەڤە.
ئاشکراژی کر، ب ئازادکرنا شنگالێ نوکە 96% ژ دەڤەرێن کوردستانی یێن ل بن کونترۆلا پێشمەرگەی ڤە و چاڤەڕێ دھێتە کرن ئەو دەڤەرێن کوردستانی یێن ماین ژی د دەستێ داعشێ دا، بھێنە ئازادکرن.