ئەڤرۆ نیوز:
ھەر مالەکا ژنەکا باش و مالکەر تێدا ھەبیت دێ وێ مالێ ئاڤەدان کەت و دێ شەنگستەکێ باش بۆ وێ مالێ دانیت، ژبەرکو ژن ھەردەم د مالێ دایە و چاڤدێریا خێزانێ و پەروەردەکرنا زارۆیان ل سەر ملێن وێ یە و ئەرکەکێ گرانتر ژ زەلامی ل سەر ملێن وێ یە، ھەروەسا ژن دشێت ببیتە ئەگەرێ ھندێ کو بھایەکێ باش بدەتە زەلامێ خوە و ناڤودەنگیەکێ بۆ دروست بکەت. شارەزایەکێ جڤاکی دبێژیت “ھەردەم ژن و زەلام تمامکەرێن ئێکن د رێڤەبرنا مالێ دا و ھەردو بەرپرسیارن”.
عایشا حەسەن ئافرەتەکا تەمەن ٥٠ سالە دبێژیت “ئەو ژنا سەروچاڤێن وێ دڤەکری بن و یا کەیف خۆش بیت و بھایەکێ مەزن بدەتە خێزان و کەسوکارێن خوە، ھەروەسا دەمێ مێھڤان و کەسێن بیانی ژی قەستا مالا وێ دکەن ب زمانەکێ جوان و خۆش و رووگەشی سەرەدەریێ دگەل بکەت، ئەو ژن دێ سەرێ زەلامێ خوە بلند کەت و ئەو مال ھەردەم دێ یا ئاڤەدان بیت و خەلک دێ قەست کەنێ و وێ ژنێ ژی دێ بھایەکێ باش د ناڤ خەلکی دا ھەبیت و دێ بیتە جھێ رێزگرتنا خەلکی”.
سەعید موحسن دانعەمرەکە دیار کر کو بھا و رێزگرتنا زەلامی ھەمی ژ ژنێ یە، ھەر مالەکا ژنەکا باش تێدا ھەبیت و یا دخێرا خێزان و زەلامێ خوە دا بیت، ئەو مال دێ یا ئاڤەدان بیت و خەلک دێ قەستا وێ مالێ کەن و دێ سەرێ زەلامێ خوە بلند کەت و گۆت “سەرکەفتنا ھەر زەلامەکی ب پشتەڤانیا ژنەکا مالکەرە، چونکی ژن ستوونا ھەرە سەرەکیە بۆ سەرکەفتنا ھەر زەلامەکی، ژبەرکو ژن مالێ برێڤە دبەت و زەلام ھەردەم ل مال نینە، لەورا مەزنان گۆتیە(مال ژنە بنیات خانی)”.
حاجی رەمەزان بێسکی شارەزایێ جڤاکی ل دۆر ڤێ مژارێ بۆ ئەڤرۆ خویا کر کو ھەردەم ژن و زەلام تمامکەرێن ئێکن د رێڤەبرنا مالێ دا و ھەردو بەرپرسیارن و ئەرکە ل سەر ملێن وان کو ئەو خێزانا خوە ب رەنگەکێ رێکوپێک و باش برێڤە ببەن، بەلێ ئەرکێ ژنێ بزەحمەتتر دبیت ژیێ زەلامی، چونکی ژن یا ل بەر مالێ و ئەو پتر ب مالێ ڤە یا گرێدایە و ژن پتر حەز دکەت مالا وێ یا رێکوپێک و جوان بیت و چ کێماسی لێ نەبن و گۆت “ھەردەم ژن رادبیت ب بەرھەڤرکا خوارن و ڤەخوارنێ و شووشتن و راکرن و دانانا مالێ و ھەروەسا پەروەردە و چاڤدێریا زارۆیان ژی دکەڤیتە ل سەر ملێن ژنێ پتر ژ یێن زەلامی، لەورا دیار دبیت کو ئەرک و زەحمەتا ژنێ پترە ژ یا زەلامی”.
شارەزایێ جڤاکی زێدەتر بۆ ئەڤرۆ خویا دکەت ھەکە ژن یا وەفادار و دلسۆز بیت بۆ زەلامی و مالا خوە و نەیا بەرەلا و بێ خەم بیت و مەزاختنێ زێدە نەکەت و یا ھاریکار بیت دگەل زەلامێ خوە دێ شێت سەرێ زەلامێ خوە بلند کەت و دێ شێت خێزانەکا سەرکەفتی ئاڤا کەت، لێ ھەکە ژن نەیا ھاریکار بیت بۆ زەلامێ خوە دێ بیتە ئەگەرێ خرابکرن و ژناڤبرنا وێ مالێ و گۆت “ھەکە ژن نەبیت مال و خێزان ژی نابن، ئەڤجا وەکو دیار رۆلێ ژنێ گرنگتر و بھاترە ژیێ زەلامی”.