ئەڤرۆ نیوز:
بریارە ل رۆژا پێنج شەمبیا بھێت چەندین بریار بھێنەدانێ ل سەر شێوازی کرنا خۆلا کوردستانێ یا وەرزێ ئەڤ سالە کو ژێدەرێن دەنگوباسی ل ئێکەتیا تەپا پێ یا کوردستانێ وەسا دیار دکەن رێڤەبرنا خۆلێ ل سەر ئەرکێ مللێن یانێن پشکدار ژی مای یە ھەکە ئەو ب خوازن دێ خول ھێتە برێڤەبرن.
ل کومبوونا رۆژا پێنج شەمبیا بھێت دێ بەحس ل سەر شێوازی کرنا خولێ ھێتەکرن کو ئێکەتیا کوردستانێ دڤێت سێ پشنیازا پێشکێشی یانێن پشکدار بکەت بۆ برێڤەبرنا خولێ ئەوژی یانێن پشکدار بھێنە بەلاڤەکرن ل سەر دو کوما یان ژی یاریێن خولێ ب ئێک قوناغا بھێنەکرن ئەڤ ھەردو شێوەزە دێ ھێنە دانێ  ژبەرکو زوربەیا یانە نوکە د قەیرانا دارایی دا نە.

ھێتە زانین ژی ئێکەتیا ناڤەندی دێ بۆ یانێن پشکدار دیارکەت ژی ھەکە د شیانێن یانێن پشکدار دابیت یاریێن خولێ وەکو سالێن بوری بھێنە برێڤەبرن ب شێوەیێ دو قوناغا، لێ دبیت ب ڤی شێوەی گەلەک یانە خوە ژ خۆلێ ڤەکێشین .
ژێدەرەکێ نێزیک ژ ئێکەتیا ناڤەندی بۆ ئەڤرۆ نیوز دیارکر دێ ل رۆژا پێنج شەمبیا بھێـت گەلەک بریار ھێنە دانێ و ھەکە ھژمارە یانێن دخوازن ژ یانێن نە خوازن زێدەتر لێ ھات وی دەمی دێ بریار ل سەر ژڤانی دەستپێکرنا خولێ ب فەرمی ھێتەدانێ و ھەر یانەکا خوە ژ خولێ ڤەکێشت دێ فەرمی کەڤتە دخولا پلا ئێک دا.
دەنگوباس وەسا دھێنە دیارکرن دبیت دو یانە خوە ژ خۆلا کوردستانێ ڤەکێشین ژبەرکو ھەتانوکە ئەو ھەردو یانە بێ دەنگن بەرھەڤیا خوە دیارنەکری یە بۆ پشکداریێ بەرامبەر دەھـ یانە بەردەوام راھێنانێن خوە کەن بۆ یاریێن وەرزێ نووی یێ خولا کوردستانێ.

ئەڤرۆ نیوز، ھەژار مەعروف:
چاڤەرێ دھێتەکرن سوباھی ل یاریگەھا دھۆک ل دەمژمێر ١:٣٠ نیڤرو ھەردو یانێن دھۆک و نەفت ھەمبەری ئێک بن ژ چارچوڤێ یاریێن قوناغا ١٦ ژ کاسا عیراقێ .
ل دور ڤێ یاریێ راھێنەرێ یانا دھۆک ئاشتی مستەفا کو دبیتە یاریا ئێکێ سەرپەرشتیا تیمێ کەت بۆ ئەڤرۆ نیوز دیارکر دڤێ یاریێ دا بتنێ دێ پشت بەستنێ ل سەر دھوکیا کەت و بێ پشکداریا پیشەکاران و یاریکەرێن دەرڤەی پارێزگەھێ یاریێ کەن و باوەریەکا مەزن ب شیانێن کورێن دھۆکێ ھەیە دێ ئەنجامەکێ باش ب دەستخوڤە ئینن.
ناڤبری ھەردیسان دیارکر ژی ل ماوێ بوری ئەوان کارکری یە ل سەر شێوازەکێ نووی یێ یاری بکەن و ھەردیسان کارکری یە ل سەر دەرونی یێ یاریکەران .
ئاستی مستەفا ئاماژە ب وێ چەندێ ژی کر د یاریا سوباھی دا ئاستێ یاریکەران بۆ وی یا گرنگە نە ئەنجام یاری ھەر دەمێ ئاستێ یاریکەران ل ئاستێ خوە بوو وی دەمی ژی باوەری ب تیمێ ھەبیت دێ ڤەگەریتە ئاستێ خوە یێ جاران.

ئەڤرۆ نیوز:
ستێرا ھەلبژارتیێ ئیسپانیا و یانا ریال مەدرید یا ئیسپانی رەئۆل گونزالیز ب دەستڤە ئینانا ناسناڤێ خولا ئەمریکا ل گەل تیما خوە نیویورک کوزمیس یا ئەمریکی پشتی د یاریا دووماھیێ دا شیان سەرکەفتنێ ل سەر تیما ئوتاوە توماربکەن ب سێ گولان بێ بەرامبەر.
ستێرا ئیسپانی ئەوێ بەری نوکە ١٦ سالا یاری ل یانا ریال مەدرید و ل گەل ڤێ یانێ شیای شەش ناسناڤێن خۆلا لیگا ئیسپانیا و سێ قارەمانێن خولا یێن ئەورپا زێدەباری چەندین ناسناڤێن دی جیھانی و ئەورپی ب دەستخوڤە بینت .
رەئول پشتی یانا ریال مەدرید ب جھـ ھێلای ماوێ دو سالان یاری ل یانا شالکە کر و پاش یاری ل یانا سەد یا قەتەری کر بۆ ماوێ سالەکێ و ڤێ دووماھیێ ھەڤبەستا یانا نیویورک کوزمیس ئیمزاکری و سەرجەمێ ٢٩ یاریا شیا ھەشت گولا توماربکەت د گونگرەکێ رۆژنامەڤانی دا پشتی یاریێ دیارکر ئەوی ل ڤێرێ دووماھی ب ژیانا خوە یا تەپا پێ ئینا.

ئەڤرۆ نیوز، ھەژار مەعروف:
کارگێریا یانا زاخۆ ب فەرمی ھەڤبەستا یاریکەرێ خوە یێ نووی و ھەلبژارتیێ ئولومپی عیراقێ حسێن عەبدولواحد راگەھاند کو ئەڤ یاریکەرە بەری چەند رۆژا ژلایێ راھێنەرێ یانا شورتە ھاتبو دۆرخستن.
سەرپەرشتێ تیما تەپا پێ یێ تیما زاخۆ تەھا عەبدولحکیم د داخویانیەکێ دا بۆ ئەڤرۆ نیوزدياركر  بەری چەند رۆژا رێککەفتن ل گەل یاریکەرێ ناڤبری ھاتبووکرن و پشتی دەست بەردانا خوە ژ یانا شورتە وەرگرتی ئەو ئەڤرۆ شیان ھەڤبەستا وی ب فەرمی راگەھینن.
ناڤبری ئاماژە ب وێ چەندێ ژی کر یاریکەر نوکە یێ ل گەل ھەلبژارتیێ ئولومپی عیراقێ و پشتی یاریێن ھەلبژارتیێ ئولومپی دێ ئێکسەر پەیوەندی ب یانا زاخۆ کەت.
ھەژی گوتنێ یە حسێن عەبدولواحد دەستپێکا ڤی وەرزی ژ یانا مینا ھاتبو ڤەگوھاستن بۆ یانا شورتە و پشتی راھێنەرێ یانا شورتە یێ نووی ئەرکێ تیمێ وەرگرتی دەھـ یاریکەر ژ پێکھاتیێ تیمێ دورخستن کو ئێک ژ ئەوان یاریکەران حسێن عەبدولواحد بوو.