ئەڤرۆ نیوز:
پشتی ئازادکرنا شنگالێ ژ ئالیێ ھێزێن پێشمەرگەیێن کوردستانێ رۆژنامە و ئاژانسێن ناڤدارێن جیھانی بەحسێ قارەمانەتی و ھێزا کوردان کرن و ئاژانسا بی بی سی د راپۆرتەکێ دا دیار کر کو ئازادکرنا شنگالێ دربەکا مەزن ل رێکخراوا تیرۆرستی یا داعشێ دا و ب ئازادیا شنگالێ دەرگەە بۆ ئازادیا مووسلێ ژی ڤەدبیت و کوردان سەلماند ئەو ھێزا ئازادیێ نە و دڤێت ھەموو وەلاتێن جیھانێ ھاریکاریا کوردان بکەن.
ئاژانسا بی بی سی د راپۆرتەکێ دا دیار کریە کو ئازادیا باژێرێ شنگالێ ژ ئالیێ ھێزێن پێشمەرگێن کوردستانێ دربەکا مەزن ل رێکخراوا تیرۆرستی یا داعشێ دا و کوردان سەلماند کو ئەو ب ھێزن و دشێن ھاریکاریا لەشکرێ عیراقێ ژی بکەن دا کو ئەو ژی دەڤەرێن کو نھا ل ژێر دەستێ داعشێ دانە ئازاد بکەن، چونکو کوردان ب شیانێن گەلەک کێم شیان دربێن مەزن ل داعشێ بدەن و ئازادیا شنگالێ نیشا ددەت کورد دشێن رۆلەکێ سەرەکی د ئازادیا مووسلێ و دەڤەرێن دی یێن عیراقێ بگێرن و دڤێت لەشکرێ عیراقێ ژی ھاریکاریا کوردان بکەت و وەک جاران دژبەریا ھێزێن پێشمەرگەی نەکەت.
د پشکەکا دی یا راپۆرتێ دا ھاتیە کو شنگال جھێ ستراتیژی بوو، ئازادکرنا وێ دەرگەە بۆ ئازادیا مووسل و گەلەک جھێن دی ڤەدکەت و ئازادیا شنگالێ نیشا دا کو داعش گەلەک لاواز بوویە و بەر ب نەمانێ ڤە دچیت، ئەو یەک د دەمەکێ دایە کو بەری نھا لەشکرێ دو دەولەتێن وەک عیراقێ و سووریایێ نەشیان خوە ل ھەمبەر داعشێ رابگرن و درەڤین و گەلەک دەڤەر کەڤتنە دەستێ داعشێ، لێ کوردان رەمزا داعشێ و ئەو ترسا کو وان دروست کربوون ژناڤ برن و دربەک مەزن لێ دا، لێ تایبەتمەندیا ئازادکرنا شنگالێ ئەوە کو ئێدی بۆ جیھانێ دیار بوو لەشکرێ سووریایێ و عیراقێ ژی دشێن شەرێ داعشێ بکەن و وان ژناڤ ببەن.
ئاژانسا رویتەرز یا نووچەیان ژی چەند راپۆرت سەبارەت ب ئازادکرنا شنگالێ بەلاڤ کرن و د راپۆرتەکێ ھاتیە دیار کرن کو ئازادکرنا شنگالێ سەرکەڤتنا ئازادیێ و دیموکراسیێ یە و سەرکەڤتنا روناھیێ یە ل دژی تاریتیێ و دڤێت جیھان قارەمانیا ھێزێن پێشمەرگەی ژبیر نەکەت، ئێدی دەم ھاتیە کو ئەمریکا و ئورۆپا ب رەنگەکێ جدی ھاریکاریا کوردان بکەن و چەکێن مودێرن بدەنە وان، ھەکە ئەو شیانێن کو د دەستێ لەشکرێ عیراقێ و سووریایێ دا ھەنە د دەستێ کوردان دا ھەبیت ئەو دشێن ب ساناھی داعشێ ل سووریا و عیراقێ دەرخینن و ژ بەر ھندێ ژی دڤێت وەلاتێن رۆژئاڤایی پێداچوونەکا باش د سیاسەتا خوە ل ھەمبەر کوردان دا بکەن، چونکو خوینا نھا کورد بۆ ئازادیێ درێژن دڤێت ب ھەروە نەچیت و دەم ھاتیە ئەمریکا و وەلاتێن ئورۆپا ب رەنگەکێ ئاشکرا پشتەڤانیا کوردان بکەن.
ل ئالیێ دی گەلەک مالپەر و تەلەفزیۆنێن جیھانێ ئازادیا شنگالێ وەک نووچەکا بلەز بەلاڤ کرن و راگەھاندن کو پێشمەرگێن کوردستانێ ب سەرۆکاتیا مەسعود بارزانی سەرۆکێ ھەرێما کوردستانێ شیان شنگالێ ژ دەستێ رێکخراوا تیرۆرستی یا داعشێ ئازاد بکەن، ئازادیا شنگالێ تا رادیەکێ کێم برینێن ئێزدیان سارێژ کر، لێ نھا پێدڤی ب ھندێ یە کو شنگال بھێتە ئاڤاکرن، ژ بۆ ئاڤەدانکرنا شنگالێ ژی دھێتە خواستن کو وەلاتێن رۆژئاڤا و ئەمریکا ھاریکاریا کوردان بکەن، چونکو ھەتا نھا ھەردەم بەحسێ وێ زۆلم و زۆرداریێ دھاتە کرن کو ل کوردێن ئێزدی ھاتیە کرن، شنگال بۆ ئێزدیان سمبۆلە و نھا ئەو باژێر ئازاد بوو و دەم ھاتیە کو رێکخراوێن جیھانی ژی ھاریکار بن دا کو شنگال ئازاد بیت.
ئاژانسا مێھر و فارس نیۆز و چەندین مالپەرێن ئیرانی ژی د راپۆرتێن جودا جودا دا ئازادیا باژێرێ شنگالێ ب دەستێ ھێزێن پێشمەرگێن کوردستانێ بەلاڤ کرن و راگەھاندن کو ھەر باژێر و دەڤەرەک ل عیراقێ ژ دەستێ تیرۆرستێن داعشێ بھێتە ئازادکرن جھێ دلخوەشیا ئیرانێ یە و دڤێت پێشمەرگە و لەشکرێن عیراقێ پێکڤە مووسل و دەڤەرێن دی یێن عیراقێ ژی ئازاد بکەن.

ئه‌ڤرۆ نیوز: ڤه‌ده‌ر ره‌شاڤایی:

داعش ستراتیژییه‌كا بێزاربوونێ گرتییه‌ به‌ر ئه‌و ژی ئه‌ڤه‌ یه‌ : ل ده‌مێ نووچه‌كێ نه‌خۆش هه‌بیت ب هێرش یان بزاڤه‌كا گه‌له‌ك توندوتیژ یا ژ نشكه‌كێ ڤه‌ ئه‌نجام دده‌ت.
ئه‌ڤه‌ ته‌كتیكه‌كه‌ كو ڤی گرۆپی به‌رییا نها ژی چه‌ند جاران بكارئیناییه‌، و ل رۆژا ئینییا بۆری ژی بۆ هه‌مان ته‌كتیك ڤه‌گه‌رییان، ب رێیا ده‌ستپێكرنا چه‌ند هێرشێن توند ل پاریسا پایته‌ختێ فره‌نسا.
ل ده‌ستپێكا رۆژا ئینی 13-11-2015 پێنتاگۆن راگه‌هاند كو وان كاروانێ جه‌لادێ داعش جیهادی جۆن (محه‌مه‌د ئه‌موازی) ل سوریا كرییه‌ ئارمانج و چێدبیت هاتبیته‌ كوشتن،
هه‌روه‌سا داعش دو شكه‌ستنێن مه‌زن یێن سه‌ربازی خارن ئه‌و ژی ژده‌ست دانا باژێرێ ستراتیژیێ شنگالێ و رزگاركرنا وێ ناوچێ ژئالیێ پێشمه‌رگه‌هێ كوردستانێ ڤه‌، و ژ ده‌ست دانا باژێرێ هۆل یێ رۆژئاڤا كوردستانێ و رزگاركرنا وێ ناوچێ ژ ئالیێ شه‌رڤانێن كورد (یه‌په‌گێ) ڤه‌.
ڤان هه‌ردو سه‌ركه‌فتنان ل سه‌رئێك رێیا داعش دناڤبه‌را ره‌قه‌ و مووسل بڕی كو دو ژ ناڤه‌ندێن وێ نه‌.
له‌ورا ب هه‌بوونا هێرشێن هێزێن كوردان و ئۆپه‌راسیۆنێن ئاسمانیێن ب هێز یێن هه‌ڤپیه‌مانیێ ل سه‌ر داعش، بۆ داعش سه‌ركه‌فتن د هێرشكرنێ دا ل باژێره‌كێ وه‌لاته‌كێ رۆژئاڤا دا ژ سه‌ركه‌فتنه‌كا هێرشكرنا سه‌ربازی دا د به‌رۆكان دا ب ساناهی تره‌، و بزاڤه‌كه‌ ژی بۆ ڤه‌شارتنا شكه‌ستنێن خوه‌ .

گۆتار: رۆژنامه‌ڤانێ (ViceNews) ئاریس رۆسینۆس