ئه‌ڤرۆ نيوز:

مه‌سعود بارزانى سۆپاسنامه‌ك ل دۆر رزگاركرنا قه‌زا شنگال به‌لاڤكر و تێدا سۆپاسيا وان هه‌موو لايه‌نان كر يێن بووينه‌ ئه‌گه‌رێن ڤێ سه‌ركه‌فتنێ و ئه‌ڤێ ل خوارێ ده‌قێ سۆپاسناما وى يه‌:

ئازادکرنا شنگالێ ل بن دەستێ تيرۆریستێن داعش ژ روویێ له‌شكرى و سیاسی و دیرۆکی ڤە سەرکەفتنەکی مەزن بوو ژ بوو گەلێ کوردستانێ کو ل سەر دەستێ پێشمەرگەیێن مەیێن قەھرەمان ھاتە تۆمار کرن. ئەڤ سەرکەفتنه‌ ب ھەموو ئالیەکى را دبێژيت ئێدی ئەو رۆژ چوو داگیرکەر و ستەمکار گەلێ کوردستانێ ب چەوسێنن. نھا گەلێ کوردستانێ سەربلندانە بەره‌ڤانيێ ژ خوە دکەت و دوژمنى دشکێنيت و پارێزەرێ بھایێن مرۆڤایەتیێیە ژی.

پشتی داگیرکرنا شنگالێ و ئەو کارەساتا ب سەرێ خووشک و برایێن مە یێن ئێزیدیان دا ھاتى ئەم ئامادە بوون ھەموو رێیەکێ ل بەر بگرین و ھەموو بهايه‌كى بده‌ین کو شنگالێ ئازاد بکه‌سن بۆ کو باوەری ب خوە بوون ژ بۆ گەلێ کوردستانێ و خووشک و برایێن مە یێن ئێزیدیان ڤەگەرينين و دوژمن و تيرۆرستان ژ ئاخا پیرۆزا کوردستانێ دەربێخین.

د دەمێن دەرباسبوویی دا خووشک و برایێن مە یێن ئێزیدی دو جاران زولم ل وان ھاتبوو کرن، ب سەدەما کوردبوونا وان ستەم ل وان ھاتیە کرن و ب سەدەما ئۆلێ ڤە ژی ھاتنە چەوساندن و نه‌خۆشى ديتينه‌. دخوازم خووشک و برایێن ئێزیدیان ژ وێ یەکێ پشت راست بكه‌م کو ھەردەم گەلێ کوردستانێ پالپشتێ وانن و ئەو بەشەکی ئەزیزێ کوردستانێ نە و پێشمەرگەى ب خوین و قوربانیدانا خوە ئه‌و ئێك سەلماند. کوردستان ژی وەلاتێ پێکڤەژیان و برایەتی و لێبۆرینا ئۆل و نەتەوەیێن جودايه‌ و دڤێت ئەو چاندا گەلێ کوردستانێ وەکی خوە بمینيت و بهێته‌ زه‌نگينكرن.

پیرۆزباھیا ئازادبوونا شنگالێ ل ھەموو ھەڤوەلاتیێن کوردستانێ دکه‌م کو ب دەست و پازویێ پێشمەرگەیێن قەھرەمان پێکھات. سەرکەفتنەکا مەزن کو ھەردەم دیرۆک ژ بیر ناکەت. ل ڤێرێ دا ب پێدڤى دزانم سۆپاسیا ئه‌مەریکا و ھێزێن ھەڤپەیمانان بکه‌م کو ل ئازادکرنا شنگالێ دا ب پالپشتیا ئاسمانیا بێ وێنە هاريكارێن پێشمەرگەى بوون. سۆپاسی وان ھەموو ھێزێن پشكداربوویێن پێشمەرگە و فەرماندەیێن وان دکه‌م کو ئه‌ڤ دەستانا مەزن تۆمار کر. سۆپاسیێن خوە یێن بێ پایان پێشکێشی پێشمەرگەیێن فەرماندەیا زێرەڤانی و یەکینەیێن پێشمەرگەیێن رۆژاڤا، فەرماندەیا شنگال، فەرماندەیا دھۆک، فەرماندەیا ھێزێن پشتەڤانی ئێك، فەرماندەیا بارزان، لەشکەرێ تایبەتی ئێك، لەشکەرێ گولان، لەشکەرێ تایبەتی دو، ھێزا دژی تيرۆر، ھێزا تایبەتا ئێك، ھێزا ٣٢، ھێزا ژینگەھا دھۆک، لیوایا ھەڤبەشێن سەر ب وەزارەتا پێشمەرگە، لیوایا ٤، لیوایا ٨، لیوایا ١٢، لیوایا ١١١ێ سەر ب یەکینەیا حەفتێ و ھێزێن خوەبەخشان دکه‌م کو ب ئیرادەیەکا پۆلایی بەشداری ئۆپەراسیۆنا ئازادکرنا شنگالێ بوون. سۆپاسیا یەکینەیێن سەر ب جڤاتا ئاساییشا ھەرێما کوردستانێ دکه‌م کو رۆلەکی وان یێ ب باندۆر ل برێڤەچوونا ئۆپەراسیۆنێ و گه‌ھاندنا زانیاریێن دروست و ھەماھەنگی ل گەل ھێزێن ھەڤپەیمانان و دانانا پلانا رزگارکرنا شنگالێ دا ھەبوو.

ئازادکرنا شنگالێ دەستانا قەھرەمانیا بێ وێنەیا زارۆک و گەدەیێن گەلێ کوردستانە و باندۆرەکا مەزن ل سەر باوەری ب خوە بوون و پاشه‌رۆژا گەلێ کوردستانێ ب جیھانێ دھێليت ژ بوو وێ یەکێ پێدڤى بوو گەلێ کوردستانێ ئاگاھداری رۆلێ وان ھێزان بيت کو پشكداری ئۆپەراسیۆنێ بوون و دیرۆک وان ب بیر بینيت.

ل دووماهیێ ھزاران سلاڤ ژ بوو گیانێ پاکێ شەھیدێن مە یێن نەمر را دشینم و ھيڤى ژ خودایێ مەزن دکه‌م کو شیفایا خێرێ بدەته‌ برینداران و ھيڤیا پاشارۆژەکا گەش ژ بۆ گەلێ کوردستانێ دخوازم.

مەسعود بارزانی

سەرۆکێ ھەرێما کوردستانێ

١٣-١١-٢٠١٥

ئه‌ڤرۆ نيوز:

نێچیرڤان بارزانی سەرۆکوەزیرێن ھەرێما کوردستانێ، پەیاما ئاڤاکرن و ب پارێزگەھبوونێ د ده‌ته‌ وەلاتیێن شنگالێ.

د پەیامەکێ دا ئازادکرنا شەنگالێ ل گەلێ کورد ب ئاواکێ گشتی و ب تایبەتی ل کوردێن ئێزدی پیرۆز کر و رادگاند کو د دەما ھەری زوو دا دێ ھەموو ھەولێن خوە ژ بۆ گه‌ره‌نتیکرنا پرانیا خزمەتێن بنگەھێن ژ وەلاتیێن شەنگالێ بدەن. ھەر د پەیاما خوە دا سۆپاسیا ئه‌مەریکا دکەت ژ بۆ ئالیکاریا وانا د هێریشا کۆنترۆلکرنا شەنگال دا.

ده‌قێ په‌ياما سه‌رۆك وه‌زيران

دلشادم کو تەڤی ھەستا ھەموو گەلێ کوردستانێ و ئازادیخوازێن جیھانێ، ل سەر ناڤێ حوکمەتا ھەرێما کوردستانێ، پیرۆزباھیێ ل مەسعود بارزانی سەرۆکێ ھەرێما کوردستانێ و فەرماندارێ گشتییێ ھێزێن چەکدار و سەرپەرشتیارێ گشتییێ ئۆپەراسیۆنا ئازادکرنا شەنگالێ و ھەموو پێشمەرگەیێن قەھرەمانیێن ڤێ داستانێ بکه‌م، ھەروەسا پیرۆزباھیێ ل گەلێ کوردستانێ ب ئاواکی گشتی و ب تایبەتی ژی کوردێن ئێزدییێن خۆشتڤی و میرێ ئێزدیان و بابا شێخ و ئەندامێن جڤاتا رۆحانی و ھەموو وەلاتیێن دەڤەرا شەنگالێ دکه‌م ب ھەلکەفتنا ئازادکرنا شەنگالێ، سەرێ رێز و حورمەتێ ژی ژى بۆ جانێ پاقژێ شەھیدێن ڤێ قەھرەمانیا پێشمەرگەیان دتەوینم و ئەم ھەڤپارێن کۆڤانا کەسووکارێن وان نە و ھێڤیا چارەسەریا لەزگین ژ برینداران را دخوازم.

ل ڤێرێ ئەم سۆپاسیەکا مەزنیا سەرۆکاتی و ئیدارە و لەشکەر و گەلێ ئه‌مەریکا دکه‌ين ژ بۆ ئێکدەنگیا وان ل سەر ئالیکاریکرنا پێشمەرگەیان و ئالیکاریا وان یا د ئۆپەراسیۆنا ئازادکرنا شەنگالێ دا. ئەم ھەروەسا سۆپاسیا ھەموو وەلاتێن ناڤا ھەڤپەیمانیا ل دژی داعشێ دکه‌ين و سۆپاسیا ھەموو وەلاتێن جیران و دۆست دکه‌ين کو د ب روو ب رووبوونا داعشێ و دوورخستنا وێ ژ خاکا کوردستانێ و پاراستنا ئازادی و ب ھەڤرەژیانێ دا ل کوردستانێ، پشتگیرێن گەلێ کوردستانێ بوونە.

ئازادکرنا شەنگالێ ژ بۆ مە وەکو گەلێ کوردستانێ و ھەموو ئازادیخوازا و مرۆڤپەروەرێن جیھانێ، مانایەکا مەزنیا خوە ھەیە. تيرۆرستێن داعشێ کارێن پر قرێژ و ھۆڤانە ل سووریێ و عيراقێ و دەڤەرێ پێکئيناینە، لێ بەلێ کۆمکوژی و ھۆڤیتیا ھەری مەزن ل شەنگالێ پێک ئانی. داعشێ ئەنفالەکا نوو ل شەنگالێ د دەرھەقا نەتەوەیا کورد دا پێک ئينايه‌، ب سەدان ژن و کچێن کورد رەڤاندن، تەڤی کو ب ھەولێن حوکمەتا ھەرێما کوردستانێ ھژمارەکا مەزنا وان ھاتنە رزگارکرن ژی، لێ بەلێ مخابن ھێشتا گەلەک د بن دەستێ وان دا مانە و ھەتا یەک ژنا کوردا ئێزدی ژی د دەستێ داعش دا مابيت، کۆڤانا کۆمکوژیا شەنگالێ د دل و ھەستا مە دە ب دووماهی ناهێت. ئەم دێ ھەموو ھەولێن خوە ب کار بینن ژ بۆ رزگارکرنا ھەموو ژن و کەچێن مە یێن د دەستێ داعشێ دا،  ھەروەسا حوکمەتا ھەرێما کوردستانێ دێ ل سەر ھەولێن خوە بەردەوام بيت ژ بۆ کو کۆمکوژیا شەنگالێ د سەویا ناڤدەولەتی دا وەکو جينوسايد بێتە ناسکرن.

د ئەنجاما هێریشا ھۆڤانەیا تيرۆریستێن داعشێ دا، شەنگال راستی وێرانکاریەکا مەزن ھاتیە، بەریا نھا ژی مە ل سەر مەزارێ شەرفەدین ل دەڤەرا شەنگالێ راگەھاندبوو و نھا ژی دوبارە دکه‌م کو گه‌ره‌نتیکرنا خزمەتێن گشتی و ئاڤاکرن و پێشدابرنا باژێرێ شەنگالێ و دەڤەرێ ب ئاوايه‌کی گشتی، دێ ژ کارێن پێشنیێن حوکمەتا ھەرێما کوردستانێ بيت، ئەم ژ جڤاکا ناڤنەتەوەیی ژی دخوازين کو د ڤی واری دا ئالیکاریا مە بکەن. ھەروەسا ژ خەلکێ خۆشتڤیێ شەنگالێ را ژی دبێژم کو ئەمێ ھەموو ھەولێن خوە د وارێ یاسایی و ئیداری دا ب کار بینن ژ بۆ کو پشتگیریا داخوازێن وەلاتیێن دەڤەرێیێن ب پارەزگەھبوونێ بکه‌ن.

جاره‌كا دى ئەڤ سەرکەفتنه‌ ل ھەموو گەلێ کورد پیرۆز بيت.

نێچیرڤان بارزانی

سەرۆکوەزێرێن ھەرێما کوردستانێ

١٣-١١-٢٠١٥