ئه‌ڤرۆ نيوز:
سپێده‌هيا ئه‌ڤرۆ ژ ئه‌نجامێ رۆژا دويێ يا ئۆپه‌راسيۆنا رزگاركرنا شنگالێ، هێزێن پێشمه‌رگه‌ى چوونه د ناڤ شنگال دا و و لقێ پارتى ئالايێ زه‌ر بلند كر.
ئۆمێد وه‌لاتى، په‌يامنێرێ ئه‌ڤرۆ نيوز د ناڤ ئۆپه‌راسيۆنا رزگاركرنا شنگال دا، راگه‌هاند كو سپێده‌هيا ئه‌ڤرۆ رۆژا ئه‌ينى رێكه‌فتى 13ى چريا دويێ هێزێن پێشمه‌رگه‌ى شيان بچنه د ناڤا شنگال دا و كادرێن پارتى ديموكراتى كوردستان چوونا ناڤ باره‌گايێ لقا 17 و جاره‌كا دى ئالايێ زه‌ر بلند كر.
ئەڤرۆ نیۆز، قائید میرۆ:
سپێدەھیا ئەڤرۆ ھێزێن پێشمەرگەی ھێرشەکا داعش ل ناحیا گوێڕ یا رۆژئاڤایێ باژێڕێ ھەولێرێ تێكشکاند و ٢٠ تەرمێن داعش کەفتینە د دەستێ پێشمەرگەی دا.
حاکم جەمال، جێگرێ بەرپرسێ میحوەرێ گوێڕ بۆ ئەڤرۆ نیۆز گۆت: “سەرێ سپێدا ئەڤرۆ تیرۆرستێن داعش ل نێزیک ناحیا گوێڕ ھێرشەکا بەرفرەهـ کرە سەر ھێزێن پێشمەرگەی ب تایبەتی نێزیک پرا گوێڕ و ھەتا سپێدەھیا ئەڤرۆ شەڕۆ پێکدادان د ناڤبەرا پێشمەرگە و تیرۆرستان د بەردەوامبوون”.
حاکم جەمال زێده‌تر گۆت: “پێشمەرگە شیا ھێرشا داعش بشکێنیت و پلانا داعش بۆ کۆنتڕۆلکرنا ناحیا گوێڕ ھاتە ژناڤبرن، د ئەنجامێ ھێرشا ئەڤرۆ دا پتری ٢٠ چەکدارێن داعش کەلەخێن وان بن سەنگەرێن پێشمەرگەی ماینە و داعشەکژی ژل ایێ پێشمەرگەی ڤه ھاتیە دەستەسەرکرن”.
ئه‌ڤرۆ نیوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا شه‌مبى رێكه‌فتى 14ى چريا دويێ 2015 ئه‌سمانێ دهۆكێ دێ ساهى بيت ل گه‌ل هنده‌ك ئه‌ورێن كێم ل جهێن جودا.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ فشارێن بلندێن وه‌لاتێ توركيا بۆ سه‌ر هه‌رێما كوردستانێ دهێته پێشبينيكرن ئه‌سمانێ دهۆكێ دێ ساهى بيت ل گه‌ل هنده‌ك ئه‌ورێن كێم ل جهێن جودا.
پشكا پێشبينيان دايه زايه زانين كو دێ ئاراستێ باى ژى دێ باشوورێ رۆژهه‌لات بيت ب ره‌نگه‌كى د ناڤبه‌را 10 هه‌تا 20 كم دا و ماوێ ديتنێ ژى 10 كم بيت و پلێن گه‌رمێ ژى دێ د ناڤبه‌را 7 بۆ 19 پلان دا بيت.
ئەڤرۆ نیۆز:
یاریا کلاسیکو یا ئەمریکا ژوری دناڤبەرا ھەلبژارتیێ بەرازیل و ئەرژەنتین ژ ڤاڤارتنێن موندیالا ٢٠١٨ ل روسیا ھاتە پاشێخستن ئەوا بریار بوو بەری دەمەکێ دی ھاتباکرن، ژبەر ئەو باران بارینا ل پایتەختێ ئەرژەنتین بوینس ئیرس بارى .
دادڤانێ یاریێ بریار دا یاری بھێتە پاشێخستن بو دەمەکێ دی ژبەرکو ئەردێ یاریگەھێ نە یێ ھاریکار بۆ یاری ل سەر بھێتەکرن.
رۆژناما ئولی یا ئەرژەنتینی د نوچەیەکێ خوە دا دیارکری یە بریارە یاری شەڤەکا دی ل دەمژمێر سێ شەڤ بھێتەکرن.
ئه‌ڤرۆ نيوز:
ڤه‌كۆلينه‌كا زانستى يا نوو گه‌هشتيه وى ئه‌نجامى كو ب كارئينه‌رێن “ئايفۆن”ێ ب ره‌نگه‌كێ گشتى ژ بكارئينه‌رێن جۆرێن دى يێن زيره‌ك زێده‌تره.
ئه‌ڤرۆ نيوز:
كۆمسيۆنا بلندا هه‌لبژارتنان ل وه‌لاتێ توركيا ب فه‌رمى ئه‌نجامێن هه‌لبژارتنێن په‌رله‌مانێ وى وه‌لاتى راگه‌هاندن و حه‌فتيا بهێت ئێكه‌مين روونشتنا په‌رله‌مانى دێ هێته ئه‌نجام دان.
سه‌عدى گۆڤه‌ن، سه‌رۆك جڤاتا بلندا هه‌لبژارتنێن توركيا، ب فه‌رمى ئه‌نجامێن هه‌لبژارتنێن په‌رله‌مانێ وى وه‌لاتى راگه‌هاند ئه‌وا ئێكى چريا دويێ برێڤه چووين.
ب گۆره‌ى وان ئه‌نجامان، پارتيا داد و گه‌شه‌پێدان “ئاكه‌په” 317 كورسى و پارتيا كۆماريا گه‌ل “جه‌هه‌په” 134 كورسى، پارتيا ديموكراتا گه‌لان “هه‌ده‌په” 59 كورسى و پارتيا بزاڤا نه‌ته‌وه‌په‌رست “مه‌هه‌په” 40 كورسى ب ده‌ست ڤه ئيناينه.
سه‌باره‌ت ب رێژا پشكداريكرنێ گۆڤه‌ن راگه‌هاند: رێژا پشكداريێ د هه‌لبژارتنان دا “85.23% بوويه و 48 مليۆن و 538 هزار و 695 كه‌سان ده‌نگ دايه و ژ وێ رێژێ ژى 697 هزار و 464 ده‌نگ نه‌هاتينه هژمارتن، ده‌نگێن هاتينه هه‌ژمارتن ژى 47 مليۆن و 840 هزار و 231 ده‌نگ بوون.
بڕياره رۆژا سێشه‌مبيا بهێت ژى روونشتنا ئێكێ يا په‌رله‌مانێ نوو يێ توركيا بهێته ئه‌نجام دا كو دێ يا تايبه‌ت بيت ب سووند خوارنا ئه‌ندامێن په‌رله‌مانێ و هه‌لبژارتنا سه‌رۆك نوو يێ په‌رله‌مانێ ئه‌وى وه‌لاتى.
ئه‌ڤرۆ نيوز:
مه‌سعود بارزانى و حه‌يده‌ر عه‌بادى ب تله‌فۆنێ دانوستاندن ل سه‌ر به‌ره‌يێن شه‌رى و سه‌ركه‌فتنێن پێشمه‌رگه‌ى ل شنگال كر.
سه‌رۆكاتيا هه‌رێما كوردستانێ راگه‌هاند كو د راگه‌هاندنه‌كێ دا ئاشكه‌را كريه كو ئه‌ڤرۆ رۆژا پێنجشه‌مبى رێكه‌فتى 12ى چريا ئێكێ يا 2015ێ د په‌يوه‌نديه‌كا تله‌فۆنى دا، مه‌سعود بارزانى سه‌رۆكێ هه‌رێما كوردستانێ و حه‌يده‌ر عه‌بادى يێ سه‌رۆك وه‌زيرێن عيراقا فيدرال، كاودانێن مه‌يدانى يێن به‌ره‌يێن شه‌رى و روو ب رووبوونا تيرۆرستان گه‌نگه‌شه كر.
ئاماژه ب وێ چه‌ندێ ژى كر، د ڤێ په‌يوه‌نديا تله‌فۆنى دا، سه‌رۆك بارزانى سه‌ركه‌فتن و پێشره‌ويێن هێزێن پێشمه‌رگه‌يێ كوردستانێ ل ده‌رڤه‌ى ده‌ڤه‌را شنگال و بهايێ وان سه‌ركه‌فتنان و كارتێكرنا وان ل سه‌ر شكه‌ستن و ژناڤبرنا داعش بۆ سه‌رۆك وه‌زيرێن عيراقێ گه‌نگه‌شه‌كر.
سه‌رۆكاتيا هه‌رێمێ ئاشكه‌را ژى كر كو سه‌رۆك وه‌زيرێن عيراقێ پيرۆزباهى ل بارزانى كر و ده‌ستخۆشى ل سه‌ركه‌فتنێن هێزا پێشمه‌رگه‌يێ كوردستانێ كر د ئۆپه‌راسيۆنێن ئازادكرنا شنگال دا.
ئه‌ڤرۆ نيوز:
سه‌رۆكێ ئێكه‌تيا مامۆستايێن كوردستانێ راگه‌هاند: بزاڤێن وان بۆ دووڤچوونێ ل دۆر مووچێ مامۆستايان د به‌رده‌وامن و په‌يوه‌ندى ب جێگرێ سه‌رۆكێ حوكمه‌تا هه‌رێمێ كريه و دبێژيت: “ئۆمێد دكه‌ين حه‌فتيا بهێت مووچێ مامۆستايان بهێته به‌لاڤكرن و به‌ردوام ژى د بزاڤێن هندێ دانه”.
عه‌بدولواحد حاجى، سه‌رۆكێ ئێكه‌تيا مامۆستايێن كوردستانێ بۆ خه‌لك راگه‌هاند كو دووڤچوون ل سه‌ر پێدانا مووچێ مامۆستايان يێ هه‌يڤا ته‌باخێ يێ 2015ێ وى په‌يوه‌ندى ب جێگرێ سه‌رۆك وه‌زيران و سكرتێرێ جڤاتا وه‌زيران كريه ئه‌وان ژى گۆتيه كو ئه‌و ل سه‌ر بزاڤێن خوه بۆ دابينكرنا مووچه‌ى بۆ مامۆستايان د به‌رده‌وامن.
گۆتژى: “ب هيڤى نه ب زووترين ده‌م مووچێ هه‌يڤا ته‌باخێ بهێته به‌لاڤكرن، هيڤيا من ژى ئه‌وه حه‌فتيا داهاتى ده‌ست ب به‌لاڤكرنا مووچه‌ى بهێته كرن”.
ب گۆره‌ى نوچه‌يه‌كى كو راديۆيا ناڤخۆ ژى ژ ژێده‌ره‌كى ژ جڤاتا وه‌زيران به‌لاڤكريه، دايه زانين كو رۆژا ئێكشه‌مبيا بهێت دێ ده‌ست ب به‌لاڤكرنا مووچێ وه‌زاره‌تا په‌روه‌ردێ و مامۆستايێن هه‌رێما كوردستانێ هێته كرن.
ئه‌ڤرۆ نیوز: ڤه‌ده‌ر ره‌شاڤایی:
مه‌سعود بارزانی فه‌رماندێ گشتیێ هێزێن پێشمه‌رگه و سه‌رۆكێ هه‌رێما كوردستانێ راگه‌هاندنه‌ك لدۆر ئۆپه‌راسیۆنا ئازادكرنا شنگالێ به‌لاڤكر كو ئه‌ڤه ده‌قێ وێ یه:
جه‌ماوه‌رێ خۆشتڤیێ كوردستانێ
ل سه‌رێ سبا رۆژا پێنجشه‌مبی 12ـێ 11ـێ 2015 هێزێن پێشمه‌رگه‌یێ كوردستانێ ل ژێر سه‌رپه‌رشتییا راسته‌وخۆییا سه‌رۆك بارزانی و ب پشته‌ڤانییا ئاسمانییا هێزێن هه‌ڤپه‌یمانان، ژ سێ به‌رۆكان ڤه هه‌لمه‌تا ئێكلاكه‌ر یا ئازادكرنا شنگال و ده‌ورۆبه‌رێن وێ ژ ده‌ستێن داگیركارییا تیرۆرستێن داعش ده‌ستپێكر.
د ڤێ ئۆپه‌راسیۆنێ دا داعش تۆشی شكه‌ستنه‌كا مه‌زن بوون و پتری سه‌د ته‌رمێن خوه لدووڤ خوه هێلان و بده‌هان ترۆمبێلێن سه‌ربازیێن وان هاتنه تێكشكاندن.
د ئێكه‌م رۆژا ئۆپه‌راسیۆنا ئازادكرنا ده‌ڤه‌رێ شنگالێ دا هێزێن پێشمه‌رگه‌یێ كوردستانێ ب سه‌ركه‌فتیانه ئارمانجێن خوه بده‌ستڤه‌ئینان و 75 سه‌دێ یا ئۆپه‌راسیۆنێ ب سه‌ركه‌فتیانه بداوی هاتییه.
ژ ئه‌نجامێ هه‌لمه‌تا هێزا پێشمه‌رگه‌یێ كوردستانێ ل رۆژا پێنجشه‌مبی و د چارچووڤێ ئۆپه‌راسیۆنێن ئازادكرنا شنگالێ دا، پتری 150 كیلۆمه‌ترێن چوارگۆشه ژ ئاخا پیرۆزا كوردستانێ ژ داعش هاته پاقژكرن و پێشمه‌رگه د پێشڤه‌چوونێن به‌رده‌وام دایه و چاڤه‌رێی تیمێن ئه‌ندازه‌یێن تایبه‌ت ب پووچكرنا مینێن چاندی و ته‌قه‌مه‌نیێ نه بمه‌ره‌ما پاقژكرنا ناڤ باژێرێ شنگالێ.
پیرۆزباهییا ڤێ سه‌ركه‌فتنا مه‌زن ل گه‌لێ كوردستانێ و بنه‌مالێن سه‌ربلندێن شه‌هیدان و بتایبه‌تی خوشك و برایێن ئێزدی دكه‌ین.
بژی پێشمه‌رگه و بژی كوردستان نه‌مری بۆ شه‌هیدێن مه یێن سه‌ربلند
فه‌رمانده‌ییا گشتی یا هێزێن پێشمه‌رگه‌یێ كوردستانێ
نيشاندان