ئه‌ڤرۆ نيوز:

داسن میر فاروق بەگ ژ بنەمالا میرێن ئێزدیان بۆ ئەڤرۆ دیارکرکو ئەوا پەکەکە و لایەنێن دی یێن سیاسی ل شنگالێ دکەن، ب تنێ موزایەدێن سیاسی نە وچو تشتی دێ نینە و ب وێ ڕەفتارێ چو دەڤەر ناھێنە ئازادکرن، دیسا خویا ژی دکەت کو ئەو ھەموو دەڤەرین ھاتینە ئازادکرن، یێن ب ھێزا پیشمەرگێ کوردستانێ ئازاد بووین و خەلک و جیھان ژی ھەموو دیدەڤانن و پێشمەرگێ قەھرەمان تیرۆرستێن داعشێ یێن شکاندین ورووبەرەکێ مەزن ژ ئاخا کوردستانێ یا ئازادکری و دێ پێشمەرگە شنگالێ ژی ئازاد کەت.

میر داسن فاروق بەگ ژ بنەمالا میرین ئێزدیان گۆت ژی” پێشمەرگێ قەھرەمان بۆ ئازادکرنا شنگالێ پێدڤی ب چو ھیزێن دێ نینە و شنگال دێ ل سەر دەستێ پێشمەرگەێ و ب سەرپەرشتیا سەرۆک بارزانی ھێتە ئازادکرن و پاشی ژی بلا خەلکێ شنگالێ ب خوە بریارێ ل سەر چارەنڤیسێ خوە بدەت. ئەم د ئاگەھدارین کو بەرھەڤیێن باش بۆ ئازادکرنا شنگالێ یێن ھاتینە کرن و ھەر دەمێ سەرۆک بارزانی سەرۆکێ ھەریما کوردستانی و فەرماندێ گشتیێ ھێزێن پێشمەرگەی فەرمانێ بدەت، دێب زووترین دەم پێشمەرگێ قەھرەمان شنگالێ ئازادکەت”.
ناڤبری ئەوژی دیارکرکو ئەو لایەنێن سیاسی یێن ئاستەنگان دروست دکەن، ھەر ئەو لایەنن کو ئەگەرێن گیرۆکرنا ئازادکرنا شنگالی نە و دەرباری ھێزا پەکەکێ ل دەڤەرا شنگالێ پێدڤی ناکەت مایتێکرنێ د کاروبارێن شنگالێ دا بکەت، ب راستی ژی ھەکە مەرەما وان ئەو بیت شنگالێ وخەلکێ شنگالێ ژ ھەرێما کوردستانێ و پارتی دیموکراتی کوردستان دوور بکەن، ئەو خەونەکا فاشلە و چو جاران بجە ناھێت، چونکی خەلکێ شنگالێ رازی نابیت.
میر داسن فاروق بەگ ئاشکرا کرکو برینێن کوردێن ئێزدی دکوورن و خەلکێ مە یێ ئێزدی حەز دکەن برینێن خوە دەرمان بکەن و زوو شنگال بھێتە ئازادکرن و مل ب ملێ پیشمەرگەی ڤە شەڕی تیرۆرستان بکەن وژناڤببەن و دەڤەرا خوە ئازاد بکەن ھەتاکو ئاوارێن شنگالێ بزڤرنە ڤە سەر مال ومولگێن خوە.

ئەڤرۆ نیوز:
ل گۆر بەرنامێ نوو یێ دەولەتا تورکیا دێ شەرێ ل دژی PKK بەردەوام بیت و د ستراتیژیا نوو دا دێ ل گەل کەسایەتی و ھێزێن دی یێن کوردی ل باکورێ کوردستانێ سەبارەت ب چارەکرنا پرسا کوردی دانوستاندنان ھێنە کرن و دەولەتێ نەڤێت ب چو رەنگەکێ ل گەل PKK و ھێزێن سەر ب وێ ڤە سەبارەت ب چارەکرنا پرسا کوردی دانوستاندنان بکەت.
چاڤدێرێ سیاسی ئەحمەد ئایدن ل ئستەنبۆلێ بۆ رۆژناما ئەڤرۆ دیار کر کو ل گۆر تشتێ نھا ل تورکیا دھێتە گەنگەشە کرن و ل گەلەک راگەھاندنێن تورکیا دا ژی بەحسێ وێ دھێتە کرن دەولەتا پشتی ھەلبژارتنان ستراتیژیەکا نوو بۆ چارەکرنا پرسا کوردی دیار کریە، ل گۆر ستراتیژیا نوو دێ شەرێ ل دژی PKK ب ھەموو رەنگەکێ بەردەوام بیت، ھێزێن تورکیا دێ ل زڤستانێ ب ھەموو رەنگەکێ ل تورکیا ھێرشی PKK بکەن و ھەروەسا دێ فرۆکێن تورکیا ژی بەردەوام بنگەھێن PKK ل ھەرێما کوردستانێ بومبەباران بکەن و گۆت: (ھەردەم ل گەل وان ئۆپەراسیۆنێن سەربازی دھێتە چاڤەرێ کرن کو دەست ب ئۆپەراسیۆنێن سیاسی ژی بھێتە کرن و ئەندامێن سەر ب PKK کو د ناڤ تورکیا دا خەباتا چەکداری دکەن و ھێرشی پۆلیسان دکەن دێ ھێنە گرتن، واتە دێ شەرەکی بەرفرەە ل دژی PKK و ھەموو سازیێن وێ ھێتە کرن).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو ل گەل وان ئۆپەراسیۆنان دێ دەولەتا تورکیا ھندەک پێنگاڤان بۆ چارەکرنا پرسا کوردی ژی ھاڤێژیت، ل گۆر زانیاریێن گەھشتنە دەستێ من، دەولەت بەحسێ چ سیستەمێن خوەسەریێ بۆ کوردان ل تورکیا ناکەت، بەلکو دێ ل گەل سازی و کەسایەتێن کوردی یێن کو ل گەل PKK نینن دێ ھەڤدیتن ھێتە کرن دا کو بزانن براستی کوردان ل تورکیا چ دڤێت، چونکو ل گۆر راپۆرتەکا رۆژناما خەبەر تورک بەرپرسێن تورکیا دبێژن پتر ژ ٧٠% کوردان ناخوازن ژ تورکیا جودا ببن و دخوازن د سیستەمەکێ نوو دا بژین و دەولەت ژی دێ کار بۆ ئاڤاکرنا وێ سیستەمێ کەت و گۆت: (لێ ب چو رەنگەکێ ل گەل HDP و PKK ھەڤدیتن ناھێنە کرن، لێ HDP دێ د چارچۆڤێ کارێ پەرلەمانی رۆلێ خوە ھەبیت و چ ئاستەنگی ل ھەمبەر کارێ وێ پارتیێ ناھێتە دروست کرن، بەس سەبارەت ب دستوورێ نوو و چارەکرنا پرسا کوردی دەولەتا تورکیا ئێدی ناخوازیت چو ھەڤدیتنان ل گەل HDP بکەت، واتە د ستراتیژیا نوو دا HDP و PKK چو جھێن خوە نابن).
ل ئالیێ دی رۆژناما رادیکال یا تورکیا ژی دوھی راپۆرتەک سەبارەت ب ستراتیژیا حوکمەتا تورکیا ل ھەمبەر چارەکرنا پرسا کوردی بەلاڤ کر و د راپۆرتێ دا ھاتیە دیار کرن کو ب فەرمانا ئەردۆگانی نھا کار بۆ دەرخستنا قانوونەکا نوو دھێتە کرن دا کو ل گۆر وێ قانوونێ چەکدارێن PKK بشێن ڤەگەرنە تورکیا و دەست ب ژیانا خوە یان خەباتا سیاسی بکەن، لێ ژ بۆ وێ یەکێ ژی دەولەت چو ھەڤدیتنان ل گەل PKK و HDP ناکەت و دێ وەک پرۆژەکا دەولەتێ بۆ رایا گشتی ھێتە بەلاڤ کرن.
د بەردەوامیا راپۆرتێ دا ئەو یەک ژی ھاتیە دیار کرن کو دەولەتێ دڤێت بلەز کار بۆ ئاڤاکرنا دستوورەکی نوو بھێتە کرن، د بەرنامێ ئەردۆگانی دا ھەیە کو د دستوورێ دا مافێ کوردان ژی بھێتە دیار کرن و ھەموو ئاستەنگیێن ل ھەمبەر خەباتا سیاسی یا کوردان بھێتە راکرن، لێ شەرێ ل دژی PKK دێ بەردەوام بیت و ھەتا PKK دەستان ژ چەکی بەرنەدەت و ژ ئاخا تورکیا دەرنەکەڤیت دەولەت بەرھەڤ نابیت چو ھەڤدیتنان ل گەل وێ پارتیێ یان ژی HDP بکەت.
د پشکەکا دی یا راپۆرتێ دا ھاتیە دیار کرن کو دەولەتێ دڤێت ل باکورێ کوردستانێ چو ئاستەنگی ل ھەمبەر ئاڤاکرنا پارتێن سیاسی یێن کو ب ناڤێ کوردستانێ خەباتێ دکەن نەمینیت و ب ڤی رەنگی دەولەتێ دڤێت پارتی و کەسێن کو سەر ب PKK نینن بشێن خەباتێ بکەن و چو ئاستەنگی ل ھەمبەر خەباتا وان ناھێتە دروست کرن.
د دووماھیا راپۆرتێ دا ئاماژە ب ڤێ یەکێ ژی ھاتیە دان کو د ستراتیژیا دەولەتێ دا بۆ چارەکرنا پرسا کوردی دێ گرنگی ب زانایێن ئایینی یێن کورد ل باکورێ کوردستانێ ھێتە دان و دێ ل گەل وان کۆمبوون ھێنە کرن دا کو پتر کورد و تورک نێزیکی ھەڤدو ببن و شەرێ ل تورکیا ب دووماھی بھێت.