ئه‌ڤرۆ نیوز:
راگه‌هاندنا پێشمه‌رگێ زێره‌ڤانى ب هه‌ماهه‌نگى ل گه‌ل فرۆكێن شه‌رى یێن سوپایێ هه‌ڤپه‌یمانان، ئه‌ڤرۆ ل ده‌مژمێر شه‌شێ ئێڤارى، خرڤه‌بوونه‌كا ژماره‌كا تیرورستێن داعش ل ناڤ كوگه‌هه‌كا غازێ ل نێزیك كه‌سكێ كره ئامانج و ژماره‌كا چه‌كدارێن تیرورست هاتنه كوشتن.
ل دووڤ پێزانینێن راگه‌هاندنا پێشمه‌رگێ زێره‌ڤانى فرۆكێن شه‌رى هه‌موو ئه‌و چه‌كدار كوشتینه كو ل كوگه‌ها غازى خرڤه‌بووین و ژماره‌كا ترومبێل و چه‌كێ ناڤنجى یێن داعش هاتنه سوتن.
ئه‌ڤرۆنیۆز، ئه‌یاد به‌روارى
جوزیف بلاته‌ر سه‌رۆكێ ئێكه‌تیا نێڤده‌وله‌تی یا ته‌پا پێی ئه‌ڤرۆ ده‌ست ژ كاركێشانا خوه ژ پۆستێ خوه راگه‌هاند.
بلاته‌ری ئه‌ڤرۆ د كونگره‌كێ رۆژنامه‌ڤانی دا، ده‌ست ژ كاركێشانا خوه راگه‌هاند و داخوازا كۆمبوونا كۆمه‌لا گشتی یا فیفایێ كر بۆ هه‌لبژارتنا سه‌رۆكێ نوی بۆ ئێكه‌تیا نێڤده‌وله‌تی یا ته‌پا پێی.
ده‌ست ژ كاركێشانا بلاته‌رى د ده‌مه‌كی دا هات پشتی چه‌ندین تۆمه‌تێن گه‌نده‌لیێ ئاراسته‌ى فیفایێ هاتینه كرن كو د ئه‌نجامدا چه‌ندین كه‌س هاتنه ده‌سته‌سه‌ركرن ژلایێ حوكمه‌تا سویسری ڤه، كو باره‌گایێ سه‌ره‌كیێ فیفایێ ل باژێرێ زیورخێ یه ل وی وه‌لاتی.
بلاته‌رى د وی كونگرێ رۆژنامه‌ڤانی دا گوت”هه‌ر چه‌نده ئه‌ز ل ڤێ دووماهیێ هاتمه هه‌لبژارتن ڤه بۆ سه‌رۆكاتیا فیفایێ، لێ من پشته‌ڤانیا هه‌موو جیهانا ته‌پا پێی نه‌بوو”.
جوزێف بلاتر (79 سال) وه‌لاتیه‌كێ سویسری یه، ل سالا 1998 بۆ سه‌رۆكاتیا فیفایێ هاتبوو هه‌لبژارتن، ل رۆژا ئه‌ینیا بۆری 29 گولانا 2015 بۆ جارا پێنجێ هاته هه‌لبژارتن ل سه‌ر كیستێ شازاده ( عه‌لێ كورێ حوسه‌ینی) یێ ئوردنی.
ئه‌ڤرۆ نیوز:
فلیپ هامۆند وه‌زیرێ ده‌رڤه یێ بریتانیا سه‌باره‌ت كومبوونا ئه‌ڤرۆ یا پاریس پشته‌ڤانیا خوه بۆ حكومه‌تا عیراقێ ده‌ربرى و گۆت: پرۆسا شكاندنا داعش پێدڤى ب ده‌مه‌كێ زور هه‌یه.
فلیپ هامۆند وه‌زیرێ ده‌رڤه یێ بریتانیا به‌حسێ پێنج چه‌ند خالان كر بۆ ژناڤبرنا داعش ئه‌وژى حشككرنا ژێده‌رێن ڤێ رێكخراوا تیرورستى و رێگرتن ل چه‌كدارێن بیانى یێن دچنه ناڤ داعش و لاوازكرنا بیروباوه‌رێن گروپێن وان و ڤه‌گه‌راندنا ته‌ناهیێ بۆ وان ده‌ڤه‌رێن زیان گه‌هشتیێ.
ئه‌ڤرۆ نیوز:
ئه‌ڤرۆ په‌رله‌مانێ كوردستانێ ب پرانیا ده‌نگان، پرۆژه قانوونا وه‌رگرتنا قه‌رێن نێڤده‌وله‌تى په‌سه‌ندكر.
د روونشتنا ئه‌ڤرۆ یا په‌رله‌مانێ كوردستانێ دا كو به‌رنامێ كارى یا تایبه‌ت بۆ ب ئه‌نجامدانا دانوستاندنان ل دۆر وه‌رگرتنا قه‌رێن نێڤده‌وله‌تى، فراكسیونێن ئێكگرتوو و كومه‌ل و بزاڤا ئیسلامى پرۆژه ره‌تكرن، به‌لێ ڤێ چه‌ندێ كارتێكرن ل پرۆسا ده‌نگدانێ نه‌كر و پرۆژه هاته په‌سه‌ندكرن.
ل دووڤ ڤى پرۆژه‌ى، حكومه‌تا هه‌رێما كوردستانێ دێ شێت 5 ملیار دولاران قه‌رز بكه‌ت و ئه‌و قه‌ركرنه ژى دێ ب رێیا لژنه‌كێ بیت كو پێكهاتیه ژ : سه‌رۆكێ حكومه‌تێ و جێگرێ وى و وه‌زیرێ دارایى و هه‌ر وه‌زیره‌كێ دى).
ئه‌ڤرۆ نیوز:
پشتى دو هه‌یڤان ژ ئه‌نجامدانان دانوستاندنان د ناڤبه‌را به‌غدا و ریاز، ده‌رئه‌نجام حكومه‌تا عه‌ره‌بستانا سعودیێ پشتى سالا 1991 ێ بۆ جارا ئێكێ بالیوزێ خوه ل عیراقێ ده‌ستنیشانكر.
ژێده‌رێن رۆژنامه‌ڤانى یێن سعودى دیاركرینه كو : حكومه‌تا سعودیێ سامر بن سه‌بهان وه‌ك بالیوزێ ل عیراقێ ده‌ستنیشانكر، كو پشتى سالا 1991 ێ بۆ جارا ئێكێ یه ریاز بالیوزێ خوه دهنێریته به‌غدا.
ئه‌ڤرۆ نیوز:
دیندار زێبارى جێگرێ به‌رپرسێ فه‌رمانگه‌ها په‌یوه‌ندیێن ده‌رڤه یێ حكومه‌تا هه‌رێما كوردستانێ بۆ كاروبارێن رێكخراوێن بیانى راكه‌هاند: هه‌رێما كوردستانێ یا نه‌چاره ژ به‌ر ئه‌گه‌رێن مروڤایه‌تى ده‌رگه‌هى ل هه‌مبه‌ر ئاواران ڤه‌كه‌ت.
دیندار زێبارى دبێژیت: سیسته‌مێ كه‌فیلى ل به‌غدا ژى دهێته په‌یره‌وكرن، مه ب تنێ دڤێت تیرورست ل ناڤ ئاواران نه‌هێنه هه‌رێمێ، ژبه‌ر كو خه‌لك هه‌بوویه ل ناڤ ئاواران ئه‌ندامێ داعش بوویه و هاتیه هه‌رێمێ و ده‌ست د ته‌قینان دا هه‌بوویه و پاشان هێزێن ئێمناهیێ گرتینه، له‌وما مه دڤێت ب رێیا كه‌فیلى، هه‌رێم و ئاواره د پاراستى بن.
زێبارى دبێژیت: ماوێ حه‌فتیه‌كێ یه پرۆسا هاتنا ئاوارێن رومادى بۆ هه‌رێما كوردستانێ ده‌ستپێكریه و ب رێیا ئه‌سمانى و حشكانى ب سه‌دان خێزانێن ئاواره‌بووى خوه گه‌هاندینه كوردستانێ و پشكا زور یا وان هاتینه هه‌ولێرێ.
ئه‌ڤرۆ نیوز:
رێباز حه‌ملان وه‌زیرێ دارایى یێ حكومه‌تا هه‌رێما كوردستانێ د چارچوڤێ به‌رهه‌ڤبوونا وى ل روونشتنا په‌رله‌مانێ كوردستانێ كو یا تایبه‌ت بۆ ب دانوستاندنان ل سه‌ر پرۆژه قانوونا قه‌ركرنێ، گۆت: به‌غدا بدروستى موچێ فه‌رمانبه‌رێن هه‌رێمێ نه هنارتیه و ڤێ هه‌یڤێ ژى دێ پشكا بودجێ هه‌رێمێ وه‌كو هه‌یڤا چوویى بریت.
رێباز حه‌ملان وه‌زیرێ دارایى یێ حكومه‌تا هه‌رێما كوردستانێ دیاركر ژبه‌ر قه‌یرانا دارایى یا هه‌رێم تووش بووى، 6 هزار پرۆژێن هه‌رێمێ هاتینه راوه‌ستاندن.
نيشاندان