ئه‌ڤرۆ نيوز:

ئەندامێ لژنا دارایی یا جڤاتا نوونەرێن عیراقێ بۆ ئەڤرۆ دیارکر، قەرێن ھەرێما کوردستانێ د بوودجا سالا ٢٠١٦ دا نە ھاتینە بەحسکرن، پەرلەمانتارێن کورد لبەر وێ بکەنە پێشنیاز ھەمبەری فراکسیۆنێن دیتر ل پەرلەمانی کو پشکا ھەرێمێ یا دڤان دو سالێن بۆری دا و نە ھاتینە مەزاختن ببیتە بەندەکێ قانوونی د بودجا سالا ٢٠١٦ ێ دا، بۆ ھندێ حوکمەتا عیراقێ نەچار ببیت دوو قانوونێ قەرێن ھەرێما کوردستانێ رەوانە بکەت، ھەروەسا گۆت: ڤێ جارێ ئێک ژ خالێن کۆمبوونا شاندێ ھەرێمێ ل گەل بەغدا دێ ئەو بیت گرنتیێ ژ بەغدا وەربگریت ل سەر رەوانەکرنا پشکا ھەرێما کوردستانێ ژ بودجا سالا ٢٠١٦.
ئەندامێ لژنا دارایی یێ عیراقێ حاکم سەرحان خوەیاکر، ددەمێ سەرەدانا شاندێ ھەرێما کوردستانێ دا بۆ بەغدا خالا ھەرە سەرەکیا دانوستاندنێ دێ ل سەر گرنتیکرنا رەوانەکرنا بەھرا ھەرێما کوردستانێ ژ بۆدجا سالا ٢٠١٦ بیت کو رێژا ١٧% یە، ھەکە حوکمەتا عیراقێ چو گرنتیا نەدەت، خوە رێککەفتنەکا نوو ژی بھێتە کرن، کی دبێژیت حوکمەتا عیراقێ دێ یا پێگیر بیت بەرامبەری رێککەفتنا ل گەل ھەرێما کوردستانێ دھێتە کرن،لەورا پێدڤیە شاندێ ھەرێمێ ڤێ جارێ گرنتیێ ژ عیراقێ وەربگریت پاشی گەنگەشێ ل سەر پشکا ھەرێمێ د بودجا سالا ٢٠١٦ دا بکەت، و چەوانیا رەوانەکرنا پەترۆلێ ژ ئالیێ ھەرێمێ ڤە بۆ کۆمپانیا سۆمۆ و رۆژانە کا ٥٥٠ ھەزار بەرمیلێن پەرتۆلێ بھێنە رەوانەکرن یان نە.
ئەندامێ لژنا داریی ێ عیراقێ گۆت: ھەکە ھەرێما کوردستانێ شیان ھەبن رۆژانە ٥٥٠ ھەزار بەرمیلێن پەترۆلێ ب رێیا کۆمپانیا سۆمۆ رەوانەی بازارێن جیھانی بکەت، دێ حوکمەتا عیراقێ چو گرنتی دەتە ھەرێما کوردستانێ پێگیری ب دانا پشکا ھەرێمێ کو ١٧% یە، ئەڤ خالە زۆر یا گرنگە و شاندێ ھەرێما کوردستانێ دێ داکوکیێ ل سەر کەت، چونکی ئەڤ سالە عیراقێ پێگیری ب رێککەفتنان نەکرن، ئەوێن دناڤبەر ھەرێما کوردستانێ و حوکمەتا عیراقێ دا ھاتینە ئەنجامدان و ھەمان رێککەفتن دێ چیتە سەر بودجا سالا ٢٠١٦.
حاکم سەرحان ئەو چەندەژی دیارکر، پرۆژێ سالا ٢٠١٥ یێ مادێ ٣٤ یێ قانوونی ھەر ھەمان پرۆژێ قانوونا بودجا سالا ٢٠١٦ مادێ ٣٤، چو گوھۆڕین تێدا نە ھاتینە کرن، ب تایبەتی ژی چو دەستکاری د بابەتێ پترۆر دولاری و ھنارتنا پەترۆلێ ژ ئالیێ ھەرێمێ ڤە و دانا بودجا پێشمەرگەی نە ھاتینە کرن، سەبارەت پێگیریا یا پرۆژەی ژی تێدا ھاتیە ھەکە ئالیەک پێگیری ب رێککەفتنێ نەکەت، ئالیێ بەرامبەر ژی نەیێ پێگریە بوێ رێککەفتنێ.
ئەندامێ لژنا داریی یێ سەر ب فراکسیۆنا پارتی ڤە گۆت: ھێشتا دیارنینە کا دێ رێککەفتنا سالا ٢٠١٥ ھێتە ھەلوەشاندن یان ژی دێ بۆ سالا ٢٠١٦ وەکو خوە مینیت، ئەم چاڤەرێ ھاتنا شاندێ ھەرێما کوردستانێ نە بۆ بەغدا، کو لبەرە ڤان رۆژێن بھێت شاندێ حوکمەتا ھەرێما کوردستانێ قەستا بەغدا بکەت، ب مەرەما دانوستاندنێ ل حوکمەتا بەغدا و دەستنیشانکرنا بەھرا ھەرێما کوردستانێ ژ بودجا عیراقێ یا سالا ٢٠١٦ و مافێن ھەرێما کوردستانێ کو دگەھیتە ١٣ تڕلێون دیناران و پارێ سالا ٢٠١٥ ژی وەک قەر د بۆدجا سالا نوویا عیراقێ دا ل گەل حوکمەتێ بھێتە بەحسکرن کو بیبتە کارەکێ قانوونی و پێگیری پێ بھێتە کرن دبوجا سالا ٢٠١٦ دا.

ئەڤرۆ نیوز:
ئەندامەکێ لژنا ئاسایش و بەرگریێ ل پەرلەمانێ عیراقێ ژ فراکسیۆنا پارتی راگەھاند، چو راستی بۆ سۆزێن حەیدەر عەبادی ل دۆر دانا دو مووچێن ھێزێن پێشمەرگەی نینن و عەبادی نەکو سۆزێن خوە ب تنێ بجە نائینیت، بەلکو قانوونەک ھەبوو و عەبادی بجە نەئینایە ئەوژی قانوونا بودجا سالا ٢٠١٥ێ، کو بەھرا پێشمەرگەی ل دەرڤەی وێ رێککەفتنا پەترۆلی بوو، بەلێ عەبادی بەھرا پێشمەرگەی نە مەزاخت، ئەڤجا دێ چاوان سۆزێن خوە بجە ئینیت، ھەکە سۆز ل دۆر ڤێ پرسێ دابن؟.
شاخەوان عەبدوللا بۆ ئەڤرۆ گوت” ب چو شێوەکی بلا پێشمەرگەی ل ھیڤیا مووچەی ژ بەغدا نەبیت و بلا ھەر ژ نوکە چو ھیڤیەکێ نەدەینێ و پاشی بێ ھیڤی ببن، ئەو چەندا دھێتە گوتن ژی تنێ ئاخڤتنن و چو راستی بۆ نینن و بلا باوەریێ ب بەغدا نەکەن”.
ل دۆر وێ چەندێ بۆچی بەردەوام بەغدا پێشمەرگەی ب پشکەک ژ سیستەمێ بەرەڤانیێ عیراقی ددانیت، بەلێ د ھەمان دەم دا چو پێگیری و ئەرکێن خوە ل بەرامبەر پێشمەرگەی بجە نائینیت،شاخەوانی گوت” وێ چەندێ دبێژن کو پێشمەرگە پشکەکە ژ سیستەمێ بەرەڤانیێ عیراقێ، وان بەھرا پێشمەرگەی ل دەرڤەی پشکا ھەرێما کوردستانێ ژ بودجێ عیراقێ ئەوژی ١٧% یە دانابوو، د بودجا عیراقێ دا ھاتبوو ھەکە لەشکرێ عیراقێ بودجەکی وەرگریت، پێشمەگە ژی وەرگریت، بەلێ ئەو قانوون نەھاتیە بجھئینان”.
سەبارەت وی دەنگوباسێ بەری چەند رۆژان بەلاڤبووی ل دۆر مەزاختنا دو مووچان بۆ پێشمەرگەی ژلایێ بەغداڤە، ئەندامێ لژنا ئاسایشێ و بەرەڤانیێ ل پەرلەمانێ عیراقێ گوت” پەرلەمانتارەکێ مە دیارە ب لەز ئەو دەنگوباسە راگەھاندبوو بێ کو د ھەموو بابەتی گەھشتبیت، من ژ لایێ خوەڤە ل گەل ھەموو فەرماندێن پێشمەرگەی ئاخڤتیمە کو ل ھیڤیا وی بابەتی نەبن ئانکو بەغدا مووچێن پێشمەرگەی ب مەزێخیت”.
د تەوەرەکی دی دا و ل دۆر پرسا ھەلوەشادنا پارتی بۆ رێککەفتنا پێکئینانا حوکمەتا ھەرێمێ ل گەل گۆڕان و دوورخستنا یوسف محەمەد ژ سەرۆکاتیا پەرلەمانێ کوردستانێ و لادانا ھەر چار وەزیرێن گۆڕان ژ حوکمەتا ھەرێما کوردستانێ، ئایا ل بەغدا ژی جێگرێ سەرۆکێ پەرلەمانێ عیراقێ کو ژ بزاڤا گۆڕانە ناھێتە لادان، ب تایبەتی کو ئەو پۆستە مافێ پارتی بوو و دایە گۆڕان، شاخەوان عەبدولای گوت” مە کار یێ ل سەر ڤێ چەندێ کری و ئەم د بەردەوامین ل سەر ڤێ چەندێ کو لایەنان رازی بکەین ئەو مافە بۆ پارتی بزڤریت، چونکی نابیت ھندەکان تنێ ھەشت کورسی ھەبن و تو داگیرانێ ژ مافێ خوە بکەین ژبۆ ئێکرێزیێ و ئارامیێ و ئەو بھێن وێ ئێکرێزیێ تێکبدەن و سڤکاتیێ ب پێشمەرگەی و سەرۆکێ ھەرێمێ و خەلکێ کوردستانێ بکەن”.
د پەرسڤا پرسیارەکا (ئەڤرۆ) دا، بۆ لادانا جێگرێ سەرۆکێ پەرلەمانێ عیراقێ، پێدڤیە ھەموو فراکسیۆنێن پەرلەمانێ عیراقێ رازی ببن، یان دێ دەنگدان ل سەر ھێتە کرن، یان ژی پێرابوونەکا دێ ھەیە، شاخەوانی گوت” ئەو پۆستە مافێ کوردانە و تنێ فراکسیۆنێن کوردی دشێن وێ چەندێ ئێکلا بکەن و ھەکە ئەو بێژن دێ جێگرێ سەرۆکێ پەرلەمانی گوھۆرین، دێ ھێتە بجھئینان و ئەو پۆستە مافێ پارتی یە کو مە ٢٩ کورسی یێن ھەین”.