ئه‌ڤرۆ نيوز:
قوتابخانا بێسرێ یا بنەرەت پشتی ١٣ رۆژان ژ ئاڤاکرنێ و قوتابی چووینە تێدا دەرز کەفتینە دیواران و ئاڤ د بن ئەردێ وێ دزێت و ئاریشێن مەزن تێدا ھەنە. سەرەراری ھندێ ل دەمێ ب دووماھی ھاتنا پرۆژەی ژی گەلەک کێماسی وەکو نەبوونا کارەبا گشتی و یا موەلیدەی و نەبوون باخچە و ڤالابوونا جھێن ئەسانسۆران تێدا ھەنە. ل رێکەفتی ٧/١٠/٢٠١٥ قوتابی چووینە تێڤە و رێڤەبەرێ ئاڤاھیێن قوتابخانان ژی دیار کر کو ئاڤاھی بێ ئاگەھداربوونا وان ھاتیە وەرگرتن و بێ وان گوھۆرین ل سەر ئاڤاھی ھاتینە کرن.
ئەحمەد محەمەد عیسا، رێڤەبەرێ قوتابخانا بنەرەت ل بێسرێ بۆ ئەڤرۆ دیار کر، بەری بھێنە ڤەگوھاستن بۆ ئاڤاھیێ قوتابخانا خوە یا نوو ل ئاڤاھیێ قوتابخانا بێسرێ یا کەڤن بوون و شەش رێزی بوو و جھێ بەرتەنگ بوو، ل رێکەفتی ٧/١٠ ھاتنە ڤەگوھاستن بۆ ئاڤاھیێ نوو، ئاڤاھیێ کەڤن ل ژڤانە ببیتە قوتابخانەکا سەرەتایی ل دەڤەرێ.
رێڤەبەرێ قوتابخانا بێسرێ گۆت ژی: ٧٥١ قوتابی ژ پۆلا ئێکێ ھەتا نەھێ مە ھەنە و ٥٦ مامۆستا، نوکە قوتابخانە دو دەوامی یە و پشتی ٧/١٠ ھاتینە ڤەگوھاستن بۆ قوتابخانێ ئەڤ کێماسیە ل قوتابخانێ ھەبووینە بەری بھێینە تێڤە ژی مە داخاز کربوو بھێنە چارەکرن و ھەتا نوکە چو دیار نینە، ئەو ژی ئەڤە بووینە کارەب نە یا گشتی و نە مولیدە نینە، رێیا ھاتن و چوونێ ل بەردەگەھێ قوتابخانێ نەیا باشە و یبیتە باران قوتابی نەشێن ھاتن و چوونێ بکەن ژ بەر ھەریێ، گۆرەپان نینە و جھێ بلندکرنا ئالای نینە و جھێ رێزبوونا قوتابیان نینە، جھێ گۆرەپانا وەرزشێ نینە، باخچە ل قوتابخانێ نینن و ھەموو ستریە و ئاخا باخچان تێدا نینە.
زێدەتر ل دور ئاریشان خویا کر، ئاڤ د دیواران دا دەر دکەڤیت ئانکو دزێت و دبن قوتابیان دا دچیت ئانکو بۆریێن ئاڤێ نە د دروستن، تانکێن قوتابخانێ تەوافە نینن، جھێ ھاتن و چوونا قوتابیان ھەر ژ نوکە دەرزیە و بارانەک بھێت دێ ژبن چیت، جھێ ئەسانسورێ وەک دیکور چێکریە و چو ئەسانسور تێدا نینن و دترسین زارۆیەک ل جھێ وێ بکەڤیت و ئاریشەک بۆ قوتابخانێ چێ بیت، جھێ موەلیدەی ئاڤاکریە ب تنێ دیکور و مولیدە نینن، قوتابخانێ نوبەدار و خزمەتگوزار نینە، رێڤەبەرێ قوتابخانێ گۆت: ل دۆر کێماسیان سەردان بۆ چەندین جھان کریە و ھەتا نوکە کێشە نەھاتیە چارەسەرکرن.
جمبەد شوکری سەرۆکا لیژنا پەروەردێ ل جڤاتا پارێزگەھا دھۆکێ ئاشکراکر، گەلەک قوتابخانە نوو ھاتینە ئاڤاکرن و ھاتینە وەرگرتن و دەوام تێدا دھێتەکرن و گەلەک کێماسی تێدا ھەنە وەک قوتابخانێن (نزارکێ، بێسرێ، جەلیدوکێ) ل ئاکرێ و گەلەک قوتابخانێن دی ژی.
سەرۆکا لیژنێ گۆت: چەندین جاران رێڤەبەرێ قوتابخانا بێسرێ سەرەدانێ دکەت و دووڤچوون ل سەر قوتابخانێ دھێتەکرن و ئەڤە ئاریشا چەندین ھەیڤانە و پەیوەندی ل گەل سەر بابەتی ل گەل رێڤەبەرێن پەروەردا دھۆک رۆژھەلات و رێڤەبەرێ گشتیێ کارەبێ دھێتەکرن بۆ دیتنا چارەکێ بۆ قوتابخانا ناڤبری.
سەمیر عەبدولعەزیز دیار کر، ھایدارین ل سەر کێشێن قوتابخانا ناڤبری و نەبوونا کارەبێ و مە ژ رێڤەبەریا کارەبێ خواستیە ھەر چو نەبیت بگۆرەکێ کارەبێ بدەنە قوتابخانێ و دیسان ل نزارکێ ژی قوتابخانەکا ٣٠ پۆلی ھەیە و ھەتا نوکە یا بێ کارەبە، ب نڤیسار پەروەردا گشتی و رێڤەبەریا کارەبێ و رێڤەبەرێ گشتی پەیوەندی پێ کریە و بەرسف دایە کو نەشێن بگۆرا بکرن، باشە پا پەروەردە دێ چەوا بگۆران کریت کو ب دەفتەرەک و نیڤانە و ئەڤە ئاریشە و ھەر دو قوتابخانە د بێ کارەبن.
رێڤەبەرێ پەروەردێ رۆژھەلات گۆت: ژ ناچاری مە قوتابی کرنە د ئاڤاھیان ڤە، چونکە بوونە سێ دەوامی و دیسان قوتابی ژ نزارکێ دھاتنە بەرۆشکێ و بارگرانی بۆ خێزانێن وان ژی و پێدڤیە کارەب ھەبیت، ب تەلەفونێ ھایدارکریمە کو قوتابخانێ وەربگرم و قوتابی تێدا بلا دەوامێ بکەن، سەمیری گۆت: وەک پەروەردە رازیبوونێ ل سەر وەرگرتنێ ب فەرمی ناکەین ھەتا ھەموو کێماسی نەھێنە دروستکرن.
ئەندازیار فەرسەت ئەحمەد سەعید، رێڤەبەرێ ئاڤاھیێن قوتابخانان ل رێڤەبەریا گشتیا پەروەردێ ل پارێزگەھا دھۆکێ گۆت: قوتابخانا بێسرێ نەخشێ پەروەردێ بوو د وی دەمی دا، د ڤەدیتنێ دا ھەموو تشت تێدا ھەبوون و ل جێبەجێکرنێ ئەڤە نەھاتەکرن، چونکو جھێ نەخوەش بوو و پێدڤی ب چەند دیوارێن کونکریتی بوو، ئیدارا ناڤخوە یا پارێزگەھێ گوھۆرین کرن بێ پەروەردێ رێڤەبەریا ئاڤاھیان ئاگەھدار بکەت، گەلەک کێماسی تێدا ھەنە.
ئەندازیاری ھێشتا گۆت: ل دەمێ وەرگرتنێ نوونەرێ مە سەردان بۆ کر و دیارکر کو ئەڤ کێماسیە تێدا ھەنە، تشتێ دروست چێکری ب تنێ مە ئەو وەرگرت، تشتێ نەبوویی و کێماسی مە ب نڤیسار پارێزگەرێ دھۆکێ ئاگەھدارکریە و شەش قوتابخانان ئەڤ کێماسیە ھەنە کو کارتێکرن ل دەوامێ یا دھێتەکرن و ئەڤە شەش ھەیڤە و ھایدارین ئەڤە بۆ ئیدارا ناڤخوە ھاتیە ڤەگوھاستن و ھەتا نوکە چو بەرسڤ بۆ پەروەردێ نەھاتینەدان.
ئەندازیار فەرسەت زێدەتر گۆت: ب تنێ ل دەمێ وەرگرتنێ ھایدارکرینە بھێن قوتابخانێ وەربگرین و دەمێ مە سەردان بۆ کرین ١٠٠% ڤەدیتنا مە ھاتیە گوھۆرین، مە نە وەرگرتیە و مە ھەموو نڤسیە کو ژ بەر ڤان کێماسیان مە نە وەرگرت، فەرسەتی گۆت: قائیمقامێ دھۆکێ قوتابخانە وەرگرتیە ب بھانا ھندێ سەرۆکێ لژنا وەرگرتنێ یە و ئەڤە بێ مە وەرگرتیە و مە بەلگە ھەنە پێشتر مە ئاگەھدارکربوون وەک ئەندازیارێن پەروەردێ وەرناگرین ھەتا ئەڤ کێماسیە نەھێنە چێکرن، دیسان ڤەدیتنا مە ھەموو گوھۆری یە، رێڤەبەرێ پەروەردێ ھایدارکرین گەلەک گڤاشتن ھەنە و قوتابی دزورن، مە وەک رێڤەبەریا ئاڤاھیان بوو دیارکر کو ئەگەر قوتابی ژی بچنە تێڤە ئەم وەک ئەندازیار ھەر وەرناگرین و ھەتا نوکە مە نەوەرگرتیە و قوتابی چووینە تێدا.

1 of 17