ئەڤرۆ نیوز:
بهایێ نەفتێ د بازارێن جیهانی دا بەرەف بلندبوونێ دایە، بهایێ ئێك بەرمیلێ نەفتا خاڤ یا برێنت گەهشتە 35 دۆلاران.
پشتی ل حەفتیا بوری دا بهایێ نەفتێ داكەفتنەكا بەرچاڤ ب خوەڤە گرتی، جارەكادی بازارێ وێ گەرم بوو، بهایێ ئێك بەرمیلێ نەفتا خاڤ یا برێنت یا ئەمریكی گەهشتە 35 دۆلاران ل هەمبەر وێ ژی بهایێ بەرمیلەكا نەفتا خاڤ یا ئەمریكی گەهشتە 28 دۆلار و 97 سەنتان.
ئەڤرۆ نیوز:
ژێدەرەكێ نێزیك ژ عەدنان زورفی كاندیدێ ڕاسپاردی بۆ پێكئینانا كابینا نوو یا حوکمەتا عیراقێ راگەهاند، ل دوماهیا حەفتیا زهێت دێ جڤاتا نوونەرێن عیراقێ باوەریێ دەنە كابینا عەدنان زورفی.
وی ژێدەری بۆ كەنالێ ئەلسومەریە گوت: دچەند رۆژێن بوری دا، زورفی شیایە پشتەڤانیا پڕانیا ئەندامێن جڤاتا نوونەران بدەست خوە ڤە بینیت و دەنگدان لسەر كابینا نوو، دێ یا دوور بیت ژ بریارێن حزبایەتی.
دوهی عەدنان زورفی بەرنامێ كابینا خوە ڕادەستی سەرۆكێ جڤاتا نوونەران كریە و لدووڤ زانیاریان چەندین لایەنێن سیاسیێن عیراقێ دێ پشکداریێ د حكومەتا نوو دا کەن.
ئەڤرۆ نیوز:
وەزارەتا ساخلەمیا عێراقێ راگەھاند، ٦٤ حالەتێن نوو یێن کۆرۆنایێ و چار حالەتێن گیان ژ دەستدانێ و ۲۰ حالەتێن چێبوونێ ھاتینە تومار کرن.
ئەڤرۆ شەمبیێ ، وەزارەتا ساخلەمی و ژینگەھا عیراقێ دیار کر، د دەما ۲٤ دەمژمێرێن بوری دا ٦٤ حالەتێن توشبوون ب ڤایرۆسێ کۆرۆنا یێ ھاتینە تۆمار کرن، کو ۲۷ ل بەغدا، ۱۰ ل بەسرە ، شەش ل نەجەف ، شەش ل موسەننا، پێنج ل دیالا، پێنج ل کەربەلا، چار ل کەرکوکێ و ئێک ل بابل و ئێک ژی ل زیقار.
هەروەسا گۆتیە ، چار حالەتێن گیان ژ دەستدانێ ھاتینە تۆمارکرن ، کو دو ل بەغدا و ئێک ل نەجەف و ئێک ژی ل دیالا.
دیسان گۆت ژی، ۲۰ کەسێن دی ژ نەخوشیێ چێبووینە، کو ھەشت ل کەربەلا ، پێنج ل نەجەف و دو ل بەغدا و دوول بەسرا و ئێک ل دیالا و ئێک ژی ل بابل.
ئەڤرۆ نیوز:
د. بژار موسا عەلی پەیڤدارێ رێڤەبەریا گشتی یێ ساخلەمیا هەولێرێ گۆت: دو تووشبوویێن دیتر یێن کۆرۆنا یێ چێبوون، پشتی وەرگرتنا چارەسەریێن نۆشداری ب تەمامی چێبووینە و بارێ ساخلەمیا وان یێ جێگیرە و هاتنە هنارتن بۆ مال.
گۆت می، هەتا نوکە ل هەولێرێ 92 کەس تووشی ڤایرۆسێ کۆرۆنا بووینە و ژ وان ژی 19 کەس چێبووینە.
سەرجەمێ گشتی یێ تووشبوویان ل هەرێما کوردستانێ 233 کەسن ژ وان ژی 87 کەس چێبووینە و 3 کەسان ژی گیانێ خوە ژ دەستدایە.
ئەڤرۆ نیوز، عەلی حاجی:
بەپرسێ لقێ زاخۆ یێ سەندیکا کرێکارێن کوردستانێ د داخویانیەکێ دا بۆ ئەڤرۆ نیوز دیار کر، پشتی رەوشا هاتنوچوونی ب زەحمەت کەڤتی ب رێیا هەرێمداریا زاخۆ وان چەندین هاریکاری گەهاندینە کرێکاران و پشتی ٤٨ دەمژمێرێن قەدەغەیا هاتنوچوونێ دەرباز ببیت دێ هژمارەکا هاریکاریێن دیتر گەهیننە کرێکاران.
زێدەتر سەگڤان عومەر گوت: د قوناغا ئێکێ دا ب هاریکاریا قایمقامیا زاخۆ وان شیا هاریکاریێن ژ کەرەستەیێن خوارنێ پێک دهاتن ب سەر ٥٠ شوفێرێن تەکسیان یێ کرێدار دا دابەش کرن ژبەر کو داهاتێ ژیانا وان شوفێران ل سەر هاتن و چوونێ بوو بەلێ نوکە دا قەدەغەیا هاتن و چوونێ هاتیە راگەهاندن و کارتێکرنەکا خراب ل سەر ژیانا وان کری یە، لەورا ئێکەم پێنگاڤا هاتیە هاڤێژتن بۆ وێ تەخا کرێکاران بوو،لدووڤ وی داهاتێ بۆ سەندیکایێ هاتی د بەرنامەیێ مە دایە ئەم ل دووف وی پارەیی پشتی قەدەغەیا هاتن چوونێ ب دوماهی بهێت و مارکێت بهێنە ڤەکرن دێ هاریکاریان ل سەر ٨١ تەخێن جودایێن کرێکاران دا بەلاڤ کەین ژبەر کو زوربەیا تەخێن کرێکاران ژ تەخێن هەژار و دەست کورتن.
و گوت ژی : ئەم داخوازێ ژ جهێن بازرگانی دکەین، زێدەتر چاڤ ڤەکری بن بۆ تەخا کرێکاران ژبەر نوکە پەیداکرنا نانێ ژیانێ بۆ تەخا کرێکاران ب زەحمەت کەفتیە ژبەر کو پەیداکرنا وی نانێ رۆژانە ل سەر کارێ وان یێ رۆژانە بەلێ نوکە دا ئەو ژی نەمایە ژبەر وێ قەدەغەیا هاتیە راگەهاندن.
سولین تەیب
پێدڤى ناكه‌ت هه‌موو ئه‌زموونه‌كێ دژیانێ دا ببینین، كو ببنه وانه دژیانا مه یا رۆژانه‌دا، نها هه‌مى جیهان تووشى نه‌خوشیا ڤایرۆسێ كۆرۆنا كوڤید-19 بوویه و هه‌ر وه‌لاته‌ك ب رێكار و یاسایێن خۆ یێن روو ب روو شه‌رێ دژوارێ ڤایرۆسێ كۆرۆنا بووى. كو رۆژانه ژمارا تووشبوونا وه‌لاتیان ل جیهانێ دبلندبوونێ دایه، وه‌كو یا دیار ل كوردستانێ ژى هه‌ر وه‌كو وه‌لاتێن دى ئه‌ڤ ڤایرۆسه رۆژ ب رۆژ یا ته‌شه‌نه و به‌لاڤ دبیت. لێ جهێ شانازی و ده‌ست خوشیێ یه كو حكومه‌تا هه‌رێما كوردستانێ پێش هه‌مى وه‌لاتان كه‌ڤت بۆ خۆ به‌رهه‌ڤكرنا ڤى شه‌رێ نه‌خاستى و پر مه‌ترسى.
ب وان هه‌موو كێماسیێن ساخله‌می و ئابووریێن نه گۆنجایى. ده‌مێ مه‌ترسى لسه‌ر وه‌لاتێن ده‌ورۆبه‌ر هه‌ر ل ده‌مه‌كێ زوو حكومه‌تا هه‌رێمێ به‌رپرسیاره‌تیا پاراستنا ژیانا وه‌لاتیان بستۆیێ خۆڤه گرت و ده‌ست ب هنده‌ك رێكارێن ده‌ستپێكى كرن و نه‌خوشخانه‌یێن تایبه‌ت بو به‌رنگاربوونا كۆرۆنایێ ئاماده‌كرن و قۆناغ ب قۆناغ بریار ده‌ركرن و ده‌ست ب كێمكرنا ده‌واما هاته‌كرن هه‌تا كو گه‌هشتیه راگرتنا ده‌واما هه‌مى دام و ده‌زگه‌هێن میرى و حزبى و رێكخراوێن جه‌ماوه‌رى. ژبلى كه‌رتێ ساخله‌میێ, پاشان گرتنا جهێن گشتى یێن كومبوونه‌ڤا خه‌لكى چ ل جهێن ئایینى یان جهێن خوشگۆزه‌رانیا وه‌لاتیان و بازاران. ل ده‌مه‌كى كو مه‌ترسى لسه‌ر جیهانێ رۆژ ب رۆژ دزێده بوونێدابوو, لیژنا به‌رنگاربوونا ڤایرۆسێ كۆرۆنایێ بریارێن ئێكلاكه‌ر ده‌ركرن.
حكومه‌تا هه‌رێما كوردستانێ بۆ پاراستنا ژیانا وه‌لاتیان، ئێكه‌م جار دمێژوویا خۆدا بریارا دا كو ئاهه‌نگ و كه‌رنه‌ڤال بۆ چه‌ژنا نه‌ته‌وه‌یى چه‌ژنا نه‌ورۆزێ و سه‌رسالا كوردى نه‌هێنه گێران و گه‌شت و سه‌یران ژى قه‌ده‌غه‌كرن و داخوازكر كو دمالێن خۆدا بمینن و هه‌ر دمالدا پێشوازیێ لڤێ رۆژا پیرۆز بكه‌ن و رێنمایێن ساخله‌میێ بجهبینن پێخه‌مه‌ت پاراستنا ژیانا خۆ, هه‌ر وه‌ها رێكێن دناڤبه‌را پارێزگه‌هان دا ژى هاتنه گرتن دیسان پێنگاڤ ب پێنگاڤ هاتن و چوون ژى دناڤا هه‌مى پارێزگه‌هاندا ب هه‌مى جوره‌كى قه‌ده‌غه‌كر و ب چه‌ند قۆناغێن جودا ئه‌ڤ قه‌ده‌غه‌یا هاتن وچوویێ نوو كرنه‌ڤه ژ پێخه‌مه‌ت سه‌لامه‌تی و پاراستنا مرۆڤایه‌تیێ. دگه‌ل درێژبوونا قه‌ده‌غه‌یا هاتن وچوونێ ژیانا خه‌لكێ هه‌ژار و بێ مووچه و كاسبكار و كرێداران پر زه‌حمه‌ت كه‌ڤت, لێ هه‌ست و وژدانا مرۆڤایه‌تیێ و تایبه‌ت كه‌سانێن سه‌رمایه‌دار هاتنه ده‌نگ و مل ب ملێ حكومه‌تا هه‌رێما كوردستانێ و رێكخراوێن خێرخوازى ده‌ست ب كۆمه‌ك و هاریكاریان كرن.
چ برێكا لێخوشبوونا كرێیێن ئاڤاهیان یان دابه‌شكرنا پێدڤیێن تایبه‌ت یێن خوارنێ، یێن كو ب ژیارا رۆژانه یا وه‌لاتیانڤه گرێداى و هاریكاریكرنا كه‌رتێ ساخله‌میێ و دروستكرنا نه‌خوشخانێن تایبه‌ت ب كۆرۆنایێ. ژلایه‌كێ دیڤه رولێ پێشمه‌رگێن قاره‌مان بۆ به‌رگیریكرن و پاراستنا وه‌لاتى.
هه‌رده‌م ب بلند دنرخینین و چو جارا رۆلێ وان ناهێته ژبیركرن كو ل جیاتى هه‌مى جیهانێ شه‌رێ تیرورستێن داعشێ دكر و سه‌ركه‌ڤتنێن مه‌زن تۆماركرن و ل وى ده‌مى نۆژدار و كه‌رتێ ساخله‌میێ مل ب ملێ پێشمه‌رگه‌ى دسه‌نگه‌رێن شه‌ریدا بوون, نها ژى دیسان هێزێن ئێمناهیێ و پێشمه‌رگێن قاره‌مان دگه‌ل كه‌رتێ ساخله‌میێ د ئه‌رك دانه.
لێ ڤێ جارێ یێن دژى ڤایرۆسه‌كا پر مه‌ترسى و كوشنده راوه‌ستیاین پێخه‌مه‌ت پاراستنا وه‌لاتیان و شكستهێنانا ڤایرۆسێ. لێره‌دا وه‌لاتى ژى دڤى شه‌رى دا ڤه‌ده‌ر نینه ل به‌رنگاربوونا كوڤید-19 و بمانه‌ڤا وان دمالدا هاریكار و پشته‌ڤان و پارێزراوێن كوردستانێ نه. له‌ورا دنهادا باشترین خۆپاراستن ئه‌وه كو دمالدا بمینین و ده‌رنه‌كه‌ڤین و ئه‌زموونێ ل ژیانا تووش بوویێن جیهانێ وه‌ربگرین و باوه‌ر ب مه‌ترسیا وێ ڤایرۆسێ بكه‌ین و خۆ بپارێزین و نه‌چینه ژده‌رڤه هه‌تا كو تووشى ڤایرۆسى نه‌بین و نه‌بینه ئه‌گه‌ر و جهێ مه‌ترسیێ لسه‌ر ژیانا ده‌ورۆبه‌رێن خۆ. هه‌ر چه‌نده زۆربه‌یا وه‌لاتیان بۆ گرنتییا ژیانه‌كا ئارام و ئاسوده پابه‌ندن ب هه‌مى رێنمایێن ساخله‌میێ و بریارێن حكومه‌تێ و خۆ كه‌ره‌نتینكرنێ دمالێن خۆدا و ئه‌ڤه ژى جهێ ده‌ست خوشیێ یه. لێ یا جهێ داخێ ئه‌وه كو دڤێ ره‌وشێ دا هنده‌ك ژ وه‌لاتیان ب چاڤ نه‌ترسى و هه‌ست نه‌كرن ب به‌رپرسیاره‌تیێ و ب به‌هانه‌یێن جودا ده‌ردكه‌ڤن و به‌رده‌وام به‌رئێك كه‌ڤتن هه‌نه و په‌یاسه‌یێن وان دكولانان دا هه‌نه، ئه‌ڤه ژى یا بوویه جهێ مه‌ترسیێ و دێ پتر ڤایرۆسێ ته‌شه‌نه‌كه‌ن، له‌ورا دڤێت ئازایه‌تیێ و سه‌ربلندیێ و پێشكه‌ڤتنێ دده‌ركه‌ڤتنان دا نه‌بینن. چونكى سه‌رپێچیكرن دقه‌ده‌غه‌یا هاتن و چوونێ دا ئازایه‌تى و سه‌ربلندى و پێشكه‌ڤتن نینه، به‌لكو به‌رۆڤاژى ده‌ركه‌ڤتنێن ب به‌هانه و بێ ئه‌ركێن پێدڤى تێنه‌گه‌هشتن و مه‌ترسیه بۆ سه‌ر ژیانا وان و مالبات و جڤاكى و بنپێكرنا یاسایێ یه. بۆ پاراستنا ژیانا مرۆڤایه‌تیێ و ده‌ربازبوون لڤێ قۆناغا پر مه‌ترسى و زه‌حمه‌ت پێدڤى یه هه‌مى وه‌لاتیێن هه‌رێما كوردستانێ هاریكار و دلسۆزبن و پابه‌ندى رێنمایێن ساخله‌میێ بن و مل ب ملێ كه‌رتێ ساخله‌میێ و هێزێن ئێمناهیێ، كوردستانێ بپارێزین لڤێ په‌تایا جیهانى و بمینینه دمالێن خۆدا و هێز و مرۆڤایه‌تی و پێشكه‌ڤتنا كوردستانێ بۆ هه‌مى جیهانێ بسه‌لمینین.
ئەڤرۆ نیوز:
دەزگەهێن راگەهاندنا ئەمریکا دیار دکەن کو د ماوەیێ ٢٤ دەمژمێرێن بۆری دا ١٣٤٠ کەسان ب ڤایرۆسێ کۆرۆنایێ ل ئەمریکا جانێ خوە ژ دەست داینە و هژمارا کەسێن کو هەتا نها ل ئەمریکا ژ بەر کۆرۆنایێ مرینە ژی گەهشتیە ٨ هزار و ٥٠٣ کەسان.
هەروەسا د ماوەیێ ٢٤ دەمژمێرێن بۆری ٣٣ هزار و ٧١٢ کەسێن دی ل ئەمریکا تووشی کۆرۆنایێ بووینە و نها ب گشتی ل ئەمریکا ٣١٢ هزار و ٢٤٩ کەس تووشی ڤایرۆسێ کۆرۆنایێ بووینە.
ئەڤرۆ نیوز:
ئورسولا ڤوندیر لاین سەرۆکا کومسیونا ئێکەتیا ئورۆپا راگەهاند کو پێدڤیە وەلاتێن ئێکەتیا ئورۆپا بۆ بەرهنگاریا کۆرۆنایێ پێکڤە ل سەر بەرنامەکێ هەڤپشک کار بکەن.
ناڤهاتیێ راگەهاند کو شەرێ ل دژی کۆرۆنایێ پێدڤی ب پارەکێ مەزنە و هەکە وەلاتێن ئێکەتیا ئورۆپا هاریکاریا هەڤدو نەکەن دێ زیان گەهیتە هەموو وەلاتێن ئێکەتیا ئورۆپا و دێ گەلەک وەلات تووشی کارەساتێن مەزن بن.
ئەڤرۆ نیوز:
فەخرەدین کۆجا وەزیرێ ساخلەمیێ یێ تورکیا راگەهاند کو هەکە د دەمەکێ کورت دا کەسێن کو تووشی ڤایرۆسێ کۆرۆنایێ بووینە بهێنە دەستنیشانکرن و کەرەنتیکرن وی دەمی دێ تورکیا شێت ل سەر کۆرۆنایێ زال بیت، لێ بەرۆڤاژی هندێ دێ ژ دەستێ تورکیا دەرکەڤیت و دێ تورکیا تووشی کارەساتەکا مەزن هێت.
چاڤدێرێن سیاسی ل تورکیا ژی دیار دکەن کو تورکیا دەستپێکێ هەست ب مەترسیا مەزن یا کۆرۆنایێ نەکربوو و پێنگاڤێن پێدڤی نەهاتنە هاڤێتن، ژ بەر هندێ ژی نها رەوش ل تورکیا گەلەک خرابە.
ئەکرەم ئیمام ئوگلۆ سەرۆکێ باژێرڤانیا مەزن یا ئستەنبولێ ژی ئەڤرۆ دیار کر کو دڤێت هەر زوو قەدەغەیا هاتنوچوونێ ل هەموو تورکیا بهێتە راگەهاندن، هەکە نها ئەو یەک نەهێتە کرن پشتی چەند رۆژان ئێدی قەدەغەیا هاتنوچوونێ ژی چو ئەنجامێن خوە نابن.
نيشاندان