ئەڤرۆ:
سەروکێ ئێکەتیا تەپا پێ یا ناڤەندی ل ھەرێما کوردستانێ بەری بەر ب وەلاتێ ئوردن بچیت د رێکا خوەدا بو فەلەستین ل سەر داخوازیا سەروکێ ئێکەتیا تەپا پێ یا فەلەستین جبریل ئەلرجوب بو پشکداریێ د کومبونا د گەل سەروکێ ئێکەتیا نێڤدەولەتی یا تەپا پێ فیفا جوزێف سی پلاتەر د داخویانیەکێ دا بو روژناما ئەڤرۆ دیارکر دێ بادەکا ھەرێما کوردستانێ و داخوازا ئەندامبونا کوردستانێ د ئێکەتیا نێڤدەولەتی دا دەتە دەستێن پلاتەری.
زێدەتر سەفین کانەبی گوت: مە بادەکەکا تمام یا بەرھەڤکری ژ گرنگترین خالێن ڤێ بادەکێ داخوازکرنا سەروکێ ئێکەتیا تەپا پێ یا نێڤدەولەتی بو کوردستانێ داکو ژ نێزیک ب رەوشا ئاراما کوردستانێ ئاگەھداربیت و زێدەتر دیتنا یاریگەھێن کوردستانێ.
ھەر وەسا ناڤبری ئەو چەندە ژی دیارکر دێ داخوازا راکرنا دورپێچا ل سەر یاریگەھێن ھەولێرێ ژ پلاتەری کەین و زێدەتر چاوانیا دەرگەھێن پشکداربونا کوردستانێ وەکو ئەندام د ئێکەتیا نێڤدەولەتی دا و دەلیڤە دان ب کرنا یاریێن نێڤدەولەتی یێن فەرمی.
ل دووماھیێ کانەبی ئەو چەندە ژی دیارکر کو دێ داخوازا پشتەڤانیێ بو پێشڤەبرنا تەپا پێ ل کوردستانێ بھێتە کرن ژلایێ رێکخستنا خولێن راھێنان و دادڤانیێ و زێدەتر دان و ستاندن ل سەر چاوانیا پێشڤەبرنا ژێرخانەیا وەرزشی ل ھەرێما کوردستانێ.

ئەڤرۆ:
چاڤەرێ دھێتەکرن ئەڤرۆ قارەمانا خولا ھەرێما کوردستانێ وەرزێ ٢٠١٤-٢٠١٥ بھێتە دەست نیشانکرن کو ھەڤرکی دناڤبەرا ھەردو یانێن پارێزگەھا دھۆکێ زێرەڤانی ب ٤٥ خالان و دھۆک ب ٤٤ خالانە و ھەردو یانە دێ یاریێن خوە ل دەرڤەی یاریگەھێن خوە کەن.
ل یاریگەھا سلێمانی تیما تەپا پێ یا سلێمانی دێ مێڤانداریا سەرکێشا خولێ کەت و چاڤدێرێن وەرزشی وەسا دبینن خودانێن یاریگەھێ دێ یاریا تولڤەکرنی کەن، ژبەرکو ل وەرزێ بوری زێرەڤانی ئەو ژ رێزا دویێ بێ بارکربوون.
ل دۆر ڤێ یاریێ راھێنەرێ تیما زێرەڤانی سلێمان رەمەزان د داخویانیەکێ دا بۆ رۆژناما ئەڤرۆ دیارکر وان بەرھەڤیەکا باش کریە و پێکھاتیێ وان چو کێماسی لێ نین بتنێ ھوزان نەبیت ئەوژی ژبەر بریارەکا ئێکەتیا ناڤەندی.
ژلایەکێ دووڤە تیما دھۆک خودانا رێزا دویێ دێ بیتە مێڤانا یانا کەرکوکێ و ئەرکێ وێ ژی یێ ب سانەھی نابیت ژبەرکو تیما کەرکوک ھەتا نوکە ب سەرپەرشتیا راھێنەرێ خوە یێ نووی عەبدوللا مەحمود خوسارەت نەبوویە و تیما دھۆک دێ یاریێ کەت بۆ سێ خالێن یاریێ و د ھەمان دەم دا چاڤ دێ ل ئەنجامێ یاریا زێرەڤانی و سلێمانی بیت.
ل دۆر یاریا دھۆک راھێنەرێ تیمێ حازم سالح دیارکر تیم گەلەک یا وەستیایە کو د ماوێ حەفتیەکێ دا سێ یاری کرینە و ڤێ چەندێ دێ کارتێکرنا خوە ھەبیت لسەر شیانێن لەشی یێن یاریکەران و پشتی سێ رۆژێن دی یاریەکا دی ھەیە لێ سەرارای ڤێ ھەمیێ دێ ھەموو شیانێن خوە تەرخان کەن بۆ ھەڤرکی ل سەر ناسناڤێ خولێ.
ھەردیسان دیارکر ژی ئەو پێدڤی دیاریەکێ نە ژ یانا سلێمانی ژبەرکو سەرکەفتن بتنێ تێرا وێ چەندێ ناکەت ئەو بنە قارەمانێن خولێ بەلکو سلێمانی بیتە رێگر د رێکا زێرەڤانی دا.
ژ یاریێن دی یێن ئەڤرۆ دێ ھێنەکرن نەوروز دێ مێڤانداریا پێشمەرگا ھەولێرێ کەت و ھەردو تیمان رێزێن سیێ و چارێ مسوگەرکرینە و تیما ئارارات دێ ل گەل برایەتی کەت و ھندرین ل گەل شێروانە و تیما پێشمەرگا سلێمانی ئەوا پاشڤەزڤری یە خولا پلا ئێک دێ مێڤاندریا ھەولێرێ کەت.

ئەڤرۆ:
یاریگەھا ئولومپی ل روما پایتەختێ ئیتالیا دێ ئەف شەڤە ل دەمژمێر ٩:٤٥ جھێ یاریا دووماھیا قارەمانیا کاسا ئیتالیا بیت د ناڤبەر ھەردو یانێن یوڤانتوس و لازیو د وێ یاریێ دا ئەوا دێ ناڤێ یانا سەرکەفتی ب قارەمانیا دویێ یا ئیتالی ل ڤی وەرزی دیار بکەت پشتی یوڤانتوس ناسناڤێ خولێ ب دەستخوەڤە بری بەری ب دووماھی ھاتنا خولێ ب چار گەران.
بەری یاریا ئەف شەڤە ڤان ھەردو یانا ھەتا نوکە ١٥٥ یاری د گەلێک کرینە یوڤانتوس ٧٨ جاران ب سەرکەفتیە بەرامبەر ٣٨ سەرکەفتنا بو لازیو و ٣٨ جاران وەکھەڤبوینە و د ڤان یاریان دا یوڤانتوس ٢٧٣ گول تومارکرینە و ل بەرامبەر ١٧٩ جاران تورا گولا وێ ژلایێ لازیو ھاتیە ھەژاندن.
بو ڤێ یاریێ مورالا یاریکەرێن یانا یوڤانتوس گەلەک د بلندن چونکو بەری نوکە ناسناڤێ خولا ئیتالیا ب دەستڤە بریە و دیسان ئومێدێن مەزن ھەنە بکەنە سێ ناسناڤ ل ڤی وەرزی چونکو گەھشتینە یاریا دووماھیا مەزنترین قارەمانی ل ئوروپا ل سەر ئاستێ یانا و زێدەتر ل دەستپێکا ڤێ حەفتیێ سەرکەفتن ل سەر ئەنتەر میلان تومارکریە د خولا وەلاتێ خوە دا بەرامبەر یانا لازیو نوکە ل رێزا سیێ د لیستا خولا وەلاتێ خوە دا دھێت و ھشتا دو یاری ماینە بو دیاربونا پشکداریا وێ د قارەمانیا ئوروپا دا ژبەر دەلیڤە یا ھەی پلێتێ ب دەستڤە نەئینت.
بو ڤێ یاریێ راھێنەرێ یوڤانتوس ماسیمیلیانو ئەلیگری دێ پشتبەستێ ل سەر گولچیێ یەدەک مارکو ستوراری یێ ٣٨ سالی کەت ئەوێ ئاستەکێ بلند د یاریا بەرامبەر ئەنتەر دا نیشاندای و پێھینڤە دانە بو گولچیێ سەرەکی جان لویجی بوفون و زێدەتر ئەلیگری شیانێن ھەین بو ھەمی ھێلان یاریکەرێن پێگوھور ب کار بینت ب تنێ نەشێت مفای ژ شیانێن کلاودیو مارکێز و ئەلفارو موراتا بینت ب ئەگەرا راوەستاندنێ و یێ دویێ خەمباریا خوە ب نە پشکداریێ دیارکریە و د گەل دا باوەری ب شیانێن ھەڤالێن خوە ھەیە بو مەزاختنا شیانا پێخەمەت سەرکەفتن و ب دەستڤە برنا ناسناڤی.
ژلایەکێ دووڤە راھێنەرێ یانا لازیو ستیفانو بیولی شیانێن نوو دێ ل بەر دەست بن بو بەرەڤانی و ھەڤرکیێ چونکو یاریکەرێن وی فیلیپی ئەندرسون و ئەنتونیو کاندیف د بارودوخەکێ باش یێ ھونەری و شیانێن لەشی دا دبورن و بشێن پشتەڤانیێ ھێرشبەرێ ئەلمانی میروسلاف کلوزە و فیلیپ دیوردیڤیتش یێ ژ ھنگافتنێ ڤەگەرایی د دروستکرنا دەلیڤێن گولکرنێ دا و دیسان د گەل ڤەگەریانا ھەردو بەرەڤانان سانتیاجو جینتیلیتی و ستیڤان دی فری ژ ھنگافتنێ ڤەگەریاینە لێ یانە دێ یا بێ بار بیت ژ شیانێن یاریکەرێ ھێلا ناڤین لوکاس بیجلیا ب ئەگەرا ھنگافتنێ.