ئه‌ڤرۆ نيوز:
گه‌له‌ك كه‌سان كێشا وێ چه‌ندێ يا هه‌يى، كليلێن خوه دهێلنه د ترۆمبێلێ دا، بۆ وێ چه‌ندێ خوه ژ ڤێ كێشێ رزگار بكه‌يى و نه‌چيه مال
كليلا يه‌ده‌ك ببه‌يى، پێدڤيه ل سه‌ر ته تو ته‌په‌كا ته‌نسێ بينى و پيچه‌كێ ژێ ببرى و وى جهى بێخيه سه‌ر جهێ كليلا ترۆمبێلێ و دێ پالده‌يى و زڤرينى، دێ ڤه‌بيت.
ئەڤرۆ:
دھێتە چاڤەرێکرن ل دووماھیا ڤێ حەفتیێ دووماھی کلیپا سترانبێژا دووری وەلات (ھێلی لۆڤێ) بھێتە بەلاڤکرن و کەسێن د کلیپێ دا کارکرین دبێژن: ڤێ کلیپێ دێ ڕەنگڤەدانەکا باش ھەبیت.
سەرپەرشتەکێ وی کاری بۆ باسنیۆز دبێژیت: کلیپا نوو یا ھێلی لۆڤێ ب ناڤێ (ڕیڤليۆشن) و ل بەرە ل ھژمارەکا کەنالان بھێتە نیشادان، کو پتریا وان کەنالێن ئەسمانی نە.
ئەو ژێدەر دبێژیت: کلیپا نوو یا ھێلی لۆڤێ دێ وەکو بۆمبەکێ پەقیت، کو ھەتا نھۆ ل دیرۆکا کلیپێن کوردی تشتێ ھوسا نەھاتیە کرن، چونکو ھەر کەسەکێ تەماشەی ڤێ کلیپێ بکەت دێ وەسا ھەست پێ کەت ئەو یێ تەماشەی فلمەکێ ئەکشن دکەت کو ل ھولیۆدێ ھاتیە چێکرن.
ل دووڤ نووچەیێن یانەیا ریال مەدرید و روژنامەیێن ئیسپانی بەحسێ هندێ دکەن کو دێ یا نەیا شاهانە گۆهورینێن مەزن ئەنجام دەت، بۆ وەرزێ داهاتی.
هەروەسا روژنامەیێن ئەلمانیا بەحسێ هندێ کریه کو یورگون کلوپێ راهێنەرێ دەست ژکارکێشایێ یانەیا بروسیا دورتموند یا ئەلمانی ب شێوەیەکێ فەرمی رازی بوویە، بۆ وەرگرتنا پۆستێ راهێنەرایا یانەیا شاهانه و پشتی ب دووماهیک هاتنا خۆلا ئیسپانیا دێ جهێ کارلو ئەنچیلوتی راهێنەرێ ریال مەدرید گریت.
روژنامێن ئەلمانی ئەوژی دیارکریە:کو کلوپی مەرجێن وەرگرتنا رەها د وی پوستەی دا وەرگرتینە و بۆ وەرزێ بهێت دێ گۆهورینێن مەزن د پێکهاتەیێ ریالێ دا ئەنجام دەت و ل بەرە حەفت یاریکەران بینیتە دناڤ رێزێن یانەیا شاهانە.
ئەڤرۆ:
سترانبێژا گەنج (لەنجە عەلی) کو نھۆ ل گەل ھەڤژینێ خۆ (زانا تاھر) ل وەلاتێ بریتانیا دژیت بۆ ئەڤرۆ دیارکر دەمێ ژیێ وی پازدە سال حەزا مۆزیکێ ل دەف وێ پەیدا بوو، پشتی چەند سالان بەر ب سترانگۆتنێ ڤە چوو و ھەتا نھۆ ھژمارەکا ستران و کلیپان ھەنە.
ھێشتا گۆت: ئەڤە دەمەکە بۆ کلیپکرنا سترانەکێ ئەز ڤەگەریایمە کوردستانێ و سترانا منا نوو ب ناڤێ (یادمکە) ل گوندێ (کۆنە سەر) سەر ب دەڤەرا گەرمیان ڤە ھاتیە وێنەکرن و نھۆ دقۆناغا دووماھیێ دایە و ل نێزیک دێ بەلاڤ بیت.
ل دووماھیێ گۆت: ل گەل ھاتنا خۆ ئەز ب دەلیڤە دبینم ھندەک کارێن دی یێن ھونەری ل ڤێرە ئەنجام بدەم.
ئەڤرۆ:
بریارە ئەڤرۆ شاندێ یانا دھۆک بەر ب باژێرێ ھەولێرێ بچیت ب مەرەما کرنا یاریا خوە یا حەفتیا دووماھیێ ژ خولا کوردستانێ یا پلا نایاب و چاڤەرێ دھێتەکرن ل رۆژا چارشەمبیا بھێت بەرامبەر یانا کەرکوکێ بکەت ل یاریگەھا کەرکوک
کو دڤێ یاریێ دا تیما دھۆک پێدڤی ب سەرکەفتنێ یە و د ھەمان دەم دا تیما زێرەڤانی سەرکەفتنێ تومار نەکەت داکو ب ناسناڤێ خولا ھەرێما کوردستانێ یا ئەڤ سالە بھێتە خەلاتکرن.
تیما دھۆک دێ بێ پشکداریا دو باشترین یاریکەرێن خوە یاریێ بەرامبەر کەرکوک کەت ئەوژی کاپتنێ تیمێ خالد موشیر و ستێرا ھێلا ناڤین ئاماد ئیسماعیل ژبەر وەرگرتنا دو کارتێن زەر ل یاریێن بوری.
ھەژی گوتنێ یە تیما دھۆک نوکە لرێزا دویێ دھێت ب ٤٤ خالان و تیما زێرەڤانی ب ٤٥ خالان ل رێزا ئێکێ دھێت.
ئەڤرۆ:
کارگێریا یانا نەفت ئەلجنوب ڤەکێشانا خوە ژ خولا عیراقێ یا تەپا پێ بو یانێن پلا نایاب راگەھاند ب ئەگەرا قەیرانا دارای ئەوا ب سەر یانێ دا ھاتی.
زێدەتر ل دور ڤی بابەتی و تایبەت پشتی گەشتنا وێ بو قوناغا بژارە ئەوا دەست ب ھەڤرکیێن وێ ھاتیە کرن و د یاریکرنا خوە یا ئێکێ دا خوسارەت بوی ئەندامێ دەستەیا کارگێریا یانێ ئیبراھیم دەحلوس راگەھاند کو بریارا خوە ڤەکێشانێ ژلایێ دەستەیا کرگێریا یانێ ھاتە دان ژ ھەڤرکیێن خولا عیراقێ ب ئەگەرا ھەبونا قەیرانا و نەبونا شیانێن پێدڤی ژبو بەردەوامی دانێ ب ھەڤرکیێ.
زێدەتر ناڤبری ئەو چەندە ژی دایە خویاکرن سەرەرای وێ چەندێ کو بوجە و مەزاختیێن یانا وان گرێدای وەزارتا نەفتا عیراقێ یێ لێ ھەبونا قەیرانا دارای یا بویە ئاستەنگ و کار ب زەحمەت ئێخستیە و ئەف چەندە بو ئەگەر بریارا خوە ڤەکێشانێ بھێتە دان و نەشێن بەردەوامیێ ب دەنە ھەڤرکی و پشکداریێ.
ئه‌ڤرۆ نيوز:
شرۆڤه‌كاره‌كێ كاروبارێن هه‌والگه‌ريێ دياردكه‌ت كو ئه‌مريكا ل عيراقێ شكه‌ستن يا ئينايى و ل سه‌ر سه‌ره‌دانا ڤێ دووماهيێ يا بارزانى ژى دده‌ته زانين كو بارزانى يا گۆتى هه‌كه پارێ په‌ترۆلێ بۆ ره‌وانه نه‌كه‌ن دێ جودا بن.
رۆبه‌رت پيێر، شرۆڤه‌كار و شاره‌زايێ كاروبارێن هه‌والگه‌رى بۆ CNN راگه‌هاند: ئه‌مريكا ل عيراێ شكه‌ستن يا ئينايى و نه‌شێت پارێزگاريێ ل ئێك پارچه‌يا وى وه‌لاتى بكه‌ت و گۆت: “ب هنارتنا چه‌كى بۆ عيراقێ، چو جاران ئه‌و وه‌لات ناچيته سه‌ر كاودانێن خوه يێن به‌رێ”.
پێير ئاماژه ب وێ چه‌ندێ ژى كريه كو سه‌ركردێن داعش و له‌شكرێ وان ل سه‌ر ده‌مێ رژێما سه‌دام حسێن دزانى چ دكه‌ن و هه‌ر ده‌مێ ده‌ڤه‌ره‌كێ داگير دكه‌ن پشته‌ڤانێن ئه‌مريكا و له‌شكرێ سۆپايێ عيراقێ دكوژن و كريارێن نه‌ژادپه‌رستى ئه‌نجام دده‌ن.
ته‌كست ل سه‌ر وێ چه‌ندێ ژى كر كو به‌غدا نه‌شێت ب ساناهى رۆمادى كۆنترۆل بكه‌ت و ب هنارتنا حه‌شه‌د شه‌عبى بۆ وى باژێرێ دێ گۆمێن خويێن دروست بن.
شرۆڤه‌كارێ CNN ده‌رباره‌يى سه‌ره‌دانا ڤێ دووماهيێ يا بارزانى ژى بۆ واشنتۆن گۆت: “بارزانى يا گۆتى هه‌كه پاره‌يێ په‌ترۆلێ نه‌گه‌هيته وان دێ ژ عيراقێ جودا بن”.
ئه‌ڤرۆ:
ل سالا ٢٠١١ دەست ب ھەلکۆلانا ئەردێ پانزینخانا گەلی یا کەڤن ھاتبوو کرن و پشتی کۆلانێ نەە خانی ل وی جھی ھاتینە خوار و ھەرفتینە، بەلێ ئاکنجیێن وان خانیان بۆ ئەڤرۆ دیار دکەن کو ئەڤە پێنچ سالە ئەو چاڤەرێ قەرەبووکرنا خانی و ئەردێن خوە دکەن، بەلێ وەبەرھێنەرێ پرۆژەی ئەو ل پشتگوە ھاڤێتینە و ئێک ژ زیانڤێکەفتیان گۆت: وەکو دووماھی چارە ئەم ژ پارێزگارێ دھۆکێ دخوازین چارەیەکێ بۆ مە ببینیت.
ھادی مەھدی یاسین، ئێک ژ زیانڤێکەفتیێن پانزینخانا گەلی بۆ ئەڤرۆ دیار کر، ل سالا ٢٠١١ وەبەرھێنەرەکی دەست ب خرابکرنا پانزینخانا گەلی کر بۆ ھندێ بکەتە جھەکێ بازرگانی، بەلێ ل گەل خرابکرنا پانزینخانێ و ھەلکۆلانا ئەردێ وێ ب کووراتیەکا مەزن، ئەو خانیێن نێزیک پانزینخانێ ھەرفتن و خراببوون و گۆت: نێزیکی نەە خانیان ھاتینە ھەرفتن و ھەتا نووکە ژبلی وەرگرتنا کریا ھەیڤانە، قەرەبوویا خانیێن وان نەھاتیە دان، د سەر ھندێ را ژ ئالیێ باژێرڤانیا دھۆکێ ڤە ھاتیە خەملاندن.
ناڤبری دیار کر کو وەبەرھێنەری ب خوە کار ب رێڤەنەبر و چو ئەندازیاریان ژی ل سەر کارنەکر و دا بۆ دەستێ ھندەک کەسێن دی، لەوما بۆ ئەگەر کو ئەو ئەردە ھەموو ھەرفت، ل دەستپێکێ کۆلانا وان یا دروست بوو، بەلێ بۆ ماوێ شەش ھەیڤان ئەو کوورا مەزن ھێلا ھوسا و دەستێ خوە نەکرنێ، ھەتا بوویە ئەگەر کو ھەرفتن پەیداببیت و گۆت: نەە خانی ژ ئەگەرێ وێ ھاتنە ھەرفتن و ھەتا نوکە چو ژ وان خێزانان نەھاتینە قەرەبووکرن.
ھادی نە ڤەشارت ژی کو پشتی خانیێن وان بەر ب ھەرفینێ چووین وان خانیێن خوە بجە ھێلان و بەرامبەر وێ وەبەرھێنەرێ پرۆژەی کریێن خانیان بۆ وان دابینکرن و گۆت ژی: دو جاران ل سەر دەستێ قائیممقامی و باژێرڤانیێ مە رێککەفتن کریە و خانیێن مە ب تنێ وەکو ئاڤاھی ھاتینە خەملاندن، بۆ وێ یەکێ ئەردی ل جھەکی بدەنە مە و ب وی پارەی ئەم بۆ خوە خانیەکێ دی ئاڤابکەین، بەلێ ھەتا نوکە ژی ئەو پارە نەھاتیە دان و قەرەبوویا مە نەھاتیە کرن و گۆت: پارێ ھەر نەە خانیان ٧٥٤ ملیون دینار ژ بلی ئەردی، ئەڤەب تنێ حەقێ ئاڤاھیان.
عزەت عەبدولقادر بابوخکی ئێک ژ زیان ڤێکەفتیان بۆ ئەڤرۆ ئاشکرا ژی کر کو مە سەرەدانا ھەموو جھان کریە و خوە چووینە نڤیسینگەھا سەرۆکی ژی بۆ ھندێ مافێ مە زوو بھێتەدان و گەلەک جاران چووینە دەڤ قائیمقامی و باژێرڤانیا دھۆکێ و ئەم نزانین دێ ئایندێ مە چو لێ ھێت و گۆت: ئەم داخوازا چاڤپێکەفتنەکێ ل گەل پارێزگارێ دھۆکێ دکەین بۆ ھندێ ب زووترین دەم چارەیەکێ ل مە بکەن.
ئه‌مير ئه‌ترووشى بۆ رۆژناما ئه‌ڤرۆ به‌رهه‌ڤ كريه
ئه‌ڤرۆ:
ئەندامەکا لژنا کارۆبارێن پەرلەمانێ کوردستانێ، ئاشکراکر کو،ئەو مژولی پرۆژە قانوونەکێ نە کو تێدا ماوەک ھاتیە دیارکرن بۆ وان کەسانێن دو مووچان وەردگرن خوە دیاربکەن و گۆت: پێدڤیە بتنێ مووچەک بمینت کو ژ حوکمەتێ وەربگرن، ژ ئالیەکێ دی ڤە، سەرۆکێ لژنا نەزاھێ ل پەرلەمانێ کوردستانێ بۆ بەرپەرێ قانوونیێ ئەڤرۆ ئاشکراکر کو ئەندام پەرلەمان ھەنە دو مووچان وەردگرن.
عومەر کوچەر سەرۆکێ لژنا نەزاھێ ل پەرلەمانێ کوردستانێ بێ کو زێدەتر پێزانینان ل سەر ھەژمار و ناڤان بدەت، ئاشکراکر کو ئەندام پەرلەمان ھەنە دو مووچان وەردگرن و گۆت: ھندەک ئەندام پەرلەمان ھاتینە و رونکرن داینە، ھەردیسا ھەبووینە ئەم ئاگەھدارکرینە، لێ د ھەمان دەم ژی دا ھەنە دراوستاینە، گۆتژی: مە ل گەل وەزارەتا دارایی و ئابووری یا حوکمەتا ھەرێما کوردستانێ ئاخفتیە کو دێ ھندەک رێنمایێن نوو دەرێخین ئەوژی ب شێوەکێ ھوسا کو دەمەک بۆ وان کەسێن دو مووچان وەردگرن بھێتە ، و ھەر کەسەکێ د ڤی ماوەیی دا مووچەکێ خوە نەراوستینت، دێ ل دووڤ قانوونێ ھێتە سزادان و یێ ورەگرتی ژی دێ بۆ حوکمەتێ زڤڕینیت.
عومەر کوچەر گۆتژی: ئەم دزانین دەمێ مووچێ کەسەکی بھێتە برین، دێ بۆ گەلەک نەخوەش بیت و دبیت تێرا نەکەت، لێ وەک جھەکێ تەشریعی و ل گۆر قانوونێَ دێ کار دکەین، ژبەر نە قانوونی یە دو مووچە بھێنە وەرگرتن ژ حوکمەتێ.
ژ لایەکێ دیڤە، مەدینا ئەیوب، ئەنداما لژنا کارۆبارێن پەرلەمانی، ل پەرلەمانێ کوردستانێ بۆ بەرپەرێ قانوونیێ ئەڤرۆ گۆت: پرۆژەکێ قانوونەک دھێتە بەرھەڤکرن کو تێدا ماوە دێ بۆ وان کەسێن دو مووچان وەردگرن ھێتە دیارکرن ئەوژی (٦٠) رۆژن، ل ڤێرە ھەکە د ماوەیێ دیارکری دا سەرەدانا بنگەھێ خوە نەکەت، ئەو کەس دھێتە سزادن، مەدینایێ ئاشکراکر ژی کو ئەڤ قانوونە نەکو نە بتنێ ل سەر ئەوان کەسان دھێتە جێبەجێکرن یێن دوو مووچان ل کوردستانێ وەردگرن، بەلکو رەنگە ھەبن ژی مووچەکی ل ھەرێمێ و ئێکی ل بەغدا وەربگرن، ئەڤە ژی نابیت و دڤێت مووچەکی پێلیت، مەدینایێ گۆتنێن عومەر کوچەری ژی پشت راستکرن کو ئەندام پەرلەمان ھەبووینە کو دوو موچان وەربگرن و گۆت: ئەو ئەندام پەرلەمان نوکە دەست بەردایی مووچەکی بوویە.
ل دووماھیێ مەدینا ئەیوب خۆیاکر کو نوکە ئەو د مژوولن ل گەل لژنا پەترۆل و غازێ ل پەرلەمانێ کوردستانێ داکو ئەو مووچێ دھێتە زڤڕاندن، بچیتە د سنووقا داھاتێن حوکمەتێ.
نيشاندان