ئه‌ڤرۆ نيوز:

ڤەکۆلەرەکێ ناڤدارێ تورکیا راگەھاند کو ئیسرائیل و سعوودیا ژ بۆ ئاڤاکرنا کوردستانەکا سەربخوە د ناڤبەرا خوە دا رێککەڤتنەک دروست کرینە و ھەر دو وەلاتان بریار داینە کو ھاریکاریا کوردان بکەن، چونکو ئیسرائیل و سعوودیا بۆ خوە باش دبینن کو وەلاتەکێ نوو و ھەڤپەیمانێ ھەبیت و ئەو ب ڤی رەنگی دێ بشێن رێگریێ ل ب ھێزبوونا تورکیا و ئیرانێ ژی بکەن و بەری نھا جەنەرالەک سعوودیا ئەو یەک بۆ من دیار کریە.

فاتح ئالتایلی نڤیسەر و ڤەکۆلەرێ ناڤدارێ تورکیا د بەرنامەکا تەلەفزیونا خەبەر تورک دا راگەھاند کو رۆژھەلاتا ناڤین بەر ب گوھۆرینێن بلەز ڤە دچیت و دڤێت ئەم قەبوول بکەین کو کوردان شیان د شەرێ ل دژی داعشێ دا ھێزا خوە نیشا ھەموو جیھانێ بدەن، مە ب چاڤێن خوە دیت کا چاوا لەشکرێ دو وەلاتێن ب ‌ھێز وەک عیراق و سووریا نەشیان شەرێ داعشێ بکەن، لێ پێشمەرگە و شەرڤانێن کورد شیان ل سووریێ و عیراقێ دربێن مەزن ل داعشێ بدەن و پێشڤەچوونێن وان بدەنە راگرتن و ژ بەر ھندێ ژی ئەڤرۆکە ئەمریکا و گەلەک وەلاتێن رۆژئاڤا ھاریکاریا کوردان دکەن و ئەو ژی دخوازن کو کورد ببنە ھەڤپەیمانێن وان ل رۆژھەلاتا ناڤین دا و گۆت: (سعوودیا و ئیسرائیل دەمەکە ژ سیاسەتا تورکیا ل ھەمبەر دەڤەرا رۆژھەلاتا ناڤین نەرازی نە، ل ئالیێ دی ئیران پشتی رێککەڤتنا ل گەل وەلاتێن زلھێز دخوازیت کو ببیتە ھێزا سەرەکی یا دەڤەرا رۆژھەلاتا ناڤین و ل ھەمبەر ئیرانێ ژی سعوودیا و گەلەک وەلاتێن دی دلگرانن و تورکیا ب خوە ژی ناکۆکی ل گەل ئیرانێ ھەنە و ژ بەر ھندێ سعوودیا و ئیسرائیل سەبارەت ب ئاڤاکرنا دەولەتا کوردی رێککەڤتینە و بەری دەمەکێ جەنەرالەکێ سعوودیا ئەو یەک گۆتە من، چونکو ئەو دبینن ھەکە دەولەتەکا کوردی ئاڤا بیت و پەیوەندیێن باش ل گەل وان ھەبیت دێ بشێن رێگری ل پیلانێن تورکیا و ئیرانێ بگرن).

ناڤھاتی د پشکەکا دی یا ئاخڤتنا خوە دا ژی ئەو یەک دیار کر کو دڤێت ئەم قەبوول بکەین کو ل تورکیا پرسا کوردی ھەیە و پتر ژ سیە سالانە کو شەر ھەیە و شەرێ نھا ھەکە وەسا بەردەوام بیت دێ بیتە شەرێ کورد و تورکان و مخابن ئەردۆگانی نەشیا وەک پێدڤی سەرەدەریێ ل گەل رەوشا نوو ل تورکیا بکەت و ژ بەر ھندێ ژی تورکیا بەر ب چارەنڤیسەکێ نەدیار ڤە دچیت و گەلەک وەلات دێ بزاڤێ کەن کو مفایێ ژ شەرێ ناڤ تورکیا وەربگرن و گۆت: (پشتی سیاسەتا ئەردۆگانی یا ل ھەمبەر فەلەستینێ و ھەلویستێ وی یێ توند ل دژی ئیسرائیلێ وەسا کر کو ئەو وەلاتە ژی دەست ب دروست کرنا ھندەک ھەڤالبەندێ نوو بکەت، سعوودیا ژ بەر بەرژەوەندیێن خوە یێن ل گەل ئیسرائیلێ و ھەروەسا ژ بەر ناکۆکیێن دژوار یێن د ناڤبەرا سعوودیا و ئیرانێ، ئەو ھەر دو وەلات نھا د گەلەک بیاڤان دا پێکڤە کار دکەن و نێرینا وان سەبارەت ب ئاڤاکرنا دەولەتەکا کوردی ل دەڤەرێ ژی وەک ئێکە).
ناڤھاتی د دووماھیا ئاخڤتنا خوە دا ئەو یەک ژی راگەھاند کو دڤێت تورکیا سیاسەتا خوە ل ھەمبەر کوردان بدەتە گوھۆرین و دڤێت ئەردۆگان بزاڤێ بکەت کو پەیوەندیێن خوە ل گەل کوردێن سووریێ باش بکەت و ھەروەسا بلەز دەست ب قۆناغا ئاشتیێ بکەت، چونکو ئەو دژبەریا کو نھا تورکیا ل ھەمبەر رۆژئاڤایێ کوردستانێ نیشا ددەت دێ پاشی ئالۆزیێن مەزن بۆ مە دروست کەت و گۆت: (ھەکە دەولەتا کوردی ل دەڤەرێ ھاتە ئاڤاکرن و تورکیا پەیوەندیێن باش ل گەل وێ دەولەتێ دروست نەکرن، دێ پێگەھێ تورکیا گەلەک لاواز بیت، چونکو دڤێت ئەم ژبیر نەکەین ھەکە دەولەتا کوردی ل رۆژھەلاتا ناڤین بھێتە دروست کرن دێ گەلەک وەلاتێن رۆژئاڤا پشتەڤانیێ لێ کەن، چونکو کوردان د شەرێ ل دژی داعشێ دا گەلەک قوربانی داینە و بۆ ھەموو جیھانێ بووینە جھێ رێزگرتنێ و ژ بەر ھندێ دێ گەلەک پشتەڤانیا کوردان ھێتە کرن).

ئەڤرۆ نيوز:

ژێدەرەکێ حوکمەتا عیراقێ ئاشکراکر کو فرۆکێن روسی ل دەستپێکا ھەتیا بھێت دێ دەست ب کارێ چاڤدێریێ کەن ل ئەسمانێ عیراقێ، ب تایبەتی ل دڤەرێن دبن کونترۆلا رێکخراوا داعش یا تیرۆرستی ڤە ژبۆ کۆمکرنا پێزانینان.

ل دووڤ سایتێ (ئەلمەعلومە) یێ عیراقی، وی ژێدەرێ حکومیێ عیراقی پێ راگەھاندیە” ھەڤپەیمانیا ھەرێمایەتی ب سەرۆکاتیا روسیا ب شێوەکێ پراکتیکی دەست ب کۆمکرنا پێزانینان و لێک گوھارتنا وان کریە ل دۆر گرنگترین بنگەھێن داعشێ و ژێدەرێن وێ یێن دارایی کو ئەو رێکخراوا تیرۆرستی ب ڕییا وان ژێدەران چالاکیێن خوە ل عیراقێ و سووریێ ئەنجام ددەت”.

وی ژێدەری خویاکر ژی” فرۆکێن روسی ل ھەفتیا داھاتی دێ دەست ب چاڤدێریا ئەسمانێ عیراقێ کەن ب تایبەتی ل وان دەڤەرێن کەفتینە دبن کونترۆلا داعشێ دا”.

ھەر چار وەلاتێن روسیا و عیراقی و سووریا و ئیرانێ ھەڤپەیمانیا خوە یا چار قۆلی و ڤەکرنا بنگەھەکێ پێزانینان ب شێوەکێ فەرمی کو بارەگایێ وی ل بەغدا بیت راگەھاندبوو، ب مەرەما لێک گوھارتنا پێزانینێن ھەوالگیری ل دۆر رێکخراوا داعشی یا تیرۆرستی و کارکرن ژبۆ ژناڤبرنا وێ رێکخراوا تیرۆرستی ل عیراقێ و سووریێ.

ژلایەکی دی ڤە جڤاتا ئێکەتیا روسی رازیبوونا خوە ل سەر داخوازیا سەرۆکێ روسیا فلادیمێر پۆتینی دیاکر ل دۆر بکارئینانا لەشکرێ روسی ل دەرڤەی سنۆرێن روسیا، ژێدەرەکێ ھەوالگیریا عیراقێ ژی ئاشکراکر کو گەرا ئێکێ یا شیرەتکار و شارەزایێن لەشکری یێن روسی و ئیرانی گەھشتنە بەغدا بۆ دەستپێکرنا کارێ ھەڤپەمانیا چار قۆلی.

وی ژێدەرێ ھەوالگیریا عیراقی بۆ سایتێ (مەوازین نیۆز) گوت” بنگەھێ لێگ گوھارتنا پێزانینێن ھەوالگیری د ناڤبەرا عیراقێ و سووریێ و روسیا و ئیرانێ دا دێ د دەمێ دو مەھێن داھاتی دا کەڤیتە کاری و عیراقێ پێدڤی ب لێک گوھارتنا شارەزایی و پێزانینێن ھەوالگیری ل گەل وەلاتان یا ھەی، ب تایبەتی پشتی دیاربووی کو ئەمریکا یا رژد نینە و شکەستن ژی ئینا ل گەل ھەڤپەیمانیا نێڤدەولەتی بۆ ژناڤبرنا رێکخراوا داعش یا تیرۆرستی”.

ژێدەرەکی ژ حوکمەتا عیراقێ بۆ ھەمان سایت ژی دیارکربوو” ٣٠ شیرەتکار و شارەزایێن لەشکری و تایبەتمەندێن کاروبارێن ھەوالگیریێ یێن روسی گەھشتینە ل رۆژا دوشەمبی ٢٨ ئیلۆنا ٢٠١٥ێ یێن گەھشتینە بەغدا ل گەل ھاریکاریێن بلەز بۆ لەشکرێ عیراقێ کو پێک دھێن ژ چەکێ ھەمەجور یێ شەڕێ جادەیان و مۆشەکێن ژ جۆرێ (کورنیت) یێن دژی ترومبێلێن مینرێژکری”.

وی ژێدەرێ حکومیێ عیراقی ئارمانجا دروستکرنا بنگەھێ پێزانینێن ھەوالگیری یێ ھەڤپشک د ناڤبەرا وان ھەر چار وەلاتان ئاشکراکر و گوت” مەرەم ژ دروستکرنا وی بنگەھێ دوورکرنا ئەمریکایە ژ ھەر رۆلەکێ لەشکری د شەڕی دژی داعشێ دا، ب تایبەتی ھندەک راپۆرتێن ھەوالگیری یێن عیراقی و رۆژئاڤای بەحس ل وێ چەندێ دکەن کو ئەمریکا چەکی و دراڤی پێشکەشی رێکخستیا داعش یا تیرۆرستی ل عیراقێ دکەت”.