ئه‌ڤرۆ نيوز:

ل دووڤ زانیاریێن دەست ب رۆژناما ئەڤرۆ کەفتین، ل چەندین قوتابخانێن سەنتەرێ باژێرێ دھۆکێ، سەرەرایی بریارا وەزارەتا پەروەردێ کو نابیت رێکەفتن ل گەل کۆمپانیێن جلکێن قوتابیان بھێنەکرن، قوتابیێن خوە ھایدارکرینە دڤێت ٤٠ ھزار دیناران بینن بۆ کرینا جلکێن وەکھەڤ بۆ ھەموو قوتابیان.

جمبەد شوکری، سەرۆکا لیژنا پەروەردێ ل ئەنجوومەنێ پارێزگەھا دھۆکێ ئاشکرا کر، بریارا وەزیری یا ھاتیە بجھئینان و ب تنێ ئەڤا دھێتە کرن رێکەفتنا ھەیڤا ئەیارێ و نیسانێ یە یا سالا بۆری کو جلک بۆ قوتابیان بۆ ئەڤ سالە بھێنە چێکرن و گۆت: ژ بەر کاودانێن نوکە کوردستان تێدا دبۆریت، وەزیرێ پەروەردێ ل حوکمەتا ھەرێما کوردستانێ بریار ل دەسپێکا ئەڤ سالە یا خواندنێ دایە نابیت قوتابخانە رێکەفتنێ ل گەل چو کۆمپانیان بکەن و ئەڤە تشتەکێ جوانە.
زێدەتر گۆت: لێ دڤیابا د بریارا خوە دا ئاماژە پێ کربا کو ژبلی قوتابخانێن رێکەفتن ل گەل ل سالا بۆری ل گەل کۆمپانیان کرین کو جلک بۆ قوتابیان بۆ ئەڤ سالە بھێنە چێکرن، یان بریار پێشت وەخت دەرکەفتبایە، چونکو ڤان کۆمپانیان جلک چێکرینە و ژ وەلاتێ تورکیا بەر ب کوردستانێ ئیناینە و نابیت ئەڤە ژی ژ کیستێ وان بچیت و دڤێت ئەڤە ژی ل بەرچاڤ ھاتبا وەرگرتن.
ل ھەمبەر وەرگرتنا پاران ژ قوتابیان، سەرۆکا لژنا پەروەردێ جمبەد شوکری گۆت: ل دووڤ زانیاریێن من ھەین، رێڤەبەرێن قوتابخانا مایتێکرن د وەرگرتنا پاران و ھەتا رێکەفتنێ نەکریە و بەرۆڤاژی ئەنجوومەنێ دایک و بابان ل سنورێ قوتابخانێ رێکەفتن گرێداینە و ب تنێ رێڤەبەر و کارگێریێن قوتابخانا رەنگێ جلکان ھەلبژارتینە.
رەجەب ئاکرەیی خودانێ کومپانیا ئەجوان یا چێکرنا جلکێن قوتابخانان بۆ ئەڤرۆ گۆت: ئەڤ سالە گەلەک داخوازی ل سەر چێکرنا جلکێن قوتابیان گەھشتنە مە، لێ مە پێگیری ب بریارا وەزارەتا پەروەردێ یا حوکمەتا ھەرێما کوردستانێ کریە، ب تنێ ئەو قوتابخانە نەبن ئەوێن ھەیڤا پێنچ یا سالا بۆری مە رێکەفتن ل گەل ھەی بۆ چێکرنا جلکان بۆ ئەڤ سالە، چونکو جلک ھاتینە ژ تورکیا و ب تنێ بەلاڤەکرن مایە و نابیت ئەڤ رێکەفتنە بھێنە ھەلوەشاندن.
خودانێ کۆمپانیێ گۆت ژی: کۆمپانیا مە ل سەرانسەری ھەرێما کوردستانێ جلکێن قوتابخانان چێ دکەت و ئەڤ سالە ب تنێ ل قوتابخانەکێ مە جلک بۆ قوتابیان چێکرینە، چوار پارچە ب ٤٠ ھزار دیناران و ھەنە پێنچ پارچە ب ٥٠ ھزار دیناران، دیسان درینگەە ژی ھەنە ل قوتابخانان دگەرن و جلکێن قوتابیان چێدکەن، لێ یا مە کومپانیا چێکرنا جلکێن قوتابخانایە و تایبەتمەندە د ڤی کاری دا.
عەبد یوسف رێڤەبەرێ گشتیێ پەروەردا پارێزگەھا دھۆکێ خویا کر، ئەڤ رێکەفتنە پتر د بەرژوەندا قوتابیان دانە و ھەکە سێ برابن بھا کێمترە و بۆ ھەژار و دەست کورتان ئەرزانترە و بۆ زارۆیێن شەھیدان و پێشمەرگان ل بەرچاڤ ھاتینە وەرگرتن، ئەڤ سالە و پشتی بریارا وەزیری و کاودانێن نوکە کوردستانی تێدا دبۆریت ئەڤ رێکەتنە ھاتینە راگرتن، لێ ئەڤا نھا یا پێشتر و نوکە ب تنێ بەلاڤەکرنە و ھژمارەکا کێمە و ھەتا ١٠ قوتابخانانە، پشتی بریارا وەزیری ھەموو قوتابخانە ھاتینە ئاگەھدارکرن کو رێکەفتن نابیت و بلا قوتابی جلکێن خوە یێن پار بکەنێ و ب تنێ رەنگ وەک ئێک بن.
ناڤبری گۆت: وەزیرێ پەروەردێ ل سەر کاودانێن ڤان قوتابخانان دھێتە ھایدارکرین بۆ دیتنا چارەکێ بۆ ڤان قوتابیان. ھێشتا گۆت: جلکێن چێ دکەین ل بازاری نە ب ڤی بھایە و نە ب ڤێ کوالێتی یە و پتر بۆ قوتابخانێن ئەھلی چێ دکەین و دیسان بۆ کۆمپانیێن پەترۆلێ ژی جلکان چێدکەین و دیسان جلکێن مە گرەنتی ھەیە بۆ دو سالان و ھەتا ٢٠٠ جاران ژی بشووت چو لێ ناھێت.
عەبد یوسف رێڤەبەرێ گشتیێ پەروەردێ ئاشکراکر کو ھەتا ١٠ قوتابخانان ل سەنتەرێ باژێری ھەنە کو پێشتر و بەری بریارا وەزیرێ پەروەردێ رێکەفتن ل گەل کۆمپانیان کرینە و ئەڤە ئەنجوومەنێ دایک و باب ل گەل کۆمپانیێ کریە و ئەڤە ھەیڤا چار و پێنچ بوویە کو جلک بۆ ئەڤ سالە چێکرینە.