ئەڤرۆ نيوز:
ھاریکارێ رێڤەبەرێ گشتیێ پەروەردێ ل پارێزگەھا دھۆکێ بۆ بەرپەرێ ئابووریێ رۆژناما ئەڤرۆ ئاشکراکر چەندین رێنمایێن نوو ل سەر فرۆشگەھێن قوتابخانان ل ئەڤ سالە دەرکەفتینە و ئاشکراکر ژی کو چەندین لژنە بۆ ھەمان مەبەست ھاتینە پێکئینان.
عومەر عەلی تاھا ھاریکارێ رێڤەبەرێ گشتیێ پەروەردێ ل پاررێزگەھا دھۆکێ بۆ رۆژناما ئەڤرۆ ئاشکراکر سالانە رێنمایێن نوو دەردکەڤن و تایبەت ل سەر فرۆشگەھان و ئەڤ سالە ب نڤیسار ١٣ ھزار ٥٩٢ رێکەفتی ٢٣-٨-٢٠١٥ دەرکەفتیە و رێمایێن تایبەت بووینە ل سەر کرێکرنا فرۆشگەھێن قوتابخانان بۆ ھەموو پەروەردا ھاتیە رەوانەکرن و کۆمبوونێن تایبەت ل سەر ھەمان بابەت ھاتینەکرن و ئەڤە بتنێ بۆ خزمەتا قوتابیانە.
عومەر عەلی تاھا گۆت: ئەڤ فرۆشگەە ب سەرئێک زێدەکرنەکا ئاشکرا ل سنورێ ھەموو پەروەردان دھێتەکرن و چەندین لژنە ھاتینە پێکئینان ل سەر ئاستێ وەزارەتێ لژنەک و ل سەر ئاستێ پەروەردێن گشتی یێن ھەرێمێ لژنەک کو سالانە دھێتە پێکئینان، ھەر پەروەردەکا قەزا دو لژنە ھاتینە پێکئینان، لژنا خەملاندنێ بۆ دەستنیشانکرنا کرێیا فرۆشگەھان ل دووڤ ھژمارا قوتابیێن قوتابخانێ، لژنا کرێدانا فرۆشگەھێ، کرێدانا فرۆشگەھێ دڤێت رێڤەبەرێ قوتابخانێ بەرھەڤ بیت و ب سەرپەرشتیا سەر پەرشتیاران و ئەڤ لژنە دھێنە برێڤەبرن.
عومەر عەلی تاھا گۆت: راستە داھات بۆ پەروەردێ و قوتابخانێ ژێ دھێت،لێ ئەڤ کارە ھەموو بۆ بەرژەوەندا قوتابیان دھێتەکرن .
ھەمبەر داھاتێ فرۆشگەھان ژی ناڤبری گۆت: رەنگە ئەڤ سالە گوھۆرین ل داھاتێ فرۆشگەھان بھێتەکرن، داھاتێ فرۆشگەھێن قوتابخانێن ھەموو قەزا ب رێکا پەروەردێن وان قوناغا ئێکێ دێ زڤریتە پەروەردا گشتی، ژڤی پارەی ٨٠% دێ بۆ قوتابخانان زڤریت و ئەڤ ژی ل دووڤ خشتەکی بۆ کارێن ھونەر و وەزرشی و چالاکیان دێ ھێتە مەزاختن و رێژەک بۆ زارۆیێن ھەژار و دەست کورت دھێتە تەرخانکرن و ب رێکا ھەر پەروەردەکێ، ٢٠% دێ مینت و ژڤێ رێژێ ٥٠% بۆ ڤەکرنا خولانە بۆ مامۆستا و فەرمانبەرێن رێڤەبەریا گشتی و ب ھەموو پەروەردێن قەزان ڤە، ٣٥% ژ رێژا ٢٠% یا مای دێ زڤریت بۆ پەروەردێن قەزا ئەگەر کارەکێ سەرانسەری بیت و ئەڤە پشتی ڤەدیتن بۆ دھێـەکرن و ١٥% یا مای بۆ پێدڤیێن قوتابخانان ژلایێ رێڤەبەریا گشتی ڤە دێ بۆ ھێتە تەرخانکرن.

ھاریکارێ رێڤەبەرێ گشتیێ پەروەردێ ل پاررێزگەھا دھۆکێ گۆت: گوھۆرین ئەوە درێژان دابوویە، سەرەدەری دێ ل گەل قوتابخان ھێتەکرن وەک رێژا قوتابیان و نە قوتابخانەکێ گەلەک پارە بۆ ھاتیە و قوتابی کێم دێ گەلەک پارە بۆ ھێنە تەرخانکرن و ئەڤە دادپەروەری چێ بیت دناڤ قوتابخانان دا،نوونەرێ ساخلەمیا دھۆکێ ئەندامە ل گەل لژنێ وەک ئالیێ ساخلەمیێ ، دیسان بەردەوام لژنێن ساخلەمیێ سەردانا قوتابخان دکەت و لژنا پێگیرنەبیت پێرابوونێن قانوونی ل گەل دھێنەکرن، دیسان لژنەک ل قوتابخانێ ھەیە و ب سەرۆکاتیا ھاریکارێ رێڤەبەری و ئەندامبوونا چەند مامۆستا و رۆژانە دێ سەرپەرشتیا فرۆشگەھێ کەن ژ ھەموو روویان ڤە، پاقژی و ساخلەمی و بھایێ فرۆتنێ دڤێت گونجایی بیت.
ھاریکارێ رێڤەبەرێ گشتیێ پەروەردێ گۆت: ئاریشە پتر ل فرۆشگەھێن کچان ھەنە و مەرجە یێ فرۆشگەھا قوتابخانا کچان بگریت دڤێت یا مێ بیت، ھەتا رادەکی سالا بوری باشتر بوویە، چونکە کچ ب دەست نەدکەفتن و ھەتا پەیدا دکرن و ئەڤ ئاریشە دناڤبەرا خودانێ فرۆشگەھێ وکارگێریا قوتابخانێ پەیدا دبوون.
ناڤبری گۆتژی” پتر ئاریشا ھەڤرکیێ و ل سەر زێدەکرنێ ل ئامادەیێن کچان ھەنە و ھندەک جاران ھەتا ٧٠ ملیۆنان چووینە ،لێ ئەڤە ب وێ کرێ نەھاتینەدان، چونکە ئارمانجامە نە وەرگرتنا رێژەکا مەزنا پارانە و پاشەرۆژێ ھەر بۆ قوتابیان بیتە ئاریشە،کو گەلەک جاران پشتی فرۆشگەە ب رێکا سەر ب ئێک زێدەکرنێ بۆ ئێکی کەفتی و دووڤ دا زانی گران گرت ئەڤجا دێ بزاڤێن خوە ڤەکێشانێ کەت و بڤی رەنگی وەک قانوون دێ سەرەدەری ل گەل ھێتەکرن و کا وی چەند ل سەر ھەڤالێ خوە زێدەکریە دێ ب وێ رێژا زێدە ھێتە سزادان و دڤێت بدەت و دێ ژێ ھێتە وەرگرتن بۆ کەسێ دووێ ھێتەدان.