ئه‌ڤرۆ نيوز:
رێڤەبەرێ ڤێتێرنەری ل پارێزگەھا دھۆکێ بۆ ئەڤرۆ دیار کر کو پێشبینی دھێتە کرن ئەڤ سالە ل رۆژێن جەژنا قوربانێ ل سەرانسەری پارێزگەھا دھۆکێ نێزیکی 10 ھزار سەرێن پەزی بھێنە سەرژێکرن، داخواز ژی ژ وەلاتیا کر د ناڤ مالێن خوە دا و ل بەر دەرگەھان قوربانێ خوە سەرژێ نەکەن و ببەنە قەسابخانان خوە سەرژێ بکەن.
د. دیار تەیب، رێڤەبەرێ ڤێتێرنەری ل پارێزگەھا دھۆکێ ئاشکرا کر، سەرژێکرنا پەزی د ناڤ کولان و ل بەر دەرگەھێن مالێن وەلاتیان مەترسیا ڤەگوھاستنا نەخۆشیان یا ھەی و گۆت: “داخوازێ ژ وەلاتیان دکەین قوربانێن خوە ببەنە قەسابخانان سەرژێ بکەن”.
خویا ژی کر، گوشتارگەھێن وان د رۆژێن جەژنێ دا بۆ سەرژێکرنا قوربانێن وەلاتیان دێ دڤەکری بن و گۆت: “ھەکەر وەلاتیەکێ نەشێت ببەتە قەسابخانێ، ئەڤ سالە رێڤەبەریا ڤێتێرنەری ھێلەکا گەرم ئێخستیە دخزمەتا وەلاتیان دا و دشێن پەیوەندیێ پێ بکەن ئەو ژی ئەڤە یە 07504277660، نۆشدارەکێ نوبەدار دێ قەستا وێ مالی کەت بۆ دیتنا وی پەزی، ھەکەر دیار بوو یێ ساخلەمە ھینگی وەلاتی دشێت ل مال و ب بریارا نۆشدارێ نوبەدار یێ ڤێتێرنەری سەرژی بکەت”.

ئەڤرۆ نیوز:
پشتی گەنجەکێ کورد بزاڤێن زۆر بۆ چێکرنا فڕۆکان کرین، شیایە دو جۆرێن فڕۆکان ل ھەرێما کوردستانێ بەرھەم بینیت و ئاماژە ب ڤێ چەندێ دکەت، ئەگەر حوکمەت یا ھاریکاربیت دێ فڕۆکێن سەربازی و ل گۆرەی ستانداردێن جیھانی بەرھەم ئینیت.
میقدادێ فڕۆکەڤان بۆ رۆژناما ئەڤرۆ گۆت: “ل سالا ٢٠٠٦ من دەست ب چێکرنا فڕۆکان ژجۆرێ ھەلیکۆپتەر ل ھەرێما کوردستانێ کریە، بەلێ ژ بەر نەبوونا ماددێ تایبەت ب فڕۆکان ڤە بزاڤێن من شکەستن ئیناینە، من دو فڕۆکە چێکربوون، ھەردوکان شکەستن ئینا، بەلێ ئەز بێ ئومێد نەبووم ژ بزاڤێن خوە بۆ چێکرنا فڕۆکێ، من سەرەدانا وەلاتێن دەرڤە کر، لەوڕا شیام چار خۆلێن فڕۆکەڤانیێ تمام بکەم، ئەوژی ل وەلاتێن فەڕەنسا، ئەلمانیا، تورکیا و رۆسیا، پشتی ڤەگەڕیایمە کوردستانێ من کەرەستێ ئورجینال یێ تایبەت ب فڕۆکان ڤە د گەل خوە ئینا ھەرێما کوردستانێ و شیایمە دو فڕۆکێن ژ جۆرێ ھەلیکۆپتەر و فڕۆکەکا نەفەرھەلگر ب سەرکەفتیانە دروست بکەم”.
خویا ژی کر، ئەو فڕۆکێن وی دروستکرین ب تنێ بۆ مەرەمێن مەدەنی دھێنە ب کارئینان و بکێری مەرەمێن سەربازی ناھێن.
ئاماژە ب وێ چەندێ ژی کر، ئەگەر حوکمەت و لایەنێن پەیوەندیدار ھاریکار وی بکەن دێ شێت ھێشتا پرۆژێ خوە بەرفرەھتر لێ بکەت فرۆکێن بۆ مەرەمێن سەربازیژی دھێنە ب کارئینان بەرھەم بینیت و گۆت: “ئەڤرۆ ل باژێڕکێ بەحرکێ دێ رێورەسمەک بۆ من ھێتە گێڕان و تێدا دێ فڕۆکا ھەلیکۆپتەر فڕینم”.
میقدادی گۆتژی: “ئەگەر ھاریکاری ھەبیت و پێدڤیێن فڕۆکەڤانیێ بۆ من بھێنە بەرھەڤکرن، دێ فڕۆکان ل گۆرەی ستانداردێن جیھانی چێکەم”.