ئه‌ڤرۆ نيوز:
فەرمانبەرەک تایبەت بۆ ئەڤرۆ دبێژیت: پشتی قەیرانا دارایی و گیرَوبونا موچەی ئەم ب ئێکجار ژ خێزانێت خوە دوور کەفتینە، ژبەرکو پشتی دەوامێ ئێکسەر ئەز قەستا کارەکێ دیتر دکەم و تا درەنگی شەڤ دمینم ژبەر ڤێ چەندێ پەیوەندیێن من وخێزانا من لاواز بوینە و من دەم نینە دگەل وان روینمە خوار.
جومعە جەمیل ئەو فەرمانبەرەیە و زێدەتر دبێژیت: (خێزانا من ھەموو ھێڤیا داھاتێ منن یان دێ بۆ کار کەم یان دێ دناڤ وانداروینمە خوار، دەمێ سەر کاری ڤەدگەرم ھندی ماندی دبم ئێکسەر دنڤم و سپێدێ قەستا دەواما خوە یا فەرمی دکەم و ڤێ چەندێ وەکریە کو مرۆڤ نەشێت کاری ل فەرمانگەھێ ژی ب دروستی ئەنجام بدەت، چونکی ئەم زێدە ماندی دبین ھەروەسا بۆ زانین ھندەک ھەڤالێت من یێت فەرمانبەر پشتی دەوامێ کارێ تەکسیێ دکەن).
لەیلا شاکر ژی فەرمانبەرە ل بنگەھێ وەرزش ولاوێن زاخۆ گۆت: (ھەموور پێنج شەمبیا من دایک و بابێن خوە دبرنە جھێن گەشتیاری و پارکا مە رۆژا خوە دەرباز دکر نوکە ئەو چەندە نەمایە بتنێ ھزرێت مە لسەر ھاتنا داھاتیە ژبەر گیرۆبونا موچەی ئەم نەشێین وەک بەرێ دەربکەڤین و بەرنامێ مە ھەموو تێک چوویە).
پاریزەر مەئمون سەبری خویا کر، پەیوەندیێن خیزانێ وەسا خورت دبن دەمێ داھاتیەکێ دەستنیشانکری ھەبیت و لدووڤ وی داھاتی ژیانا خوە دەرباز بکەن و گۆت: (لەوا پێدڤی یە ھەر سەروک خێزانەک چوار پێنج دەمژمیرا ژبلی دەمێ کاری و نڤستنێ بۆ زارۆ و خیزانا خوە تەرخان بکەت بۆ ھندی پەیوەندیێن وان موکم ببن).

ئەڤرۆ نيوز:
شارەزایەکا جڤاکی وەھا دبینیت کو، ژنا سەرکەفتی وەختێ خوشیەکێ دبینیت وێ خوشیێ بو خێزانا خوە زێدەتر لێ دکەت و خالێن لاواز دناڤا خێزانا خوە دا کێم دکەت و ھەردەم کەسەکا ب گرنژین و چاڤ ڤەکری یە و نەخوشی و نھێنیێن خێزانا خوە د ڤەشێریت و دبیتە ژنەکا بلند د چاڤێن ھەڤژین و مالباتا خوە دا.
ناھیدا دۆسکی ئەو شارەزایا جڤاکی یە و زێدەتر دبێژیت: (ھەموو ژن نەشێن ببنە ژنێن سەرکەفتی د رێڤەبرنا کاروبارێن مالێ دا ژبەرکو زور ژن ھەنە مالەکا ب رێک و پێک ئاڤاکریە و زارۆیێن خوە ب باشترین ئاوا پەروەردە کرینە و دبیت ئەو خێزانا ئەو ژنە تێدا خۆدان داھاتەکێ کێمە ژی، لێ د ھەمان دەمدا زور خێزان ھەنە خۆدان داھاتەکێ باشن لێ ب چو رەنگان خێزانا وان یا ب رێک و پێک نینە ژ ھەموو لایاڤە).
دلشاد بەرئاشی کو ماموستایە دیار کر، دڤێـت ژن یا شارەزا بیت د کاروبارێن ناڤ مالێ دا و خۆدان گرنژین و سیمایەکێ دیار بیت و حەز ژ مروڤانیێ بکەت و خودان سەرەدەریەکا بالکێش بیت دگەل ھەڤژینێ خوە و مالباتا خوە و کەسانێن دی و دبێژیت: (ھەروەسا گەلەک گرنگتر ژی دڤێت ژن یا مالکەر بیت و ھەر دەم بو ھەڤژینێ خوە یا لێکدای بیت چونکی ئەڤ چەندە دبیتە ئەگەرێ وێ یەکێ کۆ حەز و ڤیانا زەلامی ھەموو دەمان بو ژنێ د ئاستەکێ بلند دابیت).
دلشادی گوتژی: (لسەر ژنێ پێدڤیە گوھداریا ھەڤژینێ خوە بکەت، ژبەرکو زەلامی گەلەک ماف ل سەر ھەڤژینا خوە ھەنە و ل بەرامبەر ڤێ چەندێ ژن ژی خودان چەندین مافە ل سەر زەلامی و بجھئینانا ڤان خالێن مە ئاماژە پێ دای دێ خوشی و بەختەوەریا ژیانێ دناڤ خێزانێ پەیدا کەت).
ل دووماھیێ ناھیدا دبێژیت: (دڤێت ژن ھەردەم ژلایێ ھەڤژینێ خوە و مالباتا خوەڤە جھێ شانازی کرنێ و رازیکرنێ بیت و ھەردەم ھەول بدەت خواندنەکا راست و دروست بەرامبەر ھەڤژینێ خوە ھەبیت).

ئه‌ڤرۆ نيوز:
دگەل بورینا دەمی رێو رەسمێن شەھیانێ ژی دھێنە گۆھورین، ژبەرکو بەری نوکە ھەکە کەسەکی کچەک خواستبا دەوروبەران گەلەک مایتێکرن تێدا دکر کا دێ شەھیانێ چەوا و ب چ ئاوا گێڕن، لێ نوکە کچ و کوڕ بڕیارێ لسەر پتریا رێو رەسما ددەن وەک نەگێرانا شەھیانێ و چونا وان بو ھەیڤا ھنگڤینی یان نەکرنا شەڤا خەنایێ .
شارەزایا جڤاکی رەنگین عارف محەمەد دیار کر، دناڤ جڤاکێ مە دا نەمازە ل ڤی سەردەمی ھەر تشت بویە چاڤلێکرن و ب تایبەت شەھیان، چونکی نوکە شەڤ خەنا ناھێتە گێران و بەرب کێمیێ چویە، لەورا ب کراسێ سپی تبلا بوکێ دھێتە خەنا کرن و تا رادیەکی ئەڤە یا بویە چاڤلێکرن و دیاردە ئەڤە دووماھیک نەریتە ھەتا نوکە و دبێژیت: ( ھەروەسا نھا شەڤا خەنایێ ژی ل ھۆلێ دھێنە کرن و ئەڤە ژی ھەموو کەسان پێ چێنابیت کو ئەڤە دبەری نوکە دا نە بویە، زێدەباری کو ل ھندەک جھان شەڤێن خەنایان ب ئێکجاری ھەر نینن).
ئەو ڤەکولەرە زێدەتر دبێژیت: (ھندەک نەریتێن دن ژی ھەنە ئەو ژی ئەگەر بھێین و ژ نیشانیێ دەست پێ بکەین ژ بەرکو کچ ھێشتا بەشەکە ژ مالباتا خوە لەورا پتریا خەرجیێ نیشانی مالا کچێ دکڕیت ھەتا جلکێت نیشانیێ ژی ژ مالبابێ نە، چونکی ھێشتا گوستیلا زاڤای نەکریە تبلا خوە، ھەروەسا نھا دیاری زور مشە بوینە و یا بویە شەرم ھەکە کچ یان کوڕ دیاریان بو ھەڤال و کەس و کارا نەکڕیت، لێ دڤێت بزانینن کو ھندەک کەس ھەر د سروشتێ خوە دا حەز ژ ڤان نەریتان ناکەن و ھندەکێن دی دبیت بارێ وان یێ ئابوری یێ لاواز بیت لەورا دێ شەرم کەن چونکی ئەوژی نەریتەکە و دێ خەلک لومە لێ کەت و ھەکە دەین کرینە دێ ھەر کڕن) .
ل دووماھیێ دەربارەی روژا شەھیانێ رەنگینێ ئەشکەرا کر، ھندەک داب و نەریت ل روژا شەھیانێ ژی ھەنە وەکو گرێدانا پشتا بیکێ و ڕاکرن و دانانا وێ سێ جاران لێ دبێژن، رامان ژ گرێدانا پشتا بوکێ ئەوە کو وێ ھندە سوزێن داینە زەلامی و قردێلا سور ژی یا کو پشتا وێ پێ گرێ ددەن ئانکو دێ بیک وان سوزان بجێە ئینیت و خواترخواستنەکە ژ مالبابێ و گۆت: (دیسان تشتێ نە جوان دڤێ روژێ دا چوونا سەرێ بوک و زاڤایە خوزی ئەڤ تشتە نە مینیت چونا دەستی بتنێ بەسە).