ئه‌ڤرۆ نیوز،زنار تۆڤى:

نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپا دلاوه‌ر خالد ئاژگه‌یى بۆ ئه‌ڤرۆ نیوز راگه‌هاند:سۆبه‌ دێ شانده‌كێ په‌رله‌مانێ ئورۆپا كو ژ گرووپێ دۆستانیا كوردستانێ ل په‌رله‌مانێ ئورۆپا پێكهاتیه‌ ل رۆژا ئه‌ینى 11 ئیلۆنێ بۆ ئێكه‌م جار دێ سه‌ره‌دانا هه‌رێما كوردستانێ كه‌ن و دێ دگه‌ل سه‌ركردایه‌تیا سیاسیا هه‌رێما كوردستانێ كۆمبن و دێ سه‌ره‌دانا چه‌ندین جهان ل هه‌رێما كوردستانێ كه‌ن و دیاركر ژى:گرووپێ دۆستانیا كوردستانێ ل ئورۆپا ئێكه‌م لۆبیێ كوردستانێ یه‌ كو بره‌نگه‌كێ راسته‌وخۆ كار دكه‌ت بۆ بهێزكرنا په‌یوه‌ندیێ دناڤبه‌را هه‌رێما كوردستانێ و ئێكه‌تیا ئورۆپا.
دلاوه‌رى ئه‌وژى گۆت:ئه‌ڤ گرووپه‌ ب ده‌ستپێشخه‌رى و هه‌ڤكاریا نوونه‌راتیا حوكمه‌تا هه‌رێما كوردستانێ ل ئێكه‌تیا ئورۆپا هاته‌ دامه‌زراندن ب مه‌به‌ستا بهێزكرنا پێگه‌هێ كوردستانێ ل ناڤه‌ندێن ئێكه‌تیا ئورۆپى.

ئه‌ڤرۆ نیوز،زنار تۆڤى:
54 سال ب سه‌ر هه‌لگیرسانا مه‌زنترین شۆرشا گه‌لێ كوردستانێ ل دژى زۆلم و چه‌وساندنێ دا تێپه‌رى كو شۆره‌شا مه‌زنا ئیلۆنێ یه‌،شۆره‌شا ئیلۆنێ شۆره‌شه‌كا سه‌رتاسه‌رى یا گه‌لێ كوردستانێ بوو،كو هه‌مى جه و گوند و باژێرێن كوردستانێ گرتبوو،شۆره‌شا مه‌زنا ئیلۆنێ ئه‌و باوه‌رى بخۆ بوون د ناخێ هه‌مى تاكێ كوردستانى درۆستكر كو خۆدان ناسنامه‌ و مافه‌ و دڤێت داخواز بكه‌ت و ل به‌رامبه‌ر داگیركه‌رى و نه‌هه‌قیێ دا راوه‌ستیت،بۆ ئێكه‌مجار د مێژوویا بزاڤا رزگاریخوازا كوردستانێ دوێ شۆره‌شێ دا بوو،كو جۆتیار و مامۆستا و هۆنه‌رمه‌ند و هه‌مى پێكهاتێن نه‌ته‌وه‌یى و ئایینى یێن كوردستانێ ژى مل بملێ كوردا ل ژێر سه‌ركردایه‌تیا هه‌ڤبه‌ش ل دژى سته‌م و داگیركه‌را خه‌باتكر،شۆره‌شا ئیلۆنێ ئه‌و ب دۆژمن و نه‌حه‌زان گۆت كو تێكرایا گه‌لێ كوردستانێ خۆدانێ ئێك قه‌زیا هه‌ڤبه‌شه‌ و خه‌باتا وان ل ده‌ڤه‌ره‌كا دیاریكرى دا كورت نابیته‌ ڤه‌. شۆره‌شا ئیلۆنێ ئیلهامبه‌خشا بزاڤا رزگاریخوازا كوردستانێ بوو،ل نیڤا دویێ یا سه‌دێ بیستێ هه‌تاكو نوكه‌،بناغێ وان ده‌ستكه‌فتێن نوكه‌یه‌ كو ب خوین و فرمێسكێن گه‌لێ مه‌ هاتینه‌ جه،ل ده‌مه‌كى دا یادا وێ شۆره‌شا مه‌زن دكه‌ینه‌ڤه‌ كو گه‌لێ كوردستانێ ل به‌رده‌م ده‌لیڤێن بهادار و د هه‌مان ده‌مدا هێرشێن زۆر مه‌زنه‌،ب خۆراگریا خه‌لكێ كوردستانێ و ب جانفیدایا پێشمه‌رگه‌یێ قاره‌مان پێنگاڤێن زۆر مه‌زن هاتینه‌ هاڤێژتن،دشێین سه‌ركه‌فتنا ئێكجاره‌كى تۆمار بكه‌ین و دوماهیێ ب نهامه‌تیێن گه‌لێ كوردستانێ بینین و ب سه‌ربه‌ستى و ئازادى بژین،ئه‌و فره‌ لایه‌نى و ئازادیا ل كوردستانێ دا هه‌ى ل سایا خوینا شه‌هیدان هاتیه‌ بجه،باشترین وه‌فا بۆ خوینا شه‌هیدان ئه‌وه‌ جوداهیا بیرورا و فره‌ لایه‌نیا سیاسى بێخینه‌ پتر خزمه‌تا نیشتیمانى و سه‌ربه‌خۆیا پێكڤه‌ ژیانێ و ئاشتیێ،په‌رته‌وازى و خۆلقاندنا قه‌یرانا و ئێكتر شكاندن چ مفا بۆ دیمۆكراسیێ و ب هێزكرنا كوردستانێ نابیت،به‌رۆڤاژى كوردستانێ د ئێخیته‌ هه‌لویسته‌كێ لاواز و ده‌رگه‌هى بۆ هێرشێن دى ڤه‌دكه‌ت و ده‌ستكه‌فتێن گه‌لێ مه‌ دكه‌ڤنه‌ ژێر مه‌ترسیێ. د ده‌مێ نوكه‌دا مه‌زنترین وانه‌ كو دڤێت ژ شۆره‌شا ئیلۆنێ فێربین ئه‌وه‌ كو هه‌مى گه‌لێ كوردستانێ و هێزێن تێكۆشه‌ر چاره‌نڤیس و دۆز و به‌رژه‌وه‌ندا بلندا هه‌ڤبه‌ش ب ئێكڤه‌ گرێدده‌ت و ئێكبوونا مه‌ مه‌رجێ سه‌ركه‌فتنا گه‌لێ مه‌یه‌ و نابیت كاره‌كێ وه‌سا بهێته‌كرن كو ده‌رفه‌ت ژ كیستێ مه‌ بچن.
دڤێ یادا مه‌زن دا سلاڤ بۆ گیانێ پاقژێ شه‌هیدێن شه‌رێ دژى تیرۆرستان و هه‌مى شه‌هیدێن رێیا ئازادیا گه‌لێ مه‌ دنێرین،سلاڤێن گه‌رم دنێرم بۆ هه‌مى وان تێكۆشه‌رێن كو به‌شداربووین ل شۆره‌شا ئیلۆنێ و وان مێژوو بۆ گه‌لێ كوردستانێ دروستكر،هیڤییا پاشه‌رۆژه‌كا گه‌ش بۆ گه‌لێ كوردستانێ دخوازم، هیڤى دكه‌م هه‌مى هێز و لایه‌نێن سیاسى هێز و شیانێن خوه‌ بۆ به‌رژه‌وه‌ندى و سه‌ربه‌رزیا گه‌لێ كوردستانێ ته‌رخان بكه‌ن. بژى كوردستان

نه‌مرى بۆ شه‌هیدێن رێیا ئازادیێ
مه‌سعود بارزانى
سه‌رۆكێ هه‌رێما كوردستانێ