ئەڤرۆ نیوز:

فرانسوا ھۆلاند سەرۆکێ فرەنسا دوھی د پرێس کۆنفرانسەکێ دا راگەھاند کو زانیاریێن راست و دروست ل بەر دەستێ وان ھەنە کو رێکخراوا تیرۆرستی یا داعشێ ل گەل گرۆپێن دی یێن تیرۆرستی ل سووریێ بەرھەڤیان دکەن کو ھێرشێن تیرۆرستی ل فرەنسا بکەن و ژ بەر ڤێ یەکێ ژی وەزارەتا بەرگیریێ یا وەلاتێ مە و ھێزێن سەربازی دەست ب بەرھەڤیان کرینە و دێ د دەمەکێ نێزیک ھێرشێ بنگەھێن رێکخراوا تیرۆرستی یا داعشێ ل سووریێ بکەین و دێ وان ژناڤ بەین و گۆت: (دڤێت ئەم ل ھەمبەر ھێرشێن تیرۆرستی د ئامادە بین، چونکو زانیاری د دەستێ مە دا ھەنە کو گرۆپێن تیرۆرستی دخوازن چالاکیێن وەک یا شارلی ئیبدو دوبارە بکەن دا کو ترسەکا مەزن ل دەف خەلکێ مە دروست بکەن، ژ بۆ وێ یەکێ ژی مە دەست ب بەرھەڤیان کریە و دێ فرۆکێن مە ھێرشی داعشێ ل سووریێ بکەن).
سەرۆکێ فرەنسا د پشکەکا دی یا ئاخڤتنا خوە دا ئەو یەک ژی دیار کر کو دڤێت وەلاتێن ھەڤپەیمان ب رەنگەکێ جدی ل سووریێ ھێرشی داعشێ بکەن، چونکو ھێرشێن ئاسمانی یێن ل سووریێ نھا دھێنە کرن سنۆردارن و وەک پێدڤی رێگری ل ھێرشێن داعشێ ناھێتە کرن، ژ بەر ھندێ مە بریار دایە دێ ھێرشی وان بکەین، لێ جارێ ئەم ب چو رەنگەکێ ھزرا ھندێ ناکەین کو سەربازێن خوە رەوانەی سووریێ بکەین و ل گۆر ھەر پێشھاتەکێ ئەم دێ بەرھەڤ بین و گۆت: (ھاتنا پەنابەران بۆ ئورۆپا رەنگە دەلیڤەکا دی بدەتە رێکخراوا تیرۆرستی دا کو کاریگەریا خوە ل سەر ھندەک گەنجان بکەت و وان نەچار بکەت کارێن تیرۆرستی ل ئورۆپا بکەن، ژ بەر ھندێ ژی دڤێت ھەموو ھێزێن ئێمناھیێ ل ئورۆپا د ئامادەباشیێ دا بن).
ھۆلاند د پشکەکا دی یا ئاخڤتنا خوە دا ئەو یەک ژی نەڤەشارت کو ھەتا ئەم ل سووریێ و عیراقێ داعشێ و گرۆپێن دی یێن تیرۆرستی ژناڤ نەبەین دێ مەترسیا وان ل سەر ئورۆپا ژی بەردەوام بیت، ژ بەر ھندێ ھێرشێن ئاسمانی یێن نھا دھێنە کرن دا رادەیەکێ کاریگەریا خوە ھەبووینە، لێ داعش و گرۆپێن دی وەسا ژناڤ ناچن، ژ بەر ھندێ دڤێت ئەم پتر ھاریکاریا وان دەولەت و ھێزان بکەین کو نھا د بەرەیەکێ پێشیێ دا ل دژی تیرۆرێ شەری دکەن و گۆت: (دڤێت ئەم چەکێن باش بدەینە لەشکرێ عیراقێ و ھێزێن کوردی یێن کو شەرێ داعشێ دکەن، چونکو ھەکە ئەم سەربازێن خوە رەوانەی وان دەڤەران نەکەین دڤێت ئەم چەکی بدەینە وان دا ئەو شەرێ داعشێ بکەن و کورد ژی ھێزەکا سەرەکی نە کو ئەڤرۆکە ل بەرەیێ پێشیێ دا شەرێ داعشێ دکەن و شیاینە سەرکەڤتنێن گەلەک مەزن ژی تۆمار بکەن).

ئه‌ڤرۆ نيوز:

پشتی ھێرشا دو رۆژ بەرێ یا PKK بۆ سەر کاروانەکێ سەربازی یێ تورکیا کو د ئەنجام دا ٢١ سەربازێن تورک ھاتنە کوشتن سەرۆک کۆمار و سەرۆک وەزیرێن تورکیا دەست ب کۆمبوونێن بلەز ل گەل سازیێن سەربازی و ئێمناھیێ کرن و سەرۆک کۆمارێ تورکیا ژی راگەھاند کو دڤێت ئەم ستراتیژیا شەری بدەینە گوھۆڕین و ھەتا PKK ژناڤ نەچیت دێ شەر بەردەوام بیت.

پشتی کو ھێزێن PKK دو رۆژ بەری نھا ل قەزا گەڤەرێ ھێرشی کاروانەکێ سەربازی یێ تورکیا کرن و د ئەنجام دا ٢١ کەس ھاتنە کوشتن و گەلەک کەس ژی بریندار بوون، پشتی روودانێ سەرۆک وەزیرێن تورکیا بەرنامێ خوە دا راگرتن و بلەز ڤەگەری ئەنقەرە ل گەل سەرۆک ئەرکان و سەرۆکێ ھێزێن ئەردی و ئێمناھیێ دەست ب کۆمبوونەکا نەئاسایی کر و پشتی کۆمبوونێ داوود ئوگلۆ بۆ دەزگەھێن راگەھاندنا دیار کر کو PKK ب ھەموو رەنگەکێ دەست ب ھێرشێن مەزن کریە و مخابن گەلەک سەربازێن مە گیانێ خوە ژ دەست داینە و گۆت: (ل ھەمبەر ھێرشێن رێکخراوا تیرۆرستی یا PKK ئەم بێدەنگ نابین و دێ ب توندترین شێوە بەرسڤا وان دەین و دێ تۆلا شەھیدێ خوە ژی ڤەکەین، ژ بەر ھندێ مە دڤێت ل گۆر رەوشا نوو گوھۆرینێ د ستراتیژیا شەری بکەین و بلا خەلکێ تورکیا پشتراست بیت کو تیرۆرست چو دەمەکێ نەشێن ئارامیا وەلاتێ مە تێک بدەن).

پشتی ھێرشێ سەرۆک کۆمارێ تورکیا ژی پشکداری د بەرنامەکا تەلەفزیونا خەبەر تورک کر و دیار کر کو ئەو جھێ گومانێ یە و ئەز حێبەتی مایمە، چونکو کوشتنا سەربازێن تورکیا دبیتە ئەگەر ئەم ھزرێ د سراتیژیەکا نوو یا شەرێ ل دژی تیرۆرێ بکەین و ھەتا ئێک تیرۆرست ژی ل سەر ئاخا تورکیا ھەبیت دێ ھێزێن مە شەرێ وان بکەن و گۆت: (من بەری نھا ژی گۆتیە و ئەز جارەکا دی دبێژم کو بۆ مە مەترسیا ھەری مەزن PKK و داعش ژی د قۆناغا دویێ دایە، بەری نھا مە گەلەک جاران بۆ شەرێ ل دژی تیرۆرێ ھاریکاری ژ وەلاتێن ئورۆپا خواست و ھەتا نھا ژی وان ھاریکاریا مە نەکریە و نھا ژی دبێژن بۆچی تورکیا شەرێ داعشێ ناکەت، مەترسیا داعشێ ل دەرڤەی تورکیایە و مەترسیا مەزن ل سەر تورکیا PKK و ھەتا دووماھیێ ئەم دێ شەرێ وان کەین دا ژناڤ بچن).
پشتی ھێرشا PKK بۆ سەر کاروانەکێ سەربازی یێ تورکیا سەرۆکێ گشتی یێ پارتیا کۆماریا گەل CHP ژی راگەھاند کو سیاسەتا شاش یا ئەردۆگانی وەسا کر کو تورکیا بەر ب شەرەکی وەسا دژوار ڤە بچیت، ئەردۆگان و داوود ئوگلۆ ل سەر خوینا سەربازێن مە سیاسەتێ دکەن و دخوازن د ھەلبژارتنێن پێشوەخت دا ببنە پارتیا یەکێ و خەلکێ تورکیا ب گشتی ژی باش دزانیت کا ئارمانجا ئەردۆگانی چیە و ژ بەر ھندێ ئەز داخواز ژ ھەموو وەلاتیێن تورکیا دکەم کو راستیا ئەردۆگانی و سیاسەتا وی ببینن و گۆت: (ب شەری PKK ناگەھیتە چو ئارمانجەکێ و ژ بەر ھندێ دڤێت بلەز چەک بھێنە بێدەنگ کرن و ئەم ل پەرلەمانێ تورکیا وێ ب پرسێ ل سەر بنەمایێن ئاشتیانە چارە بکەین).
سەبارەت ب وێ ھێرشێ سەلاحەدین دەمیرتاش ھەڤسەرۆکێ گشتی یێ پارتیا دیموکراتی یا گەلان ژی د داخۆیانیەکێ دا داخواز ژ PKK کر کو ھێرشێن خوە یێن ل دژی ھێزێن سەربازی یێن تورکیا بدەتە راگرتن و گۆت: (ھەتا شەر ل تورکیا بەردەوام بیت ئەم نەشێین بۆ چارەکرنا ئاشتیانە یا پرسا کوردی و پرسێن دی خەباتێ بکەین و دڤێت دەولەتا تورکیا ژی ئۆپەراسیۆنێن خوە یێن سیاسی و سەربازی ل دژی PKK و خەلکێ مەدەنی ل باژارێن باکورێ کوردستانێ بدەتە راگرتن).
ل ئالیێ دی دەزگەھێن راگەھاندنا تورکیا ژی دیار کرن کو پشتی وێ ھێرشی دو رۆژن فرۆکێن تورکیا ل وێ دەڤەرێ بنگەھێن PKK بومبەباران دکەن و ب ھزاران ھێزێن ئێمناھیێ ژی ل گەڤەر و شەمزینانێ دەست ب ئۆپەراسیۆنان کرینە و د ئەنجاما شەری دا چەند وەلاتیێن سڤیل ژی گیانێ خوە ژ دەست داینە و شەر ب دژواری بەردەوامە.

ئەڤرۆ نيوز:

ئیسرائیل دێ دیوارەکێ چیمەنتۆی ب درێژیا سنۆرێ خوە ل گەل ئوردنێ کو ٢٣٥ کیلۆمەترن بۆ رێگرتنێ ل چوونا پەنابەرێن عیراقی و سووری بۆ ئیسرائیلێ دانیت.
رۆژناما (یەدیعوت ئەحرۆنۆت) یا ئیسرائیلی ژ زاردەڤێ ژێدەرەکێ لەشکریێ ئیسرائیلی یێ بلند بەلاڤکریە کو دانانا وی دیواری ب مەرەما بەرسینکگرتنا مەترسیا گرۆپێن جیھادی یێن سونی یە کو سنۆرێ ئوردنێ بکاربینن ژبۆ ئەنجامدانا کریارێن خوە دناڤ ئیسرائیلێ دا.
ژێدەری ناڤبری دیارکریە ژی کو ئیسرائیل ژ وێ چەندێ ژی دترسیت کو تووشی پێلێن پەنابەرێن عیراقی و سووری ببیت کو ب ڕێیا ئوردنێ بچنە ئیسرائیلێ.
ژلایەکێ دی ڤە رادیۆیا لەشکرێ ئیسرائیلی بەلاڤکر کو ئەو دیوار دێ ل بەرامبەر فرۆکخانا (تمناع) ل باکوورێ ئیلات کو یێ ھەڤسنۆرە ل گەل ئوردنێ ھێتە دانان و بھایێ وی دگەھیتە ٩٠٠ ملیۆن دۆلاران.