ئه‌ڤرۆ نيوز:

ل دووڤ راسپاردێن ئەنجوومەنێ وەزیرێن حوکمەتا ھەرێما کوردستانێ، لیژنەیەکا تایبەت ھاتیە پێکئینان بۆ ھندێ دووڤچوونا پرۆژێن یەکێن ئاکنجیبوونێ ل ھەرێما کوردستانێ بکەن، چونکو د ڤان سالێن بۆری دا مەزنترین ئاریشێن خەلکی ل سەر ڤان جۆرە پرۆژانە. پەرلەمانێ کوردستانێ ژی رادگەھینیت، ئەم خوە دێ دووڤچوونێ ل سەر کارێ وێ لیژێ ب خوە ژی کەین.

مەزنترین ئاریشە و گللەیێن خەلکێ کوردستانێ نھا ل سەر پرۆژێن یەکێن ئاکنجیبوونێ نە، ب سەدان پرۆژە ل ھەرێما کوردستانێ ھەنە و ب دەھان ژ وان ھاتینە راگرتن و پارێ وان ژی ژ خەلکی ھاتیە وەرگرتن، ب دەھان ٨٠% ژ پرۆژان ل گۆرەی وێ ریکلاما بۆ دکەن ناھێنە چێکرن، ئەوێن دھێنە چێکرن ژی ب کەرەستێن ئاڤاھیان یێن بێ سەروبەر دھێنە چێکرن، ب دەھان پرۆژە ھەنە یەکێن وێ دو جارکی و سێ جارکی ھاتینە فرۆتن. ب دەھان گەندەلی د ڤان جۆرە پرۆژان دا چێبووینە و ئەڤە ھەموو ژی بوویە ئەگەر کو بۆ ماوێ دو سالانە حوکمەتا ھەرێما بریار دای ئێدی مۆلەتا ئاڤاکرنا یەکێن ئاکنجیبوونێ ناھێنە دان و ل گەل ھندێ ژی لیژنەیەک ھاتیە پێکئینان بۆ دووڤچوونا ئەو پرۆژەیێن ل ھەرێما کوردستانێ ھەین.
ئوسمان شوانی، سەرۆکێ لیژنا دووڤچوونا یەکێن ئاکنجیبوونێ ل ھەرێما کوردستانێ راگەھاند، ل دووڤ راسپاردێن ئەنجوومەنێ وەزیرێن حوکمەتا ھەرێما کوردستانێ، لیژنەیەکا تایبەت ھاتیە پێکئینان بۆ ھندێ دووڤچوونا پرۆژێن یەکێن ئاکنجیبوونێ ل ھەرێما کوردستانێ بکەن و دێ ئەڤ دووڤچوونە ھەموو پرۆژان ڤەگریت و دێ چارەسەری بۆ گشت ئاریشێن وەلاتیان ھێتە دیتن و گۆت: دێ چارەسەریا گیربوونا پرۆژان کەین و دێ بزاڤێ ژی کەین ئەو ئاریشێن دناڤبەرا بەلێندەر و وەلاتیان دا چارەسەربکەین.
شوانی خویاژی کر، بۆ ھندێ دووڤچوونا مە یا پراکتیک بیت، پێدڤیە قانوونا وەبەرھێنانێ بھێتە راستڤەکرن، ئەو راستڤەکرنە ژی خوە ژ کابینا بۆری یا حوکمەتا ھەرێمێ ڤە یا ئامادەیە و ب تنێ یا مای بۆ پەرلەمانی بھێتە ھنارتن بۆ پەسەندکرنێ و جێبەجێکرنا وێ و ئەو قانوونە دێ بیتە ئەگەر کو ئێدی چو وەلاتی زەرەرمەند نەبن.
ئوسمان ئاماژە دا وێ چەندێ، نھا ١٨٠ پرۆژێن یەکێن ئاکنجیبوونێ ل ھەرێما کوردستانێ ھەنە کو تێدا دێ ١٤٣ ھزار یەکە ھێنە ئاڤاکرن، نھا کارێ لیژنێ دەستپێکریە و پرۆژە پرۆژە ئەم یێ دووڤچوونێ دکەین و ھەر گرفتەکا تێدا ھەبیت یا دھێتە ڤەکۆلین و پشتی ئاریشە و گرفت ھەموو دھێنە دیارکرن، ئێک ئێک پرۆژە دێ دەینە دەستەیا وەبەرھێنانێ بۆ ھندێ مافێن وەلاتیان بھێنە دان و کەسی زەرەرمەند نەبیت.
فەرسەت سۆفی، ئەندامێ لیژنا نەزاھێ ل پەرلەمانێ کوردستانێ بۆ ئەڤرۆ دیار کر، مە سۆز دایە کو ھەردەمێ ئەو پرۆژە قانوونا وەبەرھێنانێ بگەھیتە پەرلەمانی دێ لەزێ ل پەسەندکرنا وێ کەین و گۆت: سەبارەت وێ لیژنا ھاتیە پێکئینان ژی، ئەم وەکو لیژنا نەزاھێ ل پەرلەمانێ کوردستانێ دێ دووڤچوونێ ل سەر کارێ وێ لیژنێ ب خوە ژی کەین.