ئەڤرۆ نيوز:
سەرۆکێ زانکۆیا دھۆک بۆ رۆژناما ئەڤرۆ دیار کر کو ئەو راگرێن چار سالان راگری کری دێ ژ پۆستێ راگریێ ھێنە ئازا کرن و ھندەک کەسێن دی دێ ل شوونا وان ھێنە دانان.
پرۆفیسۆر د. مسلح دھۆکی ئاشکرا کر ژ بەر ڤێ چەندێ راگرێن کۆلیژێن: چاندنێ، پزیشکی ڤێتەرنەری، زانستێن مرۆڤایەتی و زانستێن پەروەردەیی و زانستێن پزیشکی و کۆلیژا زانست دێ ژ پۆستێن وان ھێنە ئازا کرن و گۆت:(دەستھەلاتێن منن ھندەک کەسان بۆ جھێن وان دەستنیشان بکەم، ھەتا راگرێن نوو دەست بکار دبن).
سەرۆکێ زانکۆیا دھۆک دیار کر ژی کو ھاریکارێ وی بۆ کاروبارێن كارگێرى و داراى ژی ژ بەر ھەمان مەرەم دێ ژ پۆستێ وی ھێتە ئازا کرن و کەسەکێ دی دێ ل شوونا وی ھێتە دانان.

ئه‌ڤرۆ نيوز:

ئەندامەکێ سەرکردایەتیا پارتی دیموکراتی کوردستان راگەھاند، نەیارێن پارتی دێ شکەستنێ ئینن د دووماھی کارتێن خوەدا بەرامبەر پارتی و پشتی ١٩ تەباخێ پارتی دێ ئاخڤتنا خوە ھەبیت و دێ نەخشێ سیاسی و تەوافوقێ گوھۆریت.
ھێمن ھەورامی ئەندامێ سەرکردایەتیا پارتی و بەرپرسێ پەیوەندیێن دەرڤە یێن پارتی د کورەکێ ڤەکری دا ل بارەگایێ لقێ ١٦ یێ پارتی گوت” دەستھەلات ل ھەرێما کوردستانێ ل سەر بنەمایێ سازانێ و تەوافوقا سیاسی یا ھاتیە دارێشتن، لەوما ل دەرڤەی ڤێ سازانێ چو تشتەک جھێ قەبوول کرنێ نینە، چونکی ئەو قەبارا لایەنان دناڤ دەستھەلاتێن ھەرێمێ دا ھەی ب زۆرینە و کەمینە نەھاتیە تەشبیھکرن ھەتاکو قانوونێن گرنگ ب کەمینە و زۆرینە دەرباز بکەن” دووپات کر ژی” پشتی ١٩ تەباخێ پارتی دێ ئاخڤتنا خوە ھەبیت و نەخشێ سیاسی و تەوافوقێ دێ ھێتە گوھارتن”.

ئەڤرۆ نيوز:
نوونەرێ پێکھاتێ ئەرمەنی د کۆمبوونا بەرفرەە یا لایەنێن سیاسی ل کوردستانێ ل دۆر چارەکرنا پرسا سەرۆکاتیا ھەرێمێ بۆ ئەڤرۆ دیارکر کو ھاتنا شاندێ ئەمریکی بۆ وێ کۆمبوونێ نەبوو پێکئینانا لایەنێن سیاسی بوو، بەلکو بۆ بەرچاڤکرنا بۆچوونا ئەمریکی بوو ئەوژی مانا سەرۆکێ ھەرێمێ د پۆستێ خوەدا ھەتا دووماھیا خۆلا پەرلەمانی.
یروانت نیسان ئەندامێ پەرلەمانێ کوردستانێ و نوونەرێ پێکھاتێ ئەرمەنی د ویچ کۆمبوونێ دا بۆ ئەڤرۆ گوت” برێت ماکگورک جێگرێ وەزیرێ دەرڤەیێ ئەمریکی و ھنارتیێ ئۆبامای بۆ ھەڤپەیمانیا شەڕێ دژی داعشێ د وێ کۆمبوونێ دا بۆ لایەنێن سیاسی دیارکر کو بارێ ھەرێمێ نەیێ باشە و یا د شەڕی دا ل گەل داعشێ و بۆمە باشە وەکو ئەمریکا سەرۆکێ ھەرێمێ ھەر د پۆستێ خوەدا بمینیت، چونکی پێشمەرگەی رۆژ بۆ رۆژێ سەرکەفتنێن باش یێن تۆمارکرین و یێ شیای چەندین ھزار کیلۆمەترێن ئەردی ژ دەستێ داعشێ رزگارکەت، لەوما ئەم دخوازین سەرۆکێ ھەرێمێ د پۆستێ خوەدا بمینیت”.
یروانتی گوت ژی ” بەری کۆمبوونا بەرفرەە یا لایەنێن سیاسی من گوتە ھندەک نوونەرێن وان لایەنێن سیاسی کو شاندێ ئەمریکی نەھاتیە لایەنێن سیاسی پێکبینیت، بەلکو یێ ھاتی دا بۆچوونا ئەمریکا بەرچاڤ بکەت، ھەتا ل دەمێ بێھنڤەدانەکێ د کۆمبوونێ دا من گوتە وی بەرپرسێ ئەمریکی تو ھاتی د کۆمبوونێ دا و تە ب رۆھنی بۆچوونا ئەمریکا بۆ ھەموو لایەنان بەرچاڤکر و د بەرسڤێ دا گوتە من ( تو یێ د من گەھشتی کا من یا چ گوتی)”.
یروانتی گوت ژی” ھەتاکو ئاخڤتنا ماکگورکی یا نڤیسای بوو دەمێ دووپاتی ل سەر وێ چەندێ کری کو بۆچوونا ئەمریکی ئەوە سەرۆکێ ھەرێمێ د پۆستێ خوەدا بمینیت ھەتاکو خۆلا پەرلەمانی ب دووماھی بھێت”.

ئەڤرۆ نيوز:
ئەندامەکێ پەرلەمانێ کوردستانێ ژ لیستا ئێکگرتووی ئیسلامی راگەھاند، من ل سەر لیستا ئێکگرتووی پترین دەنگ بدەستڤەئیناینە، لەوما موزایەدێ ژ کەسێ قەبوول ناکەم و بەرسڤا ئێکەتیێ ژی ددەت.
عومر کۆچەر پەرلەمانتارێ ئێکگرتووی ئیسلامی بۆ باسنیۆز گوت” ژبەر ئێکرێزی و دانوستاندنێن لایەنێن سیاسی یێن کوردستانێ، فراکسیۆنا مە بریار دابوو پشکداریێ د روونشتنا دوھی یا پەرلەمانی دا نەکەین، بەلێ پاشی چوونە ھۆلا روونشتنێ و جھێ پرسیارێ بوو، لەوما ل سەر ڤی ھەلویستێ فراکسیۆنا مە، من ئەندامەتیا خوە د پەرلەمانی دا ھەلاویست”.
عومەر کۆچەری گوت ژی” ھەکە ئێکەتیێ گوتبیتە مە ھەوە یا خوە فرۆشتیە پارتی، ئەڤە ٢٠ سالە ئێکەتیێ یا خوە فرۆشتیە پارتی و سامانێ ڤی مللەتی یێ فرۆشتی و ھەکە ئەز پارتی بام، دا خوە ل سەر لیستا پارتی بەربژارکەم نەکو ل سەر لیستا ئێکگرتووی و ڤان ھەموو دەنگان ببەم، لەوما ھەر ژ نوکە دبێژم ئەز موزایەدا سیاسی ژ کەسێ قەبوول ناکەم”.
ڤی پەرلەمانتارێ ئێکگرتووی خۆیاکر” مخابن سەرۆکێ فراکسیۆنا ئێکگرتووی، بەری روونشتنا پەرلەمانی ب پێنج خۆلەکان راگەھاندبوو پشکداریێ د روونشتنا پەرلەمانی دا ناکەین، بەلێ پاشی چوونە دناڤ ھۆلا روونشتنێ دا، لەوما ل سەر وان بۆچوونان من ئەندامەتیا خوە ھەلاویست”.
ژلایێ خوەڤە ئەندامێ پەرلەمانێ کوردستانێ ژ لیستا ئێکگرتووی ئیسلامی سەھراب رێکانی بۆ مالپەرێ فەرمیێ پارتی گوت” ئێکەتی نیشتمانی کوردستان و بزاڤا گۆڕان ھەولدان دەستپێشخەریا ئێکگرتووی بۆ سازانا لایەنان ل سەر پرسا سەرۆکاتیا ھەرێمێ سەر نەگریت، ئەوا دوھی ژی ل پەرلەمانی ھاتیە کرن کۆمبوون نەبوو، بەلکو فێلکرن بوو ل خەلکی و بۆ ھەموو لایەنەکێ ئەو قەناعەتە یا دروستبووی کو ھەکە ب سازانێ نەبیت ئەو پرسە چارە نابیت، بەلێ وان تنێ بۆ رازیکرنا لایەنگرێن خوە و پرۆپاکندا راگەھاندنێ بوو “.