ئه‌ڤرۆ نيوز:

زانکۆیا دھۆک پشت بەستن ب نڤیسارەکا وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ کریە و فەرمانا زانکۆیی یا ھژمار (٥٥٥٥) ل رۆژا ١٢-٨-٢٠١٥ دەرخستیە و تێدا بریار دایە ب ھەلوەشاندنا ھەموو (سکۆلێن) ل زانکۆیێ و گوھۆرینا سیستەمێ (فاکۆلتی) بۆ (کۆلیژ) و ھەر ژ رۆژا ١-٩-٢٠١٥ دێ کار ب ڤی سیستەمێ نوو ھێتە کرن.
پرۆفیسۆر د. مسلح دھۆکی، سەرۆکێ زانکۆیا دھۆک بۆ ئەڤرۆ دیار کر کو پشتی راوەرگرتن ل زانکۆیا دھۆک ل ناڤ مامۆستایان دا ھاتیە کرن مامۆستا پتر ژ ٩٠% ل گەل وێ چەندێ بوون سیستەمێ فاکۆلتیان ل زانکۆیێ نەمینیت و جارەکا دی بزڤریتە سیستەمێ کۆلیژان، چونکو ئاریشە بۆ وان پەیدا دبوون و گۆت: “سیستەمێ کۆلیژان ھەر ژ مێژە ل عیراقێ دھاتە پەیرەو کرن و ھەتا نوکە چو ئاریشە ژێ پەیدا نەبووینە، ژ بەر ڤێ چەندێ زانکۆیا دھۆک بزاڤ کرن ھەتا شیایی ب رێیا جڤاتا وەزارەتا خواندنا بلند قەناعەتێ بۆ چێکەت بۆ نەھێلانا سیستەمێ فاکۆلتیان”.
ھەروەسا د. مسلح گۆت: “زانکۆیا سلێمانیێ خودانا ھزرا سیستەمێ فاکۆلتیان بوو ل ھەرێما کوردستانێ، بەلێ پشتی زانکۆیا دھۆک ئەڤ سیستەمە نەھێلای وان ژی دەست پێ کر بۆ نەھێلانا وی سیستەمی، ئەو ژی ژ فاکۆلتیان دێ کەنە سیستەمێ کۆلیژان”.
زانکۆیا دھۆک د فەرمانەکا دیتر یا زانکۆیی دا ب ھژمار (٥٥٧٢) ھەیکەلەکێ نوو بۆ کۆلیژان دارشتیە و ژ لایێ وەزارەتا خواندنا بلند و ڤەکۆلینێن زانستیا ھەرێما کوردستانێ ژی ھاتیە پەسەند کرن، ل دووڤ وی ھەیکەلی راگرێ کۆلیژێ دێ ھاریکارەک ھەبیت بۆ کاروبارێن کارگێری و چەند پشکێن کارگێری ل کۆلیژێ دێ ب سەر ھاریکارێ راگری ڤە بن، سەنتەر و نڤیسینگەھێن شیرەتکاری و پشکێن زانستی و پشکێن دیتر وەکو دلنیایی جۆری و خواندنا بلند و ئامار و ژمێریاری دێ سەر ب راگرێ کۆلیژێ ڤە بن.

ئەڤرۆ نيوز:
ژێدەرەکی ئاشکرا کر، کو بڕیارە ئەڤرۆ ھەموو ئالیێ سیاسی یێن ھەرێما کوردستانێ ل ھۆلا سەعد عەبدوللا ل ھەولێرێ کۆم ببن و ل دۆر پرسا سەرۆکاتیا ھەرێما کوردستانێ بگەھنە رێککەفتنێ و چارەسەریەکێ بۆ ببینن.
ل دووڤ زانیاریێن رووداو، ئەڤ کۆمبوونە یا تایبەت نابیت ب پێنج ئالیێن سەرەکی ب تنێ ڤە، بەلکو ھەموو حزب و ئالیێن سیاسی یێن مۆلەتا قانوونی ھەی و بێی ل بەرچاڤگرتنا کورسیان ل پەرلەمانی دێ پشکداریێ د کۆمبوونێ دا کەن.
ھەژی گۆتنێ یە کو سەرۆکێ ھەرێما کوردستانێ د دووماھی پەیاما خوە دا داخواز ژ ھەموو ئالیێن سیاسی کربوو کو بەری ٢٠-٨ پرسا سەرۆکاتیا ھەرێمێ چارە بکەن.

ئەڤرۆ:
جێگرێ سەرۆکێ پەرلەمانێ کوردستانێ راگەھاند، سەپاندنا ھەر بریارەکێ ل دەرڤەی سازانێ کو یا گرێدای پرس و رەھندێن نیشتمانی ڤەبیت، ب نەقانوونی و نە شەرعی دزانین و پێدڤیە سەرۆکایەتیا پەرلەمانی و پەرلەمانتار ژ وێ پێداگیریا نەئاسایی ب خوەدا بچن و پرنسیبێ سازانێ کو بەری نوکە مە کارپێکریە، ب بنەما بگرن.
جەعفەر ئیبراھیم جێگرێ سەرۆکێ پەرلەمانێ کوردستانێ و ئەندامێ مەکتەبا سیاسی یا پارتی دیموکراتی کوردستان پشتی پشکداری د کۆمبوونا دوھی یا پەرلەمانێ کوردستانێ دا کری، ل دۆر روونشتنا نەئاسایی یا پەرلەمانی یا گرێدای راستڤەکرنا قانوونا سەرۆکاتیا ھەرێما کوردستانێ، بۆ دەزگەھێن راگەھاندنێ گوت” لژنا بەرھەڤکرنا دستووری بۆ راپرسیێ کو لایەنێن سیاسی بریار ل سەر دابوو ب سازان بیت، ھەتا نوکە یا کارێ خوە ئەنجام ددەت، باشە چاوان دبیت پرسا سەرۆکاتیا ھەرێمێ ب سازان نەبیت و ب پرنسیبێ زۆرینە و کەمینە بھێتە ئێکلاکرن؟”.
جەعفەر ئیبراھیمی گوت ژی” ھەکە روونشتنا نەئاسایی یا پەرلەمانی بھێتە کرن ژی، ب دیتنا مە یا قانوونی نینە، چونکی ھەر بزاڤەک ژ پەرلەمانی ھەبیت، پێدڤیە بۆ بەرژەوەندیا گشتی بیت، پەرلەمان بەری نوکە ژی جھێ تەوافوقێ بوو و دخوازین نوکە ژی بۆ پرەنسیبێ تەوافوقێ بزڤرین”.
جێگرێ سەرۆکێ پەرلەمانێ کوردستانێ زێدەتر گوت” پرسا قانوونی و نەقانوونی ب نیسابێ ناھێتە دەربازکرن، چونکی ئەڤە پرسەکە و ئەم ھەموو دزانین ب سازان یا ھاتی، ل دەمێ ھەلبژارتنا سەرۆکێ پەرلەمانی ژی، مە ھەر ب سازانێ کارکر، لەوما ھەر بزاڤەکا ژ دەرڤەی سازانێ شەرعیەتێ وەرناگریت”.
ب دیتنا جەعفەر ئیبراھیمی بزاڤا ھندەک لایەنان بۆ نێزیککرنا بیر و بۆچوونێن جدا جودا کو ھێشتا د بەردەوامن د پێدڤی و جھێ پیتەپێدانێ نە و گوت” مە ئەزموون یا ھەی کو چو پرسەک بێ ساوان سەرناگریت، ب دیتنا مە پێدڤیە سەرۆکاتیا پەرلەمانی یا بێ لایەن بیت، باشە بۆچی د پرسا دستووری دا، ھەتا دووماھی رۆژ بزاڤا بێ لایەنیێ دکر و بریار ھاتە دان کو لژنا بەرھەڤکرنا دستووری بۆ راپرسیێ یا بێ لایەن بیت؟ وبۆچی پرسا سەرۆکاتیا ھەرێما کوردستانێ ژ دەرڤەی سازانێ بیت؟ لەوما باوەری و دیتنا مە ئەوە سەرۆکێ پەرلەمانی دڤێ پرسێ دا یێ سەرکەفتی نەبوو، دیسا یێ سەرکەفتی نەبوو د ڕەفتارکرنێ دا ل سەر ڤێ پرسێ”.
سەبارەت ئەگەرێ ئەنجامدانا روونشتنا نەئاسایی یا پەرلەمانێ کوردستانێ کو چەند لایەنەک ب بێ بەرھەڤبوون و نەرازیبوونا فراکسیۆنا پارتی دیموکراتی کوردستان، جێگرێ سەرۆکێ پەرلەمانێ کوردستانێ دبێژیت” راستڤەکرنا قانوونا سەرۆکاتیا ھەرێما کوردستانێ بھێتە پەسەندکرن، یان نە، ئومێدا مە ئەوە پەرلەمانتار بۆچوونا خوە ل سەر ھەڤپشکەکێ بنەرەتی دا نەسەپینن، چونکی ژ دەرڤەی سازانێ یە و شەرعیەت نابیت و ئەم دانپێدانێ پێ ناکەین، لەوما پێدڤیە ھزر د وێ چەندێ دا بکەن کا دێ چاوا شێن سەقامگیریێ چەسپینن و ئاشتیا جڤاکی پەیداکەن، ھەر قانوونەکا دەربکەڤیت ژی، کو یا گرێدای ھەر پرسەکا رەھندا نیشتمانی ھەبیت و بێ سازان بریار ل سەر بھێتە دان، ل دەف مە دێ چیتە د خانا نەشەرعیەتێ دا”.
جەعفەر ئیبراھیم دووپاتی ل سەر وێ چەندێ کر کو “بزاڤێن مە د سیاسی نە و د چارچۆڤێ قانوونێ دانە، لەوما بلا کەس بۆ وێ چەندێ نەچێت کو پارتی دیموکراتی کوردستان بەرۆڤاژی قانوونێ سیاسەتێ دکەت”.