ئه‌ڤرۆ نيوز:

مه‌سعود بارزانى سه‌رۆكێ هه‌رێما كوردستانێ و حه‌يده‌ر عه‌بادى سه‌رۆك وه‌زيرێن عيراقێ كۆنگره‌كێ رۆژنامه‌ڤانى ئه‌نجام دا و تێدا به‌حس ل سه‌ره‌دانا سه‌رۆك وه‌زيران بۆ هه‌ولێر كر.

ل ده‌سپێكێ سه‌رۆك بارزانى په‌يڤه‌ك پێشكێشكر و به‌حس ل گرنگيا سه‌ره‌دانا سه‌رۆك وه‌زيران كر و گۆت: “بۆچوون د نێزيكى ئێك بوون و رێكه‌فتن و هه‌ڤهاتن بۆ كارێ هه‌ڤپشك بۆ به‌رژه‌وه‌نديا عيراقێ هاته‌ كرن”.

پاشان عه‌بادى سۆپاسيا سه‌رۆكێ هه‌رێما كوردستانێ كر بۆ وێ پێشوازيا لێ هاتيه‌ كرن و گۆت: “به‌رپرساتيا نه‌ينه‌وا يا مه‌ هه‌موويانه‌ بێ جوداهى و ب هه‌موو ئاسان”.

زێده‌تر گۆت: “پشكه‌ك ژ سه‌ره‌دانا مه‌ ژ به‌ر ئازادكرنا مووسل بوويه‌ د ده‌مه‌كى دا كو ئه‌ڤه‌ تشته‌كێ سرۆشتى يه‌ وه‌كو سه‌رۆك وه‌زير سه‌ره‌دانا هه‌رێما كوردستانێ بكه‌م”.

ئاماژه‌ ب وێ چه‌ندێ ژى كر كو د ديدارا خوه‌ دا به‌حس ل ڤه‌كرنا هه‌موو ده‌رگه‌هێن هاريكاريێ يێن ئه‌منى و ئاڤه‌دانكرن و پێشڤه‌چوون و ئابوورى و ئاواران و هه‌موو لايان هاتيه‌ كرن.

نه‌ڤه‌شارت ژى كو گرنگترين خزمه‌تكارى بۆ ئاواران ئه‌وه‌ بۆ جهێن وان ڤه‌گه‌رينن و به‌حس ل وێ چه‌ندێ ژى كر كو ئه‌و كار ژ به‌ر وێ چه‌ندێ دكه‌ن.

سه‌رۆك وه‌زيران خۆيا كر كو كوردستان و عيراق خه‌لكى د پارێزن و داعش وان د كوژيت و ئه‌و جوداهيا د ناڤبه‌را وان دايه‌ و گۆت: “داعش يا لاواز بوويى، يا نێزيكى ژ ناڤچوونێ بووى”.

عه‌بادى گۆتژى: “هنده‌ك كه‌س ژ حه‌شه‌د شه‌عبى هه‌بوويه‌ كو ده‌ستدرێژى ل سه‌ر تكريت و خه‌لك و مالێ وان كريه‌ و هژماره‌كا كێم بوويه‌، به‌لێ هه‌موو يێن هاتينه‌ ده‌سته‌سه‌ركرن و دێ گه‌هنه‌ مافێ خوه‌ يێ قانوونى و دژى وان هه‌موو كه‌ساينه‌”.

سه‌رۆك وه‌زيرێن عيراقێ درێژى دا گۆتنا خوه‌ گۆت: “راسته‌ هژمارا تێكده‌ران كێم بوويه‌، به‌لێ ئێك ژى بيت بۆ مه‌ گه‌له‌كه‌ و ڤێ چه‌ندێ قه‌بوول ناكه‌ين”.

د به‌رسڤا پرسيارێن رۆژنامه‌ڤانان دا ل دۆر ئازادكرنا مووسل، عه‌بادى گۆت: “ژڤانێ ئازادكرنا مووسل يێ هاتيه‌ دياركرن، به‌لێ ژ به‌ر ئه‌گه‌رێن ته‌كنيكى و ئه‌منى به‌حس ناكه‌ين، مه‌ گه‌له‌ك په‌يوه‌ندى ل گه‌ل گه‌له‌ك كه‌سان هه‌نه‌ ل مووسل ب ره‌نگه‌كێ ئێكسه‌ر و دخوازن ل مووسل ژ داعش رزگار ببن و دێ هاريكارى ل گه‌ل وان ژى هه‌بيت”.

بارزانى ژى د به‌رسڤا رۆژنامه‌ڤانان دا گۆت: “مه‌ به‌حسێ هه‌موو وان كێشێن ل هه‌رێمێ ژى هه‌ين كر و رێكه‌فتين كو ب هه‌ڤپشكى هه‌موو كێشه‌ بهێنه‌ چاره‌ كرن”. عه‌بادى ژى گۆت: “دێ بزاڤێ كه‌ين هه‌موو كێشان چاره‌ كه‌ين”.

عه‌بادى زێده‌تر د به‌رسڤا رۆژمامه‌ڤانان دا گۆتژى: “هه‌كه‌ هه‌وه‌ ل گه‌ل ئۆبامايى ديتم دێ زانم دێ چ بێژمێ و بودجێ ژى كێشه‌ تێدا نينه‌ و پاره‌ يێ كێمه‌ و عيراق هه‌موو د ڤێ ره‌وشێ دايه‌”.

سه‌رۆك بارزانى ل دۆر مووسل ژى گۆت: “هه‌ردو لا دێ لژنه‌كێ پێكئينن و دێ ڤه‌كۆلينه‌كێ ل سه‌ر پشكداريا هه‌رێمێ د شه‌رێ ئازادكرنا نه‌ينه‌وا دا به‌رهه‌ڤ كه‌ين و ل وى ده‌مى دێ وێ بڕيارێ ده‌ين”.

سه‌رۆك وه‌زيران ل دۆر حه‌شه‌د شه‌عبى ژى گۆت: “حه‌شه‌د شه‌عبى ل هه‌موو عيراقێ يێن هه‌ين و خوه‌به‌خشن، راسته‌ خرابكارێن هه‌ين، به‌لێ نه‌ حه‌شه‌د شه‌عبى يه‌، هنده‌ك كه‌س يێن د ناڤ حه‌شه‌د شه‌عبى دا هه‌ين و خه‌له‌تيان دكه‌ن و خرابكار يێن ل هه‌موو جهان ژى هه‌ين”. گۆتژى: “ئه‌ڤه‌ ئێكرێزيا عيراقێ دده‌ته‌ دياركرن”.

نه‌ڤه‌شارت ژى كو بودجا هه‌رێمێ چو په‌يوه‌ندى ب پشكداريا هه‌رێمێ د شه‌رێ ئازادكرنا مووسل دا نينه‌ و ئه‌و مافێ هه‌رێمێ يه‌ و دێ هێته‌ دان، ئه‌ڤه‌ گۆتنێن هه‌ر ئێك ژ سه‌رۆك بارزانى و حه‌يده‌ر عه‌بادى بوون.