ئەڤرۆ نیوز:
شیرەتکارێ وەزیرێ دەرڤە یێ تورکیا راگەھاند کو ل گەل ئەمریکا رێککەڤتنینە کو دێ ھەرێمەکا ئارام ل ناڤ ئاخا سووریێ ھێتە ئاڤاکرن و دێ تورکیا سەرپەرشتیا وێ بکەت، ل ھەمبەر ڤی یەکی ژی پەیڤدارێ وەزارەتا دەرڤە یا ئەمریکا راگەھاند کو چو رێککەڤتن د ناڤبەرا مە و تورکیا دا نینن و تنێ ئەم ل سەر لێدانا داعشێ رێککەڤتینە و مە بۆ تورکیا ژی دیار کریە کو نابیت ب چو رەنگەکێ ئەو ھێرشی یەکینەیێن پاراستنا گەل ل رۆژئاڤایێ کوردستانێ بکەن.
فریدون سنرلی ئوگلۆ شیرەتکارێ وەزیرێ دەرڤە یێ تورکیا دوھی د داخۆیانیەکێ دا راگەھاندبوو کو ئەمریکا داخوازیا مە یا بۆ ئاڤاکرنا ھەرێمەکا ئارام ل سووریێ قەبوول کریە و ئەو ھەرێمە دێ ژ ئالیێ مە ڤە ھێتە برێڤە برن و ھەکە ھێزێن پاراستنا گەل بخوازن کو بھێنە ناڤ وێ ھەرێمێ ئەم دێ ھێرشی وان کەین و ناھێلین کو ب چو رەنگەکێ ئەو کارەکێ وەسا بکەن، چونکو تورکیا نەچارە بەرەڤانیێ ژ بەرژەوەندیێن خوە بکەت و ھەروەسا مەترسی ل سەر ئێمناھیا تورکیا ھەنە و دروست کرنا ھەرێمەکا وەسا بۆ مە و بۆ خەلکێ سووریێ ژی گرنگیەکا خوە یا تایبەت ھەیە.
پشتی داخۆیانیێن شیرەتکارێ وەزیرێ دەرڤە یێ تورکیا مارک تونیر پەیڤدارێ وەزارەتا دەرڤە یا ئەمریکا دیار کر کو سەبارەت ب ئاڤاکرنا ھەرێمەکا ئارام ل سووریێ چو رێککەڤتنەک د ناڤبەرا مە و تورکیا دا نینە، تنێ ئەم رێککەڤتینە کو شەرێ رێکخراوا تیرۆرستی یا داعشێ بکەین و وان ژ وێ دەڤەرێ دەربخینین، چونکو ئێدی تورکیا ژی ھەست ب مەترسیا داعشێ کریە و ژ بەر ھندێ ژی بکارئینانا بنگەھێ ئنجرلیک کارەکێ گرنگ بوو و گۆت: (ئەمریکا چو سۆز نەداینە تورکیا کو دێ دەڤەرەک ئارام ل ناڤ ئاخا سووریێ دا بھێتە دروست کرن، چونکو ھندەک ھزر و بۆچوونێن مە یێن تایبەت ل دۆر وی بابەتی ھەنە و ژ بەر ھندێ ژی مە چو بریارەک نەدایە، نھا یا گرنگ ئەوە کو ئەم داعشێ ل سووریێ ژناڤ ببەین و ل گەل تورکیا ژی سەبارەت ب ژناڤچوونا داعشێ رێککەڤتن ھاتیە کرن و چو راستی بۆ رێککەڤتنەکێ سەبارەت ب ئاڤاکرنا ھەرێمەکا ئارام نینە).
پەیڤدارێ وەزارەتا دەرڤە یا ئەمریکا ئەو یەک ژی راگەھاند کو ئەم دزانین پەنابەرێن سووریێ یێن نھا ل تورکیا بارگرانیەک بۆ وی وەلاتی دروست کریە، لێ ژ بۆ وێ یەکێ ژی مە دیار کریە کو ژناڤچوونا داعشێ و ئاڤاکرنا رێڤەبەریەکا نوو ل سووریێ دێ بشێت وێ قەیرانێ چارە بکەت، چونکو ب ئاڤاکرنا دەڤەرەکا ئارام ئەو پرسە چارە نابیت و گەلەک ئالی ل سووریێ ب خوە ل دژی ئاڤاکرنا ھەرێمەکا ئارامن و ژ بەر ھندێ ژی تشتەکی وەسا ل بەرنامێ مە دا نینە.
نڤیسەرێ ناڤدارێ تورکیا دەنیز زەیرەک ژی د داخۆیانیەکێ دا بۆ تەلەفزیونا خەبەرتورک راگەھاند کو پشتی جەبھەت ئەلنوسرە دەڤەرێن سنۆری یێن تورکیا چۆل کری و تورکیا ژی بلەز ھێزێن تورکمانان ل وان دەڤەران بنەجە کری ئەمریکا نەرازیبوونا خوە ل ھەمبەر وێ یەکێ دیار کریە، چونکو ئەمریکا دبینیت تورکیا پێگیریێ ب رێککەڤتنێ ناکەت و بجھکرنا تورکمانان ل وێرێ دێ ئالۆزیێن ل سووریێ مەزنتر کەت و تورکیا ژی ب رەنگەکێ جدی شەرێ داعشێ ناکەت و باوەریا وەلاتێن رۆژئاڤا ب سۆزێن تورکیا ناھێت و ژ بەر ھندێ ژی دوھی بلەز وەزارەتا دەرڤە یا ئەمریکا ھەلویستێ خوە دیار کر، چونکو ئەمریکا ب چو رەنگەکێ ناھێلیت تورکیا تورکمانان ل سووریێ بۆ بەرژەوەندیێن خوە ل دژی کوردان و ھێزێن دی بکار بینیت، ئەمریکا کوردان ل سووریێ وەک ھەڤپەیمانێ خوە یێ سەرەکی دبینیت و کوردان ل دژی داعشێ شەر کرینە و شیاینە سەرکەڤتنێن مەزن تۆمار بکەن و ژ بەر ھندێ ژی ئەمریکا داخوازیێن تورکیا ل دژی کوردان قەبوول ناکەت.
ل ئالیێ دی رۆژناما تیلگراف یا بریتانی ژی د راپۆرتەکێ دا دیار کر کو تورکیا خەلەتیەکا مەزن کر کو د ڤی دەمی دا ھێرشی پارتیا کارکەرێن کوردستانێ کر، چونکو تورکیا رێ دا بنگەھێ ئنجرلیک ل دژی داعشێ بھێتە بکارئینان و داعش دێ ل ھەمبەر تورکیا شەری کەت و ل ئالیێ دی پەکەکە ژی نھا شەرێ تورکیا دکەت و ژ بەر ڤان دو خالان تورکیا دێ بەر ب شەرەکی ناڤخوەیی ڤە بچیت.