ئه‌ڤرۆ نيوز:
حوکمەتا قەتەر بڕیار دا کو دو ملیۆن یۆرویان بۆ دابینکرنا پێدڤیێن ئاواران ل ھەرێما کوردستانێ ب مەزێخیت کو ٤٠% ژ وی پارەی بۆ وان ئاوارێن ل سنوورێ پارێزگەھا دھوکێ یە.
مەنال محەمەد فوئاد، بەرپرسا دووڤچوون و ھەلسەنگاندنێ ل بوردێ مرۆڤایەتی یێ پارێزگەھا دھۆکێ بۆ ئەڤرۆ دیار کر کو وان پلانەک بو پێدڤیێن ئاواران و کەمپێن ل سنوورێ پارێزگەھێ ھەیە و گۆت: “ملیارەک و ٨٠ ملیۆن دینار بۆ پارێزگەھا دھۆکێ ھاتیە تەرخانکرن، ب ڤی پارەی ژی پێنج موەلیدێن کارەبێ یێن ٥٠ کەی ڤی، ١٥٠ خیڤەتێن دژی ئاگر و بارانێ، ١٥٠٠ تانکێن ئاڤێ، ٢٠٠٠ باتەزینک و ١٩٦٦ ئاڤتەزینک دێ پێ ھێنە کرین و ل سەر کەمپێن ئاواران یێن سنوورێ پارێزگەھا دھۆکێ ھێنە بەلاڤکرن”.
ئاشکرا ژی کر، سێ ترۆمبێلێن تایبەت کو ئێک بۆ ڤەگوھاستنا ئاڤا پاقژ و دو تانکەر ژی بۆ ڤەگوھاستنا ئاڤا گران دێ ھێنە دابینکرن.
بەرپرسا دووڤچوون و ھەلسەنگاندنێ ل بوردێ مرۆڤایەتی ل پارێزگەھێ ئاماژە ب وێ چەندێ ژی کر، ئەڤ ھەموو پرۆژە ژ قووناغا تەندەریێ دەرباز بووینە و بۆ وان کۆمپانێن کو بڕیارە ڤان کەلوپەلان دابین بکەن ھاتینە ڤەگوھاستن و گۆت: “ل ڤان دو رۆژێن بھێت دێ دەست ب بەلاڤکرنا وان ھێتە کرن، دڤێت د دەمێ حەفتیەکێ دا ئەڤ پرۆژە بھێنە ب جھئینان”.
نيشاندان