ئه‌ڤرۆ نيوز:
ئه‌ڤرۆ شەمی ٠٤-٠٤-٢٠١٥ ل سەلاحەدین به‌رێز مەسعود بارزانی سەرۆکێ ھەرێما کوردستانێ پێشوازیا کاردینال فەرناندۆ فیلۆنی نوونەرێ تایبەتییێ پاپایێ ڤاتیکان و شاندەکی ل گەل کر کو ژ بالیۆز جۆرج لینکوا، پاتریاک لویس ساکۆ، مەتران بەشار مەتی وەردە، مەتران نیقادیمۆس مەتی شەرەف، خالد جەمال ئەلبێر و قەشە بەھنام بینۆکا پێکھاتبوون.
د دەستپێکا ھەڤدیتنێ دا نوونەرێ پاپایێ ڤاتیکان ژ بۆ رەخساندنا ڤێ ھەڤدیتنێ سۆپاسیا سەرۆک بارزانی کر و رێز و سلاڤێن تایبەتی یێن پاپایێ ڤاتیکان پێشکێشی سەرۆک بارزانی کرن. نوونەرێ پاپایێ پیرۆزێ ڤاتیکان سۆپاسیا سەرۆک بارزانی و حکومەت و گەلێ کوردستانێ کر کو وێ ھەژمارا زێدەیا کۆچبەر و لێقەومیان ھه‌مبێز کرينە و ب بێی بەرچاڤکرنا جوداھیا ئۆلی و نەتەوەیی ھەموویان دپارێزن و خزمەتگوزاریێ پێشکێشى وان کرنە و ئەڤە ژی نیشانا دلفرەھی و باوەربوونا کوردستانێ ب بھایێن بلندێن پێکڤەژیان و ھەڤکاریێیە و راگھاند کو ل سەردانا خوەیا ل جەم کۆچبەرێن کریستیانان دا وێ یەکێ دیتیە کو ھەموو گەلەک سۆپاسگوزارن ژ بۆ وێ ب دەنگ ڤە ھاتن و ھەڤکاریێن وە و حکوومەتا ھەرێما کوردستانێ و رێخستنێن مرۆڤیان.
نوونەرێ پاپایێ پیرۆزێ ڤاتیکان ل درێژاھیا ئاخافتنا خوە دە سۆپاسیا رۆلا پێشمەرگە کر و راگه‌ھاند: داخواز ژ وەیێن رێزدار دکه‌م سۆپاس و سلاڤێن مە و پاپایێ پیرۆز بگه‌ھینن پێشمەرگەیان کو جانێ خوە ژ بۆ پاراستنا ژیانا کەسێن دن گۆری دکه‌ن و پێزانینێن مە ژ بۆ وێ رۆلا ئازایانەیا پێشمەرگە ل پاراستنا کۆچبەر و لێقەومیان ھەیە و ئەوێ پێشمەرگە کریە تەنێ ب وان کەسان تێکرن کو بریارێ دانە ژیانا خوە ژ بۆ خزمەتکرنا خەلکێ تەرخان بکه‌ن. ھەروه‌ھا بالکشاند ل سەر وێ یەکێ کو نھا پێشمەرگە ل سەر ئاستا ھەموو جیھانێ بوویە سەمبۆلا خوەراگری و جانگۆریا ب ناڤێ ئازادیێ، ژ بەر کو شەرێ پێشمەرگە نە شەرەکە ژ بۆ داگیرکاریێ، بەلکوو شەرەکە ب ناڤێ پاراستنا ژیانا خەلکەکی دن و پاراستنا ئازادی و پێکڤەژیان و بەختەوەریا خەلکێ.
نوونەرێ تایبەتییێ پاپایێ پیرۆزێ ڤاتیکان راگھاند: دەما د دەستپێکا ئێریشا تەرۆریستان ھاتم کوردستانێ، رەوش گەلەک خەراپ بوو، خوەشھالم کو دبینم ڤێ جارێ پێشکەتنەکە بەر ب چاڤ ھەیە، ژ بلی وێ یەکێ کو پێشمەرگە ل ڤێ شەرێ دا چەکێن باش ب دەست ڤە نەبوو لێ بەلێ باوەری و شیانا وانیا ژ بۆ خزمەتا مرۆڤایەتی و ئازادی و پاراستنا ژیانا خەلکەکی دن تەرخان کر و ب ڤێ سەدەمێ ژی پێشمەرگە سەرکەت و نھا کۆچبەر دوورن ژ مەترسیێ.
ھەر ل ڤێ ھەڤدیتنێ دا شاندێ میھڤان سۆپاس و پێزانینێن خوە پێشکێشی سەرۆک بارزانی کرن کو ل ھەموو ھەلکەفتان دا پەیاما پیرۆزباھیێ پێشکێشی کریستیانان و پێکھاتێن ئۆلییێن دن دکەن و ئەڤە ژی نیشانا بەشداریا سەرۆکیا ل خوەشی و نەخوەشیێن وان پێکھاتانە کو دبێ جھێ زێدەتر ب ھێزترکرنا بنگەھێن پێکڤەژیانێ.
ل بەرانبەر دا سەرۆک بارزانی ب گەرمی ب خێرھاتنا نوونەرێ پاپایێ پیرۆزێ ڤاتیکان و شاندا ل گەل کر و سۆپاسیا پاپایێ پیرۆز کر و دلنیا کر کو پەیاما وان دگه‌ھينيت پێشمەرگەیێن کوردستانێ. د دەربارێ ھەرەشەیێن تيرۆریستان دا سەرۆک بارزانی راگه‌ھاند: ل وێ سەردانا بەرێیا کوردستانێ کو دەستپێکا هێریشا تيرۆریستان بوو من ب وە گۆت کو یان ئەمێ ھەموو پێکڤە بمرین یان تەرۆریستان تێک دشکینین و کۆچبەر ب سەربلندی ڤەدگەرن مالێن خوە، نھا دبینین کو پێشمەرگە ئەفسانەیا داعیشێ تێک شکاند و سەرکەفتنەکە گەلەک مەزن تۆمارکرن و بەشەکی زێدەیێ ناڤچەیێن داگیرکری ھاتن ئازاد کرن و وە دلنیا ژی دکم تەرۆریست تو پاشارۆژەکە وان ل ڤی وەلاتێ دا توونە و کۆچبەر ب سەربلندی وێ ڤەگەرن مالێن خوە.
سەرۆک بارزانی ب شاندا میھڤان راگھاند کو جارەکی دن ل رێیا وە ڤە داخواز ژ خوشک و برایێن مەسیھیان دکم بیر ل کۆچ و ب جیھ ھشتنا وەلاتێ خوە نەکن و دلنیا بن کو نھا تەرۆریست گەلەک لاوازبوونە و پشتی دەرخستنا تەرۆریستان ژی پاشارۆژەکە گەش ل بەندا ھەموو پێکھاتێن ئۆلی و نەتەوەییێن ناڤچەیێ دکە و تو دەمەکی جارەکی دن رێ نادین ژیانا وان بکەڤێ بەر مەترسیێ.
سەرۆک بارزانی تەکەز ژی کر کو ھەرێما کوردستانێ ھەردەم ب مالەکی ئارام و ژ بۆ ھەموو پێکھاتێن نەتەوەیی و ئۆلیان دمینە.
سەرۆک بارزانی د داویا ھەڤدیتنا خوە دە ب ھەلکەفتا جەژنا قیامێ ڤە ل رێیا شاندا میھڤان پیرۆزباھیێن خوە پێشکێشی کریستیانێن کوردستان و ئراقێ و ھەموو جیھانێ کر و سلاڤ و رێزێن خوەیێن تایبەتی ژ بۆ پاپایێ پیرۆز نیشان دا و راگھاند کو ژ وێ یەکێ دلنیا بن ئەم خوشک و برایێن خوەیێن ل ھەموو پێکھاتێن کوردستانێ دپارێزین.
ئه‌ڤرۆ نیوز:
سه‌رۆكێ هه‌رێما كوردستانێ پیرۆزباهیا رزگاركرنا تكریت ل حه‌یده‌ر عه‌بادى كر و هه‌ر دو ئالیان رژدى ل سه‌ر هه‌ماهه‌نگى و هه‌ڤكاریا به‌رده‌وام د ناڤبه‌را هێزێن عیراقى و پێشمه‌رگه‌ى كر.
ئه‌ڤرۆ د په‌یوه‌ندیه‌كا ته‌له‌فونى دا، د ناڤبه‌را مه‌سعود بارزانى سه‌رۆكێ هه‌رێما كوردستانێ و حه‌یده‌ر عه‌بادى سه‌رۆك وه‌زیرێن عیراقێ، بارزانى پیروزباهی ل سه‌رۆك وه‌زیرێن عیراقێ كر ب هه‌لكه‌فتا ئازادكرنا تكریت ژ ئالیێ هێزێن عیراقى ڤه و شكه‌ستنا تیرورستان ل ده‌ڤه‌رێ، هه‌روه‌سا سه‌رۆك وه‌زیرێن عیراقێ پیرۆزباهیێن خوه ئاراسته‌ى سه‌رۆك بارزانى كرن ب هه‌لكه‌فتا سه‌ركه‌فتنێن به‌رچاڤ یێن هێزێن پێشمه‌رگێ كوردستانێ به‌رامبه‌ر تیرورستان.
ئەڤرۆ نیۆز، سالار دۆسکی:
سۆباھی ٤-٤-٢٠١٥ ل سەرانسەری جیھانێ، جژنا قیامەتێ یا کرستیان و ئەرمەنانە و ل ھەرێما کوردستانێ ژی سالانە ئەڤ رێورەسمە دھێنە گێران و ئاھەنگێن خوەشیێ دھێنەسازکرن، لێ ل دووڤ گۆتنێن قەشەکێ پارێزگەھا دھۆک ئەڤ سالە جوداھی ھەیە ژ سالێن بوری.
قەشە مارسیس ل دێرا ئەرمەنان ل ماسیکێ بۆ مالپەرێ ئەڤرۆ نیۆز گۆت: “سۆباھی جەژنا قیامەتێ يه یا عیسا پێغەمبەرە سلاڤ ل سەربن، مللەتێن کرستیان و ئەرمەن ل دێرێن خوە دێ رێورەسمێن ئاینی ب ڤێ ھەلکەفتێ گێرن و ھەموو دێرێن پارێزگەھێ ئەڤ ھەلکەفتا ئاینی دێ ھێتە ساخکرن”.
ناڤبری گۆتژى: “ئەڤ شەڤە کرستیان دێ رێورەسمان دەست پێ کەن و ئەرمەن سۆباھی دەمژمێر (١٠) سپێدێ دێ دەست ب رێورەسمان کەن ل دێرا ئەرمەنان ل تاخێ ماسیکێ”.
دا زانين ژى كو مێھڤانێن ئەرمەن گەلەک ژ دەرڤە بۆ برێڤەبرنا جەژنا قیامەتێ هاتينه ل گەل مرۆڤێن خوە و گۆت: “ئەڤە دبیتە جەژنا دوویێ کو ب تنێ رێورەسمێن ئاینی دھێنە گێران، ئاھەنگ ل سەر خاترا شەھید و پێشمەرگێ کوردستانێ ناھێنەگێران، وی دەمی دێ گێرین ھەتا کوردستان ھەموو ئازاد بیت”.
ئەڤرۆ نیۆز، قائید میرۆ:
ل ئيدارا خۆجهيا گەرمیان دو پۆستێن وێ ده‌ڤه‌رێ بەر ب پارتی ديموكراتى كوردستان کەفتینە و بەرپرسەکێ پارتی ژی رادگەھینيت كو ژ بەر رێکەنەفتنا ل دۆر پۆستێن پارێزگەھێن ھەلەبچە و سلێمانیێ ل گەرمیان ژی ئه‌ڤ بڕياره نەچوویە د وارێ بجهئينانێ دا.
رەھێل جاف، بەپرسێ دەزگەھێ رەوشنبیری و راگەھاندنا پارتی ديموكراتى كوردستان ل گەرمیان بۆ ئەڤرۆ نیۆز گۆت: “پارتی د گەل لایەنێن سیاسی گەھشتیە رێکەفتنێ بۆ پۆستێن ئیدارەیا دەڤەرا گەرمیان و ب گورەيی رێکەفتنێ دو پۆست بەر پارتی کەفتینە، ئەو ژی جێگرێ ئێکێ یێ سەرپەرشتیارێ ئیدارا گەرمیان و رێڤەبەرێ ناحیەکێ”.
رەھێل گۆتژی: “ئەف دو پۆستە د کێمن بۆ پارتی و ژ بەر رێکنەکەفتنا پارتی د گەل ئێکەتیێ و گۆڕان ل ھەردو پارێزگەھێن ھەلەبچە و سلێمانیێ، لەوڕا ل گەرمیان ژی نەچوویە د وارێ بجهئینانێ دا”.
ئه‌ڤرۆ نيوز:
محه‌مه‌د يوسف سه‌رۆكێ نايجيريا د ده‌مێ سه‌ره‌دانا خوه دا بۆ وه‌لاتێ ئه‌مريكا دياركر كو بۆكۆ حه‌رام خرابترين دوژمنێ ئيسلامێ يه و ئه‌و دێ شكێت چونكو موسلمانێن ئه‌فريقيا ئه‌و نه‌فێن و كارێن وان يێن پيس ره‌ت دكه‌ن.
سكايى نيوز ئه‌و چه‌نده ژى ژ زار ده‌ڤێ وى به‌لاڤكريه كو چو تشتێ ئيسلامێ د ناڤ بۆكۆ حه‌رام دا نينه ژ ره‌ڤاندنا ژنان و كرێتكرنا وان و كوشتنا بێ تاوانان و ڤه‌خوارنا خوونا مرۆڤان كرێتترين رێ نه بۆ شێواندنا ئيسلامێ.
محه‌مه‌د يوسف سه‌رۆكێ نايجيريا ئاماژه ب وێ چه‌ندێ ژى كريه كو ئه‌وێ رێكخراوا تيرۆرستى چو پاشه‌رۆژ نينه گۆت: “ب ئانه‌هيا خودێ ئه‌و دێ شكێن”.
ئه‌ڤرۆ نيوز:
د پۆلينكرنا زانكۆيێن جيهانى دا ب گۆره‌يى مالپه‌رێ webometrics.info زانكۆيا دهۆك ل سه‌ر ئاستێ هه‌رێمێ ل رێزا دويێ دهێت ل پشت زانكۆيا نوشداريا ددانان ل هه‌ولێرێ.
ب گۆره‌يى ڤى مالپه‌رى زانكۆيا نوشداريا هه‌ولێر ل پلا ئێكێ ل سه‌ر ئاستێ هه‌رێمێ و يا چار هزر و 684ێ دهێت و ب دووڤ دا زانكۆيا دهۆك ل رێزا دويێ ل سه‌ر ئاستێ هه‌رێمێ و نه‌هێ ل سه‌ر ئاستێ عيراقێ و يا حه‌فت هزار و 310ێ ل سه‌ر ئاستێ جيهانێ دهێت.
ب دووڤدا زانكۆيێن سۆران و يا ئه‌مريكى ل سلێمانێ دهێن و پاشان ژى هه‌ر ئێك ژ زانكۆيێن كۆيه و سلێمانيێ و سه‌لاحه‌دين و گه‌شه‌پێدانا مرۆڤايه‌تى دهێن.
زانكۆيا نه‌ورۆز ژى ل پشت ڤان هه‌موو زانكۆيێن هه‌رێمێ دهێت و 37ێ ل سه‌ر ئاستێ عيراقێ و ل سه‌ر ئاستێ جيهانێ ژى ل رێزا 19 هزار و 466ێ دهێت.
ئه‌ڤرۆ نيوز:
ده‌رباره‌يى پێدانا مۆله‌تا هه‌لگرتنا چه‌كى و هه‌بوونا وى، وه‌زاره‌تا ناڤخۆ رێنمايێن نوو ده‌ركرن و تێدا مه‌رجێن بۆ پێدانا مۆله‌تێ هاتينه دان، دهێنه گوهۆڕين.
ب گۆره‌يى ڤان رێنمايان، ب تنێ وه‌زيرێ ناڤخۆ و پارێزگاران و سه‌رپه‌رشتێن ئيداران ده‌سته‌لاتێن پێدانا چه‌كى يێن هه‌ين و ب گۆره‌يى چه‌كى ژى دهێته گوهۆڕين.
هه‌ر د وان رێنمايان دا كو ئيمزايا كه‌ريم شنگالى وه‌زيرێ ناڤخۆ ل سه‌ره، هاتيه: “پێدانا مۆله‌تا هه‌لگرتن و هه‌بوونا چه‌كى دێ هێته سنورداركرن و ل حاله‌تێ گه‌له‌ك پێدڤى دێ هێته دان و ژ لايێ ده‌سته‌لاتا پێدانێ داخوازيا دانا مۆله‌تێ دێ هێته هه‌لسه‌نگاندن و ئه‌ڤ مۆله‌ته بۆ ساله‌كێ يه”.
نيشاندان