ئەڤرۆ نیوز:
ئەردەلان نورەدین، ئەندامێ فڕاکسیۆنا پارتی دیموکراتی کوردستان ل پەرلەمانێ عیراقێ بۆ رۆژناما ئەڤرۆ دیارکر، مە چەندین جار دانوستاندن ل گەل بەغدا کرینە و شاندێن ھەرێما کوردستانێ بۆ ڤێ مەرەمێ چووینە بەغدا ھەتا رێککەفتن ھاتینەکرن، بەلێ بەغدا رێز ل ڤان رێککەفتنان نەگرتیە و ئەم یێن گەھشتینە وێ باوەریێ بەغدا چو جاران یا پێگیر نابیت ب رێککەفتنان ل گەل ھەرێما کوردستانێ و پارێ ھەرێمێ نادەت، وەکو د بودجەی دا ھاتی، تنێ بزاڤێن وێ چەندێ دکەت کو قەیرانێن ھەرێما کوردستانێ ئالۆزتر بکەت، ئەڤە ژی بۆیە ئەگەر کو حوکمەتا ھەرێمێ باوەری ب بەغدا نەمینیت و بزاڤێن ڤەدیتنا رێکێن دی دکەت.
ئەردەلانی گوت ژی” ل ڤێ دووماھیێ، دەمێ سەرۆک بارزانی سەرەدانا ئەمریکا کری، ئەڤ چەندە ب ئەمریکا ھاتیە راگەھاندن، کو ئەڤە دووماھی دەلیڤەیە بۆ بەغدا، ھەتا ئاریشێن دارایی یێن ھەرێما کوردستانێ چارە بکەت، ھەکە بەغدا بخوازیت ئاریشێن مە چارە بکەت ئەم د بەرھەڤین، بەلێ بەغدا ب خوە ناخوازیت ئەو ئاریشە چارە ببن، باشترین چارە ئەڤە ب شێوەکێ سەربخوە بژین و پەترۆلا خوە ب ئازادی بفرۆشین”.
دکتۆر بەختیار شاوێس، پەرلەمانتارێ ئێکەتی نیشتمانی کوردستان ل پەرلەمانێ عیراقێ بۆ رۆژناما ئەڤرۆ گۆت” ھەکە ئەم ل ھەرێما کوردستانێ بشێین پەترۆلا خوە ب شێوەکێ سەربخوە بفرۆشین ب مەرجەکی گەرەنتی ھەبیت بۆ فرۆتنا وێ و وەکی بەرێ نەبیت شکەستنێ بینین، چونکی جارا دی دەمێ ھەرێما کوردستانێ پەتڕۆلا خوە فرۆتی، ھاتە گوتن کو مە رێککەفتنەکا ٥٠ سالی ل گەل تورکیا ھەیە، بەلێ شکەستن ئینا، ھەتا بەغدا ل دادگەھێن نێڤدەولەتی سکالا ل سەر ھەرێما کوردستانێ تۆمارکر، لەوما ھەکە گەرەنتی ھەیە بۆ فرۆتنا پەتڕۆلا ھەرێما کوردستانێ ب شێوکێ سەربخوە ئەڤە ئاسایی یە، بەلێ ھەکە چو گەرەنتی نینە، ئەڤە پێنگاڤەکا شاشە و ھەرێما کوردستانێ سەرناکەڤیت”.
بەختیاری زێدەتر گوت” ئەڤە سێ ھەیڤە فەرمانبەرێن ھەرێما کوردستانێ موچێن خوە وەرنەگرتیە، ھەکە فرۆتنا پەترۆلا ھەرێمێ سەرنەگرت، ھەر دڤێت ڤەگەڕین بەغدا و ل گەل حوکمەتا عەبادی بگەھینە رێککەفتنێ، ب دیتنا من ھەکە ئەم بێی بەغدا پەترۆلێ بفرۆشین، حوکمەتا عەبادی یا بێ دەنگ نابیت و دێ گڤاشتنان کەتە سەر ھەرێما کوردستانێ، ھەکە ڤێ جارێ ھەرێما کوردستانێ د پرسا فرۆتنا پەتڕۆلا خوە دا یا سەرکەفتی نەبیت، مللەت تەحەموولێ ناکەت، ئاریشە ئەوە یا بەرێ دوبارە نەبیتەوە و ھەکە فرۆتنا پەترۆلێ یا بەرێ سەرگرتبا، دبیت نوکە چو ئاریشێن بودجە و موچەی ل ھەرێمێ نەمابان”.
شاوێسی خویاکر ژی” ھێشتا پەیوەندیێن مە ل گەل بەغدا یێن ماین و بەھرا ھندێ ھەنە دەست ب دانوستاندنان ل گەل حوکمەتا عیراقێ بکەین، ھەکە ئاریشە گەھشتبیتە خالا دووماھیێ، ئەم بۆچی ڤەدگەڕین بەغدا و وەزیرێن کورد دچنە دەواما خوە، دبیت ھێزا پێشمەرگەی د پرۆسا ئازادکرنا باژێرێ مووسلێ دا پشکدار ببیت، لەو ئەم دبێژین، پێدڤیە ل گەل بەغدا پێک بھێین، ژ بەر کو مە ترس یا ھەی ھەرێما کوردستانێ د فرۆتنا پەتڕۆلێ دا ب شێوەکێ سەربخوە سەرنەکەڤیت و جارا بۆری یا بۆیە بەند بوومە، حوکمەتا ھەرێما کوردستانێ ژی تنێ یا پارتی نینە ھەتا بڕیارێ ل سەر دانوستاندنان بدەت، حوکمەت یا پارتی و ئێکەتی و گۆڕان و ئیسلامیانە و پێنج حزب تێدا د پشکدارن و حوکمەت یا پێنج حزبێن سەرەکی یە”.

ئەڤرۆ نیوز:

ئەندامەکێ سەرکردایەتیا پارتی دیموکراتی کورستان راگەھاند، گۆڕان ل گەل درووشمێن خوە یا راستگو نەبوو و نەشیان چار سالێن ئارام دروست بکەن.
عەلی عەونی ئەندامێ سەرکردایەتیا پارتی دیموکراتی کوردستان بۆ باسنیۆز گوت” بارودۆخێ کوردستانێ یا تایبەتمەندە و ئەم یێن دناڤ شەڕەکێ گران ل گەل داعشێ دا، دۆرپێچا ئابووری یا ل سەر مە و پاشەرۆژا دەڤەرێ یا نەدیارە، ل ڤێرێ ژی ل کوردستانێ بارودۆخێ مە گەلەک یێ باش نینە، نەوشیروان موستەفا رێکخەرێ گشتیێ بزاڤا گۆڕان راستی نەگوت کو چار سالێن ئارام ل ھەرێما کوردستانێ یێن ب رێڤە، چونکی ئەڤە سالەک ب سەردا چوو و خەریکە ھەموو تشت دێ ھێنە ھەلوەشاندن، لەوما ھزرکرنا نەوشیروان موستەفای ل سەر رەوشا کوردستانێ، پشکەکە ژ قەیرانێ”.
عەلی عەونی زێدەتر دبێژیت” مخابن، بزاڤا گۆڕان کلتۆرەک ل سلێمانیێ یێ دروستکری، کو کۆمەکا کەسان بێ ھزرکرن یا دەست ب ئاخڤتنێن کریت و سوتنا جەمەدانیا و سوتنا رەمزێ نەتەوایەتیێ، کو ئەڤە نە زمانێ سیاسەتێ نە و نەوشیروان و بزاڤا گۆڕانێ ژێ د بەرپرسیارن”.
ناڤبری خویاکر” ئێکەتی دەمێ گۆڕان ژی ل گەل، بۆ وێ چەندێ ھاتە دامەزراندن دژی پارتی و نەھجێ بارزانی کاربکەن، نوکە ژی ئەو قوتابخانە وانەیان بۆ گۆڕانێ و ئێکەتیێ دبێژیت، بنگەھێ جەماوەری یێ وان گەلەک یێ ژ ھەڤ دوور نینە، ژ سەرڤە وەسا دیاردبیت ژبەر ھندەک پۆستان ژھەڤدوو ددوورن، بەلێ ل سەر ئاستێ جەماوەری ئێکن و یێن بووینە کوتلە کوتلە”.
ل دووڤ بۆچوونا ڤی ئەندامێ سەرکردایەتیا پارتی دیموکراتی کوردستان” ئێکەتی وێ پێشنیارێ ددەتە گۆڕان و دبێژیتی ئەم ئێک حزبین و دشێین د چارچۆڤەکێ نوو دا کاربکەین و سەعدی پیرەی ئەندامێ مەکتەبا سیاسی یا ئێکەتی نیشتمانی کوردستان ئەو ئاخڤتنە گوت کو ئەو ھەردو حزب گەلەک ژ ھەڤدو د نێزیکن، لەوما پێ دچیت ئێکەتیێ ئەو کەسایەتیا واتەیی ژدەست دابیت، لەوما یا نەچارە بکەڤیتە دبن کاریگەریا گۆڕانێ دا، یان گۆِران ڕادەستی بنەمالا تالەبانی بھێتە کرن”.
ھەر ل دۆر ڕادەستکرنا بزاڤا گۆڕان بۆ بنەمالا تالەبانی، عەلی عەونی دبێژیت” د جیھانا سیاسەتێ دا ھەموو تشت مومکینە، لەوما چوونا نەوشیروان موستەفای بۆ ناڤ ئێکەتیێ و دوور نینە گۆڕانێ تەسلیمی ئێکەتیێ بکەت، نوکە ژی گۆڕان دەست ب خانەنشینکرنێ و گەندەلیێ دناڤ حوکمەتێ دا یا کری و یا ڕاست نەبوو ل گەل درووشمێن خوە”.