ئەڤرۆ:
ژ چارچووڤێ یاریێن گەرا چاردێ و بەردی دووماھیێ یێن خولا پلە ئێکا ھەرێما کوردستانێ بریارە ئەڤرۆ ھەردوو نوونەرێن پارێزگەھێ گارە و سێمێل یاریێن خوە یێن ڤێ گەرێ بەرامبەر تیمێن شەھیدان و سۆران بکەن.
ل یاریگەھا خوە سەرکێشا خۆلێ تیما تەپا پیێ یا یانا گارە دێ کەڤیتە د تاقیکرنەکا ب زەحمەت دا دەمێ تیما تەپا پێی یا شەھیدان مێڤان دکەت .
ئەڤ یاریە بۆ تیما گارە دھێتە ھژمارتن یاریا ئێکلاکەر بۆ برنا ناسناڤێ خولێ چنکو ھەکە دڤێ یاریێ دا سەرکەفت دێ ب فەمی سەرکەڤیتە خۆلا پلا نایاب و ھەتا رادەکێ مەزن دێ بیتە قارەمانا خۆلێ چنکو د یاریا گەرا دووماھیێ دا دێ کەڤیتە بەرامبەر تیما تەپا پێی یا سیروانا نوو ئەوا پێدڤی ب سەرکەفتنێ زێدەتر ژ ھەشت گۆلان ھەتا بشێت بیپتە قارەمان لەورا ئەڤ یاریە بۆ گارە یاریا برنا ناسناڤی یە.
ل دۆر ڤێ یاریێ راھێنەرێ یانا گارە خالد موسا بۆ رۆژناما ئەڤرۆ گۆت: یاریا ئەڤرۆ بومە یاریا مان و نەمانێ یە و پێدڤیە ل سەر مە ب ھشیاری سەرەدەریێ بکەین و ھزرنەکەین کو سەرکەفتنا مە یا مسگەرە چنکو تەپا پێی باوەری نینە.
زێدەتر ناڤبری ئەو چەندە ژی دیارکر کو تیم د گوپیتکا رەوشا خوە یا دەرونی دایە و چو کیماسی نینن نە ژلایێ ھونەری و نە ژلایێ دارایی لەورا وان چو رێک نینن ژبلی سەرکەفتنێ.
ژلایەکێ دووڤە نوونەرا دویێ یا پارێزگەھێ تیما تەپا پێی یانا سێمێل دێ یاریا خوە یا ڤێ گەرێ ل یاریگەھا خەبات ئەوا دھێتە ھژمارتن یاریگەھا وێ دێ تیما تەپا پێی یا سۆران مێڤان کەت د یاریەکا ڤەبر دا بۆ تیما سێمێل چنکو ھەتا رادەکێ باش ھیڤیێن وێ د گەشن بۆ دەربازبوونێ و پێدڤی ب سەرکەفتنێ یە دڤێ یاریێ و یاریا گەرا دووماھیێ دا بەرامبەر ھەڤرکا خوە تیما سۆلاڤ و بەرامبەر گارە سیرۆان خوسارەت کەت د گەرا دووماھیێ دا ھەتا بشێت سەرکەڤیت.
ل دۆر ڤێ یاریێ سەرپەرشتێ تیما سێمێل عومەر سەبری گۆت: پشتی نەرازیبوونا مە ل سەر یانا ھەلۆ سەرگرتی زاخا یاریکەرێن مە بلند بوویە و مەبەرھەڤیێن باش بۆ ڤێ یاریێ کرینە و مە باوەری ب شیانێن یاریکەرێن خوە ھەیە دێ سەرکەفتنێ تومارکەن.
زێدەتر ناڤبری گۆت: ل رەخەکی دێ چاڤێ مە ل ئەنجامێت مە بیت و ل رەخەکێ دی دێ چاڤێ مە ل گارە بیت کو ھەڤرکێن مە بومە خوسارەت کەت بو وێ چەندێ ئەم ھەر دو پێکڤە سەرکەڤینە پلا نایاب.

ئەڤرۆ:
سەروکێ یانا دھۆک دیارکر ھەر گوھۆرینەکا ل یانا دھۆک پەیدابیت دێ کارەکێ باشتر دووڤ خوە دا پەیداکەت و ئێدی بێ پلان چ کار ل یانا دھۆک برێڤە ناچن و ناھێتە قەبوول کرن کەسەک د کارگێریا یانێ دا بیت و کار نەکەت.
زێدەتر بژار ئسماعیل د دیدارەکا تایبەت دا بۆ رۆژناما ئەڤرۆ دیارکر ل دووڤ وان سوزێن بۆ پشتەڤانیا یانا دھۆک ژلایێ رێڤەبەرێ گشتی یێ وەرزشا ھەرێما کوردستانێ و پارێزگارێ دھۆکێ وی بەرپرسیارەتیا ڤی بارێ گران یێ یانێ ب ستویێ خوە ڤە گرتیە و دیارکر ژی ھەر گوھۆرینەکا د یانا دھۆک دا پەیدابیت دی دەرئەنجام مفایێن خوە ھەبن ژبەرکو نوکە یاریکەر و دەستەیا راھێنەران زێدەباری پشتەڤانێن یانێ دلخوشن ب ئەڤان گوھۆرینان و بھیڤی نە دێ شێن بنە جھێ باوەریا ھەر لایەکی.
زێدەتر بژاری دیارکر نوکە زێدەتر ژ دەە ھەیڤانە کارگێریا یانێ چو مووچە و ھەڤبەست نە داینە یاریکەرێن تیما تەپا پێ، لێ چاڤەرێنە ب زووترین دەم ئەڤ کێشەیە چارەسەربیت، پشتی کێشەیێن ئابوری ل سەر ھەرێمێ سڤک دبن و ب رەوا دبینت یاریکەر داخوازا مافێن خوە ژ کارگێریا یانێ بکەن، سەرەرای و چەندێ کو نوکە یانە د چەند کێشەێن ئالوز یێن یاریکەران دا دەرباز دبیت و نوکە کارگێری ھەمی یا کار دکەت ڤان کێشەیان چارەسەر بکەت ژ وانا کێشەیا یاریکەرێ تیمێ یێ پیشەکار ئینێست ئینگا و یاریکەرێن عرەب یێن باسکت بۆلێ.
زێدەتر ناڤبری ل دۆر دوبارە ڤەگەراندنا تیمێن باسکت بۆلێ بۆ خولێن عیراقێ و ھەریما کوردستانێ گۆت: د کومبونا خوە دا مە داخواز ژ سەرپەرشتێن ڤێ یاریێ کریە پەیوەندیێ ب یاریکەرێن تیمێ و راھێنەران بکەن داکو دوبارە ڤەگەرنە راھێنانان و دیسان ڤەگەراندنا یاریکەر و راھێنەرێن بەری نوکە ل یانێ کار کرین داکو دوبارە خزمەتا یانا دھۆک بکەن د ھەر یاریەکێ دا.
ل دووماھیێ ناڤبری ئەو چەندە ژی دیارکر نوکە ئەو د ناف تیما تەپا پێ و کارگێریا یانێ نەشێن چو گوھۆرینەکێ بکەن ژ بەرکو تیم د ھەڤرکیێن خولا عیراقێ و کوردستانێ دایە و کارێ وان یێ سەرەکی ئەوە تیم د خولا عیراقێ دا دەربازبیتە قوناغا دووڤ دا یا بژارە، زێدەباری ب دەستڤەئینانا ناسناڤێ خولا ھەرێما کورستانێ یا تەپا پێ بۆ یانێن نایاب و بۆ سالا بەَت ھەر کارەکێ بۆ یانێ بھێتەکرن دێ ب پلان بیت و چو کار ل یانا دھۆک برێڤە ناچن بێ پلان، ژبەرکو بەرپرسێن حکومی قەبوول ناکەن وەکی بەری نوکە کارێن یانێ بێ پلان برێڤە بچن و کوژمێن ئاشوپی و بێ مفا مەزێخین و ژ نھا قەبوول ناکەت کەسەک د کارگێریا یانێ دابیت و یێ بێ کار بیت.