ئه‌ڤرۆ نيوز:

ل ٣١\٧\٢٠٠٣، بۆ ئێکەم جار حەفتینامەک ب زارێ بادینی کەفتە د گۆرەپانا رۆژنامەڤانیا کوردی دا، سوبەھی ٣١\٧\٢٠١٥ دێ ژیێ رۆژنامێ بیتە ١٢ سال و بەر ب ھەلکرنا چرایێ ١٣ سالیێ کەت. رۆژناما ئەڤرۆ د چەندین قۆناغان را دەربازبوویە ھەتا گەھشتیە ڤێ قۆناغێ، بگرە بەری ھینگی دەرخستنا حەفتیناما پەیمان و پاشی ناڤێ وێ بوویە رۆژناما ئەڤرۆ و پشتی ھینگی ل سالا ٢٠١٢ ژ رۆژنامەکا حەفتیانە بوویە رۆژنامەکا رۆژانە و ھەر رۆژ ل گەل ھەلاتنا رۆژێ، رۆژنامە ل بەر دەستێن خواندەڤانان دھێتە دیتن. ب شیان و نەخشەدانان و ماندیبوونا ژمارەکا نەکێما میدیاکاران ب درێژاھیا سالان “١٩٩٣ – ٢٠١١ ” ئەڤرۆ ب ھەر سێ سەردەمێن خوەڤە “پەیمان، ئەڤرۆ یا ھەفتانە، ئەڤرۆ یا رۆژانە، شیایە جھەکێ ھەرە شرین و ژێھاتی دناڤا میدیا کوردی و ب تایبەت مەندیا دەڤەرا بادینان دا بگریت و ببیتە مارکەکا خودان ناڤ و سەنگ.

رۆژنامەڤان بەھجەت ھروری، سەرنڤیسەرێ بەرێ یێ رۆژناما ئەڤرۆ و ئێک ژ دامەزرێنەرێن رۆژنامێ دیار کر، کارکرن د رۆژنامەڤانیێ دا ل وی دەمی یا ب ساناھی نەبوو. ژ بەر گەلەک ئەگەران: وەکو نەبوونا رۆژنامەڤانێن پیشەیی و ئەکتیڤ، کو رۆژنامەڤانی ژی وەک جھەکێ حزبی دھاتە دیتن و بۆ ڤەحەواندنا خەلکی و کەس بۆ دھاتنە دامەزراندن و ڤرێکرن بێی نیاسین. ھەموو کەسێن ئەدیب و ھۆنەرمەند و ھەر کەسێ دەستێ نڤیسینێ د وارەکی دا ھەبا،وەک رۆژنامەڤان دھاتە دامەزراندن! ژ بەر ڤێ یەکێ ژی بابەتێن رۆژنامەڤانی ب تاما ئەدەبی دھاتن نڤیسین. ھەروەسا نەبوونا سیستەمەکی یان کۆمپانیێن بەلاڤکرنا رۆژنامەیان و ب رێیێن تاکەکەسی دھاتن بەلاڤکرن.
نزار عەبدولعەزیز، بەلاڤکەرێ ئێکانە یێ رۆژناما ئەڤرۆ ل پارێزگەھا دھۆکێ بۆ ئەڤرۆ دیار کر، وان پتر ژ ٦٠٠ پشکداریێن رۆژانە یێن رۆژناما ئەڤرۆ ل ناڤ دام و دەزگەھێن میری ھەنە و رۆژانە ژی د زێدەبوونێ دانە و گۆت: نھا ئەم ناڤا توماردکەین بۆ ھندێ رۆژنامێ ببەینە د ناڤ مالان دا، ھەتا نوکە پتر ژ ھزار خێزانان ناڤێ خوە تومارکریە بۆ ھندێ ئەم رۆژانە رۆژنامێ بۆ وان ببەینە مالێن وان.
وەسفی حەسەن ردێنی، رێڤەبەرێ راگەھاندنێ ل پارێزگەھا دھۆکێ ئاماژە ب وێ یەکێ کر، رۆژناما ئەڤرۆ رۆلەکێ گرنگ و پێش چاڤ ھەیە د رۆمالکرن و وان نووچێن گرێدای ئەڤرۆیا خەلکێ مە، ب تایبەت ئەو نووچێن گرێدای دوزا مللەتێ مە و شەرێ مە ل گەل تیروریستێت داعش و وەرگرتنا رەئی و بۆچوونێن بسپورێت بیانی ل دور نھو و ئایندێ کوردستانێ، ھەروەسا رۆلەکێ سەرەکی و پێشەنگ ھەیە د پەیداکرن و بەلاڤکرنا نووچێن گرێدای ژیانا رۆژانە یا خەلکێ مە.
قودرەت مەحموود، پەیامنێرا کەنالێ NRT ل دھۆکێ دیار کر، رۆژناما ئەڤرۆ ب راستی ژی ھەتا رادەیەکی بوویە ژێدەرێ پێزانین و بوویەران ل دەڤەرا بادینان و ب ھیڤیا وێ یەکێ نە پتر رۆلێ خوە ببینیت و بشێت خواندەڤانێ خوە زێدەتر لێ بکەت و گۆت: دخوازین ھندەک لاپەرێن دی ل رۆژنامێ زێدە ببن کو پتر گرنگیێ بدەنە رۆلێ ژنێ و وەرگرتنا مافێن وێ.
رۆژنامەڤان سەباح ئەترووشی دیار کر، بەرفرەھبوونا دەرگەھێن پێزانیان و دەزگەھێن راگەھاندنێ و شێوازێن سەردەم و ئەنترنێتا گەرۆک و سایتێن ب لەز، مینا تویتەر، فێسبووک و ئینستگرام و ئاسانیا گەھشتن ب زانیاریا وەلێ کر کو جەماوەر ل رۆژنامەگەریا ب لەز بگەریێت و ب سەناھی ئەو دەزگەھـ ل وەلاتی بگەریێت و زانیاریێ بگەھینتێ ل گەریانا وی ل رازانا وی ل سەیرانا وی ل سەر کارێ وی کو مێشکێ وەلاتی بخوڤە گرێدەت، ئەگەر جارەکێ ئەو دەزگەھـ نەھات ئەو د دووڤ را بچیت و گۆت: ل دەستپێکا دروستبوون و دامەزراندنا رۆژناما ئەڤرۆ کو ئەز ژی ئێک ژ دا مەزرینەران بووم ل سەر بۆنیاتەکێ حەفتیانە ھاتە ئاڤاکرن و ستاف و جە و پلان ھەموو حەفتیانەبوون، ھەتا دەست بکار بوی، دڤێت رۆژناما ئەڤرۆ پێداچوونەکێ د کاری دا بکەت.
سەباح ئاماژە دا وێ چەندێ، وەک نێزیکبوونەکا من یا رۆژانە ل گەل ڤێ رۆژنامێ، چونکو یا مە تشتەکێ رۆحیە ئەم حەز ژێ دکەین و شوون تبلێن مە د دروستبوونا وێ دا ھەبوون، ئەم حەز دکەین پێشکەڤیت و بەردەوام بیت و ستافێ خوە زێدەکەت، کو نە ھەموو بنڤیسن، ھندەک ل نڤیسەر و نڤیسینێن باش بگەرن و بینن.
رۆژنامەڤان سەباح زێدەتر دبێژیت: دیسان ستافەک ب تنێ لەزاتی د ئینانا خەبەری دا و ستافەک لەزاتی د گەھاندنێ دا. ئەڤە ژی پێدڤیە ل سەر ڤێ رۆژنامێ جار ب جار سمینار و ووڕک شوپا ل گەل خەلکی و نڤیسەرا و رۆژنامەڤانان و رێڤەبەریێن حکوومی بکەت و رەئیا وان وەربگریت و نێزیکی خوە بکەت و گەلەک تشتێن مەنتقی برێڤە ببەت و پلان زۆرن، ھەموو د کورتیا ڤێ کومێنتێ دا ناھێنە گۆتن.
رۆژنامەڤان تەیار عادل گۆران خویا کر، ئەز ئێک ژ وان رۆژنامەڤانامە یێن ب رێیا رۆژناما ئەڤرۆ فێری زارێ بادینی بوویم و ئەڤرۆ دەرگەھەکێ باشە بۆ کارکرنێ د گۆرەپانا رۆژنامەڤانی دا و قوتابخانەکە بۆ چێکرنا رۆژنامەڤانان و گۆت: ئاکنجیێن بەردەرەش ھەردەم وێ داخوازیێ ژ رۆژنامێ دکەن ببیتە دەرگەھەک بۆ ھندێ گازندێن وان بگەھەنە جھێن پەیوەندیدار و ئیدارا پارێزگەھا دھۆکێ و ھەموو ئاریشە ژی ھەر ب رێیا رۆژنامێ بھێنە چارەسەرکرن.
ھەر ل دور ئاستەنگان ھروری خویا کر، نەھاریکاریا دەزگایێن میری و جەماوەری ل گەل رۆژنەمەڤانان و نەبوونا چاپخانەیان ل پارێزگەھێ و ژ بەر ڤێ یەکێ مە ھەموو حەفتیان رۆژنامە دبرە ھەولێرێ و دو سێ رۆژان ل وێرێ دماین ھەتا مە چاپ دکر و ڤەدگەڕاندەڤە دھۆکێ و بەلاڤ دکر. ھەروەسا نەبوونا دراڤێ پێدڤی بۆ دەرێخستنا رۆژنامەیان. کێمیا ئالەتێن پێدڤی یێن دەرێخستنا رۆژنامێ ژ کۆمپیوتەران و کامیرە و ریکۆردەران. ئاستەنگێن حزباتی، عەشیری و ئایینی د شرۆڤەیان دا کو ھێشتا ژی بەردەوامن.
بەھجھەت خویاژی کر، رۆژناما ئەڤرۆ ژ ناڤێ وێ دیارە کو ھزرا وێ یا سەربخوە و رۆژانەکرنێ بوو. لێ ژ بەر نەبوونا شیانا، حەفتیانە دەرکەفت و ل سەر دھاتە نڤیسین: رۆژانەیە، لێ بەروەخت حەفتیێ جارەکێ دەردکەڤیت و گۆت: ھزرا دامەزراندنا رۆژنامێ ئەو بوو کو یا ئازاد و سەربخوە بیت و دەرگەھێ وێ بۆ قەلەمێن ئازاد و جودا جودا ڤەکری بیت و رەنگڤەدانا دەنگێ جەماوەری بیت. ژ ھژمار (٥٣) و پاش دا ژ بەر ھۆکارێن دارایی، ئەڤرۆ دەست ژ پەیڤا (رۆژانەکرن)ێ بەردا و ل سەر دھاتە نڤیسین: (حەفتینامەکا سەربەخۆیە ل دھۆکێ دەردکەڤیت). ب راستی ژی ئەڤرۆ شیا ھەتا رادەیەکێ باش دەربڕینێ ژ دەنگێ جادێ بکەت و گەلەک بابەتێن وێرەک و ئازاد بەلاڤ بکەت و ببیتە دەنگێ خەلکی و د پتریا راپڕسیان دا ئەڤرۆ چوو د رێزبەندا رۆژنامە یێن پێشیێ دا ل رێزبەندا رۆژنامە یێن ھەرێما کوردستانێ.
ل دور وێ یەکێ کا رۆژناما ئەڤرۆ شیا چو گوھۆرینان بکەت، ناڤبری گۆت: وێرەکی دا خوە د بەلاڤکرنا رەئیێن جودا دا. ب دیزاین و لاپەرێن رەنگا و رەنگ و سەرنجراکێش دەرکەفت. نڤیسەر ژ ھەموو کوردستانێ کێشانە ناڤ لاپەرێن خوە. بیاڤێن بەرفرەە دانە کێشن جەماوەری و خەلکی خوە د ناڤ دا دیت. بابەت ب زاراڤێ سۆرانی ژی بەلاڤکرن، ژ بلی بادینیێ کو زاراڤێ فەرمیێ رۆژنامێ بوو. ھەتا رادەیەکێ باش حەزێن ھەموو تەخێن جڤاکی تێرکرن. ئانکۆ ناڤەرۆکەکا ھەمەرەنگ و گشتگیر ھەبوو. ژ ھژمار ١٤٥ وێڤە لاپەرێن ئەڤرۆ بوونە (٢٠) و(٤) لاپەرێن وێ رەنگاورەنگ بوون. پەیامنێرێن خوە ل ھەموو دەڤەرێن کوردستانێ ھەبوون. ئەڤرۆ پاشبەندەکێ ئەدەبی ھەبوو و ١٠٩ ھژمار ژێ دەرکەفتن. پاشبەندەک ب ناڤێ پەیمان ب فۆنتێن لاتینی ھەبوو و ٢٠ ھژمار ژێ دەرکەفتن و مە ڤڕێدکرن باکوور و رۆژئاڤایێ کوردستانێ. ئەڤرۆرۆلەکێ پێشچاڤ د ڤەژاندنا زمانێ کوردی و گەشەکرنا رۆژنامەڤانیێ دا ل دەڤەرێ ھەبوو.
سەبارەت ھۆکارێن رۆژانەکرنێ بەھجەت دیار کر، رۆژنامە ژ بەر کو یا حەفتیانە بوو، خواندەڤان تێرنەدکرن، تێھنا رۆژنامەڤانێن وێ ژی نەدشکاند کو پارێزگەە یا تژی بوویەر و روودان بوو و دەلیڤە یێ بەلاڤکرنا وان نەدبوو و بۆ حەفتیا پاشتر کەڤن دبوون. ئەڤرۆ سەربۆڕێن رۆژانەکرنێ ھەبوون و ل ھەلکەفتێن ھەلبژارتنێن باژێرڤانیان و فیستەڤالا جزیزی ب شێوێ رۆژانە دەرکەفتیە و رۆژانەکرن بۆ خێزانا ئەڤرۆ یا ناموو نەبوو. لەوان ھزر ل رۆژانەکرنا وێ ھاتە کرن و چەندین پڕۆژە یێن رۆژانەکرنێ مە ب رێیا دەزگەھێ خانی یێ رەوشەنبیری و راگەھاندنێ و بەری وی ژی نڤیسینگەھا رەوشەنبیری و راگەھاندنێ یا لقێ ئێک PDK بۆ نڤیسینگەھا ناڤین یا رەوشەنبیری و راگەھاندنێ بلند کرن (من دەقێ پتریا وان راپۆرت و داخوازنامەیان ھەنە)، کو مە دڤێت رۆژنامە یا ئەڤرۆ بکەینە رۆژانە و دھۆک پێدڤی رۆژنامەیەکا رۆژانەیە. د کۆمبوونێن نڤیسینگەھا ناڤین ژی دا و ل گەل دیتنا ھەر بەرپرسەکێ شۆلەژێژی دا مە ب دەلیڤە دزانی و ب چڕی ئەڤ داخوازە دوپات دکر. بزاڤێن مە د بەردەوام بوون و دەزگایێ خانی یێ رەوشەنبیری و راگەھاندنێ ژی ھاریکار بوو و ل دووماھیێ پێنگاڤێن مە سەرگرت و رۆژنامە یا ئەڤرۆ ل رۆژا ١.١٠.٢٠٠٩ ب شێوەیەکێ رۆژانە دەرکەفت و سەرکەفتن ئینا. لێ دیسا گەلەک ژ وان ھۆکارێن من ل سەری گۆتین، ھندەک ئاستەنگ مان ب تایبەت چاپخانە و سیستەمێ بەلاڤکرنێ و ئازادیا رادەربڕینێ.
بەھجەت ھروری ئەو یەک ژی دیار کر، د ماوێ ١٧ سالان دا ب ھەموو دلسۆزی ل سەر کارێ خوە یێ رۆژنامەڤانی و سەرنڤیسکاریێ بەردەوام بوون تا رۆژا ١\٩\٢٠١١ من ب حەزا خوە و ب فەرمی دەست ژ کارێ سەرنڤیسکاریێ بەردای. ئەڤرۆ یا رۆژانە یا بەردەوامە و ب وێ ھیڤیا کو ببیتە دەزگایەکێ بەرفرەە و ئەڤرۆ یێن رۆژانە یێن: ئابۆری، سیاسی، جڤاکی و سپۆرتێ دەرکەڤن. رۆژبوونا رۆژناما ئەڤرۆ ل ھەموو رۆژنامەڤان و کارمەندێن وێ ب پلە ئێک و ل ھەموو گەلێ کوردستانێ پیرۆز دکەم. دیسان ل وان رۆژنامەڤان و کارمەندێن کار بۆ ئەڤرۆ کری و ب ھەر ئەگەرا بیت، ژێ دوورکەفتبن. ھەر ژ یەکەم رۆژا دەرکەفتنا رۆژنامە یا ئەڤرۆ کو کاک (ئەدیب چەلکی) سەرنڤیسکارێ وێ بوو، من وەک رێڤەبەرێ نڤیسینێ تێدا کارکریە. پشتی دەمەکێ کێم وەک سکرتێرێ نڤیسنێ من کارکریە. پشتی کاک ئەدیب ل دووماھیا ھەمان سال چوویە دەرڤەی وەلاتی من پۆستێ سەرنڤیسکاریا رۆژنامێ وەرگرت.