ئه‌ڤرۆ نیۆز، قائید میرۆ
ئێڤاریا ئه‌ڤرۆ دێ ل باژێڕێ هه‌ولێرێ لایه‌نگرێن په‌كه‌كێ خۆنیشاندانێ دژی بوردۆمانا توركیا ئه‌نجام ده‌ن.
ژێده‌ره‌كێ ئاگه‌هدار ب ئه‌ڤرۆ نیۆز راگه‌هاند” ل دژی بوردۆمانكرنا بنكه و باره‌گایێن پارتا كرێكارێن كوردستانێ په‌كه‌كێ، بڕیاره ئێڤاریا ئه‌ڤرۆ ل باژێڕێ هه‌ولێرێ لایه‌نگرێن په‌كه‌كێ خۆنیشانده‌كێ ئه‌نجام بده‌ن.
ژێده‌ری گۆتژی” ئه‌ف خۆنیشاندان دێ ل سه‌نته‌رێ باژێڕی برێڤه‌چیت و دروشمێن دژی حوكمه‌تا توركیا دێ هێنه بلندكرن، ئه‌ڤه ژبلی خواندنا یاداشته‌كێ.
ئەڤرو نیوز، نەوزاد زادە ھلوری:
دەمەکێ بەری نوکە فروکێن شەرکەرێن تورکیا سنوورێ ناحیا دینارتە بوردومانکر و زیانێن گیانی و ماددی پشت خوه ڤە ھێلان.
مەھران لوقمان رێڤەبەرێ ناحیا دینارتە بو ئەڤرو نیوز گۆت: (ئەڤرۆ رۆژا شه‌مبى رێكه‌فتى 25ى تيرمه‌ها 2015ێ فروکێن شەرکەرێن تورکیا چەند دەڤەرەکێن ناحیا دینارتە وەکو جەمشرتێ و کافیا و ھندەک جھێن دن کو مولکێن پەکەکێ لێ ھەنە بوردومانکرینە و زیانێن گیانی و مادی پشت خوه ڤە ھێلاینە).
زێدەتر گۆت: (وەلاتیێن دینارتێ بو مەرەما ب خودانکرنا تەرش و کەوالی سەرەدانا وان جھان کربوون بەلێ نھا رەوشا خەلکی دەفەری نەباشە و ئەو دەڤەر چولکرینە ئاوارەى دینارتێ بووینە).
رێڤەبەرێ ناحیا دینارتە گوت ژی: (دەمەک بەریا نھا چار چەکدارێن پەکەکێ ل دینارتێ خوە رادەستی ھێزێن ئێمناھیێ کرینە).
وه‌لاتيه‌كێ گۆندێ شه‌هێ دياركر كو ئه‌وى ب چاڤێ خوه ديتيه كو چار گه‌ريلا هاتينه ناڤ هه‌رێما كوردستانێ و په‌يوه‌ندى ب حوكمه‌تا هه‌رێمێ كريه و ته‌رمێن 10 كه‌سان ژى ديتينه، ژ به‌ر نه‌بوونا هێلا ئه‌نترنێتێ ل جهێ ئه‌و لێ نه‌شياين وێنا ب ده‌ست خوه بێخين.
ئامێدیێ، مەحمود نھێلی:
ژ ئەنجامێ بوردومانکرنا فرۆكێن لەشکەرێ تورکیا بۆ سەر دەڤەرێن جداجدا یێن قەزا ئامێدیێ چوار وەلاتی بریندار بوونە و زیانێن مالی یێن زۆر ژی گەھاندنینە خەلکێ دەڤەرێ و نھا ب سەدان وەلاتیێن دی ل دەڤەرێن جدا یێن قەزا ئامێدیێ ئاسێ بوونە.
ژێدەرەکێ ژ نەخوشخانا ئامێدیێ بۆ ئەڤرۆ نیوز راگەھاند کو ئەڤرۆ سپێدێ دو ژ وان وەلاتیێن ژ ئەنجامێ بوردومانکرنا فرۆكێن تورکیا بریندار ببوون گەھاندنە نەخوشخانێ و پشتی چارەسەریێن دەسپێکی بۆ دھوکێ ھاتینە رەوانەکرن.
وی ژێدەری ئەو یەک ژی دیار کر کو ئێک ژ وان برینداران زارۆ بوویە و ھەروەسا ئێکێ ژ وانا پێیەکێ خوە ژ دەست دایە کو ل دەڤەرا رێکانیا ل گوندێ وەرەخەل و گوندێ بێزەلێ یێن سەر ب ناحیا شێلادزێ بریندار بووینە.
ل گور ئاخفتنا حسنی سەرگەلی ھەلبژێرێ گوندێ سەرگەلێ یێ سەر ب ناحیا دێرەلۆک ڤە کو بوردومانا شڤێدی گەلەک نێزیکێ گوندی بوویە و ئەڤێ یەکێ ژی ترسەکا زۆر ئێخستیە دلێ خەلکێ گوندی تایبەتی ژی ژن و زارۆیان و گۆت: ئەڤێ بوردومانێ زیانێن زۆر گەھاندنە بیستان و رەزێن وانا و ھەروەسا ژێدەرێ ئاڤا ڤەخوارنێ و ئاڤا چاندنێ یا گوندی ژی ژ ناڤبریە).
ناڤبری داخاز ژ لایەنێن پەیوەندیدار ژی کر کو ب ھەوارا وانا بچن و تورکیا ئاگەھدار بکەن کو ڤێ بوردومانێ راوەستینیت.
ھەروەسا بەری نھا ژی ھەژمارەکا زۆرا وەلاتیان قەستا گوندێن خوە کرینە و نھا ئاسی بووینە و نەشێن ل گوندێن خوە دەرکەڤن.
عوبەید مێزی ئێک ژ وەلاتیێن دێرەلۆکێ دیار دکەت کو بەری چەند رۆژا برایەکی وی ل گەل ھەڤالێن خوە قەستا گوندی کریە و پشتی بووردومانێ چارەنڤیسێ وان نەیێ دیارە و پەیوەندی ژی پێ ناھیتە کرن ژ بەر کو ھێلا تەلەفونێ ل وێ دەڤەرێ نینە.
تێ زانین بەری نیڤرۆیا ئەڤرۆ ژی دووبارە بالەفرێن تورکیا بوردومانا دەڤەرێ کریە و ئاگرەکی مەزن بەردایە دارستانا دەڤەرا ئامێدیێ و تا نھا ژی یا بەردەوامە و پرانیا خەلکێ سەر گوندان دەڤەرێن خوە چولکرینە و قەستا جھێن تەنا کریە.
ئه‌حمه‌د داوود ئۆغلۆ سه‌رۆك وه‌زيرێن كاربرێكه‌ر يێ توركيا بۆ ماوێ ده‌مژمێره‌كێ دانوستاندن ل گه‌ل مه‌سعود بارزانى سه‌رۆكێ هه‌رێما كوردستانێ كر و تێدا ئامانجا وه‌لاتێ خوه ژ بۆردۆمانا ده‌ڤه‌رێن سنورى يێن هه‌رێما كوردستانێ ئاشكه‌را كر.
ئۆغلۆيى د كۆنگره‌كێ رۆژنامه‌ڤانى دا راگه‌هاند: “من به‌حسێ ئۆپه‌راسيۆنێن توركيا بۆ سه‌ر باكورێ عيراقێ ئه‌نجامدايه”، ئاماژه ب وێ چه‌ندێ ژى كر: “بارزانى ته‌كست ل سه‌ر پشته‌ڤانيا خوه بۆ توركيا كريه”.
دا زانين ژى كو هێشتا ل قه‌نديل مه‌ترسى يا ل سه‌ر توركيا هه‌يى، ئه‌حمه‌د داوود ئۆغلۆ گۆتژى: “من گۆته بارزانى كو ئه‌و ئۆپه‌راسيۆن دژى باكورێ عيراقێ نينه”.
ئەڤرۆ نیۆز، قائید میرۆ:
قایمقامێ قەزا مێرگەسۆر تەکەزکر، شەڤا بۆری ھژمارەک گوندێن دەڤەرا مزووری ژووریا ژ لایێ فڕۆکەیێن تورکیا ڤە ھاتینە بۆردۆمانکرن و زیان گەھاندیە دەڤەرێ.
غەفوور ئەحمەد مالەسواری، قایمقامێ قەزا مێرگەسۆرێ بۆ ئەڤرۆ نیۆز گۆت: “شەڤا بۆری فڕۆکەیێن شەڕکەرێن وەلاتێ تورکیا ھەر ئێک ژ گوندێن، تویێ، سلۆر، رەڤین، سومێ، یێن دەڤەرا مزووری ژووریا سەر ب قەزا مێرگەسۆرێ بۆردۆمانکرن و د ئەنجام دا، ژبلی زیانێن ماددی چو زیانێن گیانی نەبوون، ژ بەر کو ھژمارەک گوندی ل دەڤەرێ بوون.
غەفوور ئەحمەد گۆتژی: “ل قەزا مێرگەسۆرێ، ٧٥ گوند نەھاتینە ئاڤاکرن پتریا وان ژی بنکەهـ و بارەگایێن پارتا کرێکارێن کوردستانێ “پەکەکێ” تێدانە، لەوڕا بووینە ئارمانجا فڕۆکەیێن تورکیا، داخوازێ ل وەلاتیان دکەین سەرەدانا ڤان دەڤەران نەکەن، ھەتا رەوش تەنا دبیت”.
ئەڤرۆ نیۆز، قائید میرۆ:
حوکمەتا ھەرێما کوردستانێ دەزگەھێن ساخلەمی بەرھەڤکرینە بۆ قوربانیێن بوردۆمانا تورکیا و بەرپرسەکێ حوکمەتا ھەرێمێ ژی دبێژیت: “پێشبینی دکەین خەلکێ گوندان ئاوارە ببیت”.
کاروان گوندە ژۆری، رێڤەبەرێ ناحیا سیدەکان بۆ ئه‌ڤرۆ نيوز راگەھاند” ل ئێڤاریا دوھی وەرە وەلاتێ تورکیا ئۆپەڕاسیۆنەکا ھەوایی ل دژی چەکدارێ پارتا کرێکارێن کوردستانێ پەکەکێ دەستپێکریە و شەڤا بۆری دەڤەرێن سینوریێن سەر ب ناحیا سیدەکان ب گرانی ھاتینە تۆپبارانکرن “.
کاروانی گۆتژی: “ژ ئەگەرێ تۆپباران و بۆمبە بارانا تورکیا بۆ سەر دەڤەرێ چو زیان ب کۆچەر و رەڤەندێن ھەرێما کوردستانێ نەگەھشتیە و ھەرێما کوردستانێ دەزگەھێن ساخلەمی بەرھەڤکرینە بۆ ھەر ئەگەرەکێ نەچاڤەڕێکری و پێشبینی دکەین خەلکێ ڤان دەڤەران ئاوارەی سەنتەرێ ناحیا سیدەکان و قەزا سۆران ببیت، ژ بەر کو دێ ئۆپەڕاسیۆن درێژیێ کێشیت”.
ئەڤرۆنیوز, رەزوان رۆژبەیانی:
کومیسەر حازم محەمەد ژ راگەھاندنا ھاتنوچوونا قەزا بەردەرەش بۆ ئەڤرۆ نیوز خویا کر ئه‌ڤرۆ رۆژا شەمبی رێکەفتێ 25ى تيرمه‌ها 2015 ل دمژمێر 5:30ی سپێدی ل سەر رێیا گشتی یا د ناڤبەرا بەردەرەش و ناحیا رۆڤيا دا ل نزیک گوندێ نەزراوە دو ترومپێلێن ژ جۆرێ ئۆپل فیکترا لێکدا.
زێدەتر گۆت: “د ئەنجام دا شوفێرەکى جانێ خوە ژ دەست دا و پێنج کەسێن دی ژی ب دژواری بریندار بوون کو کەسێ جانێ خوە ژ دەست دايی پۆلیسە و خەلکێ بەردەرەشە و تەرمێ وی ھاتە رەوانە کرن بۆ نوشداريا داد ل ئاکرێ و بریندار ژی کوردێن شەبەکن و ھاتنە رەوانە کرن بۆ نەخوشخانا تەنگاڤیا ل ئاکرێ”.
کومیسەرێ ھاتنوچوونێ ئاماژە ب وێ چەندێ ژی کر کو ئەگەرێ روودانێ بۆ وێ چەندێ ڤەگەراند کو ترۆمپێلەکێ بزاڤ کریە بچیتە سایدێ بەرامبەردا، دا کو ھندەک ترۆمبێلان ب ھێلیت و ترۆمپێلا دی کەفتیە بەر سینگی وی و ڤێک کەفتینە و روودان دروست بوویە.
ئەڤرۆ نیۆز، قائید میرۆ:
شەڤا بۆری ل باژێڕێ ھەولێرێ ل سەر میراتی برایەکی، برایێ خوە کوشت و بەرەف جھەکێ نەدیار رەڤی.
موقەدەم کاروان خۆشناو، پەیڤدارێ پۆلیسێن ھەولێرێ بۆ ئەڤرۆ نیۆز راگەھاند” دەمژمێر ١٠ی شەڤا بۆری ل تاخێ راپەڕین یێ باژێڕێ ھەولێرێ وەلاتیەکی لسەر ئاریشەیا میراتێ برایەکێ خوە یێ ٣٠ ب چەکێ کلاشینکۆفێ کوشت و دەم و دەست گیانێ خوە ژ دەستدا.
موقەدەم کاروانی گۆتژی” پشتی گەھشتنا ھێزەکا پۆلیسان بۆ جھێ بۆیەرێ تۆمەتبار شیا خو دەربازبکەت و بەرەفە جھەکێ نەدیار رەڤی، بەلێ ڤەکۆلین د بەردەوامن ل دۆر چێبوونا بۆیەرێ.
ئه‌ڤرۆ نيوز:
دوهى ئێڤارى و هه‌تا دره‌نگى شه‌ڤ ب ره‌نگه‌كێ به‌رده‌وام فرۆكێن شه‌ركه‌رێن ده‌وله‌تا توركيا هه‌ر ئێك ژ چيايێ گاره و مه‌تينى ل سنورێ ده‌ڤه‌را ئامێديێ و به‌روارى بالا بۆردۆمانكرن و پاشان ژى ده‌ست ب بۆردۆمانكرنا بنارێ قه‌نديل كر.
د راگه‌هاندنه‌كێ دا، پارتا كرێكارێن كوردستانێ “په‌كه‌كه” به‌لاڤكر كو فرۆكێن سۆپايێ توركيا د رێيا فرۆكێن شه‌رى دا هه‌رێمێن پاراستنا مه‌ديا و بۆردۆمان كرينه و ئاشكه‌را ژى كريه كو ل ده‌مژمێر 22:55 ده‌قيقه يا شه‌ڤا بۆرى ده‌وله‌تا توركيا هه‌رێمێن پاراستنا مه‌ديا و زاپ و هه‌ڤتانين و ئاڤشين بۆردۆمان كرينه.
ئه‌ڤ بۆردۆمانكرنه د ده‌مه‌كى دا كو هه‌ردو پارتێن ئاكپارتى و هه‌ده‌په هه‌ڤدۆ ب پێگيرنه‌كرن ب قووناغا ئاشتيێ تۆمه‌تبار دكه‌ن و پشتى ته‌قينێن سيرچێ ژى دو له‌شكرێن ده‌وله‌تا تورك ل كوشتى هاتنه ديتن.
نيشاندان