ئه‌ڤرۆ نيوز:
كه‌مال كه‌ركووكى به‌رپرسێ ميحوه‌رێ رۆژئاڤا كه‌ركوكێ بۆ باسنيوز دياركر كو دوهى ل ده‌مێ شه‌ر و پێكدادانێن د ناڤبه‌را هێزێن پێشمه‌رگه‌ى و چه‌كدارێن داعش ل گوندێ (سه‌ید خلف)، ژ ئاليێ هێزێن پێشمه‌رگێ ل هه‌واهاتنێ ل سنورێ ميحوه‌رێ رۆژئاڤا كه‌ركوكێ و باژێروكێ دوبز، ئاميره‌كێ مه‌زن يێ گوله‌نه‌بر و بۆمبرێژكرى و به‌رهه‌ڤكرى بۆ په‌قاندنێ ده‌ست ب سه‌ردا هاته گرتن و پاشان ب هاريكاريا فرۆكێن هه‌ڤپه‌يمان هاته ژناڤبرن.
ئه‌ڤرۆ نیۆز، سالار دۆسكى:
په‌یڤدارێ لژنا ئێمناهیێ ل په‌رله‌مانێ عیراقێ ئاشكراكر كو چه‌ك بۆ عیراقێ دهێت، لێ به‌هرا پێشمه‌رگێ كوردستانێ به‌راورد ل گه‌ل سه‌نگ و قوربانى و هێزا پێشمه‌رگێ كوردستانێ گه‌له‌ك كێمه، بۆ نموونه ژ سه‌رجه‌مێ 250 هه‌مه‌ران بتنێ به‌غدا 20 هه‌مه‌ر راده‌ستى پێشمه‌رگێ كوردستانێ كرینه، دیسان چه‌كه‌كێ پێشكه‌فتى هاتیه و سه‌رجه‌مێ 20 هزار پارچان ئێك پارچه ژى بۆ كوردستانێ نه‌هاتیه ره‌وانه‌كرن.
شاخه‌وان عه‌بدۆللا، زێده‌تر بۆ مالپه‌رێ ئه‌ڤرۆ نیۆز گۆت: هه‌تا نوكه حوكمه‌تا عیراقێ پێگێرى ب دانا هه‌موو ئمتیازاتێن پێشمه‌رگێ كوردستانێ نه‌كریه، لدووڤ میزانیا 2015پێدڤى بو لدووڤ مادێ نه‌هێ برگا پێنجێ دڤێت پێدڤیێن پێشمه‌رگه‌ى وه‌زاره‌تا بازرگانى فرێكه‌ت و هه‌تا نوكه نه‌هنارتیه.
ئه‌ڤرو نیوز،بارزان مزوورى
به‌رپرسێ راگه‌هاندنا قایمقامیا قه‌زا به‌رده‌ره‌ش، صالح عیسا، بۆ ئه‌ڤرو نیوز دیار كر كو دهێته سپێده‌یا روژا ئێك شه‌مبى ده‌مژمێر 10 سپێدێ 3/15 د رێورسمه‌كێ دا، ب ئاماده‌بوونا قایمقامێ قه‌زا به‌رده‌ره‌ش، سردار یه‌حیا و مالباتا شه‌هید هوجام و خه‌لكێ ده‌ڤه‌رێ ، دێ په‌رده ل سه‌ر په‌یكه‌رێ شه‌هید هوجام هێته راكرن.
ناڤبرى دیار كر كو ئه‌ڤ په‌یكه‌ره به‌رامبه‌ر ئاڤاهیێ ناحیا روڤیا هاتیه دانان.
ئەڤرۆ نیۆز، ھۆشەنگ تاجر:
ل گۆر راپۆرتەکا رۆژناما یێنی شەفەق یا تورکیا پشتی کو باژارێ مووسل ژ ئالیێ رێکخراوا تیرۆرستی یا داعشێ ڤە ھاتە کۆنترۆل کرن و مەترسی ل سەر بەغدا و باژارێن دی یێن شیعان دروست بوویی بەرپرسێن ئیرانێ بلەز رێکخراوا خراسان ئاڤا کرن و د ناڤ ٩ مەھان دا ب ھزاران چەکدارێن شیعە گەھشتنە وێ رێکخراوێ و وەک داعشێ ب چەکێن گران ڤە ھاتیە ب ھێز کرن.
د دووماھیا راپۆرتێ دا ئاماژە ب ڤێ یەکێ ھاتیە کرن کو رێکخراوا خراسان ژی وەک داعشێ ھشکباوەرە و چەکدارێن وێ وەک داعشێ درندەنە و ل سووریێ و عیراقێ ھەتا نھا چەندین چالاکی ئەنجام داینە و بەری مەھەکێ ژی ناڤێ خوە گوھۆرینە و خوە وەک دەولەتا ئیسلامی ل ئیران و شامێ ددەنە نیاسین.
ئەڤرۆ نیۆز، ھۆشەنگ تاجر:
سەلاحەدین دەمیرتاش ھەڤسەرۆکێ ھەدەپێ دوھی د پرێس کۆنفرانسەکێ دا راگەھاند کو حوکمەتا تورکیا نەڤێت پرسا کوردی چارە بکەت و ھەکە رەوش وەسا بەردەوام بیت چو تشتەک چارە نابیت و پەکەکە ژی دەستان ژ چەکی بەرنادەت.
ل ھەمبەر داخۆیانیێن دەمیرتاشی یالچین ئاکدۆگان جێگرێ سەرۆک وەزیرێن تورکیا دیار کر کو دەمیرتاش ھەر ل دەستپێکێ ھەتا نھا نەڤێت ئاشتی ل تورکیا دروست بیت و ئەم چاڤەرێ دکەین کو ل نەورۆزێ پێنگاڤێن باش بۆ ئاشتیێ بھێنە ئاڤێتن و دڤێت چەک ب تەمامی بھێنە بێدەنگ کرن و گۆت: (ھەتا چەک بێدەنگ نەبن حوکمەتا مە ژی نەشێت چو پێنگاڤان بھاڤێژیت و ئەم چو دەستکاریێ د قانوونا ناڤخوەیی دا کو بەری نھا ل پەرلەمانی ھاتبوو پەسەند کرن ژی ناکەین).
ئه‌ڤرۆ نیۆز، قائید میرۆ
بڕیاره سبه رۆژا ئێك شه‌مبی ل باژێڕێ هه‌ولێرێ، ب هه‌لكه‌فتا كیمیا بارانكرنا باژێڕێ هه‌له‌بجه خۆپیشاندانه‌ك بۆ هه‌مبه‌ر باره‌گایێ قونسۆلخانه‌یا وه‌لاتێ ئه‌لمانیا بهێته ئه‌نجامدان.
سیروان گه‌ردی، ئێك ژ رێكخه‌رێن خۆنیشاندانێ ب ئه‌ڤرۆ نیۆز راگه‌هاند” بهه‌لكه‌فتا سالڤه‌گه‌ڕا كیمیا بارانكرنا هه‌له‌بجه كو تێدا پێنج هزار وه‌لاتیێن كورد بوونه قوربانی، سبه رۆژا ئێك شه‌مبی خۆنیشانده‌كێ بۆ هه‌مبه‌ر قونسۆلخانه‌یا وه‌لاتێ ئه‌لمانیا ل هه‌ولێرێ ئه‌نجام بده‌ین.
گه‌ردی دیاركر، مه‌ره‌م ژ خۆنیشاندانێ نه‌ڕازیبوونا خه‌لكێ كوردستانێ یه، هه‌مبه‌ر ئه‌ڤان چه‌كێن حوكمه‌تا وی سه‌رده‌میا ئه‌لمانیا داینه رژێما سه‌دام و ملله‌تێ كورد هاتیه كیمیا بارانكرن، هه‌روه‌سا یاداشته‌كا نه‌ڕازیبوونێ دێ ده‌ینه ڤی وه‌لاتی و دلگرانیا خه‌لكێ كوردستانێ دێ بۆ ئه‌لمانیا خویا بكه‌ین.
ئه‌ڤرۆ نیۆز، قائید میرۆ
هێزێن پۆلیسان چار كه‌س ب تۆمه‌تا سه‌خته‌كرنا دۆلارێ ئه‌مریكی ده‌سته‌سه‌ركرن په‌یڤدارێ پۆلیسان ژی ئاشكرا كر، ئه‌ف پارێ سه‌خته كه‌فتیه بازاڕێن هه‌ولێر و دهۆكێ و دبیت وه‌لاتی هشیاربن.
رائید كاروان عه‌بدولكه‌ریم، په‌یڤدارێ پۆلیسێن پارێزگه‌ها هه‌ولێرێ ب ئه‌ڤرۆ نیۆز راگه‌هاند” هێزێن پۆلیسان ب هه‌ڤكاری دگه‌ل ئاژانسا ئاسایشا هه‌رێما كوردستانێ شیان چوار كه‌سان ب تۆمه‌تا سه‌خته‌كرنا دۆلارێ ئه‌مریكی ده‌سته‌سه‌ربكه‌ن، ئه‌وژی پشتی كۆمكرنا زانیاریێن هویر ل دۆر ئه‌ڤێ باندا سه‌خته‌كرنێ.
كاروانی گۆت ژی” ئه‌ڤان چوار تۆمه‌تبارا ل وه‌لاته‌كێ جیران دۆلارێ ئه‌مریكی سه‌خته‌كریه و ئینایه ناڤا هه‌رێما كوردستانێ دا و كڕین و فرۆتن بڤی پارێ سه‌خته‌كریه و نوكه ئه‌ف پارێ سه‌خته لبازاڕێن هه‌ولێر و دهۆك و ئاكرێ و سۆران هه‌یه و داخوازێ ژ وه‌لاتیان دكه‌ین دده‌مێ دیتنا ئه‌ڤی پاره‌ی مامه‌لێ نه‌كه‌ن و نه‌هێلانا گونه‌هباریان ئاگه‌هداربكه‌ن.
ئه‌ڤرو نیوز،بارزان مزوورى
ژێده‌ره‌ك ژ رێكخراوا چه‌كدارێن ئازاد ل مووسل بو مالپه‌رێ ئه‌ڤرو نیوز دیار كر كو چه‌كدارێن تیرورستێن داعش 15 وه‌لاتیێن سڤیل ل گوره‌پانا نبی ونس ل ناڤ باژێرێ مووسل هنده‌ك ژ وان سه‌رژێكرن و هنده‌ك ژ وان سێداره‌دان و ل دووڤ دا ل پێش چاڤێن وه‌لاتیان ته‌رمێن وان نمایشكرن.
ژلایه‌كێ دى ڤه لایه‌نگرێن چه‌كدارێن تیرورستێن داعش ل په‌یچێ خو یێ تویته‌رى وێنه یێن هنده‌ك ژ وان كه‌سێن سێداره‌داین به‌لاڤكریه كو تێدا دیار كریه هنده‌ك ژ وان كه‌سان بناڤێ دوله ئیسلامیه كارێن خراب ئه‌نجام داینه به‌رامبه‌ر وه‌لاتیا و مال و حالێ وان ب زورى بریه و چه‌ك هه‌لگرتیه هنده‌ك ژ وان ژى رێنمایێن چه‌كدارێن تیرورستێن داعش بجه نه ئیناینه .
ئه‌ڤرۆ نیۆز: ڤه‌ده‌ر ره‌شاڤایی:
جڤاتا ئاساییشا هه‌رێما كوردستانێ د به‌ییاننامه‌كێ دا ئاشكرا دكه‌ت كو تیرۆرستێن داعش ماده‌كێ كیمیاوی كو گازا ژه‌هراوی یا كلۆرینه دهێرشێن خوه دا دژی هێزێن پێشمه‌رگه بكارئینایه.
ل 23 كانوونا دویێ یا 2015 ێ داعش دهێرشه‌كا خوه دا كلۆرین بكارئینابوو دژی پێشمه‌رگه‌ى، پێشمه‌رگه چه‌ند نموونه‌ك ژ ئاخا هێرش لسه‌ر چێبووی كۆم كربوون و دابوونه ده‌ستێ وه‌لاته‌كێ ئورۆپی یێ هه‌ڤپه‌یمانییا دژی داعش بۆ پشكنینێ، پشتی شرۆڤه و پشكنینان گازا كلۆرین تێدا دیاربوو كو دناڤ چه‌ك و ته‌قه‌مه‌نییان دا هاتبوو بكارئینان.
ئه‌ڤه ئێكه‌مین جاره بفه‌رمی و پشكنینڤه دهێته راگه‌هاندن كو داعش گازا كلۆرین بكاردئینیت، جڤاتا ئاساییشا هه‌ریما كوردستانێ ژی زێده‌باری ئیدانه‌كرنا ڤی كارێ داعش، خویاكر كو ئه‌ڤ یه‌كه وه‌سا دگه‌هینیت كو داعش پشتی شكه‌ستنێن خوه یێن به‌رده‌وام هه‌ر چ تشتێ ژ ده‌ستی هێت دێ كه‌ت.
نيشاندان