ئه‌ڤرۆ نيوز:

رێکخراوا چاڤدێریا مافێ مرۆڤی یا سووریێ راگەھاند کو رێکخراوا تیرۆرستی یا داعشێ گەف ل کوردان کربوون کو دڤێت د ناڤ سێ رۆژان دا ژ رەقا دەربکەڤن، چونکو ھەموو کورد ھاریکاریا ھێزێن ھەڤپەیمان و یەکینەیێن پاراستنا گەل دکەن و یێن نەچن دێ ھێنە کوشتن و ژ بەر ھندێ ژی د ناڤ سێ رۆژان دا چو کوردەک ل رەقا نەما و ھەموو ژ وی باژاری دەرکەڤتن.

رێکخراوا چاڤدێریا مافێ مرۆڤی یا سووریێ راگەھاند کو پشتی رەقا کەڤتە دەستێ داعشێ رەوشا کوردێن وی باژاری گەلەک خراب بوون، چونکو ھەرەدم داعشێ ئەو ب پشتەڤانێن ئەمریکا و یەکینەیێن پاراستنا گەل تاوانبار دکرن و پشتی کو گرێ سپی و چەندین دەڤەرێن دی ژ دەستێ داعشێ ھاتنە دەرخستن و مەترسی ل سەر رەقە دروست بوو تیرۆرستێن داعشێ بەری نھا سێ رۆژ دەلڤە دابووینە کوردێن وی باژاری کو دەربکەڤن و گەفا وێ یەکێ ژی ل وان ھاتبوو کرن کو یێن ژ رەقا نەچن دێ ھێنە کوشتن.

د بەردەوامیا راپۆرتێ دا ھاتیە دیار کرن کو د ڤان سێ رۆژێن دووماھیێ دا ب ھزاران مالباتێن کورد یێن ل رەقا نەچار مان کو برەڤن و گەلەک ژ وان بەرێ خوە داینە رۆژئاڤایێ کوردستانێ و ھندەکێن دیتر ژی نەچار ماینە کو بەر ب دەڤەرێن دی یێن سووریێ بچن، پشتی دەرکەڤتنا مالباتێن کورد ھەموو کەل و پەل و مالێ وان ھاتینە تالانکرن و عەرەبێن رەقا ل جھێ وان ھاتینە ئاکنجیکرن.
د پشکەکا دی یا راپۆرتێ دا ھاتیە دیار کرن کو دو رۆژێن چەکدارێن داعشێ ل رەقا مال ب مال دگەرن دا بزانن کا خێزانێن کورد ماینە یان نە. لێ چو کورەک ل رەقا نەمایە و ژ ترسا کوشتنێ رەڤینە و بەرێ خوە داینە دەڤەرێن دی یێن سووریێ دا گیانێ خوە قورتال بکەن.
د دووماھیا راپۆرتێ دا ھاتیە دیار کرن کو پشتی شکەستنا داعشێ ل گرێ سپی و کۆبانێ چەکدارێن داعشێ ل رەقا و گەلەک دەڤەرێن دی دەست ب گرتنا کوردان دکر و ئەو وەک پشتەڤانێ ئەمریکا بناڤ دکرن و دگۆتن کورد کافرن و جیھاد ل دژی کوردان ھاتبوو راگەھاندن و ژ بەر ھندێ ژی ل رەقا و عەین عیسا و گەلەک گوند و باژێرکان مەترسیەکا مەزن ل سەر ژیانا کوردان ھەبوو و رۆژ ب رۆژێ ژی خێزانێن کورد ژ ترسا داعشێ نەچار دمان ل ژێر دەستھەلاتا وان نەمینن و ھەری دووماھیێ ژی ل رەقا ژ بەر گەف و کوشتنێ ھەموو خێزانێن کورد رەڤین و نھا ل رەقا چو کوردەک نەمایە و ژ ترسا داعشێ رەڤینە.

ئه‌ڤرۆ نيوز:

سەرۆک کۆمارێ بەرێ یێ تورکیا سیاسەتا حوکمەتێ یا دەرڤە رەخنە کر و راگەھاند کو تورکیا ژ راستیا رۆژھەلاتا ناڤین و وەلاتێن عەرەبی دوور کەڤتیە و دۆستێن وێ کێم بووینە و دڤێت د زووترین دەم دا پەیوەندیێن ل گەل وەلاتێن ھەرێمی و گشتی ژ بەر چاڤ بھێنە دەربازکرن و سیاسەتەکا نوو بھێتە بجیھکرن.

عەبدوللا گول سەرۆک کۆمارێ بەرێ یێ تورکیا ل ئستەنبولێ پشتی خوارنا فتارێ ب ئامادەبوونا رەجەب تەیب ئەردۆگان سەرۆک کۆمارێ تورکیا و ئەندامێن پەرلەمانی و ئالیگرێن پارتا داد و گەشەپێدانێ ئاخڤتنەک بۆ بەرھەڤبوویان پێشکێش کر و راگەھاند کو تورکیا وەلاتەکی مەزن و کاریگەرە ل رۆژھەلاتا ناڤین، لێ د ڤان سالێن داوی دا کاریگەریا خوە نەمایە یانکۆ گەلەک لاواز بوویە و سەدەمێ وێ ژی سیاسەتا شاش یا دەرڤەیە و گۆت: (نھا نە ل مسر، سووریێ، عیراق، لیبیا و یەمەنێ و نە ژی ل ئوروپا ئاخڤتن و پێشنیاز و داخوازیێن مە ناھێنە قەبوولکرن و ژ ئەنجاما سیاسەتا کو ل دەرڤە ھاتیە مەشاندن سەنگێ وەلاتێ مە گەلەک لاواز بوویە و ئێدی دڤێت ب جدی سیاسەتا دەرڤە ل بەر چاڤ بھێتە دەرباز کرن و پێداچوونەک بھێتە کرن).
سەرۆک کۆمارێ بەرێ ھەروەسا دیار ژی کر کو مخابن نھا وەلاتێن ئیسلامی د ناڤ ئالۆزیێن مەزن دانە و خوە ب دەستێن خوە ژناڤ دبەن و زیانەکا مەزن دگەھیننە ئۆلا ئیسلامێ و گۆت: (بەرێ نھا د دروستبوونا ھەر ئالۆزی و روودانەکی دا تورکیا ھەڤکاریا وەلاتێن عەرەبی دکر و ئاخڤتنا مە دھاتە گۆھداریکرن و ئەم جھێ سەرنجا ھەموویان بووین و دەمێ مە بزاڤا چارەکرنا ئالۆزیان ددا ھەمو وەلاتان رێز ل مە دگرتن و کاریگەریەکا مە یا مەزن ھەبوو، لێ مخابن نھا ئەم نە جھێ سەرنجا وەلاتێن عەرەبی و رۆژھەلاتا ناڤینن و ل ئوروپا ژی کاریگەریا مە گەلەک لاوازە بۆ ڤێ چەندێ ژی دڤێت ئەم بلەز سیاسەتا دەرڤە ژ بەر چاڤان دەرباز بکەین و ل دووڤ راستیێن ھەرێمێ سیاسەتەکا نوو ئاڤا بکەین ھەکە).
عەبدوللا گول د پشکەکا دی یا ئاخڤتنا خوە دا ژی داخواز ژ ھەموو پارتێن سەرکەڤتیێن ھەلبژارتنێن پەرلەمانێ کر کو د زووترین دەم دا حوکمەتەکا ھەڤپەیمانی دروست بکەن و گۆت: (ھەم وەلاتێ مە ھەم ژی رۆژھەلاتا ناڤین د رەوشەکا گەلەک ھەستیار دا دەرباز دبیت و نابیت د رەوشەکا وەسا دا وەلات بێی حوکمەت بمینیت و ئەز ھیڤیدارم دێ ھەموو ئالیێن ل پەرلەمانی ل سەر پرسێن گرنگ ل ھەڤ بکەن و حوکمەتێ ئاڤا بکەن و بەرنامەکا نوو یا دارێتی بۆ سیاسەتا دەرڤە دروست بکەن ژ بەر کو ئەم چەند ژ راستیا ھەرێمێ دور کەڤین دێ تووشی زیانێن مەزن بین و گرانیا خوە یا ل رۆژھەلاتا ناڤین و جیھانێ ژ دەست بدەین).
ھەروەسا پشتی ئاخڤتنێن عەبدوللا گول، رەجەب تەیب ئەردۆگان سەرۆک کۆمارێ نھا یێ تورکیا ژی ئاخڤتنەک پێشکێش کر و راگەھاند کو تورکیا بێی حوکمەت نامینیت و پارتێن ل پەرلەمانی یان دێ حوکمەتەکا ھەڤپەیمانی ئاڤا بکەن یان ژی دێ ھەلبژارتنێن پێشوەخت بھێتە ئەنجامدان.
ل ئالیێ دی ھاتە زانین کو پارتا بزاڤا نەتەوەپەرەست MHP ب مەرجێن کو قۆناغا ئاشتیێ نەمینیت، چار وەزیر و ھەموو کەسێن کو گەندەلی کرینە بھێنە دادگەھکرن و دەستێوەردانێن سەرۆک کۆمار د حوکمەتا داھاتی دا نەمینیت، دێ رازی بیت پشکداری د حوکمەتا ھەڤپەیمانیێ دا بکەن. دیسان پارتا کۆماریا گەل CHP ژی راگەھاند کو ھەکە ئەو و AKP ل سەر پرسێن وەک گوھۆرینا سیاسەتا دەرڤە، چارەکرنا پرسگرێکا کوردی و نەھێلانا دەستێوەردانێن سەرۆک کۆماری بۆ ناڤ حوکمەتێ و دادگەھکرنا وەزیرن گەندەل و ھەڤکارێن وان، ل گەل AKP ل ھەڤ بکەن دێ ل گەل AKP د کابینا نوو دا جھێ خوە بگرن. ل ئالیێ دی ھاتە زانین داخوازیێن CHP ژ ئالیێ بەرپرسێن AKP ڤە ھاتنە رەت کرن.