ئەڤرۆ نیوز:
سەرۆکێ لیستا ئێکگرتووی ئیسلامی ل پەرلەمانێ کوردستانێ دیارکر کو گەلەک خالێن نێزیکبوونێ وگەھشتنا ئەنجامەکێ باش ل سەر سازانێ و پرسا سەرۆکاتیا ھەرێما کوردستانێ یێن ھەین و ھەموو لایەن درژن ل سەر ھندێ کو د زووترین دەم دا ئەڤ کێشە بھێتە چارەکرن .
ئەبوبکەر عومەر عەبدوللا سەرۆکێ لیستا ئێکگرتووی ئیسلامی کوردستان ل پەرلەمانێ کوردستانێ بۆ رۆژناما ئەڤرۆ دیارکر کو ئەو پێشوازیێ ل سەرەدانێن شاندێ پارتی دکەن و ئەڤە پێنگاڤەکا ئەرێنی یە، پێدڤی بوو پێشتر لایەنێن سیاسی دەست ب سەرەدانێن خوە کربان، دووپاتیێ ل سەر وێ چەندێ ژی دکەین کو پێدڤیە پرسا سەرۆکاتیا ھەرێما کوردستانێ ب سازان بھێتە چارەسەرکرن.”
ئەبوبەکری زێدەتر گوت”دڤێت سازان ھەبیت چونکی دەم کێم یێ مای و دڤێت ھەتا ١٩-٨ ئەڤ کێشە د ناڤبەرا پارتێن سیاسی دا نەمابیت و بەرۆڤاژی دێ ڤالاتیا قانوونی ل ھەرێما کوردستانێ دروست بیت، ئەڤە ژی گڤاشتنەکە ل سەر لایەنێن سیاسی کو د رژدبن ل سەر چارەسەرکرنا کێشان و لەزێ بکەن کو بگەھنە رێککەفتنەکی”.
سەرۆکێ لیستا ئێکگرتووی ئیسلامی ل پەرلەمانێ کوردستانێ ئەو چەندە ژی گۆت” ھەتا نوکە وەک ئێکگرتوو، مە بوچوونا خوە دیار نەکریە ل دۆر وێ چەندێ کو سەرۆکێ ھەرێمێ (مەسعود بارزانی) نەمینیتە پوستێ خوە دا، پێشنیارەک ب ڤی رەنگ یا کەفتیە بەر دەستێ ھەمو لایەنێن سیاسی و ھەموو پارتێن سیاسی یێ ڤەکۆلینان ل سەر ڤی بابەتی دکەن، ھێشتا وەک ئێکگرتوو مە بەرسڤا وێ پشنیارێ نەدایە، پارتی یا پشنیارکری کو ھەتا خولا چارێ یا پەرلەمانی ب دووماھی بھێت، بارزانی د پوستێ خوە دا بمینیت”.
ناڤبری گۆت ژی”خالا ھەڤپشک یا ھەموو پارتێن سیاسی دڤێت سازان بیت و ئەڤە چارە رێکە بۆ نێزیکبوونێ، دیسا خالا دویێ کو مە ھەموو پارتان نێزیکی ئێک دکەت ئەوە کاودانێن ھەرێما کوردستانێ تێدا دبوریت گەلەک د نازکن، دیسان خالا ھەڤپشک ئەوە کو ھەرێما کوردستانێ ببیتە خودان دستوورەک و ئەڤە خالێن ھەڤپشکن مە کوم دکەت، دیسا ل شەرێ دژی داعشێ ل گەل ئێکن، ل بەغدا ژی ئێک ھەلویستن، ھەتا ل ھەمبەر سەربخوەیا ئابووری یا ھەرێما کوردستانێ ژی ھەموو لایەنێن سیاسی ئێک بۆچوون یا ھەی، گەلەک پرسێن دی یێن ھەین کو تێدا ھەموو ئێک ھەلویستن”.
ئەبو بەکری ئەوچەندە ژی گۆت”ھەتا نوکە چو لایەنان سازان نە رەدکریە و ھەموو پشتەڤانێن نێزیکبوونێ نە و رژدیێ ل سەر ڤێ چەندێ دکەن و تشتێ مەزنتر دێ ئەو بیت کومبوونا پێنچ حزبان بھێتەکرن و ئەم ب ھیڤی نە کو د نێزیکترین دەم دا ئەڤ پرسە بھێتە چارەسەرکرن”.

ئەڤرۆ:

سوران عمر ئەندامێ پەرلەمانێ کوردستانێ ژ فراکسیۆنا کۆمەلا ئیسلامی د چاڤپێکەفتنەکا خوە دا بۆ کەنالەکێ راگەھاندنێ و ھەروەسان د پەیجێ خوە یێ تایبەت دا ل سەر تۆرا جڤاکی یا فیسبووکی، ھوشداریێ ددەت ئەندام و لایەنگرێن چار حزبێن کوردستانی کو ژلایێ دەزگەھێ پاراستنێ ڤە پلانەکا دژی وان بۆ رەڤاندن و گرتنێ ھاتیە رێکخستن.

ئامینە زکری جێگرا سەرۆکێ فراکسیۆنا پارتی دیموکراتی کوردستان ل پەرلەمانێ کوردستانێ بەرسڤا ڤی پەرلەمانتارێ کۆمەلا ئیسلامی ددەت و ڤان داخۆیانیێن ب بێ بنەما د ھەژمێریت.
ئامینا زکری د پەیچێ خوە یێ تایبەت ل سەر تۆرا جڤاکی یا فیسبووکی دبێژیت” ھەرچەند گومان تێدا نینە کو چو بنەما بۆ ڤان ئاخڤتنان نینە و ئەڤ نە جارا ئێکێ یە ئەڤ بابەتە ژلایێ وان ڤە دھێتە ئازراندن و ھەموو خەلکێ کوردستانێ یێ ھوشیارە و ژبیر نەکریە بەری چەند رۆژان ل پەرلەمانێ کوردستانێ ھەمان سیناریۆ بەلاڤکرن کو ھێرش و کوشتن ل سەر پەرلەمانی و پەرلەمانتەرانە ھەیە، لێ چەند دەمژمێرەک دەرباز نەبوون بۆ خەلکێ کوردستانێ دەرکەفت کو تەنھا پرۆپاگندەیەکا سیاسی و راگەھاندنێ یا بێ بنەمایە “.
ئامینا د بەرسڤا سوران عومەری دا زێدەتر دبێژیت”ل بن سیبەرا کارمەند و رێڤەبەر و خوینا شەھیدێن دەزگەھێن ئەمنی، ئەڤرۆ ب دیموکراسیانە خەلکێ کوردستانێ ژیانا ئاسایی یا خوە دەرباز دکەن و ھەموو پارتێن سیاسی ب ئازادانە کارێ سیاسی و دەربرینا بیر و بوچوونێن خوە دکەن، دەزگەھێن ئەمنی ب قانوونێن ھژمار ( ٤ و ٥ ) یێن سالا ٢٠١١ ل بن ناڤێ جڤاتا ئاژانسا پاراستن و زانیاری و قانوونا دەزگەھێ ئاسایشێ ھاتینە رێکخستن و دەزگەھێن نشتیمانی نە”.
خویا دکەت ژی”ب ھەموو پشتراستی ڤە دشێم بێژم، بێ جوداھی ئەڤ دەزگەھێن ئەمنی یێن حوکمەتێ گیانێ وەلاتیان د پارێزن و ب یەکسانی و دادپەروەری ئێمناھیێ بۆ خەلکێ کوردستانێ دابین دکەن و وەلاتیان ژ ھەرەشەیێن تێرۆریستان د پارێزێن”.
جێگرا سەرۆکێ فراکسیۆنا پارتی ل پەرلەمانێ کوردستانێ، ڤی پەرلەمانتارێ کۆمەلا ئیسلامی ئاماژێ ب وێ چەندێ دکەت کو پێدڤیە پێرابوونێن قانوونی ل بەرامبەر وی پەرلەمانتارێ کۆمەلا ئیسلامی بھێنە وەرگرتن ل دووڤ قانوونا سیخوری کرن ل سەر دەزگەھێن ئەمنی و دبێژیت” ل گور ئاخڤتنێن سوران عومەری، وی پێزانین ل سەر ئاستەکێ بلند و نەدیار بۆ رایا گشتی وەرگرتینە، ل دۆر قانوونا سیخوری کرنێ ل سەر دەزگەھێن ئەمنی ئەڤە تاوانە و پێدڤیە پێرابوونێن قانوونی بەرامبەر وی کەسێ سیخوریێ دکەت بھێنە وەرگرتن و ئاخڤتنێن سوران عومەری ژی د چارچۆڤێ سیخوریکرن ل سەر دەزگەھێن ئەمنی دایە”.

ئامینە زکری دیاردکەت کو د پشکەکا دی یا ئاخڤتنێن خوە دا، سوران عومەر ئاماژە ددەتە ھندێ کو رۆژانە مروڤ دھێنە رەڤاندن و مافێ مروڤی ل ھەڤلێرێ پێشێل دبیت، و دبێژیتە سوران عومەری” تو نابینی ل ھەرێمێ وی دەمی مافێ مروڤی و دیموکراسی کەفتە بن پرسیارێ، دەمێ جەنابێ تە بەرپرسیارەتیا لێژنا مافێ مروڤێ ل پەرلەمانێ کوردستانێ وەرگرتی؟! کو ئەڤە ژی بۆ جھێ نەرازیبوونا ب دەھان رێکخراوێن جڤاکێ مەدەنی و ژنان”.
ب دیتنا ڤێ پەرلەمانتار پارتی” ئەڤ جورە داخویانیە دژی دەزگەھێن ئەمنی ترس و دو دلیێ دروست دکەن و ئاشتیا جڤاکی تێک ددەن، پێدڤیە ئەم وەک پەرلەمانتەر ب بەرپرسیارەتر رەفتارێ ل گەل داخویانیێن رۆژنامەڤانی بکەین، دا خەلک ب ئاسودەیی بژیت.”