ئه‌ڤرۆ نيوز:

نەهـ سال ل سەر ھەبوونا کرێکارێن پاقژکرنێ یێن بەنگلادشی ل کوردستانێ بۆرین، د دووڤچونەکا رۆژنامەڤانی دا، زانیاریێن ھوور ل سەر ژیانا وان دھێنە دیارکرن. مێھڤان ئەحمەد یاسین بەرپرسێ دووڤچوونا کارێ کومپانیا ئەرتووشی ل پارێزگەھا دھۆکێ دیار کر، ل سالا ٢٠٠٧ گرێبەست ل گەل باژێرڤانیا دھۆکێ گرێدایە بۆ ئینانا کرێکارێن بیانی و پاقژکرنا ناڤ باژێری و ھەتا نوکە بەردەوام و ل گەل ھاتنا ئاواران بۆ دھۆکێ رۆژانە ھەتا ٩٠٠ تەنێن گلێشی ژ پارێزگەھێ بۆ کارگەھا کواشێ دھێنە ڤەگۆھاستن.

مێھڤان ئەحمەد یاسین بەرپرسێ دووڤچوونا کارێ کومپانیا ئەرتووشی ل پارێزگەھا دھۆکێ بۆ رۆژناما ئەڤرۆ گۆت: ل سالا ٢٠٠٧ مە گرێبەست ل گەل زانکۆیا دھۆکێ گرێدایە بۆ پاقژکرنێ و ل ھەمان سال مە گرێبەست ل گەل ٤٣٠ کرێکارێن بەنگلادشی گرێ دا، دوڤچوونەکا باش ل سەر ھاتەکرن، مە کرێکار ھەبووینە دەرچوویێن کولیژا پزیشکی و ھەنە گەلەک زمانان دزانن و کەسانێن شارەزا د ناڤ دا ھەنە.
مێھڤان ئەحمەد یاسین بەرپرسێ دووڤچوونا کارێ کۆمپانیا ئەرتووش ل دھۆکێ گۆت ژی: مە کرێکار ژ سێ وەلاتان ھەبووینە (بەنگلادش، نیپال، ھندی)، پتر پشت بەستنا مە ل سەر کرێکارێن (نیپالی و بەنگلادشی) یە، چونکە پتر کاران دزانن و دیسان ھەولێرێ و زاخۆ مە ھەژمارەکا باش یا کرێکارێن ھندی ھەنە، ناڤبری گۆت: ل ھەولێرێ و زاخۆ و سێمێلێ و دەردوران و ل دھۆکێ ھەتا ١٤٥٠ کرێکاران ھەنە و ھەیڤانە مۆچێ وان دەمێ خوە دا دھێتە دان و ئەڤە دا کار نەھێتە راوستاندن، کرێکار ژ ٣٠٠ دۆلاران ھەتا ٦٠٠ دۆلاران ھەیڤێ وەردگریت و ھەنە دەمژمێرێن زێدە کار دکەن، ھەر شەفتەک ھەشت دەمژمێر و ل دووڤ قانوونا جیھانی کار دکەن و یێ زێدەتر کار بکەت
پارێ زێدە بۆ دھێتە ھەژمارتن و ھەر سێ دەمژمێران و ھەر سێ سالان جارەکێ ھەر کرێکارەکێ ئازادە گرێبەستا خوە نوو بکەت و یێ نەڤێت دشێت نوو نەکەتە ڤە، کرێکار ھەنە ئەڤە نەە سالە نەچووینە مالێن خوە و نوکە دەستووردان بۆ ھاتینە ڤەکرن و ھەتا ٩٠ رۆژان وەربگریت و ھەموو پێدڤیێن چوونێ بۆ دھێنە دابینکرن و ھەتا ٢٦٠ کرێکاران دەستووردان وەرگرتینە و چووینە مالێن خوە و زڤرینە و ئەڤە ل سەر کیستێ کۆمپانیێ یە .
ناڤبری گۆت: مە کرێکار ھەنە خێزانێن وان ژی ل گەلن، لێ ھندەک جھێن دی وەک مالان کار دکەن، ھەتا نوکە چو روودان ل گەل سازیێن ئەمنی ل پارێزگەھێن ھەولێر و دھۆکێ چێ نەبوویە و کار گەلەک ب باشی دھێتە برێڤەبرن و رۆژ بۆ رۆژێ باشترە و ب تنێ چەند روودانێن ترافیکی بوومە پەیدا بووینە سێ کرێکاران گیانێ خوە ژ دەست دایە و ھەتا نوکە مووچێ وان بۆ خێزانێن وان دھێتە ھنارتن.
مێھڤان ئەحمەد یاسین بەرپرسێ دووڤچوونا کارێ کومپانیا ئەرتووشی ل پارێزگەھا دھۆکێ گۆت: پێشتر مە ھەتا ٤٥٠ تەنێن گلێشی ژ پارێزگەھا دھۆکێ دھاڤێت، پشتی ھاتنا ئاواران و باژێر بەرفرەە بوویی ب گشتی ل پارێزگەھێ رۆژانە ھەتا ٩٠٠ تەنێن گلێشی دھێتە رەوانەکرن بۆ کارگەھا کواشێ.
مێھڤان ئەحمەد یاسین گۆت: ل گەل گرێبەستا سالا ٢٠١٤ مە گەلەک ترۆمبێلێن خوە گوھورینە و ترۆمبێلێن نوو مە ژ وەلاتێ ئیناینە، دیسان مە مەکینا بەفرێ ئینایە و چەند بەفرەکا بەرفرەە بێت ئەو مەکینە دشێت ب زووترین دەم راکەت ل دھۆکێ و زاخۆ ھاتینە و دیسان گەلەک ترۆمبێل باش مە ئیناینە بۆ ڤەگوھاستنا گلێشی و ھەر ئێک ٧٠ تەنان رادکەت.
بەرپرسێ دووڤچوونا کارێ کومپانیا ئەرتووشی گۆتژی: ھەموو ھەلکەفتان عەلاگێن گلێشی ل سەر گەشتیاران دھێنە دابەشکرن و دیسان فەرمانگەھێن میری و قوتابخانە و سازیێن پەروەردێ و دیسان مالێن ترۆمبێلێن مە نەگەھنێ وەک تاخێن گژە بەران و دیسان مزگەڤتان ژی رۆژانە ل سەر دھێنە بەلاڤەکرن، دیسان سالانە حاویێن سەر جادا دھێتە گوھۆرین، دیسا حاوی ل تاخێن گژە بەران ھاتینە بەلاڤەکرن کو خەلک بگەھینێ و ترۆمبێلێن مە بگەھیتێ، شووقێن باژێری رۆژانە گلێش دھێتە راکرن و تاخا ھەکە رۆژانە ترۆمبێل نە گەھیتێ ھەر رۆژەکێ نە ئێکێ ترۆمبێل دگەھیتێ و گلێشی را دکەت.
ناڤبری خواست خەلکێ ھاریکار بیت ل گەل کرێکاران کو پتر باژێرێ دھۆکێ بھێتە پاقژکرن و دھۆک ب پاژیێ یێ ناڤدارە.
سەبارەت پەیوەندیێن جڤاکی ژی ناڤبری گۆت: ھەتا نوکە چو پەیوەندیێن جڤاکی ل گەل خەلکێ دھۆکێ و کرێکارێن بەنگلادشی دا چێ نەبووینە، ب تنێ پێکئینانا خێزانێ چێ بوویە کو کرێکاری ل ڤێرێ دەواتا خوە کریە و بووک ل بەنگلادش و ب ئەنترنێتێ ل گەل ئێک دو ئاخفتینە و ئەڤە ب پەیوەندیان ئێک دو دیتی یە و ب تنێ ھەڤالینی ل گەل خەلکێ دھۆکێ چێ بوویە و خێزان ھەنە کرێکارێن مە سەردانێ بۆ دکەن و دھێتە ھژمارتن ژ ئەندامێن خێزانێ.

ئەڤرۆ نيوز:
ئەندامەکێ لژنا پیشەسازی و سامانێن سروشتی ل پەرلەمانێ کوردستانێ دیار کر، وەزیرێ سامانێن سرۆشتی ل حوکمەتا ھەرێما کوردستانێ ئاشکرا کریە، حوکمەتێ بۆ فرۆتنا پەترۆلا خوە گرێبەست د گەل کۆمپانیەکێ ئیمزاکریە و و بڕیارە د دەمەکێ نێزیک دا ھندەک پارێ وێ بگەھیتە ھەرێمێ و بۆ مووچێ فەرمانبەران یێ ھەیڤا گۆلانێ بھێتە مەزاختن بڕیاردەرا لژنا دارایی ژی ل پەرلەمانێ کوردستانێ دبێژیت: “حەفتیا بھێت دێ مووچێ ھەیڤا گۆلانێ ھێتە بەلاڤکرن”.
بەیار تاھر دۆسکی، ئەندامێ لژنا پیشەسازی و سامانێن سروشتی ل پەرلەمانێ کوردستانێ خویا کر، حوکمەتا ھەرێما کوردستانێ بۆ دابینکرنا مووچێ فەرمانبەران چەند رێ گرتینەبەر و گۆت: “ئاشتی ھەورامی، وەزیرێ سامانێن سروشتی دیار کریەگرێبەستەک د گەل کۆمپانیەکێ ئیمزاکریە بۆ فرۆتنا پەترۆلا خوە، ل ڤان نێزیکان ژی بڕەک ژ وی پارەی دێ بۆ ھەرێما کوردستانێ ھێتە ھنارتن و پاشی ئەو پارە دێ بۆ وەزارەتا دارایی ھێتە دان، دا کو مووچێ ھەڤیا گۆلانێ ل سەر فەرمانبەران بەلاڤ بکەت”.
ژ لایەکێ دیڤە ھیڤا حاجی میرخان، بڕیاردەرا لژنا دارایی ل پەرلەمانێ کوردستانێ بۆ مالپەرێ فەرمیێ پارتی راگەھاند، ھەتا رۆژا پێنجشەمبیا بھێت، دێ دووماھی ب بەلاڤکرنا مووچێ ھەڤیا نیسانێ ھێت و راستەوخوە پشتی وی دێ دەست ب بەلاڤکرنا مووچێ ھەیڤا گۆلانێ ھێتە کرن”.
خویا ژی کر، وەزارەتا دارایی ژی بەرھەڤی بۆ ڤێ مەرەمێ کرینە و گۆت: “دەستپێکا حەفتیا بھێت دێ دەست ب بەلاڤکرنا مووچێ ھەیڤا گۆلانێ ھێتە کرن و ل دەستپێکێ ژی وەزارەتا پێشمەرگەی دێ مووچەی وەرگریت”.