ئه‌ڤرۆ نيوز:

سه‌رۆكێ سودانێ عومه‌ر حه‌سه‌ن ئه‌لبه‌شير، راگه‌هاند كو ئه‌و يێ به‌رهه‌ڤه‌ سالا 2020 ده‌ستا ژ ده‌ستهه‌لاتێ به‌رده‌ت، به‌لێ ب مه‌رجه‌كێ جاره‌كادى وى د هه‌لبژارتنێن سه‌رۆكايه‌تيێ يا بهێت دا كو دێ ل هه‌يڤا 4 هێنه‌ كرن، بهه‌لبژێرنه‌ڤه‌.

به‌شيرێ 71 سالى بۆ رۆژناما لوموند يا فره‌نسى ئاماژه‌ ب وێ يه‌كێ دايه‌ كو ئه‌و يێ به‌رهه‌ڤه‌ ژ ده‌ستهه‌لاتێ دووركه‌ڤيت، به‌لێ حزبا وى دێ وى هه‌لبژێرن بۆ هه‌لبژارتنێن بهێت و دبێژيت: ئه‌ڤه‌ دووماهى جاره‌ ئه‌ز خوه‌ به‌ربژێر دكه‌م، ئه‌گه‌ر ئه‌ز هاتمه‌ هه‌لبژارتن، دێ سلا 2020 ده‌ستهه‌لاتێ بجه هێلم.

به‌شير پشتى كوده‌تايا سالا 1989 ى، هاتيه‌ سه‌ر حوكمى، ئانكو ئه‌ڤه‌ 26 ساله‌ سه‌رۆكێ سودانێ يه‌، و دادگه‌ها تاوانان يا لاهاى، به‌شير ب وێ يه‌كێ گونه‌هبار كريه‌ كو كريارێن دژى مروڤايه‌تيێ ئه‌نجامداينه‌.

ئه‌ڤرۆ نيوز:

 ناسناما چه‌كدارێ رێكخستیا داعش كو ب ماسك ڤه‌ د ڤیدیۆیا سه‌ربرینا بارمتێن رۆژئاڤایی دده‌ستێن داعش دا ده‌ركه‌ڤتبوو هاته‌ ئاشكرا كرن.

ئه‌ڤ كه‌سه‌ ب جۆن جیهادی دهێته‌ نیاسین و سه‌ربرێ سه‌ره‌كیێ بارمتێن داعشه‌، ناسناما وی یا دروستی ئاشكرابوو كو ئه‌و ژی موحه‌مه‌د ئه‌موازی یه‌ ب ره‌گه‌ز كوێتی یه‌ و ژ دایكبوویێ بريتانیا یه‌ ژ رۆژئاڤا له‌نده‌ن. بۆ ئێكه‌م جار جۆن د ڤیدیویا سه‌ربرینا رۆژنامه‌ڤانێ ئه‌مریكی جه‌یمس فۆلی دا ده‌ركه‌ڤتبو و ماسكه‌كی سه‌رۆچاڤێن خوه‌ گرتبوون ل ته‌باخا سالا 2014 ێ و لدووڤدا ل چه‌ندین ڤیدیۆیین دی یێن سه‌ربرینێن كه‌سێن ئه‌مریكی و ئه‌ورۆپی دا ده‌ركه‌ڤتبۆ و گه‌ف ل ئه‌مریكا و ئه‌ورۆپا دكرن .

ناڤبری بۆ داوی جار د ڤیدیۆیا سه‌ربرینا رۆژنامه‌ڤانی ژاپۆنی دا ده‌ركه‌ڤتبوو ، لدووڤ راپۆرته‌كا بی بی سی ناڤی وی به‌ری ده‌مه‌كی یه‌ هاتیه‌ زانین لێ ژبه‌ر ئه‌گه‌رێن هه‌والگیری ناڤێ وی نه‌هاتبوو ئاشكراكرن.