ئەڤرۆ نیوز:
رێڤەبەرێ قوتابخانێن ئەھلی ل وەزارەتا پەروەردا حوکمەتا ھەرێما کوردستانێ راگەھاند، ھەتا نوکە پتر ژ ٣٠٠ داینگەە و باخچێن زارۆیان و قوتابخانە و پەیمانگەھێن ئەھلی ل ھەرێما کوردستانێ مۆلەتا کارکرنێ وەرگرتیە و سالانە کارێ خوە دکەن و قوتابیان وەردرگرن، بەلێ ژ ئەگەرێ نە جێبەجێکرنا رێنمایێن وەزارەتا پەروەردێ، ھەتا نوکە ھەشت ژ وان ھاتینە سزادان و داخستن و گۆت: مە دو جۆرێن سزایان ھەنە، سزایێ دارایی کو ھەر قوتابخانەکێ بھێتە سزادان، جارا ئێکێ ب کۆژمێ ١٠ ملیۆن دیناران دەستپێ دکەت و ھەتا ١٥٠ ملیۆن دیناران و سزایێ دویێ ژی داخستنا قوتابخانێ یە ھەتا کو کێماسیێن خوە چارەسەردکەن
ماموستایەکا پارێزگەھا دھۆکێ کە نەڤیا ناڤێ خوە دیاربکەت بۆ ئەڤرۆ خویاکر، ئەو دەرچوویا ئامادەیا بازرگانی بوویە، بەلێ بەری دو سالان قوتابخانەکا ئەھلی ژ وێ خواست بوو ل دەڤ وان بیتە ماموستا، دا کو وانا ئنگلیزیێ بۆ قوتابیێن باخچەی بێژیت، وێ بۆ ماوێ دو سالان دەوام ل باخچێ ئەھلی یێ زارۆیان ل قوتابخانەکا مەزن یا دھۆکێ دکر، سەرەرای ھندێ وێ چو ژ ئنگلیزیێ نە دزانی و گۆت: وەکو من دیتی پتریا ماموستایێن وێ قوتابخانا ئەھلی کو خوە ب پرۆفیشنال دزانیت، د پرۆفیشنال نەبوون.
وێ ماموستایێ ئاشکرا کر کو ھەموو کەس ھزر دکەن دەمێ قوتابخانەکا ئەھلی ڤەدبیت، ھەموو خواندن ب زمانێ ئنگلیزیە و ماموستایێن وێ ھەموو ژ دەرڤە دھێن و د پرۆفیشنالن، بەلێ پشتی من دەوام ل قوتابخانەکا مەزن یا ئەھلی کری، من ھوسا نەدیت و ھوسا ئاشکرا دبوو کو ماموستایێن وان د نۆرمالن و پتریا وان خەلکێ دھۆکێ بوون و گەلەک ژ وان ژی ب چو رەنگەکی زمانێ ئەنگلیزی نەدزانین، ب تنێ پت لێکدان و ژ نوو خوە فێر دکرن.
دانا محەمەد، رێڤەبەرێ قوتابخانێن ئەھلی ل وەزارەتا پەروەردا حوکمەتا ھەرێما کوردستانێ بۆ ئەڤرۆ دیار کر، زێدەباری ھەبوونا پتر ژ ٣٠٠ داینگەە و باخچێن زارۆیان و قوتابخانە و پەیمانگەھێن ئەھلی ل ھەرێما کوردستانێ، نھا رێژەکا دی یا مەزن یا کەساتیان خواستیە باخچە و قوتابخانە و پەیمانگەھێن ئەھلی و تایبەت ل ھەرێما کوردستانێ ڤەکەن و گۆت ژی: ژ ئەگەرێ نەکرنا کۆنگرێ پەروەردێ، بریارا دانا مۆلەتان بۆ دەمەکی ھاتبوو راگرتن، بەلێ نھا دووبارە رێ ھاتیە ڤەکرن بۆ ھندێ مۆلەتا ڤەکرنا دەزگەھێن پەروەردێ یێن ئەھلی بھێنە ڤەکرن.
ناڤبری دیار کر، ھەتا بەری کۆنگرێ پەروەردێ، ٣٠ قوتابخانێن ئامادەیی، ٥٠ پەیمانگەە، ٧٠ قوتابخانێن بنەرەتی و ١٥٠ داینگەە و باخچێن زارۆیان ل ھەرێما کوردستانێ د تۆمارکری بوون و سالانە ل گۆرەی رێنمایێن وەزارەتا پەروەردێ کارێ خوە دکرن و گۆت ژی: ژ ڤی سەرجەمی نێزیکی ٣٠ قوتابخانان د نێڤدەولەتی نە.
رێڤەبەرێ قوتابخانێن ئەھلی ئاماژە ب وێ یەکێ کر، پتریا قوتابخانێن نێڤدەولەتی سیستەمێ بیانی بکاردئینن و ھندەک ژی ھەنە سیستەمێ ناڤخوە یێ کوردستانێ بکاردئینن و گۆت: ئێک ژ مەرجێن سەرەکی یێن ڤەکرنا دەزگەھێن پەروەردێ یێن ئەھلی ئەوە کو ئاڤاھیەکێ باش ھەبیت، بۆ نموونە بۆ باخچە و داینگەھێن ئەھلی نابیا ئەردێ ئاڤاھیێ وێ ژ ٤٠٠ مەتران کێمتر بیت، بۆ قوتابخانێن ئامادەیی نابیت ژ ١٠٠٠ مەتران کێمتر بیت، بۆ پەیمانگەھێن وەرزشی نابیت ژ شەش ھزار و ٢٥٠ مەتران کێمتر بیت.
دانا ل دور مەرجێ بۆھایێن قوتابخانە و پەیمانگەھێن ئەھلی دیار کر کو وەزارەتا پەروەردێ ئەو مەرجە ژی دانایە بەر دەزگەھێن پەروەردێ یێن ئەھلی و گۆت: بۆ پەیمانگەھێن کۆمپیوتەری ملیونەک و ٨٠٠ ھزار دینار ھاتینە دەستنیشانکرن، بۆ پەیمانگەھێن وەرزشی دو ملیون و ٢٠٠ ھزار دینار، پەیمانگەھا نەفتێ دو ملیون و ٥٠٠ ھزار دینار سالانە، باخچە و داینگەھان ھەیڤانە ١٥٠ ھزار دینار و بۆ قوتابخانان ژی ل گۆرەی کوالێتی و سیستەمێ قوتابخانێ دمینیت.
دانا محەمەد، رێڤەبەرێ قوتابخانێن ئەھلی ل وەزارەتا پەروەردا حوکمەتا ھەرێما کوردستانێ دا زانین ژی، ئەگەرێ سەرەکی یێ داخستنا ھندەک قوتابخانێن ئەھلی ئەو بوویە کو ھندەک قوتابخانان ماموستا و کارمەندێن پرۆفیشنال بکارنەئیناینە، ھەروەسا ھندەک قوتابخانە و پەیمانگەھان پشتی وەرگرتنا مۆلەتا کارکرنێ نەشیاینە ل گۆرەی وێ کوالێتیا ھاتینە دەستنیشانکرن ل سەر وێ کوالێتیێ د بەردەوام بن و گۆت: مە دو جۆرێن سزایان ھەنە، سزایێ دارایی کو ھەر قوتابخانەکێ بھێتە سزادان، جارا ئێکێ ب کۆژمێ ١٠ ملیۆن دیناران دەستپێ دکەت و ھەتا ١٥٠ ملیۆن دیناران و سزایێ دویێ ژی داخستنا قوتابخانێ یە ھەتا کو کێماسیێن خوە چارەسەردکەن.