ئەڤرۆ نيوز:
ئەندامێ سەرکردایەتی یا پارتی دیموکراتی کوردستان دلشاد شەھاب راگەھاند، وەکو پەیرەوکرنەکا سیاسی دیموکراتی، ئاساییە پارتی بایکۆتکرنا پەرلەمانی بکەت، ھەروەسا دوپاتکر، ئەوا ل پەرلەمانی ھاتیە روودان، دەستپێکا سەرەدەریەکا نەیا دروستە ل گەل پرس و کێشێن نشتیمانی و دروستکرنا ڤێ ھاش و ھوشێ ل پەرلەمانێ کوردستانێ ، ئەڤە ژی شاشیەکا دیا سەرۆکێ پەرلەمانی بوو.
دلشدا شەھاب ئەندامێ سەرکردایەتیا پارتی دیموکراتی کوردستان و وەزیرێ بەرێ یێ حوکمەتا ھەرێما کوردستانێ راگەھاند، پاشەرۆژا کوردستانێ ب ڤێ شێوەی ب رێڤەناچیت، و سەرەدەری ل گەل ناھێتە کرن، ئەوا ل پەراەمانی ھاتیە روودان ، دەسپێکەکا نەیا دروستا ل گەل پرسێن نشتیمانی بوو.
دلشاد شەھاب ھەروەسا گۆت: بایکوتکرنا پارتی ل پەلەمانی پێنگاڤەک بوو دڤێت ھاتبا ھاڤێتن، نەرازیبوونا پارتی ژی ل سەر ناڤەرۆک و ھوربینیێن پرۆژەی نەبووینە، بەلکو ل گەل چەوانیا سەرەدەریا ل گەل پرسا ھەستیار وەکو دامەزراوەکا سدستوری یا سەرۆکاتیا ھەرێما کوردستانێ بوویە.
ئەندامێ سەرکرداتیەکا پارتی بەحسێ رێژا قانوونیا روونشتنا پەرلەمانێ کوردستانێ کر و گۆت: سیستەمی حوکمڕانیێ ب ڤی شێوەی ناھێتە گوھۆڕین، ھەکە ھژمارا نیسابێ قانوونی ب ٥٦ پەرلەمانتاران تەمام ببیت، وی دەمی ب رووری قانوونی ڤە ٢٩ پەرلەمانتار دشێن سیستەمێ حوکمڕانیێ بگوھۆڕن، ئەڤە گەفە ل سەر ئێک رێزیا نشتیمانی ، من دڤێت بیرا سەرۆکێ پەرلەمانێ کوردستانێ ژی بینم، ل سەر پرۆسیسا ئێک رێزی و تەوافقێ ب ٢٤ کورسیان سەرۆکاتیا پەرلەمانێ کوردستانێ ئەو دکەت، ھەکە ئەو ل گەل تەوافقێ نەبیت و ب دەنگێ ٢٩ پەرلەمانی سیستەمێ حوکمڕانیا ھەرێمێ ب گوھۆڕیت، ئەرێ ئەو بخوە چەوا ب ٢٤ کورسیان ل سەر کورسیا سەرۆکێ پەرلەمانی روونشت.
دلشاد شەھاب کو ھەڤدەم ئەندامێ لژنا دانوستاندنا پارتی بوو بۆ پێکئینانا کابینەیا ھەشتێ یا حوکمەتا ھەرێما کوردستانێ ، ب دیتنا وی روونشتنا ٢٣ ی حوزیرانێ یا پەرلەمانێ کوردستانێ پێنگاڤەک بوو بەرۆڤاژی بانگەوازیا ھەموو ئالیان ھاتیە ھاڤێتن، و گۆت: ھەرسێ ئالیێن بەرێ یێن ئۆپۆزسیۆنێ ھەردەم دووپاتی ل سەر تەوافقێ کریە، ھەکە بیرا وان بھێت رەوانەکرنا پرۆژەکی ب شەکەستنا پارتی دبینن، د خەوانا دا ژی ئەو شەکەستنا پارتی نابینن، پارتی ژ مەفرەزەکا پارتی زانی دەستپێکریە و ئەڤرۆ حوکمڕانیێ دکەت.
ل گۆڕ دیتنا ئەندامێ سەرکردایەتیا پارتێ، پرۆژە قانوون خواندنا ئێکێ بۆ ھاتیە ئەنجامدان کو ب راستڤەکرنا دەستھەلاتێن سەرۆکاتیا ھەرێما کوردستانێ گرێدایە، تێکدانا ئێک رێزیا نشتیمانی بوویە کو ھەموو دامەزار و پۆستێن کوردان ل بەغدا ژی ل سەر وێ تەوافقێ ھاتینە بناغەکرن و دنان.
سەبارەت داخوازکرنا قونسل و نوونەرێن وەلاتان ژی بۆ پەرلەمانێ کوردستانێ د روونشتنا پەرلەمانی دا، دلشاد شەھاب گۆت: ھەکە وەکی وەلاتیەک بەرێ خوە ب دەمێ ، بەرنامێ کارێ پەرلەمانی بتنێ بۆ رادەستکرنا پرۆژە قانوون بۆ لژنەکا پەیوەندیدار بوویە، ئەز نزانم داخوازکرنا وان ھەموو خەلکی بۆ پەرلەمانی کو پرۆژە قانوونک ل سەر سەرۆکاتیا پەرلەمانی بۆ لژنەکێ بۆ چیە؟، وان بتنێ ڤیایە شاھیدان پەیدا بکەن کو بێژن، پارتی ب شێوەکی دێ رێگریا ل ڤێ پرۆسا دیموکراتی گریت، مە ژی ئەو بیرو و بووڤون ژ ناڤبرن.

ئەڤرۆ نیوز:
پارتێن رۆژھەلاتێ کوردستانێ ب داخۆیانیێن جودا جودا پشکداریا سەرکونسولێ ئیرانێ ل پەرلەمانێ کوردستانێ شەرمزار دکەن و دیار دکەن کو ئەو یەک دێ رەوشا کوردستانێ گەلەک خراب کەت، چونکو ھەر جھەکێ ئیران لێ بیت ئارامی لێ نینە و ژ بەر ھندێ ژی داخواز ژ ھەموو پارت و ئالیێن سیاسی ل ھەرێما کوردستانێ دکەن کو ل سەر بنەمایێ بەرژەوەندیێن نەتەوی کار بکەن و نەھێلن دۆژمنێ کوردستانێ یاریێ ب چارەنڤیسێ مە بکەن.
روستەم جیھانگیری ئەندامێ مەکتەبا سیاسی یا پارتی دیموکراتی کوردستان- ئیران د داخۆیانیەکێ دا بۆ رۆژناما ئەڤرۆ دیار کر کو پشکداریا سەر کونسولێ ئیرانێ ل کۆمبوونا پەرلەمانێ کوردستانێ و لسەر داخوازیا ھندەک ئالیان نیشا ددەت کو یاریەک گەلەک مەترسیدار ب چارەنڤیسێ ڤی مللەتی دھێتە کرن و گۆت: (کورد ھەموو کۆمارا ئیسلامی و ھەلویستێ وێ ل دژی خەلێ مە دزانن، چونکو کۆمارا ئیسلامی رۆژانە ب دەھان لاوێن کورد ل رۆژھەلاتێ کوردستانێ ل سێدارە ددەت و ژ بەر ھندێ ژی شەرمزاریەکا مەزنە کو ئەڤرۆکە کۆنسولێ ئیرانێ ل کۆمبوونەکا وەسا گرنگ یا پەرلەمانێ کوردستانێ دا پشکدار بیت و رێنماییان بدەتە ھندەک ئالیێن سیاسی ل کوردستانێ).
ناڤھاتی د پشکەکا دی یا ئاخڤتنا خوە دا ئەو یەک ژی دیار کر کو نھا سەرۆکێ ھەرێما کوردستانێ خەباتەکا مەزن بۆ راگەھاندنا دەولەتا کوردی دکەت و ئیران ژی وێ یەکێ باش دبینیت کو نھا دەلیڤەکا زێرین بۆ کوردان ھاتیە پێش و ژ بەر ھندێ ژی نھا ئەو ب رێیا ھندەک ھێزێن سیاسی ل کوردستانێ پیلانەکا گەلەک کرێت ل دژی بەرنامێ بارزانی برێڤە دبەن و نھا ژی ھەموو بزاڤێن ئیرانێ بۆ وێ یەکێ نە کو نەھێلن بارزانی دەولەتا کوردی راگەھینیت و یا ل پەرلەمانێ کوردستانێ ژی ھاتە کرن راستیا وێ یەکێ ب ھەموو رەنگەکێ نیشا ددەت.
ل ئالیێ دی عارف باوەجانی سکرتێرێ گشتی یێ پارتی سەربەستی کوردستان ژی راگەھاند کو دڤێت ھەموو پارت و ئالیێن سیاسی یێن کوردستانێ ھەلویستەکێ توند ل دژی ئیرانێ نیشا بدەن، یێن کو ب پشتەڤانیا ئیرانێ دخوازن یاریێ ب چارەنڤیسێ ڤی مللەتی بکەن دڤێت باش بزانن کو کورد چو دەمەکێ ژ وان نابۆرن، چونکو ئەوا نھا ل ھەرێما کوردستانێ بدەستڤە ھاتیە ژ ئەنجاما خوینا ھزاران شەھیدێن کوردستانێ یە و نابیت ھندەک ئالیێن سیاسی ژ بەر بەرژەوەندیێن خوە یێن تەنگ ئەڤرۆکە پیلانێن وەسا کرێت برێڤە ببەن کو دیارە د ئەنجاما وان پیلانان ژی دێ کورد تووشی زیانەکا مەزن بن و گۆت: (ئیران دڤێت سەرۆکێ ھەرێما کوردستانێ مەسعود بارزانی ژ سەرۆکاتیا ھەرێما کوردستانێ بھێتە دوورخستن، چونکو ئەو باش دبینن ئەڤرۆکە بارزانی بارێ مللەتەکێ دایە سەر ملێ خوە و خەباتەکا مەزن بۆ راگەھاندنا دەولەتا کوردی دکەت و ھەموو کوردەکی ب شەرەف ژی ئەڤرۆکە پشتەڤانیێ ل بارزانی دکەن).
د دووماھیا ئاخڤتنا خوە دا عارف باوەجانی ئەو یەک ژی دیار کر کو ئامادەبوونا سەرکونسولێ ئیرانێ ل کۆمبوونا پەرلەمانێ کوردستانێ سڤکاتیەکا مەزن ب خوینا شەھیدێن کوردستانێ و براستی ژی ئەو کارێ ھاتە کرن ھەستێ ھەموو کوردێن رۆژھەلاتێ کوردستانێ بریندار کر و ژ بەر ھندێ ژی ئەم وەک کوردێن رۆژھەلاتێ کوردستانێ ھیڤیدارین کو ئێدی چو کارەکی وەسا بێ بھا ل جھەکێ پیرۆز وەک پەرلەمانێ کوردستانێ نەھێتە دوبارە کرن.
ل ئالیێ دی پارتا سوسیالیست یا باکورێ کوردستانێ ژی د داخۆیانیەکێ دا راگەھاند کو ب سپۆنسەریا ئیرانێ دژایەتیا دەولەتا کوردی دھێتە کرن و یا ل پەرلەمانێ کوردستانێ ھاتیە کرن بریندارکرنا ھەستێ نەتەوی یێ ھەموو کوردەکێ بوو و ب تایبەتی ژی سڤکاتیەکا مەزن ل ھەستێ نەتەوی یێ کوردێن رۆژھەلاتێ کوردستانێ ھاتە کرن، چونکو یێ رۆژانە لاوێن کورد ل ئیران ل سێدارە ددەت چاوا دێ بچن و ل پەرلەمانێ کوردستانێ بریارێ ل سەر چارەنڤیسێ کوردان بدەن.