ئه‌ڤرۆ:

ژنەکا ب رەگەز عەرەب کو ئەڤە نەە سالە ئاکنجییا ئێک ژ کومەلگەھێن دھۆکێ برایێ وێ دناڤا رێکخراوا تیروستی یا ب ناڤێ داعش دا بوو و رۆژانە تێلەفونا وێ دکر دەنگ و باسێن کوردان ژێ داخوازدکر و وێ ژی ھند ژێ چێدکر پێزانین ھەموو ب تێر و تەسەلی بۆ وی دگۆتن، ھاتە دادگەھکرن و سالەکێ حوکم بوو.

ژنەکا ب رەگەز عەرەب کو ئەڤە نەە سالە ئاکنجییا ئێک ژ کومەلگەھێن دھۆکێ برایێ وێ دناڤا رێکخراوا تیروستی یا ب ناڤێ داعش دا بوو و رۆژانە تێلەفونا وێ دکر دەنگ و باسێن کوردان ژێ داخوازدکر و وێ ژی ھند ژێ چێدکر پێزانین ھەموو ب تێر و تەسەلی بۆ وی دگۆتن، چەندین دیدەڤان ل سەر ھەبوون ئەو ژی دەمێ وێ ب رێیا تێلەفونێ پێزانین دانە برایێ خوە ئەڤێ دناڤ داعش دا مێھڤان ھەبوون، وان مێھڤانا ئاگەداریا پولیسان کر و ھەروەسا دیدەڤانی ل سەر ڤێ ژنێ دا، ئەڤێ ژنا رەگەز عەرەب پێنج زارۆ ھەبوون و یا ب دووگیان بۆ، وێ ب خوە ژی دانپێدان ب تاوانا خوەکر.

پارێزەر ھەڤال وەھاب رەشید بۆ ئەڤرۆ دیارکر کو پشتی دادگەھێ پێرابوونێن ڤەکۆلینێ ئەنجام داین ل دووڤ مادێ چار یا قانوونا دژی تیرورێ کو ئەڤە گەفەکە ل سەر ئێمناھیا کوردستانێ ب حوکمێ سالەکێ ھاتە دادگەھکرن، گۆتژی زەلامێ ڤێ ژنێ ژی کو ئەو ژی رەگەز عەرەبە ب کێشەکا جودا کو ھەر ل سەر مادێ تیرورێ ھاتە دادگەھکرن ب حوکمێ دو سالان چونکو ئەو ژی جورە ریکلامەک بو داعشان دکر.

د ڤێ دەربارێدا چارەسەرێ دەروونی سەروەر رەزیکی دبێژیت: پەروەردەکرنا شاش ل دەمێ زارۆکینیێ کارتێکرنا خوە یا ھەی ل سەر پەیداکرنا ھزرێن تیرورێ یان یێن توند و تیژیێ ھەروەسا تێکچونێن کەسایەتی کو ئێکە ژ نەساخیێن دەروونی لنک ھندەک کەسان دیار دبیت ئانکو ئەڤ جورێ کەسایەتیێ حەز دکەت کوشتن و خوین و ئێشاندنا مرۆڤان ب چاڤێن خوە بینیت ھەردەما کوشتن و خوین رێتنێ دبینیت ھەست ب ئارامیێ دکەت و تامێ ژێ دبینیت، ھەبوونا بیرو باوەرێن شاش دناڤا سوپەر ئیکویێ واندا کو ئێکە ژ پێکھاتێن کەسایەتی وەلێ دکەت تاکە کەس بەرەڤ توند و تیژیێ ڤە بچیت، ناڤبری ھێشتا گۆت: ھندەک کەس ھەنە تووشی جورەکێ تێکچوونێن کەسایەتی دبن و خوشیێ ژ خوین رێتنێ و کوشتنێ و سەرژێکرنا مرۆڤان دبینن و ھەست ب ئارامبوونا دەروونی دکەن، ئەگەر ئەم ڤەکۆلینێ کوور د دەروونێ ڤان کەسان دا بکەین دێ دیار بیت کو ژلایێ ھزر و رەفتار و ھەستان ڤە د نورمال نینن. دبیت ئەو کەس یێ ساخلەم بیت ژلایێ دەروونیڤە بەلێ ئەگەرێن ئابووری وەلێ بکەن کو بیتە تیرورست بۆ ب دەستڤەئینانا ھندەک پارەی بەرەڤ تیروربوونێڤە بچیت.

زێدەتر گۆت: ئەگەر تو برسیار ژ ڤان کەسان بکەی کانێ بوچی وان خیانەتکر، ئێکسەر دێ بەرسڤا تە دەن و بێژن مە خیانەت نەکریە ئەڤا مە کری ھاریکاریێ ژبەر کو ئەو کەس ھەڤالێن مەنە و مە پر ژ دل حەز ژوان دکر، ھەم دبیت پارەکێ باش بۆ وان پێڤە ھاتبیت. بەلێ گەلەک یا دیارە کو ئەڤا وان کری سەرکێشا ھەموو خیانەتایە ئەگەر خیانەتا ڤان بیت ژلایێ دەروونیڤە حەزا تێکدانێ و تولڤەکرنێ ھەبیت یان ژی یان رەفتارێن وان تووشی تێکچوونێ بیت، ھەروەسا پاشەروژا زارۆیێن وان ژی یا دیار نینە، دبیت د پاشەروژێ دا زارۆیێن وان ژی بەرەڤ دزی و رەفتارێن نە شرین و کوشتنێ و تیرورێ ڤە بەت.