ئه‌ڤرۆ نيوز:
مه‌دحه‌ت سلێمان شيره‌تكارێ قانوونى يێ سه‌رۆكێ په‌رله‌مانێ كوردستانێ راگه‌هاند كو بۆ جارا ئێكێ يه سه‌رۆكێ په‌رله‌مانێ كوردستانێ حه‌ره‌مێ په‌رله‌مانێ كوردستانێ دشكێنيت و زێره‌ڤانێن ب چه‌ك دئينيته ناڤ حه‌ره‌مێ په‌رله‌مانێ كوردستانێ و ب تنێ قونسلێ ئيرانێ ژى ل په‌رله‌مانێ كوردستانێ بوو و يێن دى ب تنێ وه‌رگێرێن خوه هنارتينه هۆلا كۆمبوونێ.
ئه‌ڤرۆ نيوز:
به‌رپرسێ كارگێرى يێ مه‌كته‌با سياسى يا ئێكه‌تى نشتيمانى كوردستان راگه‌هاند كو پرۆژێ راستڤه‌كرنا قانوونا سه‌رۆكاتيا هه‌رێما كوردستانێ راوه‌ستاند و دێ هه‌ر پێنج لايه‌ن حه‌فتيا بهێت سازانێ كه‌ين.
مه‌لا به‌ختيار، به‌رپرسێ ده‌سته‌يا كارگێرى يا مه‌كته‌با سياسى يا ئێكه‌تى نشتيمانى كوردستان، د چارچۆڤێ سه‌ره‌دانا خوه دا بۆ لايێ يه‌كگرتوو ئيسلامى كوردستان كۆنگره‌كێ رۆژنامه‌ڤانى يێ هه‌ڤپشك ل گه‌ل ئه‌ميندارێ گشتيێ يه‌كگرتوو ئه‌نجام دا و تێدا راگه‌هاند كو پرۆژێ راستڤه‌كرنا قانوونا سه‌رۆكاتيا هه‌رێمێ هاته راوه‌ستاندن.
به‌رپرسێ كارگێرى يێ مه‌كته‌با سياسى يا ئێكه‌تى نشتيمانى كوردستان زێده‌تر گۆت: “ل حه‌فتيا بهێت دێ هه‌ر پێنج لايه‌نێن سياسى سازانێ كه‌ن و ل ده‌سپێكێ ژى يا سياسى و پاشان ژى يا قانوونى”.
ئه‌ڤرۆ نيوز:
ئه‌ندامێ لژنا 21 كه‌سى يا نڤيسينا دستوورێ هه‌رێما كوردستانێ راگه‌هاند كو باشتره كۆمبوونا په‌رله‌مانى ب راوه‌ستيت و ژ لايێ قانوونى و دستوورى ڤه يا خه‌له‌ته.
سيروان زه‌هاوى، ئه‌ندامێ لژنا 21 كه‌سى يا نڤيسينا دستوورێ هه‌رێما كوردستانێ، بۆ رووداو گۆت: “هيڤى دكه‌م روونشتنا په‌رله‌مانێ كوردستانێ بهێته راوه‌ستاندن نه‌يا قانوونى يه و دژى دستوورێ هه‌رێما كوردستانێ و عيراقێ يه.
گۆتژى: “ئه‌ڤ كارێ چار لايه‌نێن سياسى شكاندنا ئيرادا سياسى يا لايه‌نه‌كێ سياسى يه كو پارتى يه، د ده‌مه‌كى دا چه‌ندين جاران پارتى و ئێكه‌تى پرۆژێن گه‌له‌ك گرنگ راوه‌ستاندينه، ژ به‌ر پرسێن ئه‌خلاقى و نوكه كاره‌كێ ژ ڤى ره‌نگى دهێته كرن”.
زێده‌تر گۆتژى: “پارتى لايه‌نێن سياسى فێرى تيرهاڤێتنێ كرن، ئه‌وان تيره‌ك ل پارتى دا”، دا زانين ژى كو ئه‌ڤه كۆده‌تايه‌كا مه‌ده‌نى يا سپى يه دژى پارتى ل په‌رله‌مانى دهێته كرن.
دا زانين ژى كو نابيت ل ڤى وه‌لاتى پشتى 17ى شوباتێ كاره‌كێ ژ ڤى ره‌نگێ بێ سازان هه‌بيت، ئه‌ڤێ روونشتنێ سازان ل سه‌ر نينه و گۆت: “ئه‌ڤ روونشتنه شه‌رموزاريكرنا مه يه به‌رامبه‌ر نوونه‌رێن وه‌لاتێن جيهانێ”
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كێ په‌رله‌مانێ كوردستانێ راگه‌هاند كو ژ روويێ ئه‌خلاقى و سياسى و كوردستانى ڤه نه‌دبوو قونسلێ ئيرانێ ئاماده‌يى روونشتنا ئه‌ڤرۆ يا په‌رله‌مانێ كوردستانێ ببيت و دا زانين كو ئه‌ڤه نيه‌تا خرابا سه‌رۆكێ په‌رله‌مانى نيشا دده‌ت.
د روونشتنا ئه‌ڤرۆ يا په‌رله‌مانێ كوردستانێ دا ئه‌وا خواندنا ئێكێ بۆ پرۆژێ راستڤه‌كرنا قانوونا سه‌رۆكاتيا هه‌رێمێ هاتيه كرن، قونسلێن چه‌ند وه‌لاتێن بيانى ل هه‌رێما كوردستانێ هاتنه داخوازكرن و ب تنێ قونسلێ ئيرانێ ئاماده‌يى روونشتنا په‌رله‌مانى بوو.
ل دۆر ڤێ چه‌ندێ ڤه‌مان فه‌يسه‌ل، ئه‌ندامێ په‌رله‌مانێ كوردستانێ بۆ ئه‌ڤرۆ نيوز گۆت: “ژ لايێ كوردستانى و سياسى و ئه‌خلاقى ڤه نه‌دبوو كو د روونشته‌كا وه‌سا يا ئاسايى دا قونسلێ وه‌لاته‌كێ ب هێز يێ وه‌كو ئيرانێ بهێته گازينكرن كو ب تنێ خواندنا ئێكێ بۆ پرۆژه‌يى هاته كرن”.
زێده‌تر گۆت: “ئه‌ڤه پتر نيه‌تا خرابا يوسف محه‌مه‌د، سه‌رۆكێ په‌رله‌مانێ كوردستانێ نيشان دده‌ت كو پشته‌ڤانيكرنه بۆ وه‌لاته‌كێ خودان هێز يێ وه‌كو ئيرانێ، ژ به‌ر هندێ ژى ريسوا و ئيدانه دكه‌م”.
ئه‌ڤرۆ په‌رله‌مانێ كوردستانێ ب ئاماده‌بوونا 57 ئه‌ندامێن په‌رله‌مانى و بێ ئاماده‌بوونا په‌رله‌مانتارێن پارتى ديموكراتى كوردستان و مه‌سيحى و توركمانى، په‌رله‌مانێ كوردستانێ خواندنا ئێكێ بۆ پرۆژێ قانوونا راستڤه‌كرنا قانوونا سه‌رۆكاتيا هه‌رێما كوردستانێ كر.
ئه‌ڤرۆ نيوز، نيوار محه‌مه‌د سه‌ليم:
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو شه‌رمزاريه ل ده‌مه‌كێ هوسان قونسلێ ئيرانێ ل په‌رله‌مانێ كوردستانێ ئاماده بيت و بێى وى چو كاران نه‌كه‌ن.
ئه‌ڤرۆ په‌رله‌مانێ كوردستانێ ب ئاماده‌بوونا 57 ئه‌ندامێن په‌رله‌مانى و بێ ئاماده‌بوونا په‌رله‌مانتارێن پارتى ديموكراتى كوردستان و مه‌سيحى و توركمانى، په‌رله‌مانێ كوردستانێ خواندنا ئێكێ بۆ پرۆژێ قانوونا راستڤه‌كرنا قانوونا سه‌رۆكاتيا هه‌رێما كوردستانێ كر.
د ڤێ روونشتنا په‌رله‌مانى دا، ل سه‌ر داخوازا هنده‌ك فراكسيۆنا قونسلێن چه‌ند وه‌لاتان هاتينه داخوازكرن به‌لێ هه‌تا نڤيسينا ڤى بابه‌تى ب تنێ قونسلێ ئيرانێ پشكدارى ڤێ كۆمبوونا په‌رله‌مانێ كوردستانێ كريه.
ل دۆر ڤێ پرسێ محه‌مه‌د عه‌لى ياسين،ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ، د داخۆيانيه‌كا تايبه‌ت دا بۆ ئه‌ڤرۆ نيوز گۆت: “ئه‌ڤ پرۆژێ نوكه بۆ راستڤه‌كرنا قانوونا سه‌رۆكاتيا هه‌رێمێ هاتيه پێشكێشكرن يێ ده‌وله‌تا ئيرانێ و قونسلێ وێ يه ل كوردستانێ”.
زێده‌تر گۆت: “ب مخابنى ڤه كو كوردستان ل به‌ر ده‌رازينكا سه‌ربه‌خۆبوونێ يه، ئێكه‌تى نشتيمانى كوردستان و بزاڤا گۆڕان كار ژ بۆ سه‌رخستنا ئه‌جنيدايێن وه‌لاتێ ئيرانێ دكه‌ن، شه‌رمه‌كا گه‌له‌ك مه‌زنه ده‌ستێ وان ئيرانێ دابيت”.
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ ئاماژه ب وێ چه‌ندێ ژى كر كو ئه‌ڤا په‌رله‌مانێ كوردستانێ ئه‌ڤرۆ كرى يا دوور بوو ژ ته‌وافقا سياسى و سازانێ و ب قووناغا پشتى ته‌وافقا سياسى د زانين.
ئه‌ڤرۆ نيوز، نيوار محه‌مه‌د سه‌ليم:
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو ته‌وافقا سياسى نه‌ما و ئه‌ڤا ئه‌ڤرۆ هاتيه كرن قووناغا پشتى ته‌وافقا سياسى يه.
ئه‌ڤرۆ په‌رله‌مانێ كوردستانێ ب ئاماده‌بوونا 57 ئه‌ندامێن په‌رله‌مانى و بێ ئاماده‌بوونا په‌رله‌مانتارێن پارتى ديموكراتى كوردستان و مه‌سيحى و توركمانى، په‌رله‌مانێ كوردستانێ خواندنا ئێكێ بۆ پرۆژێ قانوونا راستڤه‌كرنا قانوونا سه‌رۆكاتيا هه‌رێما كوردستانێ كر.
محه‌مه‌د عه‌لى ياسين،ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ، د داخۆيانيه‌كا تايبه‌ت دا بۆ ئه‌ڤرۆ نيوز گۆت: “ئه‌وا ئه‌ڤرۆ ل په‌رله‌مانێ كوردستانێ چێبوويى دژى ته‌وافقا سياسى يا حوكمه‌ت و په‌رله‌مانێ كوردستانێ بوو و دژى سازانا نشتيمانى بوو”.
زێده‌تر گۆت: “پرسا سه‌رۆكاتيا هه‌رێما كوردستانێ پرسه‌كا هه‌ستيار و نشتيمانى يه و گۆت: “دڤێت بابه‌تێن ژ ڤى ره‌نگى ب سازانێ بهێنه ئه‌نجام دان”.
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ ئاماژه ب وێ چه‌ندێ ژى كر كو پارتى ديموكراتى كوردستان پشتى ڤێ چه‌ندێ دێ هه‌لويستێن دژوار هه‌بن.
ئه‌ڤرۆ نيوز:
د كۆنگره‌كێ رۆژنامه‌ڤانى دا ل به‌ر په‌رله‌مانێ كوردستانێ، فراكسيۆنا پارتى ره‌تكر كو ئه‌و توندوتيژيێ به‌رامبه‌ر كۆمبوونا ئه‌ڤرۆ بكه‌ن.
محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ بۆ رۆژنامه‌ڤانان گۆت: “ب چو ره‌نكه‌كى تێكدانێ ناكه‌ين به‌رامبه‌ر كارێ په‌رله‌مانى وه‌كو دبێژن، به‌لێ هه‌موو بزاڤان دكه‌ين كو ئه‌و كۆمبوون نه‌هێته كرن”.
راگه‌هاند ژى كو بابه‌تێ سه‌رۆكاتيا هه‌رێما ره‌هه‌نده‌كێ نشتيمانى يێ هه‌يى و نابيت ئێكلايانه‌نه سه‌ره‌ده‌رى ل گه‌ل بهێته كرن و گۆت: “په‌رله‌مان يێ مه و هه‌موو لايه‌نايه، كۆمبوونا ب وى ره‌نگى بۆ ده‌ربازكرنا وى پرۆژێ قانوونێ خزمه‌تا چو لايه‌نان ناكه‌ت”.
ئه‌ڤرۆ نيوز:
په‌رله‌مانێ كوردستانێ روونشتنا خوه يا ئاسايى ئه‌نجام دا و تێدا هه‌ر چار پارتێن گۆڕان و ئێكه‌تى و كۆمه‌ل و يه‌كگرتوو دخوازن خواندنا ئێكێ بۆ پرۆژێ قانوونا راستڤه‌كرنا سه‌رۆكاتيا هه‌رێمێ بهێته كرن.
ب گۆره‌يى ئه‌و پێزانينێن هه‌ين ژى كۆمبوونا په‌رله‌مانێ كوردستانێ ب ئاماده‌بوونا 20 قونسلێن وه‌لاتێ جيهانى ده‌سپێكر.
ب گۆره‌يى راگه‌هاندنه‌كا په‌رله‌مانێ كوردستانێ بڕياره ئه‌ڤرۆ رۆژا سێشەمبى رێكه‌فتى 23ى خزيرانا 2015ێ په‌رله‌مانێ كوردستانێ ل ده‌مژمێر 11:00 كۆم ببيت.
ل دۆر به‌رنامێ كارى ئاماژه ب وێ چه‌ندێ كريه كو دێ خواندنا ئێكێ بۆ چه‌ند پرۆژێن قانوونان هێته كرن و ژ وان ژى راستڤه‌كرنا قانوونا سه‌رۆكاتيا هه‌رێما كوردستانێ و پرۆژێ قانوونا راستڤه‌كرى يێ چارێ يێ قانوونا سه‌رۆكاتيا هه‌رێما كوردستانێ.
ديسا دێ دانوستاندنێ ل سه‌ر هه‌ردو پرۆژێن نه‌بڕينا مووچێ ئێكانه‌يان و ئێكانه‌يێن كيميا باران وئه‌نفال و جينوسايدكريان كه‌ت.
هه‌ر د وێ راگه‌هاندنێ دا ئاماژه ب وێ چه‌ندێ ژى كريه كو دێ دانوستاندنێ ل سه‌ر پرۆژێ قانوونا رێكخستن و چاندن و ڤه‌گوهاستنا ئه‌ندامێن له‌شێ مرۆڤى هێته كرن.
ئەڤرۆ نيوز:
ل گۆر گۆتنا سکرتێرێ لقێ سلێمانیێ یێ رۆژنامەڤانان حەفتیا بھێت ١٤٠ رۆژنامەڤان دێ پارچە زەڤیان وەرگرن، ل دەمەکی ئەڤە سێ سالە ناڤێن ژمارەکا رۆژنامەڤانان دەرکەفتینە و ھێشتا بسەر دا نەھاتینە بەلاڤکرن. د ڤی واری دا سکرتێرا سەندیکا رۆژنامەڤانێن کوردستانێ تایێ دھۆکێ نەرازیبوونا خوە دیار دکەت و دبێژیت “فەرق و جوداھی ھەمبەری دھۆکێ دھێتە کرن”.
کاروان ئەنوەر سکرتێرێ لقیَ سلێمانیێ یێ سەندیکا رۆژنامەڤانێن کوردستانێ بۆ خەندان دیار کربوو کو ٢٢ی حزەیرانا ٢٠١٥ ل گەل لیژنا تایبەت ب پارچە زەڤیێن رۆژنامەڤانان کۆم بوویە کو ژ جێگرێ سەرۆکێ باژارڤانیا سلێمانیێ و تاپۆیا ئێک و دو یێن سلێمانیی پێک ھاتیە و گۆت “ئەم گەھشتینە وی ئەنجامی کو دەڤەرا (قولەڕەیس)کو دکەڤیتە رۆژئاڤایێ سلێمانیێ بۆ رۆژنامەڤانان یا گونجایە و ھیچ ئاریشەک نینە”.
سکرتێرێ لقیَ سلێمانیێ یێ سەندیکا رۆژنامەڤانێن کوردستانێ خویا ژی کر ھەر ژ ئەڤرۆ ٢٣ى خزيرانا ٢٠١٥ دێ دەست ب کارێن ئیداری کەن و گۆت “ھەفتیا بھێت نێزیکی ١٤٠ رۆژنامەڤان دێ پارچە زەڤیان وەرگرن کو چەند سالە ناڤێن وان بۆ وەرگرتنا پارچە زەڤیان ھاتینە”.
ڤیان عەباس سکرتێرا سەندیکا رۆژنامەڤانێن کوردستانێ تایێ دھۆکێ دیار کر کو سەندیکا نەرازیبوونا خوە دیار دکەن، چونکی چەندین جاران بزاڤ ل گەل پارێزگارێ دھۆکێ و ل گەل سەرۆکاتیا باژارڤانیا دھۆکێ و رێڤەبەریا باژارڤانیێ کریە و گۆت “ئالیێن پەیوەندیدار سۆز داینە مە، لێ ھەتا نھا سۆزێن وان دبێ ئەنجام بووینە و دلگرانیا مە ئەوە بۆچی ل پارێزگەھەکێ دێ ھێنە بەلاڤکرن و ل دھۆکێ ناھێنە بەلاڤکرن، ئانکو فەرق و جوداھی ھەیە”.
ژ ئالیێ خوە ڤە ئەندازیار ھەڤال ئەحمەد رێڤەبەرێ گشتیێ باژارڤانیان ل دھۆکێ دیار کر کو ژ مێژەیە چ پارچە نەھاتینە بەلاڤکرن، چونکی ئەرد نینە و ئەو ئەردێ ھەی سەر ب وەزارەتا چاندنێ ڤەیە و گۆت “ئێک ژ ئاریشێن مە ئەردێ چاندنێ یە، چونکی پێدڤیە بھێتە سەر ناڤێ باژارڤانیێ”.
ئەندازیار ھەڤال ئەحمەد گۆت ژی “رێکەفتنا مە ل گەل سەندیکا رۆژنامەڤانان ئەوە ھەردەمێ پارچە ھاتنە بەلاڤکرن رۆژنامەڤان دێ ل دەستپێکا ھەمی تەخێن دی بن و بێ سرە دێ وەرگرن و ھەر ئێک ل باژێرڤانیا خوە دێ وەرگریت”.
نيشاندان