ئەڤرۆ:
ئەندامەکا لژنا قانوونی ل پەرلەمانێ کوردستانێ دیارکر کو ل حەفتیا بھێت دێ دەست ب دانوستاندنان ھێتە کرن ل دۆر پرۆژە قانوونا وەرگرتنا قەرێن نێڤدەولەتی داکو ب زووترین دەم بھێتە پەسەند کرن، گۆت ژی ھەرێمێ نوکە پێدڤی یا ب قەران ھەی.
مەدینا شەرنەخی ئەنداما لژنا قانوونی ل پەرلەمانێ کوردستانێ بۆ مالپەڕێ فەرمیێ پارتی دیموکراتی کوردستان گۆت دەمەکە پرۆژە قانوونا وەرگرتنا قەرێن نێڤدەولەتی گەھشتیە پەرلەمانی و دانوستاندنێن زۆر ل دۆر ھاتینە کرن، داکو زوو پەسەند ببیت، دیار ژی کر کو ئەڤ قەرە دێ ژ دو بانکێن مەزن یێن جیھانی ھێنە کرن، بۆ دانان ژێرخانا ئابووری یا ھەرێمێ و نەبوو دابینکرنا مووچێن فەرمانبەرانە.
مەدینا شەرنەخی گۆت ژی ئەڤ پرۆژە قانوونە ژ ١٢ مادان پێک دھێت، ل دۆر وان ھەردو بانکان ژی گۆت ھەر ئێک ژ بانکێن (گۆڵد ماکس)یا ئەمریکی و (دویجە) یا ئەلمانی نە کو دو بانێکێن مەزنێن نێڤدەولەتی نە و دێ قەر ژێ ھێنە کرن.
شانده‌كێ بلندێ حوكمه‌تا هه‌رێما كوردستانێ ب سه‌رۆكاتيا نێچيرڤان بارزانى ئه‌ڤرۆ ل ئه‌نقه‌ره دێ ل گه‌ل هه‌ر ئێك ژ ره‌جه‌ب ته‌يب ئه‌ردۆگان سه‌رۆك كۆمارێ وى وه‌لاتى و ئه‌حمه‌د داود ئۆغلۆ سه‌رۆك وه‌زيرێن وى وه‌لاتى كۆم بيت.
سامى ئه‌رگۆشى سكرتێرێ رۆژنامه‌ڤانى يێ نێچيرڤان بارزانى بۆ مالپه‌رێ فه‌رمى يێ حوكمه‌تا هه‌رێما كوردستانێ راگه‌هاند كو شاندێ ل گه‌ل نێچيرڤان بارزانى د ڤێ سه‌ره‌دانێ دا، پێكهاتينه ژ هه‌ر ئێك ژ قوباد ته‌له‌بانى، جێگرێ سه‌رۆك وه‌زيران و ئاشتى هه‌ورامى، وه‌زيرێ سامانێن سرۆشتى و رێباز حه‌ملان، وه‌زيرێ دارايى و عه‌لى سه‌ندى، وه‌زيرێ پلاندانانێ و سه‌فين دزه‌يى، ئاخفتنكه‌رێ ب ناڤێ حوكمه‌تا هه‌رێما كوردستانێ.
ئاماژه ب وێ چه‌ندێ ژى كريه كو مه‌ره‌ما سه‌ره‌دانێ به‌حسكرنه ل سه‌ر ره‌وشا نوكه و ئه‌و بابه‌تێن نوكه هه‌ردو لا گرنگيێ پێ دده‌ن، به‌لێ ب گۆره‌يى چاڤدێران دێ ئه‌نجنيدايێن كۆمبوونێ به‌حسكرن بيت ل سه‌ر بابه‌تێ هێزێ “وزێ”.
رووداو به‌لاڤكريه كو ئه‌ڤرۆ رۆژا پێنجشه‌مبى ده‌مژمێر 12:30 ده‌قيقه ب ده‌مێ هه‌ولێرێ ره‌جه‌ب ته‌يب ئه‌ردۆگان، سه‌رۆك كۆمارێ توركيا ل ئاك سه‌رايى “كۆشكا كۆمارى يا توركيا” ل ئه‌نقه‌ره دێ پێشوازيێ ل نێچيرڤان بارزانى و شاندێ ل گه‌ل دا كه‌ت.
پاشان شاندێ حوكمه‌تا هه‌رێما كوردستانێ دێ ل گه‌ل ئه‌حمه‌د داود ئۆغلۆ سه‌رۆك وه‌زيرێن وى وه‌لاتى كۆم بيت.
هه‌ر چه‌نده ئه‌ڤ سه‌ره‌دانه ل پشت سه‌ره‌دانا نێچيرڤان بارزانى بۆ به‌غدا دهێت، به‌لێ نڤيسينگه‌ها سه‌رۆك وه‌زيرێن هه‌رێما كوردستانێ راگه‌هاند، ئه‌ڤێ سه‌ره‌دانێ چو ب په‌يوه‌ندى ب سه‌ردانا به‌غدا ڤه نينه و به‌رى نوكه هاتيه رێكخستن.
ئەڤرۆ:
بریارە ئەڤرۆ و سوبەھی شەش یاری ژ گەرا دویێ یا قوناغا دویێ یا خولا ھەرێما کوردستانێ یا تەپا پێ بۆ یانێن نایاب ل یاریگەھێن جودا یێن ھەرێمێ بھێنە کرن ژ گرنگترین یاری زێرەڤانی دێ یاریا دێربی ل گەل یانا دھۆک ئەنجام دەت و زاخۆ ژی دێ ل یاریگەھا خوە مێڤانداریا سلێمانیێ کەت.
د یاریا دێربیا پارێزگەھێ ناڤبەرا سەرکێشا خولێ و ھەڤرکا وێ یا سەرەکی د خولێ دا یانا زێرەڤانی خودانا رێزا دویێ ب جوداھیا چار خالان ل یاریگەھا یا دویێ بریارە سوبەھی بھێتە کرن کو ھەردو تیم دێ یاریا مان و نەمانێ ئەنجام دەن بۆ سەرکەفتنێ تایبەت یانا دھۆک ئەوا ھەمی ھێزا خوە ل ڤی وەرزی تەرخان کری بۆ دەستڤە ئینانا ناسناڤێ خولا کوردستانێ.
ل دۆر ڤێ یاریێ یادگار یونس یاریکەرێ تیما تەپا پێ یانا دھۆک بۆ رۆژناما ئەڤرۆ دیارکر یاری ل ناڤ یاریگەھا زێرەڤانی دا ھەتا رادەیەکێ مەزن دێ یا بزەحمەت بیت ژ بەرکو باشترین تیم ل ڤی وەرزی یانا زێرەڤانی یە تایبەت ل یاریگەھا خوە کو چو تیم نەشییاینە وێ خوسارەت بکەن دیسان یاریکەرێن خودان شیان ژی ل ناڤ ڤێ تیمێ ھەنە زێدەباری راھێنەرەکێ خودان سەربور و شارەزایە لێ مە باوەری ب شیانێن خوە و یاریکەرێن خوە ھەیە دێ شێین سەرکەفتنێ د ڤێ یاریێ دا تومار کەین بۆ ڤێ یاریێ ژی یاریکەرێن مە ئوسامە محەمەد و ئەحمەد مەئمون نە د بەرھەڤ ژ ئەگەرێ ھنگافتنێ.
ژ لایێ خوە ڤە راھێنەرێ زێرەڤانی سلێمان رەمەزان ژ بەر ڤێ یاریا ھەستیار ئەو یێ بەرھەڤ نینە چو داخویانینان بۆ رۆژناما ئەڤرۆ و دەزگایێن راگەھاندنێ بدەت.
د یاریەکا دی دا نوونەرا سیێ یا پارێزگەھا دھۆکێ یانا زاخۆ ل یاریگەھا دەلال ل زاخۆ ئەو ژی دێ یاریەکا ب زەحمەت ھەمبەر یانا سلێمانیێ کەت بۆ ڤێ یاریێ یانا زاخۆ دێ ھەمی بزاڤان کەت پێخەمەت دەستڤە ئینانا خالێن تمام یێن یاریێ داکو بەردەوامیێ بدەتە ھەڤرکیا خوە ل پێشیا خولێ و ھەر ئەنجامەکێ دی ژبلی سەرکەفتنێ دێ زاخۆ دێ زاخۆ ژ ھەڤرکیا ناسناڤێ خولێ دور ئێخیت.
ژ یاریێن دی یێن ھەمان گەر تیما تەپا پێ یا نەورز دێ ل یاریگەھا خوە ل گەل یانا ھەولێر کەت دیسان پێشمەرگا ھەولێر ژی ھەمبەری کەرکوکێ کەت و شێروانە ژی ب پشتەڤانیا جەماوەرێ خوە دێ یاریێ ل گەل ئارارات ئەنجامدەت دووماھی یاریێن ڤێ گەرێ دا پێشمەرگا سلێمانیێ دێ ل گەل برایەتی یاریا خوە ئەنجام دەت.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمان دێ ب ته‌مامى ئه‌ور بيت و باران دێ باريت و هنده‌ك جاران دێ گه‌له‌ك بۆش بيت و ل هنده‌ك ده‌ڤه‌ران ژى دێ به‌فر باريت.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ فشارێن نزمێن ده‌ريا ناڤه‌راست بۆ سه‌ر هه‌رێما كوردستانێ ئه‌و پێشبينى دكه‌ن كو سوبه‌هى رێكه‌فتى 2015.2.20 ئه‌سمان دێ ب ته‌مامى ئه‌ور بيت و باران دێ باريت و هنده‌ك جاران دێ گه‌له‌ك بۆش بيت و ل هنده‌ك ده‌ڤه‌ران ژى دێ به‌فر باريت.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ دێ يا نزم بيت هه‌ڤبه‌ركى ل گه‌ل رۆژێن به‌رى نوكه ب ره‌نگه‌كى د ناڤبه‌را 13 بۆ 5 دا.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو دێ ئاراسته‌يێ وى باكوورێ رۆژئاڤا بيت ب ره‌نگه‌كى دێ يێ ل سه‌رخوه و ناڤه‌ندى بيت د ناڤبه‌را 5 بۆ 20 كلم د ده‌مژمێره‌كێ دا و ماوێ ديتنێ ژى دێ د ناڤبه‌را 10 كلم دا بيت.
ئەڤرۆ:
وەلاتێ تورکیا دیار کریە پشتی کو شاندەکێ وان 2015.2.18 سەرەدانا ھەرێمێ کری و ل گەل وەزارەتێن بارزگانی و ئابووری کۆم بووی، دیار بوویە کو ھەرێما کوردستانێ ب رێژا 80% کەلوپەلێن وەلاتێ تورکیا بکار دئینت.
محەمەد کارابایی رێڤەبەرێ گشتیێ ساخلەمی و پاراستنا خوراکی ل وەزارەتا ئابووری یا وەلاتێ تورکیا دیار کر ھەرێما کوردستانێ بۆ تورکیا پێگەھەکێ گرنگێ بازرگانی و ئابوورییە و ژبەر ھندێ ئارامی و ئێمناھیا کوردستانێ بۆ مە وەکو یا گرنگە و بۆ ئەڤرۆ گۆت “ئەو بەرھەمێن ئەم رەوانەی ھەرێمێ دکەین، ل ناڤخۆیا تورکیا ژی ب ھەمان جۆر و کەوالێتی ل تورکیا ژی بکار دئینین”.
ژلایێ خوە ڤە ڤەمان فەیسەل جێگرێ لیژنا بازرگانی و پاراستنا مافێ ب کاربەری ل پەرلەمانێ کوردستانێ کو ل سەر داخوازا حوکمەتا ئەنقەرە ب رێکا کونسولخانە و وەزارەتا دەرڤەیا تورکیا ل تورکیا پشکداریێ د کۆنفرانسەکێ بازرگانی و ئابووری دا کریە ل ئەنقەرە بۆ رۆژناما ئەڤرۆ گۆت “بژڤانین ھندەک پێشنیاران ل پەرلەمانی بکەینە پرۆژە قانوون کو د بەرژەوەندا بکاربەرێ ھەرێمێ دا بین”.
محەمەد کارابایی دیار ژی کر پێشڤەچوونا وەلاتێ تورکیا ژ ئەنجامێ پێشڤەچوونا وان قانوونێن چاڤدێریا دروستکرنا کەلوپەلان دەرکەفتیە و گۆت “ئەم پێگیریێ دکەین کو بەرھەمێن ئەم رەوانەی ھەرێمێ و جیھانێ دکەین ھەمان جۆر کەوالێتیا دەینە خەلکێ تورکیا و مە دڤێت وێ رەوشەنبێریێ دروست بکەین، کو کەلوپەلێن تورکیا کێماسی د دروستکرنا وان دا نینن”.
ڤەمان فەیسەل گۆت ژی”ژبەر گرنگیا پێگەە و سنوورێ جۆگرافیێ تورکیا پێدڤیە ھەماھەنگیێ د ناڤبەرا ھەردو وەلاتان دا دروست بکەین”.
ئەڤرۆ:
بڕیارە ل دەستپێکا حەفتییا بھێت ساخلەمییا پارێزگەھا دھۆکێ ھەوەکا بەرفرەھا ڤاکسیندانێ ل دژی نەخۆشیێن سۆرکا و فالنجا زارۆیان ل سەرانسەری پارێزگەھێ ئەنجام بدەت.
د. سیروان محەمەد ئەسوەد رێڤەبەرێ کاروبارێن خوپاراستنا ساخلەمیێ ل پارێزگەھا دھۆکێ راگەھاند ئەڤ ھەوە دێ ل ٢٢ ڤێ ھەیڤێ دەست پێکەت بۆ ماوێ ١٥ رۆژان یا بەردەوام بیت، کو ھەموو زارۆیێن ئێک رۆژی ھەتا پێنج سالی ھێنە ڤاکسین دان، ھەروەسا ڤاکسینێ سۆرکا ژی زارۆیێن نەە ھەیڤی ھەتا پێنج سالێ دێ وەرگرن.
ئەو ژی دا زانین کو ٢٥٤ ھزار زارۆ دێ ڤاکسینێ دژی فالنجا زارۆیان و ٢١٦ ھزار ژی دێ ڤاکسینێ دژی نەخۆشییا سۆرکا وەرگرن، دۆرێن ٧٠ ھزاران زارۆیێن ئاوارانە، ٦٠٠ تیم دێ ل مالان گەرن.
نيشاندان